‘गलत निर्णयले प्रहरी असफल’- विश्व - कान्तिपुर समाचार
अमेरिकी गोलीकाण्ड

‘गलत निर्णयले प्रहरी असफल’

एजेन्सी

टेक्सास — अमेरिकाको टेक्सासस्थित विद्यालयको गोलीकाण्ड मच्चाउने बन्दुकधारीलाई जवाफी आक्रमण गर्न प्रहरी असफल भएको एक वरिष्ठ अधिकारीले जनाएका छन् ।

टेक्सासको सार्वजनिक सुरक्षा विभागका निर्देशक कर्नेल स्टेभेन म्याक्क्रले ‘प्रहरीले गलत निर्णय गरेकाले’ बन्दुकधारीलाई जवाफ दिन निकै ढिला भएको बताएका हुन् । सुरक्षाकर्मीहरू घटनास्थलनजिकै रहेका भए पनि बन्दुकधारीलाई रोक्न वा तत्काल जवाफी कारबाही गर्न असफल भएका उनको दाबी छ ।

टेक्सासस्थित प्राथमिक विद्यालयमा मंगलबार अन्धाधुन्ध गोली प्रहार हुँदा १९ जना बालबालिकासहित २१ को मृत्यु भएको थियो । करिब ५ सय विद्यार्थी अध्ययन गर्ने युभाल्डे सहरको रोब विद्यालयको कक्षाकोठामै प्रवेश गरी १८ वर्षीय बन्दुकधारीले गोली हानेका थिए ।

गोली प्रहार सुरु भएको ४० मिनेटमा मात्र प्रहरी विद्यालयमा पुगेको पुष्टि भएको म्याक्क्रले बताए । घटनास्थलमा रहेकाहरूले सहयोगका लागि बारम्बार प्रहरीलाई खबर गरेका उनको भनाइ छ ।

म्याक्क्रका अनुसार घटनास्थल नजिकैका वरिष्ठ प्रहरी अधिकारीले ‘कुनै पनि बालबालिका जोखिममा नरेहेको’ वा ‘कोही जीवित नरहेको ठानेर’ विद्यालयका सहयोगीलाई कुरेको हुन सक्ने बताए । अधिकारीहरूले भने कुन समय के–के भयो भन्ने प्रस्ट रूपमा बताउन सकेका छैनन् । टेक्सास राज्यका गभर्नर ग्रेग अबोटले आफूले पाएका कतिपय सूचना गलत भएको बताएका छन् । ‘घटनाबारे सबैले थाहा पाए । तर मलाई दिइएका केही सूचना तथ्यपूर्ण नरहेको पछि थाहा भयो,’ उनले भनेका छन् ।

अबोटले सन्दिग्ध बन्दुकधारी सेल्भाडोर रामोस सुरक्षा कारबाहीमा मारिएका जनाए । कारमा सवार रामोस सडकको बेरिकेड तोड्दै विद्यालय प्रवेश गरी कक्षाकोठामा पढिरहेका विद्यार्थीलाई लक्षित गर्दै गोली प्रहार गरेका थिए । घटनामा ७ देखि १० वर्ष उमेर समूहका विद्यार्थीले ज्यान गुमाएका हुन् ।

यसैबीच, अमेरिकाका पूर्वराष्ट्रपति डोनाल्ड ट्रम्पले अमेरिकाले युक्रेनलाई आर्थिक सहयोग गर्नुको साटो देशकै विद्यालयको सुरक्षालाई प्राथमिकता दिनुपर्ने बताएका छन् । टेक्सास गोलीकाण्डपछि पहिलोपटक बोल्दै उनले विद्यालयको सुरक्षाका विषयमा सरकारको ध्यानाकर्षण गरेका हुन् ।

‘अमेरिकाले युक्रेनलाई अर्बौं रकम दिन सक्छ भने हाम्रो घरमा बालबालिकालाई सुरक्षित राख्न पनि सक्नुपर्छ,’ अमेरिकामा हतियार बिक्री तथा प्रयोगसम्बन्धी नियम परिवर्तनको विरोधमा रहेकाहरूको एक सम्मेलनमा बोल्दै ट्रम्पले भने । अमेरिकाको सबैभन्दा ठूलो बन्दुकधारी समूह नेसनल राइफल एसोसिएसन (एनआरए) को बैठक हाल ह्युस्टनमा भइरहेको छ ।

‘हामीले इराक र अफगानिस्तानमा करोडौं रकम खर्चियौं । तर, उपलब्धि केही भएन,’ ट्रम्पले भने, ‘हामीले अन्य देश निर्माण गर्नुअघि हाम्रै बच्चाहरूका लागि सुरक्षित विद्यालय निर्माण गर्नुपर्छ ।’ रुसले फेब्रुअरी २४ मा अमेरिकामाथि आक्रमण गरेयता अमेरिकाले युक्रेनका लागि करिब ५४ अर्ब डलर बराबरको सहयोग पठाइसकेको छ ।

ट्रम्पले बोल्नुअघि टेक्सासका सिनेटर टेड क्रुजले धार्मिक कार्यमा घट्दै गएको उपस्थिति तथा सामाजिक सञ्जाल र भिडियो गेमका कारण सामूहिक गोलाबारीका मुख्य कारण भएको बताएका थिए ।

एनआरएको बैठक चलिरहेका बेला बाहिर भने सयौं प्रदर्शनकारीले विरोध जनाएका थिए । प्रदर्शनकारीले ‘एनआरएले बालबालिका मार्‍यो,’ ‘बच्चालाई बन्दुक होइन, सुरक्षा देऊ’ जस्ता नारा लेखिएका प्लेकार्ड तथा गोलीकाण्डमा परेका पीडितको तस्बिर बोकेका थिए ।

प्रकाशित : जेष्ठ १५, २०७९ ०८:०८
प्रतिक्रिया
पठाउनुहोस्

हिमपातले यार्चा संकलन प्रभावित

आश गुरुङ

चामे, मनाङ — हुलाकी ओडारदेखि छंगाछुर भीरको बाटो छिचोल्दै विकट नारको लेकमा यार्चागुम्बु टिप्दै गरेका एक्का तामाङ एक्कासि सदरमुकाम चामे झरे । दालचामल सकियो । पकाउने भाँडो पोहोरकै छ । लेकमा हिमपात भयो । केही दिनयता यार्चा टिप्न सकिरहेका छैनन् । यार्चा टिप्ने लेक हिउँले पुरियो । धादिङको रि–गाउँबाट गएका १२ जनामध्ये ६ जनालाई ओडारमा राखेर एक्का तामाङ ६ जनालाई लिएर दालचामल बोक्न चामे झरेका हुन् ।

‘लेकमा बसेको डेढ महिना हुन लाग्यो । भीरको बाटो डोरीले कम्मरमा बाँधेर जानुपर्छ । अहिले हिउँ परेको छ । रासन सकिएर झरेको हो,’ उनले भने, ‘फेरि डोरीमा झुन्डिएर जानुपर्छ ।’ बाध्य भएर ज्यानलाई जोखिममा राखेर, मृत्युको मुखमा पुर्‍याएर यार्चा टिप्न जाने गरेको उनले बताए । डेढ महिनामा उनले २ सय २० गोटा यार्चा टिपेका छन् । एउटाको ४ सय रुपैयाँमा ठेकेदारले किन्छ । १२ जनाको पुर्जी काट्दा ठेकेदारले ४ लाख रुपैयाँ पुर्जी काट्ने ठाउँमा बुझाए । ‘ठेकेदारले पैसा तिरिदिएको छ । लेकमा जानेआउने र घरगाउँबाट जानेआउने बाटो यही हो,’ उनले भने, ‘अहिले यार्चा टिप्न प्रशासनले खुला गरेको छ ।

धादिङकै रि–गाउँका यशु तामाङका अनुसार १९ जना भ्राताङ लेकमा यार्चा टिप्न व्यस्त छन् । यार्चा रहने ठाउँमा अहिले हिमपात भएको छ । ‘यार्चा टिप्ने ठाउँमा हिउँ पर्‍यो, बस्दाबस्दै रासन सकियो । रासन लिन झरेका हौं,’ उनले भने, ‘हिउँले पुरिएको ठाउँमा कसरी किरा टिप्ने, कसरी जाने ? गाह्रो छ ।’ उनका अनुसार १९ जनाको पुर्जीदेखि खानपान, बासस्थानलगायत गरी ठेकेदारले ४२ लाख रुपैयाँ खर्च गरेका छन् । पाँच सयवटा यार्चा टिपेका यशुले भने, ‘भरे १५/२० हजार पाउँछ कि पाउँदैन, सबै ठेकेदारले लान्छ ।’

अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय मनाङका प्रमुख लेखनाथ गौतमका अनुसार मनाङभरि करिब १ हजार ५ सयदेखि २ हजार जनाको हाराहारी संकलक लेकमा पुगेका छन् । ४ हजार ५ सय मिटरमाथि हिमपात हुन सक्छ । त्यही ठाउँमा यार्चा पाइन्छ । ‘मौसम बिग्रिरहेको छ । फिल्डमा साथीहरूलाई खटाएका छौं,’ उनले भने । लेकमा हिमपात भएकाले यार्चा संकलक प्रभावित भएको हुन सक्ने उनले बताए । यार्चा संकलनका लागि बाहिरी जिल्लाका मात्रै नभएर मनाङी पनि लेकमा पुगेका छन् । संकलकलाई एक्याप मातहतको संरक्षण क्षेत्र व्यवस्थापन समितिले पुर्जी जारी गर्ने गरेको छ ।

हिमाली जिल्ला मनाङमा बहुमूल्य जडीबुटी यार्चा संकलनमा १२ वर्षपछि जिल्ला बाहिरका बासिन्दालाई अनुमति दिइएको छ । नारको लेकमा ०६६ जेठमा ७ जना गोरखालीको हत्या भएपछि यार्चा संकलनमा बाहिरी जिल्लाका बासिन्दालाई मनाङ प्रशासनले प्रवेशमा प्रतिबन्ध लगाउँदै आएको थियो । पछिल्लो समय बाहिरी जिल्लाका बासिन्दा तर मनाङमा बसोबास गर्दै आएकालाई फुकुवा गरिएको थियो । गत वर्ष स्थानीय र जिल्लावासीले मात्रै यार्चा टिपेका थिए भने त्यसअघिको वर्ष कोरोना संक्रमण जोखिमका कारण यार्चा संकलन बन्द गरिएको थियो । संकलन गर्न आउनेका लागि स्थानीयबासीलाई प्रतिव्यक्ति १० हजार रुपैयाँ तोकेको छ । जिल्लावासीलाई १५ हजार रुपैयाँसम्म र जिल्ला बाहिरका व्यक्तिलाई २० हजार रुपैयाँ तोकेको छ । कतिपय लेकमा प्रतिव्यक्ति ३५ हजारसम्म लिने गरेको यार्चा संकलक बताउँछन् । संकलन गरिसकेपछि व्यवसायीले प्रतिकिलो ३० हजार रुपैयाँ राजस्व बुझाउनुपर्छ ।

मनाङको लेकमा संकलित यार्चा अन्तर्राष्ट्रिय बजारमा प्रतिकिलो १५ लाखदेखि २० लाख रुपैयाँसम्म पर्ने अनुमान छ । एक्यापका अनुसार गत वर्ष ८१ किलो यार्चा संकलन भएकामा २४ लाख ३० हजार रुपैयाँ राजस्व संकलन भएको छ । गत वर्षको तुलनामा यस पटक बढी संकलन हुने अपेक्षा छ ।

एक्यापका अनुसार मनाङका २५ भन्दा बढी लेकमा यार्चा पाइन्छ । उक्त क्षेत्रमा रहेका सीएमसीले छोडपुर्जीबापत १ किलो बराबर १० हजार रुपैयाँ लिने गरिएको छ । स्थानीय तहले निकासी करबापत १ किलोको १० हजार रुपैयाँ लिने गरेका छन् । हिमपातको तालमेल नमिल्दा मनाङमा यार्चा घट्दै गएको संकलकले बताउने गरेका छन् । प्रमुख जिल्ला अधिकारी रवीन्द्रप्रसाद आचार्यले सुरक्षाको दृष्टिकोणबाट यार्चा संकलकलाई अप्ठ्यारो नपरेको बताए । ‘यार्चागुम्बु संकलन क्षेत्र सुरक्षाकर्मीको निगरानीमा हुन्छ । हामीले सुरक्षा व्यवस्था मजबुत बनाएका छौं,’ उनले भने ।

प्रकाशित : जेष्ठ १५, २०७९ ०८:०७
पूरा पढ्नुहोस्
प्रतिक्रिया
पठाउनुहोस्
×