अस्ट्रेलियामा शिक्षकको चरम अभाव- विश्व - कान्तिपुर समाचार
कान्तिपुर वेबसाईट
AdvertisementAdvertisement

अस्ट्रेलियामा शिक्षकको चरम अभाव

तत्काल २ हजार शिक्षक आवश्यक
नयाँलाई आकर्षित गर्न थपियो सुविधा
नारायण खड्का

अस्ट्रेलिया — अस्ट्रेलियाका विद्यालयमा शिक्षकको चर्को अभाव देखिएको छ । अभाव पूरा गर्न विभिन्न राज्य सरकारले आर्थिकलगायतका सुविधा घोषणा गरे पनि समस्या समाधान हुन सकेको छैन ।

खासगरी दुर्गम क्षेत्रका विद्यालयमा शिक्षकको चरम अभाव देखिएको जनाइएको छ ।

न्यु साउथ वेल्स, भिक्टोरिया, दक्षिण अस्ट्रेलियालगायतका राज्य सरकारले शिक्षकलाई आकर्षित गर्न हजारौं डलरका साथै अन्य विविध सुविधाको घोषणा गरेका छन् ।

दुर्गम क्षेत्रमा रहेका शिक्षक अभावलाई अन्त्य गर्नका लागि सरकारले हरेक वर्ष पाउने तलबबाहेक वार्षिक रूपमा हजारौं डलर सुविधा, सहुलियत रूपमा बस्ने आवासको व्यवस्था, दुर्गम क्षेत्रमा जान आउनका लागि निःशुल्क सेवा दिने घोषणा गरेका हुन् । तर समस्या भने अझै उस्तै छ । स्थानीय सञ्चारमाध्यमका अनुसार अस्ट्रेलियामा तत्कालका लागि २ हजार बढी शिक्षकको अभाव छ ।

शिक्षक अभावकै कारण केही दुर्गम क्षेत्रका विद्यालय नियमित सञ्चालन गर्न नसकिने अवस्था सिर्जना भएको समाचारहरूमा जनाइएको छ ।

शिक्षकलाई दुर्गम क्षेत्रमा आकर्षित गर्ने उद्देश्यले भिक्टोरिया राज्यले करिब ४२ मिलियन डलरको सहयोग कार्यक्रम घोषणा गरेको छ । जसमा हरेक वर्ष ९ हजार अतिरिक्त सुविधा दिने र दुर्गम क्षेत्रमा जान लाग्ने सम्पूर्ण खर्च सरकारले नै व्यवस्था गरिदिनेलगायतका सुविधा छन् । त्यस्तै, न्यु साउथ वेल्स राज्यले २० देखि ३० हजार डलरसम्म सहयोग दिने घोषणा गरेको छ । १० वर्षसम्म दुर्गम क्षेत्रमै रहेर काम गर्ने शिक्षकलाई वार्षिक थप ५ हजार डलर दिने न्यु साउथ वेल्स सरकारले जनाएको छ ।

दक्षिण अस्ट्रेलिया सरकारले पनि दुर्गम क्षेत्रमा शिक्षक पठाउन २० हजार डलरका दरले सहयोग घोषणा गरेको छ । जसमा हरेक वर्ष दुर्गममा पढाउने शिक्षकलाई १० हजारका दरले थप सहयोग दिइने जनाइएको छ ।

शिक्षक अभावका कारण दुर्गम क्षेत्रमा गम्भीर असर परिरहेको भन्दै मानसिक रोग परामर्शदाताले सरकारलाई सचेत गराएका छन् । अस्ट्रेलियाका करिब १० हजार विद्यालयमा ४० लाख विद्यार्थी अध्ययनरत छन् । देशभर कार्यरत ३ लाख ४ हजार शिक्षकमध्ये प्राथमिक तहमा १ लाख ५६ हजार र माध्यमिक तहमा १ लाख ४८ हजार छन् । अस्ट्रेलियामा शिक्षकले वार्षिक करिब ७० हजार डलर तलब पाउने गरेका छन् । शिक्षक हुनका लागि सम्बन्धित क्षेत्रमा अध्ययन गरेको हुनुपर्ने प्रावधान छ ।

तथ्यांकअनुसार अस्ट्रेलियामा हाल प्रविधि, कला, स्वास्थ्य र शारीरिक शिक्षा विषयमा शिक्षकको चरम अभाव छ । अंग्रेजी, विज्ञान तथा गणितका शिक्षकको समेत केही क्षेत्रमा अभाव देखिएको जनाइएको छ । न्यु साउथ वेल्स शिक्षक महासंघका अध्यक्ष एन्जेलो ग्याभ्रिल्याटोसले न्यु साउथ वेल्स राज्यमा मात्र तत्काल एक हजार शिक्षकको पद रिक्त रहेको र करिब १५ प्रतिशत शिक्षकले आफ्नो क्षेत्रभन्दा बाहिरको विषयमा अध्यापन गराइरहेको बताएका छन् ।

पछिल्लो समयमा कोरोनाका कारण शिक्षकको समस्या चर्किएको दक्षिण अस्ट्रेलियामा एक दशकदेखि कार्यरत शिक्षक कपिल पाण्डे बताउँछन् । ‘एकातिर कोरोना भएपछि विद्यालय आउन मिल्दैन, अर्कोतिर रिलिभ टिचर (सट्टामा आउने अर्को शिक्षक) पाउन गाह्रो भएकाले समेत समस्या थपिएको हो,’ पाण्डेले भने । कतिपय दुर्गम क्षेत्रमा शिक्षक अभावका कारण दुईटा कक्षालाई मर्ज गरेर एकै शिक्षकले पढाउनुपर्ने बाध्यता रहेको उनको भनाइ छ ।

यसैबीच, जनसंख्याको हिसाबले सबैभन्दा ठूलो न्यु साउथ वेल्स राज्यका शिक्षकले गत बिहीबार सिड्नीमा विरोध प्रदर्शन गरेका छन् । सरकारी तथा क्याथोलिक विद्यालयका हजारौं शिक्षकले सरकारले हालै घोषणा गरेको ३ प्रतिशत तलब वृद्धिको चर्को विरोध जनाएका हुन् । आफ्नो हकहितको माग गर्दै गएको ७ महिनामा शिक्षकले गरेको यो तेस्रो आन्दोलन हो । शिक्षण पेसा तनावपूर्ण रहेको भन्दै सरकारी निकायको ध्यानाकर्षण गराएका शिक्षकले आफूहरू थकित भएको जनाएका हुन् । सरकारले शिक्षकलाई आकर्षित गर्न अझै राम्रा योजना नल्याएसम्म शिक्षक अभावको समस्या समाधान नहुने उनीहरूको भनाइ छ ।

प्रकाशित : असार २०, २०७९ ०९:२८
प्रतिक्रिया
पठाउनुहोस्

बदलिँदै छ अस्ट्रेलिया

अस्ट्रेलिया बहुसांस्कृतिक मुलुक बन्दै, कुनै धर्म नमान्ने जनसंख्या ४० प्रतिशत, हिन्दु र इस्लाम धर्म मान्नेको संख्या बढ्दै
नारायण खड्का

अस्ट्रेलिया — अस्ट्रेलियाले ५ वर्षपछि मंगलबार राष्ट्रिय जनगणनाको नतिजा सार्वजनिक गर्‍यो । जनगणनामार्फत अस्ट्रेलियाले आफ्नो देशको जनसंख्या करिब २ करोड ६० लाख रहेको तथ्यांक मात्र दिएन कि परम्परागत शैली बदल्दै गएको विवरणसमेत सार्वजनिक गर्‍यो ।

अस्ट्रेलियाले सफल बहुसांस्कृतिक राष्ट्रका रूपमा विकसित हुँदै गएको आफ्नो परिचयलाई मंगलबार निकालेको जनगणनाको विवरणपछि पुष्टि गर्‍यो । त्यसका साथै कोरोना भाइरसको संक्रमणपछि पनि आर्थिक क्षेत्रमा पाएको सफलता, सामान्य कामदारको औसत साताको आम्दानी, झन्डै ४० प्रतिशत जनता नास्तिक रहनु, २ सय ५० बढी वंशज तथा पुर्खाको सूचनालाई समावेश गरिनु र ३ सय ५० भाषालाई जनगणनामा समेटेर अस्ट्रेलियाले विविधताको परिचय दिएको हो ।

धर्मप्रति आस्था राख्ने कम हुनु, आदिवासीको संख्यामा वृद्धि हुनु, विविधता थपिनुलगायत विषयका अस्ट्रेलिया परिवर्तन हुँदै गएको देखिएको बीबीसीले जनाएको छ । त्यसबाहेक पनि धेरै कुराले अस्ट्रेलियालाई अन्य विभिन्न मुलुकका तुलनामा पृथक बनाएको छ । कुनै पनि धर्मविशेषलाई प्राथमिकता नदिने भए पनि क्रिस्चियन धर्म अपनाउने कम हुँदै गएका छन् भने हिन्दु तथा इस्लाम धर्म मान्ने जनसंख्या बढ्दै गएको छ । अझ रोचक त अस्ट्रेलियाका ४० प्रतिशत जनताले जनगणनामा कुनै पनि धर्म नमान्ने बताएका छन् ।

करिब १ सय २१ वर्षअघि मात्र संघीय राज्यका रूपमा उदाएको अस्ट्रेलियामा मुख्यतः आप्रवासी नै बसोबास गर्दै आएका छन् । विशेषगरी गोरो छालाका नागरिकको बाहुल्य रहेको भए पनि आगामी वर्षहरूमा त्यो कमजोर हुने देखिएको छ । यस वर्षको मतगणना हेर्ने हो भने यहाँ रहेका आधा अभिभावक विदेशमा जन्मिएका छन् भने एक चौथाइभन्दा बढी जनसंख्या विदेशमा जन्मिएका छन् । अस्ट्रेलियामा आप्रवासीले आफ्नो संख्या बढाउनु मात्र हैन कि त्यससँगै आफ्नो भाषा तथा धर्मलाई समेत सँगसँगै प्रभावकारी रूपमा अघि बढाइरहेका छन् । तथ्यांक हेर्ने हो भने पनि चीनको मुख्य भाषा मन्डारिन अंग्रेजीपछिको दोस्रो भाषा बनेको छ भने झन्डै ३ लाख ७० हजार अरबिक भाषी बसोबास गर्छन् भने २ लाख ४० हजारले पन्जाबी बोल्ने गरेका छन् । कोरोना भाइरसका कारण झन्डै दुई वर्ष आफ्नो अन्तर्राष्ट्रिय सीमा बन्द गरेको भए पनि अस्ट्रेलियालाई १० लाख बढीले आफ्नो घरका रूपमा स्विकारे । अस्ट्रेलियाको औसत हरेक साताको आम्दानी १७ सय ४८ डलर (करिब १ लाख ४५ हजार रुपैयाँ) छ । जसमा पनि पुरुषले २ हजार २५ डलर र महिलाले १८ सय डलर कमाउँछन् । यसले अस्ट्रेलियामा अहिले पनि तलबमा लैंगिक विभेद भने अहिले पनि कायम रहेको देखाएको छ । कोरोनाका कारण अर्थतन्त्रमा नराम्रो असर परेको भए पनि बेरोजगार दर दशकौंको कम अर्थात् ३.९ प्रतिशतमा अस्ट्रेलियाले कायम राख्यो ।

अत्यन्तै राम्रो स्वास्थ्य संरचना र सुविधा भए पनि यहाँका ८० लाख बढी जनता दीर्घरोगका कारण पीडित छन् जसमध्ये करिब २२ लाख जनता मानसिक रोगका कारण पीडित छन् । अर्कोतिर अस्ट्रेलियाले आदिवासीलाई अत्यन्तै महत्त्व मात्र दिने गरेको छैन कि सेवा तथा सुविधासमेत तुलनात्मक रूपमा अलि बढी दिने गरेको छ । यस पटकको जनगणनामा ५ वर्षअघिको भन्दा २५ प्रतिशतले आदिवासीको जनसंख्या बढेको तथ्यांक छ । करिब १६ प्रतिशत अस्ट्रेलियाली जनता एकल परिवारका रूपमा बस्ने गरेका छन्, जुन संख्या करिब १० लाख ७० हजार हो । विश्वमै घर खरिद गर्नका लागि कठिन देश बन्दै गए पनि ६६ प्रतिशतले आफ्नै घरमा बस्छन् तर पनि घर सम्पूर्ण रूपमा खरिद गर्ने नागरिक भने जम्मा ३० प्रतिशत मात्र रहेका छन् । अस्ट्रेलियाको तथ्यांक विभागका सहायक तथ्यांकविद् थेरेसा डिकिन्सनले हालै सार्वजनिक तथ्यांक महत्त्वपूर्ण भएको बताएकी छन् ।

अस्ट्रेलिया विकसित मुलुक मात्र नभएर विश्वकै सफल बहुसांस्कृतिक देशका रूपमा चिनिन्छ । यहाँको राज्य तथा केन्द्र सरकारले विभिन्न धर्म तथा कलासंस्कृतिका समुदायले गर्ने कार्यक्रमलाई सहयोगसमेत गर्ने गरेको छ । ५ वर्ष लगाएर तयार गरिएको र गत मंगलबार सार्वजनिक जनगणनाले अस्ट्रेलियाले आप्रवासी, उनीहरूको कलासंस्कृति, भाषा, धर्मले बहुसांस्कृतिक पहिचानलाई अझ बढाउने मात्र नभएर त्यस्ता परिवर्तनले देश विकास हुने प्रमाणसमेत दिएको छ ।

*यसअघि प्रकाशित जनसंख्याको तथ्यांक त्रुटि भएकोमा क्षमयाचनासहित सच्याइएको छ ।- सम्पादक

प्रकाशित : असार १६, २०७९ ०७:२६
पूरा पढ्नुहोस्
प्रतिक्रिया
पठाउनुहोस्
x
×