रुसको कब्जामा युक्रेनको लाइमन सहर- विश्व - कान्तिपुर समाचार

रुसको कब्जामा युक्रेनको लाइमन सहर

सेभिरोडोनेत्स्कको पनि दुई तिहाइ क्षेत्रमा नियन्त्रण
एजेन्सी

किभ/मस्को — रुसी सेनाले युक्रेनको डोनत्स्क क्षेत्रको लाइमन सहर कब्जा गरेको छ । पछिल्लो डेढ सातायता लगातार भारी मात्रामा आक्रमण गरिरहेको रुसले उक्त सहर नियन्त्रणमा लिएको युक्रेनले समेत स्विकारेको छ । यसअघि नै रुसी समर्थित पृथकतावादीहरुको बाहुल्य रहेको यो सहर आफूहरुले गुमाएको युक्रेनी राष्ट्रपति भोलोदिमिर जेलेन्स्कीका सल्लाहकार आलेक्सी एरिस्टाभिचले बताएका हुन् ।

‘अप्राणित तथ्यांकअनुसार हामीले लाइमन सहर गुमायौं,’ शुक्रबार एक भिडियो सन्देशमा एरिस्टाभिचले भनेका छन्, ‘रुसले आक्रमण व्यवस्थित र एकिकृत गरेको छ । यसबाट सैद्धान्तिक रुपमा रुसको सैनिक परिचालन, व्यवस्थापन र रणनीतिक दक्षताको स्तर बढेको देखाउँछ ।’

डोनेत्स्क क्षेत्रका गभर्नर पाभ्लो किरिलेन्कोको भनाइले समेत लाइमनमाथि नियन्त्रण जमाउन रुस सफल भएको संकेत गर्छ । ‘लाइमन सहर मुख्य रुपमा रुसी सेनाको नियन्त्रणमा छ तर यस क्षेत्रका केही नयाँ स्थानलाई भने युक्रेनी सेनाले पकडमा लिएको छ,’ मिडिया आउटलेट रोमाडस्केसँग कुराकानी गर्दै उनले भनेका छन् । किभका रक्षा अधिकारीले पनि डोनेत्स्कको उत्तर–पश्चिम र दक्षिण–पूर्वी क्षेत्रमा नियन्त्रण बनाइ राख्न युक्रेनी सुरक्षा फौज अझै युद्ध क्षेत्रमा डटिरहेको दाबी गरेका छन् ।

लाइमन युक्रेनको ठूलो सहर भने होइन तर रुससँग रणनीतिक रुपमा सम्बन्ध भने राख्छ । युक्रेनको यो प्रमुख रेल्वे हब हो । मुख्य सहरहरुसँग जोडिने सडक सञ्जालमा समेत जोडिएको छ । मुलककै दक्षिण–पश्चिम क्षेत्रमा सामग्री ढुवानी गर्ने एक प्रमुख विन्दु मानिने स्लोभिन्स्क सहर यहाँबाट २० किलोमिटरको मात्रै दूरीमा पर्छ । यसकारण पनि लाइमनमाथि कब्जा जमाउनु रुसका लागि महत्वपूर्ण प्राप्तिको रुपमा विश्लेषण गरिएको छ । यसै साता रुसले कब्जा गरेको यो दोस्रो सहर पनि हो ।

यसबाहेक पछिल्लो डेढ सातायता डोनबास क्षेत्रका अन्य दुई सहरहरु सेभिरोडोनेत्स्क र लिसिचान्स्कमा समेत भारी आक्रमण जारी छ । लुहान्स्कका गभर्नर सेरही हैदईका अनुसार रुसी सेनाले सेभिरोडोनेत्स्कको दुई तिहाइ क्षेत्रमा आफ्नो नियन्त्रण जमाइसकेको छ । ‘तर सबै क्षेत्रमा नियन्त्रण कायम गरिसकेको भने छैन,’ उनले भनेका छन् । लुहान्स्कबाट युक्रेनी सेना हटिसकेको रुस समर्थित पृकथकतावादीको समूहले गरेको दाबीलाई भने उनले नकारेका छन् ।

सेभिरोडोनेत्स्क धेरै जनघनत्व भएको डोनबास क्षेत्रकै मुख्य सहर हो । जहाँ अझै पनि युक्रेनी सेनाले नियन्त्रण गुमाइसकेको छैन । स्थानीय अधिकारीका अनुसार यहाँका ९० प्रतिशत भवन र ६० प्रतिशत घरहरु ध्वस्त भइसकेका छन् । रुसले आक्रमण थालेयता यहाँका १५ सय सर्वसाधारणको ज्यान गइसकेको छ । अझै १० हजार सर्वसाधारणले युद्ध रोकिने आशामा उक्त क्षेत्र छोडेका छैनन् ।

मस्कोले भने युक्रेनकै मुख्य औद्यौगिक क्षेत्र मानिने डोनबास क्षेत्र (डोनेत्स्क र लुहान्त्स्क) लाई पूर्ण रुपमा कब्जा गर्ने उद्देश्य रहेको स्पष्ट पारेको छ । यो क्षेत्रमा रुसी समर्थित पृथकतावादीको बाहुल्य रहेको छ ।

प्रकाशित : जेष्ठ १३, २०७९ २२:०५
प्रतिक्रिया
पठाउनुहोस्

'दक्षिण एसियाली मुलुकहरुमा थुप्रै संकट'

श्रीलंकामा आर्थिक, अफगानिस्तानमा राजनीतिक, बंगलादेशमा शरणार्थी तथा भारत र पाकिस्तानमा धार्मिक अतिवादको संकट
कान्तिपुर संवाददाता

काठमाडौँ — गरिबी उन्मूलनका लागि दक्षिण एसिया मञ्च (सापे) ले दक्षिण एसियाली मुलुकहरुमा व्यापक संकट रहेको निचोड निकालेको छ । काठमाडौंमा आयोजित तीनदिने भेलापछि दक्षिण एसियाका प्रतिनिधिहरुले दक्षिण एसियाका मुलुकहरुमा थुप्रै समस्या रहेको बताएका हुन् ।

दक्षिण एसियाका प्रतिनिधिहरुले श्रीलंकामा राजपाक्ष परिवारको गलत कामको कारण आर्थिक संकट, अफगानिस्तानमा तालिबानको राजनीतिक नेतृत्वको कारण जनताको मौलिक अधिकारमै संकट, बंगलादेशमा म्यान्मारबाट लखेटिएका रोहिंग्या शरणार्थीको संकट तथा भारत र पाकिस्तानमा धार्मिक अतिवादको संकट रहेको औंल्याएका थिए।

काठमाडौंमा भएको छैटौं वार्षिक सभा तथा जनसार्क बैठकमा यस क्षेत्रका सामाजिक अभियान्ता, अधिकारकर्मी तथा विज्ञहरुले यस क्षेत्रमा बढ्दै गएको आर्थिक, राजनीतिक र सामाजिक संकट तथा कोभिड महामारीपछिको आर्थिक पुनरुत्थानका विषयहरुमा गम्भीर बन्न सरोकारवालाहरुको ध्यानाकर्षण गएका हुन् ।

छलफलमा भारतका बाबु माथ्यु, जाकीया सोमन, बाबु पी रमेश, नीता, शोभा रघुराम, बंगलादेशका सहनाज सुमि, मनोहवर मुस्तफा, श्रीलंकाका लोगेश्वरी पुनि, नलिनी रतनराज, नेपालका हरि शर्मा, शुशील प्याकुरेल, नेत्र तिम्सिना, शर्मिला कार्की, उद्धव प्याकुरेल, कनकमणि दीक्षित, अर्जुन कार्की, बिमला राई पौडेल, भुटानका गोविन्द रिजाल, पाकिस्तानका फारुक तारिकले दक्षिण एसियाको समग्र अवस्था र नयाँ सामाजिक आन्दोलन र जनसंघर्षबारे आफ्नो धारणा राखेका थिए ।

तीनदिने छलफलपछि १५ बुँदे काठमाडौं घोषणापत्र समेत जारी गरिएको छ । उनीहरुले दक्षिण एसियाको समस्या समाधान गर्न सार्क मुलुकहरु मिल्नु पर्ने पनि सुझाव दिएका छन् । यस्तै भारत र पाकिस्तानले द्वन्द्व गर्न नहुने तथा अफगानिस्तान र श्रीलंकाको संकटलाई सबै मिलेर सम्बोधन गर्नुपर्ने उनीहरूको सुझाव थियो । दक्षिण एसियाली मुलुकहरु बीचमा बन्द सीमालाई खुला गर्नुपर्ने पनि उनीहरुको माग थियो ।

प्रकाशित : जेष्ठ १३, २०७९ २२:०१
पूरा पढ्नुहोस्
प्रतिक्रिया
पठाउनुहोस्
×