३४ वर्ष पुरानो घटनामा सिद्धुलाई एक वर्ष जेल- विश्व - कान्तिपुर समाचार

३४ वर्ष पुरानो घटनामा सिद्धुलाई एक वर्ष जेल

कान्तिपुर संवाददाता

काठमाडौँ — ३४ वर्ष पुरानो घटनामा भारतीय कांग्रेस नेता तथा पञ्जाबका पूर्वमन्त्री नवजोतसिंह सिद्धूलाई भारतीय सर्वोच्च अदालतले एक वर्षको जेल सजाय सुनाएको छ । बिहीबार सर्वोच्च अदालतले करिब तीन दशक पुरानो घटनामा पूर्वक्रिकेटरसमेत रहेका सिद्धुलाई सजाय सुनाएको हो । 

सन् १९८८ डिसेम्बर २७ का दिन पञ्जाबको पटियालामा पार्किङमा सिद्धु र ६५ वर्षीय गुरनाम सिंहबीच हातपात भएको थियो । सरकारी अभियोजकका अनुसार सिद्धु र उनका अर्का साथी रुपिन्दर सिंह पटियालाको शेरनवाला गेटनजिकै विवादपछि गुरनामसँग हातपात गरी फरार भएका थिए । उनीहरू गुरनाम ढलेपछि भागेका थिए । पछि उपचारका क्रममा गुरनामको अस्पतालमा मृत्यु भएको थियो ।

गुरनामका परिवारले सिद्धु र उनका साथीविरुद्ध पछि मुद्दा दायर गरेका थिए । सन् २००६ मा उच्च अदालतले सिद्धु र उनका साथीलाई दोषी ठहर गर्दै ३/३ वर्ष जेल सजाय र एक/एक लाख रुपैयाँ जरिवानासमेत गरेको थियो ।

तर सिद्धुले उच्च अदालतको फैसलालाई चुनौती दिँदै सर्वोच्च अदालतमा अपिल गरेका थिए । उनी गुरनामको मृत्युबारे चिकित्सको राय स्पष्ट नभएको भन्दै सर्वोच्च गएका थिए । त्यतिबेला सर्वोच्चका न्यायाधीश जे चेलमेश्वेर र एसके कौलको इजलासले सिद्धुलाई भारतीय दण्ड संहिताको धारा ३२३ अन्तर्गत 'स्वेच्छाले चोट पुर्‍याएको' अपराधमा दोषी करार गरेको थियो । त्यसमा उनलाई भारतीय दण्ड संहिताको धारा ३०४ अनुसार दोषी ठहराउन नसकिने बताइएको थियो । सन् २००६ को पञ्जाब एन्ड हरियाणा उच्च अदालतले भने त्यही धाराअन्तर्गत उनलाई दोषी करार गरेको थियो ।

उच्च अदालतले गुरनामको मृत्युको कारण 'हृदयघात' नभई 'सबड्युरल ह्यामरेज'(मस्तिष्कको बाहिरी सतहमा हुने रक्तश्राव)भएको उल्लेख गरेको थियो । तर सर्वोच्चले भने उच्च अदालतले भनेअनुसारको 'सब्ड्युरल ह्यामरेज' को कुनै प्रमाण नभएको र केवल अनुमानमा आधारित भएको उल्लेख गरेको थियो । त्यही आधार देखाएर सिद्धुलाई सर्वोच्च अदालतले एक हजार जरिवाना मात्र गरेको थियो ।

उक्त सजाय कम भएको भन्दै पीडित परिवारले सर्वोच्च अदालतमा अपिल गरेको थियो । पीडित परिवार पक्षबाट वरिष्ठ अधिवक्ता सिद्धार्थ लुथरा र सिद्धुका तर्फबाट वरिष्ठ अधिवक्ता एएम सिंघवीले बहस गरेका थिए । मार्च २५ मै अन्तिम बहस सकिए पनि सर्वोच्च अदालतले फैसला सुरक्षित राखेको थियो । बिहीबारको फैसलामा सर्वोच्चले सिद्धुलाई दोषी ठहर गर्दै एक वर्ष जेल सजाय सुनाएको हो । फैसलापछि सिद्धुले ट्विट गर्दै अदालतको फैसलालाई सम्मान गर्ने बताएका छन् ।

प्रकाशित : जेष्ठ ५, २०७९ १९:००
प्रतिक्रिया
पठाउनुहोस्

मुख्यमन्त्रीका स्वकीय सचिव दीपक यादवको जमानत जफत

भूषण यादव

वीरगन्ज — मधेस प्रदेशका मुख्यमन्त्री लालबाबु राउत गद्दीका स्वकीय सचिव दीपक यादवको जमानत जफत भएको छ । यादवले पर्साको पटेर्वासुगौली गाउँपालिकाको अध्यक्षमा जनता समाजवादी पार्टी (जसपा) बाट उम्मेदवारी दिएका थिए ।

पटेर्वासुगौलीमा ११ हजार ४५३ मत खसेको थियो । मतगणनाको क्रममा कूल खसेको मतमध्ये २२५ बदर भएका थियो भने ११ हजार २२८ मत सदर भएका थियो । कानुनतः उम्मेदवारले जमानत जोगाउन सदर मतको १० प्रतिशत मत ल्याउनु पर्ने हुन्छ ।

पटेर्वासुगौलीका निर्वाचन अधिकृतका अनुसार जसपाका दीपक यादवले ४ सय ६९ मत मात्र पाएका छन् । जमानत जफत हुन नदिन उम्मेदवारले ११ हजार २२८ मतको १० प्रतिशत भनेको ११ सय २२ मत ल्याउने पर्ने हुन्छ । तर, जसपाका उम्मेदवार दीपक यादवले कूल सदर मतको ५ प्रतिशत भन्दा पनि कम मत पाएका छन् । यादवले पाएको ४ सय ६९ मत भन्दा बढी मत मकै छापका लालबाबु महरले ल्याएका छन् ।

महरले ७२३ मत ल्याएका निर्वाचन कार्यालयले जानकारी दिएको छ । उम्मेदवारी दर्ता अघिसम्म उनी मुख्यमन्त्रीकाका स्वकीय सचिव थिए । पटेर्वासुगौली गाउँपालिकाको अध्यक्षमा कांग्रेसका दिनेश चौधरीले ३ हजार ९४४ मत ल्याई निर्वाचित भएका छन् भने निवर्तमान अध्यक्ष एमालेका उम्मेदवार हरिनारायण चौधरी पराजित भएका छन् । हरिनारायणले ३ हजार ९४४ मत प्राप्त गरेका छन् ।

प्रकाशित : जेष्ठ ५, २०७९ १८:५८
पूरा पढ्नुहोस्
प्रतिक्रिया
पठाउनुहोस्
×