परमाणु अस्त्र परीक्षण तयारीमा किम- विश्व - कान्तिपुर समाचार
कान्तिपुर वेबसाईट
AdvertisementAdvertisement

परमाणु अस्त्र परीक्षण तयारीमा किम

एजेन्सी

सोल — उत्तर कोरियाले जुनसुकै बेला आफ्नो सातौं परमाणु अस्त्र परीक्षण गर्न सक्ने एक अमेरिकी उच्च अधिकारीले चेतावनी दिएका छन् । प्योङयाङले आइतबार एकै दिन सबैभन्दा बढी आठवटा बलिस्टिक क्षेप्यास्त्र परीक्षण गरेपछि उत्तर कोरियाका लागि अमेरिकी विशेष प्रतिनिधि सुङ किमले परमाणु अस्त्र प्रहार गर्न सक्ने चेतावनी दिएको बीबीसीले जनाएको छ ।

फाइल तस्बिर : केसीएनए/रोयटर्स

त्यसको प्रतिक्रियामा अमेरिकी उपविदेशमन्त्री वेन्डी शेर्मनले उत्तर कोरियाले जस्तोसुकै परमाणु परीक्षण गरे पनि त्यसको ‘चर्को र बलियो प्रतिक्रिया’ जनाउने चेतावनी दिएकी छन् । उत्तर कोरियाले ५ वर्षयता कुनै पनि परमाणु अस्त्र परीक्षण नगरेको भए पनि कोरियाली द्वीपमा तनाव मत्थर भएको छैन । उत्तर कोरियाली नेता उत्तर कोरियाली नेता किम जोङ–उनले पछिल्लो समय परमाणु तथा क्षेप्यास्त्र कार्यक्रमलाई तीव्रता दिने बताउँदै आएका छन् ।

इन्डोनेसियाको जाकर्तामा बोल्दै अमेरिकी विशेष प्रतिनिधि किमले उत्तर कोरियाले यो वर्ष अभूतपूर्व संख्यामा क्षेप्यास्त्र परीक्षण गरेको बताएका छन् । गत जनवरीमा हाइपरसोनिक क्षेप्यास्त्र परीक्षणको दाबी गरेको उत्तर कोरियाले यो वर्ष ३१ वटा क्षेप्यास्त्र प्रहार गरिसकेको छ । यसअघि उसले सन् २०१९ मा वर्षभरिमा २५ वटा क्षेप्यास्त्र प्रहार गरेको थियो ।

‘अहिले बल्ल जुन महिना चलिरहेको छ,’ पत्रकारहरूसँग किमले भने । उत्तर कोरिया रणनीतिक तथा सानो आकारका परमाणु अस्त्रको परीक्षणका लागि बढी इच्छुक देखिएको किमको बुझाइ छ । उत्तर कोरियाले अर्को परमाणु अस्त्र कहिले प्रहार गर्ला ? भन्ने प्रश्नको जवाफमा किमले भनेका छन्, ‘जुनसुकै बेला । चाँडोमा यही साता ।’

दक्षिण कोरियाली राजधानी सोलमा बोल्दै शेर्मनले उत्तर कोरियाद्वारा हुने त्यस्तो परीक्षण संयुक्त राष्ट्रसंघीय संकल्प प्रस्तावको प्रतिकूल हुने बताएकी छन् । ‘दक्षिण कोरिया, अमेरिका र जापान मात्र होइन । मलाई लाग्छ, पूरै विश्वले बलियो र स्पष्ट रूपमा प्रतिक्रिया दिन्छ,’ दक्षिण कोरियाली र जापानी अधिकारीसँग भेटका लागि सोल पुगेकी शेर्मनले भनिन् । प्योङयाङले गरेका परीक्षणको जवाफी कदमस्वरूप अमेरिका र दक्षिण कोरियाले सोमबार ८ वटा क्षेप्यास्त्र प्रहार गरेका थिए । पछिल्लो समय क्षेप्यास्त्र प्रहारको होड चलिरहेको भए पनि अमेरिका उत्तर कोरियासँग बिनासर्त कूटनीतिक वार्ता गर्न तयार रहेको किमको भनाइ छ । उत्तर कोरियामा कोरोना महामारी फैलिएपछि अमेरिकाले मानवीय सहायताका लागि प्रस्ताव गरेको समेत उनको भनाइ छ ।

उत्तर कोरियाले गत मार्च अन्त्यमा अन्तरमहादेशीय बलिस्टिक क्षेप्यास्त्र (आईसीबीएम) परीक्षण गरेको थियो । जुन सन् २०१७ यताकै पहिलो आईसीबीएम परिक्षण हो । हजारौं किलोमिटर टाढासम्म मार हान्न सक्ने आईसीबीएम क्षेप्यास्त्र सैद्धान्तिक रूपमा अमेरिकी भूमिसम्म पुग्छ ।

संयुक्त राष्ट्रसंघले उत्तर कोरियामाथि बलिस्टिक क्षेप्यास्त्र तथा परमाणु अस्त्र परीक्षणमा प्रतिबन्ध लगाएको छ । नेता किमले तत्कालीन अमेरिकी राष्ट्रपति डोनाल्ड ट्रम्पबीच ४ वर्षअघि भएको वार्तापछि उत्तर कोरियाले लामो दूरीका क्षेप्यास्त्र परीक्षणमाथि अस्थायी रोक लगाएको थियो । तर सन् २०२० मा किमले उक्त प्रतिबद्धता मान्न आफू बाध्यकारी नभएको बताएका थिए । उत्तर कोरियाले सन् २०१७ मा परीक्षण गरेको ह्वासोङ–१२ आईसीबीएम क्षेप्यास्त्र ४ हजार ५ सय किलोमिटरको उचाइसम्म पुगेको थियो । ह्वासोङ–१४ भने ८ हजार किलोमिटर उचाइमा पुगेको थियो । यो क्षमताका जमिनबाट प्रहार गर्न सकिने क्षेप्यास्त्र अमेरिका, रुस र चीनसँग मात्रै छन् ।

कतिपय विज्ञले सन् २०१७ मा परीक्षण गरिएको क्षेप्यास्त्र नियमित बाटोअनुसार प्रहार गरिएको भए १३ हजार किलोमिटरको उचाइमा पुग्ने दाबी गरेका थिए । त्यसको अर्थ उक्त क्षेप्यास्त्रले अमेरिकाको जुनसुकै स्थानमा प्रहार गर्न सम्भव हुन्छ ।

प्रकाशित : जेष्ठ २६, २०७९ ०८:०२
प्रतिक्रिया
पठाउनुहोस्

‘युक्रेन युद्धले विकासोन्मुख देशमा आर्थिक मन्दी’

कोरोनापछि तंग्रिँदै गरेको विश्वको अर्थतन्त्र थप बिग्रने
आर्थिक वृद्धिदर न्यून र मुद्रास्फीतिको जोखिम उच्च हुने
एजेन्सीहरू

वासिङटन — कोरोना महामारीले नराम्रोसँग प्रभावित विश्वको अर्थतन्त्र रुस–युक्रेन युद्धका कारण थप बिग्रने चिन्ता थपिएको छ ।

विश्व बैंकले युद्धका कारण विश्वभर आर्थिक मन्दीको अवस्था उत्पन्न भइसकेको जनाएको छ । खासगरी पूर्वी एसिया र युरोपका विकासोन्मुख देशले ठूलो आर्थिक मन्दीको सामना गरिरहेको बैंकले जनाएको छ । विश्व बैंकका अध्यक्ष डेभिड मलपासले उच्च मुद्रास्फीतिको जोखिम रहेको र आर्थिक वृद्धिदर न्यून हुने निकै जोखिम रहेको बताएका छन् । उनले विश्वमा खानेकुरा र ऊर्जाको भाउ उच्च हुँदै गएको बताए ।

‘युक्रेन युद्ध, चीनमा जारी लकडाउन, आपूर्ति चक्रमा आएको अवरोध र मुद्रास्फीतिको जोखिमले आर्थिक वृद्धिमाथि ठूलो प्रभाव परिहेको छ,’ मलपासले भनेका छन्, ‘कतिपय देशलाई मन्दीबाट बच्न निकै गाह्रो हुन देखिएको छ ।’ विश्व बैंकले विश्वव्यापी आर्थिक अवस्थासम्बन्धी जुन महिनाको प्रतिवेदनमार्फत मलपासले मुद्रास्फीतिको जोखिम उच्च रहेको चेतावनी दिएका हुन् ।

बैंकले सन् २०२२ मा युरोपेली देशहरू युक्रेन र रुस आर्थिक संकटका कारण निकै ठूलो समस्यामा पर्ने पूर्वानुमान गरेको छ । त्यसका साथै युद्ध र कोरोना महामारीको असर थप बढ्दै जाने चेतावनी बैंकको छ । ‘यदि विश्वव्यापी मन्दी रोकियो भने पनि मुद्रास्फीतिको समस्या कैयौं वर्षसम्म रहिरहनेछ,’ मलपासले भनेका छन् । सन् २०२१ देखि २०२४ भित्र विश्वव्यापी आर्थिक वृद्धिदर २.७ प्रतिशतले सुस्त हुने बैंकले प्रक्षेपण गरेको छ । यसअघि सन् १९७६ र १९७९ मा आर्थिक मन्दीका कारण हालसम्मकै उच्च बेरोजगारी र मूल्यवृद्धि भएको थियो । रुसले युक्रेनमा आक्रमण सुरु गरेको सय दिन नाघिसकेको छ । उत्तर एट्लान्टिक सन्धि संगठनको सदस्य बन्ने युक्रेनको तयारीपछि रुष्ट रुसले फेब्रुअरी २४ मा आक्रमण सुरु गरेको हो । रुसी आक्रमण केही सातामा नै टुंगिने विश्व समुदायको आकलनविपरीत युद्ध लम्बिएको छ । जसका कारण निकै टाढाटाढाका देशसम्म पनि त्यसको प्रत्यक्ष र परोक्ष असर परिरहेको छ ।

पेट्रोलियम पदार्थ, ग्यास, खाद्यान्नलगायत सामग्रीको मूल्य अकासिएको छ भने कतिपय देश गहिरो आर्थिक संकटमा फसेका छन् । कोरोना महामारीका कारण थलिएको अर्थतन्त्र सुधार गरी पहिलेको लयमा फर्किने कोसिस गरिरहेका श्रीलंकालगायत देशमा आर्थिक अवस्था थप गहिरिएको छ । महामारीपूर्वको तुलनामा आम्दानी घटेको छ भने बेरोजगारी दर बढ्दै गएको छ । ऊर्जा तथा खाद्यान्नमा भएको महँगीले निम्न तथा निम्नमध्यम वर्गीय मानिसको जीविकोपार्जन झन् कष्टकर बन्दै गएको छ । यसैबीच, बेलायती अर्थतन्त्रको वृद्धिदर अनुमान गरिएभन्दा कम हुने एक थिंकट्यांकले चेतावनी दिएको छ । आर्थिक सहयोग र विकाससम्बन्धी संगठन ओईसीडीले बेलायती अर्थतन्त्र यस वर्ष ३.६ प्रतिशतले वृद्धि हुने र अर्को वर्षको वृद्धिदर शून्य प्रतिशत रहने जनाएको हो ।

यसको अर्थ जी–७ राष्ट्रहरूमा आर्थिक वृद्धिदरका हिसाबले दोस्रोमा रहेको बेलायत अर्को वर्ष पुछारमा पुग्नेछ । जी–७ मा अमेरिका, क्यानडा, जर्मनी, जापान, फ्रान्स र इटाली छन् । ओईसीडी आर्थिक विकास, जीवनस्तर र विश्वव्यापी व्यापारको प्रवर्द्धनका लागि सहयोग पुर्‍याउने देशहरूको समूह हो ।

प्रकाशित : जेष्ठ २६, २०७९ ०८:०१
पूरा पढ्नुहोस्
प्रतिक्रिया
पठाउनुहोस्
x
×