राष्ट्रिय सभा निर्वाचनमा फ्रान्सेली राष्ट्रपतिलाई धक्का, ईयू नेतृत्वमा प्रभाव पर्ने
पेरिस — आइतबार भएको निर्वाचनमा फ्रान्सको तल्लो सदन राष्ट्रिय सभामा राष्ट्रपति इमानुएल म्याक्रोंले आफ्नो पूर्ण बहुमत गुमाएपछि सरकार सञ्चालनमा असहज हुने भएको छ ।
मतदाताहरूले ५ सय ७७ सिट भएको फ्रान्सको राष्ट्रिय सभामा राष्ट्रपति म्याक्रोंलाई पूर्ण बहुमत नदिएपछि सरकार सञ्चालनका लागि आफ्ना नीतिहरू लागू गर्न कठिन हुने देखिएको हो । यो निर्वाचनमा आफ्नो पार्टीले पूर्ण बहुमत ल्याउन नसकेपछि युरोपेली युनियनको नेतृत्व गरिरहेका म्याक्रोंलाई ईयूमा आफ्ना नीतिहरू लागू गराउनसमेत कठिन हुने तर्क राजनीतिक विश्लेषकहरूले गरिरहेका छन् ।
‘पोलस्टर इप्सोस-सोप्रा स्टेरिया’को पछिल्लो प्रक्षेपणअनुसार म्याक्रोंको सेन्टर राइट गठबन्धनले २ सय ३४ सिट, प्यान-वामपन्थी नुपेस गठबन्धनले १ सय ४१, अति-दक्षिणपन्थी नेसनल र्यालीले ९० सिट र रूढिवादी द रिपब्लिनस र यसका सहयोगीहरूले ७५ सिट जित्ने दाबी गरेको छ ।
राष्ट्रपति म्याक्रोंका सहयोगीहरूले आफ्नो दोस्रो कार्यकाल बचाउनका लागि संसदीय बहुमतलाई एकजुट गर्न सोमबारबाट आफूहरूले काम थालेको बताएका छन् । अहिले वामन्थीहरूको गठबन्धनले विधायिकाको सबैभन्दा ठूलो विपक्षी गुटको हैसियत बनाएका छन् ।
म्याक्रोंको एन्सेम्बल (टुगेदर) गठबन्धन संसदीय चुनावमा सबैभन्दा ठूलो दलको रूपमा देखा त पर्यो तर गत पाँच वर्षदेखि प्राप्त गरेको संसदीय बहुमतलाई कायम राख्न उक्त गठबन्धनलाई गाह्रो परिरहेको छ ।
म्याक्रोंको पार्टीले हालको निर्वाचनमा आफ्नो वर्चस्व कायम गर्न नसकेपछि दक्षिणपन्थी र वाम पार्टीहरूसँग सम्झौता गरेर बहुमत खोज्ने प्रयास सुरु गर्नुपर्ने देखिएको छ ।
युक्रेनमाथि रुसको आक्रमणलाई अन्त्य गर्न र ईयूमा प्रमुख राजनेताको रूपमा देखिन चाहिरहेका ४४ वर्षीय म्याक्रोंले अब घरेलु समस्याबाट विचलित हुने जोखिम पनि उठाएका छन् ।
प्रकाशित : असार ६, २०७९ १५:४०
