अफगानिस्तानमा गएको भूकम्पमा परी २५० को मृत्यु- विश्व - कान्तिपुर समाचार
कान्तिपुर वेबसाईट
AdvertisementAdvertisement

अफगानिस्तानमा गएको भूकम्पमा परी २५० को मृत्यु

कान्तिपुर संवाददाता

काठमाडौँ — अफगानिस्तानमा मंगलबार राति गएको भूकम्पमा परी कम्तीमा २ सय ५० जनाको मृत्यु भएको छ । मंगलबार राति गएको भूकम्पमा परी कम्तीमा २ सय ५० जनाको मृत्यु भएको र सयौंको संख्यामा मानिसहरू घाइते भएको स्थानीय प्रशासनलाई उद्धृत गर्दै बीबीसीले उल्लेख गरेको छ ।

अफगानिस्तानको दक्षिण-पूर्वी शहर खोस्टभन्दा ४४ किलोमिटरको दूरीमा रहेको स्थानलाई केन्द्र बनाएर ६.१ म्याग्निच्युड स्केलको भूकम्प गएको बीबीसीले लेखेको छ ।

भूकम्पको धक्का अफगानिस्तानको राजधानी काबुल र छिमेकी देश पाकिस्तानमा समेत महसुस गरिएको युरोपियन मेडिटेरिनियन सिस्मोलोजिकल सेन्टरलाई उद्धृत गर्दै अन्तर्राष्ट्रिय समाचार संस्था रोयटर्सले बताएको छ ।

भूकम्पबाट सबैभन्दा धेरै क्षति अफगानिस्तानको पक्तिका प्रान्तमा भएको छ । ‘दुर्भाग्यवश ! गएराति गएको भूकम्पमा परी पक्तिका प्रान्तका चार जिल्लाका सयौं मानिसहरू घाइते भएका छन् भने दर्जनौं घरहरू ढलेका छन्‚’ सरकारका प्रवक्ता बिलाल कारिमीले ट्विटरमा लेखेका छन् ।

उनले सम्बन्धित निकायलाई आपत्कालीन उद्धारका लागि तुरुन्त उक्त क्षेत्रमा जानका लागि निर्देशनसमेत दिएका छन् ।

प्रकाशित : असार ८, २०७९ १२:१९
प्रतिक्रिया
पठाउनुहोस्

बुद्ध एयरले क्षमा माग्दै भन्यो- आगामी दिनमा उडान नै रोक्ने निर्णयमा संलग्न हुन्नौं

कान्तिपुर संवाददाता

काठमाडौँ — बुद्ध एयरले आफ्नो छाता संगठन ‘वायुसेवा सञ्चालक संघ’ ले बुधबारका लागि घोषणा गरेको हवाई सेवा अनिश्चितकालका लागि बन्द गर्ने निर्णयप्रति क्षमा माग्दै आगामी दिनमा उडान नै रोक्ने निर्णयमा सहभागी नहुने बताएको छ ।


बुधबार सामाजिक सञ्जालमार्फत अत्यावश्यक सेवाअन्तर्गतको उडान बन्द गर्ने निर्णय यथोचित नभएको जनाउँदै बुद्ध एयरले लेखेको छ, ‘वायुसेवा कम्पनी, यात्रुहरूको पारवहन सुविधा र कर्मचारीहरूको जीविकोपार्जनको थलो हो । हाम्रो आन्तरिक समस्या समाधान गर्नका लागि सेवालाई बन्द गर्नु यथोचित निर्णय होइन ।’

आन्तरिक उडानमा दुईवटा अमेरिकी बिचक्राफ्ट र १४ वटा युरोपियन एटीआर विमान गरी १६ वटा जहाज उडाउँदै आइरहेको बुद्धले मंगबलार संघसँग ऐक्यबद्धता जनाउँदै उडान बन्द गर्ने निर्णयमा साथ दिएकोमा आत्मालोचना गर्दै आगामी दिनमा उडान नै रोक्ने निर्णयमा सहभागी नहुने जनाएको छ । ‘आत्मआलोचना गर्दै आगामी दिनमा हाम्रो कारणले उडान सेवा अवरुद्ध नहुने प्रण गर्दछौं,’ बुद्धले भनेको छ ।

काठमाडौंबाट दैनिक ३ सय हाराहारीमा आन्तरिक उडान हुने गरेको छ । त्यसमध्ये बुद्धले मात्रै दैनिक १ सय ४० वटासम्म उडान गर्छ । बुद्धले हाल काठमाडौंस्थित त्रिभुवन अन्तर्राष्ट्रिय विमानस्थलको आन्तरिक पार्किङतर्फ रातिको समयमा क्षमताभन्दा बढी जहाजहरू रहेको जनाउँदै यो सुरक्षाको दृष्टिकोणले जोखिमपूर्ण हुने उल्लेख गरेको छ ।

धेरै अगाडिको अध्ययनले पार्किङ क्षेत्रमा १७ वटा जहाजहरूको क्षमता रहेको देखाइएको र यसै कारणले नागरिक उड्डयन प्राधिकरणले आन्तरिक वायु सेवाहरूलाई त्यसभन्दा बढी जहाजहरू काठमाडौं बाहिर रात्रि बिसान गर्न निर्देशन दिएको उसले जनाएको छ ।

‘आजको परिस्थितिमा त्यस पार्किङ थलोमा सुधार भएको छ र अहिले १७ वटा जहाजहरूभन्दा बढी रात्रि बिसान हुने अवस्था छ । प्राधिकरणले सोहीअनुरुप काठमाडौंमा रात्रि बिसान हुने जहाजहरूको संख्या बढाउने आश्वासन प्राप्त भएको छ; यसले नेपाली यात्रुहरूलाई उल्लेख्य सुविधा पुग्ने र सबै क्षेत्रलाई आर्थिक लाभ प्राप्त हुने छ,’ बुद्धले भनेको छ ।

यसैबीच बुधबार बिहान ७ बजेर ११ मिनेटबाट आन्तरिक विमानस्थलबाट उडान भएको विमनस्थल प्रमुख पूर्ण चुडालले बताए । उनका अनुसार बुधबार दिनभरका लागि ८८ वटा उडानको तालिका स्वीकृत भएको छ । ‘आज बिहानैदेखि उडान सुरु भएका छन् । वायुसेवाहरूले यात्रुको मागअनुसार उडान तालिका मागे अनुमति दिने छौं,’ उनले भने, ‘आन्तरिक उडानमा रहेका सबै वायुसेवाहरूले धमाधम उडान गरिरहेका छन् ।’

प्रकाशित : असार ८, २०७९ ११:५८
पूरा पढ्नुहोस्
प्रतिक्रिया
पठाउनुहोस्
×