युक्रेनको सपिङ सेन्टरमा रुसद्वारा मिसाइल आक्रमण
काठमाडौँ — रुसले युक्रेनको क्रेमेन्चुक सहरस्थित एक व्यस्त सपिङ सेन्टरमा मिसाइल आक्रमण गर्दा कम्तीमा दुई जना मारिएका छन् । साथै २० जना घाइते भएको युक्रेनी वरिष्ठ अधिकारीहरूले जनाएका छन् ।
आक्रमणपछि घटनास्थलमा आगो लागिरहेको तथा क्षतविक्षत अवस्थाको तस्बिर सामाजिक सञ्जालमा व्यापक रुपमा सेयर गरिएको छ । सार्वजनिक भएको भिडियोमा धुवाँको मुस्लो उडिरहेको देखिएको छ ।
युक्रेनी राष्ट्रपति भोलोदोमिर जेलेन्स्कीका अनुसार उक्त सपिङ सेन्टरभित्र १ हजारभन्दा धेरै मानिस रहेका थिए । जेलेन्स्कीले यसबारे जानकारी दिएका छन् । साथै मृत्यु हुनेको वास्तविक विवरण पनि यकिन नभएको बताइएको छ। जेलेन्स्कीले भने उक्त घटनामा मृत्यु हुनेको संख्या कल्पना गर्न नसकिने जनाएका छन् ।
घटनास्थलमा अहिले ठूलो संख्यामा उद्धारकर्मीहरू खटिएका छन् । क्रेमेन्चुक युक्रेनको सबैभन्दा ठूलो तेल प्रशोधन क्षेत्र रहेको सहर मानिन्छ । जुन डिनिप्रो नदीको किनारमा अवस्थित छ।
प्रकाशित : असार १३, २०७९ २१:४४