अस्ट्रेलियामा नयाँ प्रधानमन्त्री

अस्ट्रेलियाका नवनियुक्त प्रधानमन्त्रीले बेलायती महारानीको प्रतिनिधिका रूपमा रहने गभर्नर जनरलसँग शपथ लिने व्यवस्था छ ।

अल्बानिजीसँगै महत्त्वपूर्ण मन्त्रालयको जिम्मेवारी पाएका ४ सांसदले पनि शपथ लिएका छन् । सोमबार बिहान आयोजित कार्यक्रममा लेबर पार्टीका उपनेता रिचार्ड माल्र्सले उपप्रधानमन्त्री, जिम चार्लमरले ट्रेजरर, केटी गालाघरले अर्थमन्त्री र पेनी योंगले विदेशमन्त्रीको शपथ लिएका हुन् ।

नवनियुक्त प्रधानमन्त्री अल्बानिजी ‘क्वाड’ बैठकमा सहभागी हुन शपथग्रहणलगत्तै जापान गएका छन् । बैठकमा सहभागी हुन प्रधानमन्त्रीसँगै नवनियुक्त विदेशमन्त्री योंग पनि गएकी छन् । क्वाडमा अमेरिका, अस्ट्रेलिया, जापान र भारत छन् ।

अस्ट्रेलियामा शनिबार भएको चुनावमा सत्तारूढ दल लिबरल गठबन्धनलाई हराउँदै लेबर विजयी भएको हो । लेबरले बहुमत सिटमा जित हासिल गर्न भने सकेको छैन । स्थानीय समाचार संस्था एबीसीका अनुसार सोमबार साँझसम्म लेबर ७३ सिटमा विजयी भइसकेको छ । मतगणनाको अन्तिम नतिजा नआइसकेकाले उसको बहुमत आउन सक्ने सम्भावना भने कायमै छ । लगातार ३ कार्यकाल (९ वर्ष) सम्म सत्तामा रहेको लिबरल गठबन्धन भने ५४ सिटमा सीमित भएको छ । अस्ट्रेलिया सरकार गठनका लागि १ सय ५१ सदस्यीय तल्लो सदनमा ७६ सिट ल्याउनुपर्छ ।

अस्ट्रेलियासँगको सम्बन्ध चिसिएका बेला चीनले प्रशान्त क्षेत्रको सोलोमन टापुसँग सुरक्षा सम्झौता गरेपछि चुनावप्रति विश्वव्यापी चासो बढेको थियो । तत्कालीन सरकार यस मामिलामा असफल रहेको आरोप लगाएको लेबरले कस्तो नीति अख्तियार गर्छ भन्नेमा पनि कतिपयको ध्यान तानिएको छ । जापान प्रस्थान गर्नुअघि संक्षिप्त प्रतिक्रिया दिँदै प्रधानमन्त्री अल्बानिजीले चीनसँगको सम्बन्ध अप्ठ्यारो किसिमको हुने बताएका छन् ।

तर मन्त्रिपरिषद्का प्रारम्भिक सदस्यको छनोटका आधारमा प्रधानमन्त्री अल्बानिजीलाई चुनावी वाचा पूरा गर्न सहयोग पुग्ने देखिएको जानकारहरूको भनाइ छ । अल्बानिजीको सुरुवाती मन्त्रिमण्डलमा दक्ष र सम्बन्धित क्षेत्रमा जानकार रहेका ब्रिसबेनस्थित सञ्चारविज्ञ डा. भरतराज पौडेल बताउँछन् । विज्ञता र दक्षताका आधारमा जिम्मेवारी दिने कार्यले देश र सरकार सफल हुने गरेको उनको भनाइ छ । ‘एक साताअघि भएको निर्वाचनको नतिजा नेपालमा अझै आइसकेको छैन । अस्ट्रेलियाले चुनाव भएकै दोस्रो दिनमा नयाँ सरकार बनाइसक्यो,’ पौडेलले भने, ‘नेपालले अस्ट्रेलियाबाट धेरै कुरा सिक्नुपर्छ ।’

को हुन् अल्बानिजी ?

अस्ट्रेलियाका ३१ औं प्रधानमन्त्री बनेका अल्बानिजी सामान्य परिवारबाट अस्ट्रेलियाली राजनीतिमा उदाएका हुन् । भद्र र शान्त स्वभावका अल्बानिजी विद्यार्थी उमेरदेखि नै लेबर पार्टीमा क्रियाशील थिए । अघिल्लो निर्वाचनमा लिबरल गठबन्धनसँग पराजय भोगेपछि तत्कालीन पार्टी नेता बिल सर्टनले राजीनामा दिएपछि उनी लेबर नेता चयन भएका हुन् ।

अल्बानिजी अस्ट्रेलियामा सहज बसोबासका लागि सरकारले दिने घर (सोसल हाउजिङ) मा हुर्किएका थिए । स्वास्थ्य समस्याका कारण सरकारले दिने अपांग भत्तामा निर्वाह गरेकी आमा र आफ्नो संघर्षबारे अल्बानिजीले पटकपटक सार्वजनिक मञ्चमा बोल्दै आएका थिए ।

आफू निकटका मान्छे र राजनीतिक वृत्तमा ‘अल्बो’ उपनामले परिचित अल्बानिजीले अस्ट्रेलियामा भ्रष्टाचार निवारणसम्बन्धी राष्ट्रिय आयोग निर्माण गर्नुपर्ने कुरालाई निर्वाचनमा जोडका साथ उठाएका थिए । उनले कर्मचारीको तलब वृद्धि र जलवायु परिवर्तनबारे समेत अघिल्लो सरकारभन्दा राम्रो काम गर्ने बताएका छन् ।

यस पटकको पनि निर्वाचनको केही दिनअघिसम्म अल्बानिजीभन्दा प्रधानमन्त्री स्कट मरिसन नै लोकप्रिय रहेका सर्वेक्षणमा देखिएको थियो । तर चुनावी नतिजाले भने सर्वेक्षणलाई गलत सावित गरेको हो । तर अझै करिब २० प्रतिशत मत गन्न बाँकी रहेकाले पहिलो विदेश भ्रमणमा निस्किएका अल्बानिजीलाई अन्तर्रास्ट्रिय सम्बन्धमा सुधार गर्नेदेखि ४ प्रतिशतभन्दा तल झरेको बेरोजगार दर सुधार्ने चुनौती छ ।