पहिलो पटक उत्तर कोरियाद्वारा कोरोना पुष्टि भएको स्वीकार- विश्व - कान्तिपुर समाचार

पहिलो पटक उत्तर कोरियाद्वारा कोरोना पुष्टि भएको स्वीकार

कान्तिपुर संवाददाता

काठमाडौँ — उत्तर कोरियाले पहिलो पटक मुलुकमा कोरोना भाइरसको महामारीको पुष्टि गरेको छ । उत्तर कोरियाली सरकारी सञ्चार माध्यमका अनुसार नेता किम जोङ उनले छिट्टै नै भाइरसलाई उन्मूलन गर्ने प्रतिबद्धता व्यक्त गरेका छन् ।

बीए.२ का रूपमा परिचिच ओमिक्रोन भेरिएन्ट भेटिएपछि उत्तर कोरियामा राष्ट्रिय आपत्काल घोषणा गरिएको छ । उत्तर कोरियाले कति जनालाई कोरोना संक्रमण भयो भन्नेबारे भने केही जानकारी दिएको छैन । उत्तर कोरियाले यसअघि भने मुलुकमा कोरोना पुष्टि नभएको दाबी गर्दै आएको थियो । तर रिपोर्टहरूका अनुसार भने कोरोना संक्रमण देखिए पनि उत्तर कोरियाले गोप्य राखेको थियो ।

उत्तर कोरियाले कोरोनाविरुद्ध खोप अभियान पनि सुरु नगरेको बताइएको छ । चीन र रुसमा भनेको कोरोना खोपको प्रस्ताव पनि उसले अस्वीकार गरेको थियो ।

चीनलगायतका मुलुकमा कोरोना संक्रमण फैलिएपछि उत्तर कोरियाले पूर्ण रूपमा सीमा बन्द गरेको थियो । दक्षिण कोरिया र चीनमा संक्रमणले महामारीको रूप लिए पनि उत्तर कोरियाले संक्रमण पुष्टि नभएको दाबी गरेको थियो। दुई वर्षसम्म सीमा बन्द गरेको उत्तर कोरियाले गत जनवरीमा मात्रै चीनसँगको सीमा खोलेको बताइन्छ ।

खोप नलगाएको र मुलुकको कमजोर स्वास्थ्य प्रणालीका कारण ओमिक्रोन भेरिएन्ट देखिनुले उत्तर कोरिया निकै जोखिममा रहेको जनस्वास्थ्यविद्हरूको भनाइ छ । दक्षिण कोरियाबाट सञ्चालित एनके न्युजका अनुसार उत्तर कोरियामा २ दिनदेखि लकडाउन जारी छ ।

कोरोना पुष्टि भएपछि नेता किमले वर्कर्स पार्टीका पोलिटब्युरोसँग छलफल गरेका छन् । उनले छलफलमा छिट्टै नै भाइरसलाई उन्मूलन गर्ने गरी कदम चालिने बताएका थिए ।

प्रकाशित : वैशाख २९, २०७९ ११:२२
प्रतिक्रिया
पठाउनुहोस्

मतदान गर्न गाउँ फर्किनेको बीपी राजमार्गमा लर्को

सामान्य अवस्थामा दैनिक २–३ हजारसम्म सवारीसाधन आवतजावत गर्दै आएकामा अहिले ७ हजारभन्दा बढी
राजकुमार कार्की

सिन्धुली — काठमाडौं बस्दै आएका धनुषा यदुकुवाका उमेश पञ्जियार बुधबार घर फर्किने क्रममा कमलामाई नगरपालिका–२ चियाबारीस्थित बीपी राजमार्गसँगै जोडिएको एक होटलमा भेटिए । शुक्रबार हुने स्थानीय तह निर्वाचनमा मतदान गर्न उनी घर फर्किंदै थिए ।

आफूजस्तै गाउँकै मतदाता सूचीमा नाम रहेका धेरै जना गाउँ फर्किने क्रममा रहेको उनले बताए । ‘मत हाल्न पाउनु हाम्रो अधिकार हो, यस्तो मौकाको सदुपयोग त गर्नुपर्‍यो नि !,’ उनले भने, ‘मत हालेर राम्रो उम्मेदवारलाई जिताउने र घरमा समेत भेटघाट हुने भएकाले यसलाइ पर्वकै रूपमा लिएको छु ।’

सुनसरी तरहराका कृष्ण थापाको भनाइ पनि उस्तै छ । उमेरले ६० वर्ष नाघिसकेका उनी मतदान गर्नकै लागि औषधिउपचारलाई समेत थाती राखेर गाउँ फर्किंदै थिए । ‘निर्वाचनमा मतदान गर्ने हो, भोलिपल्ट यही बाटो भएर फर्किएपछि समयमै फेरि पुगिहालिन्छ,’ उनले भने, ‘अर्कोपटक कसले देखेको छ र, मतदान गर्न पाइन्छ, पाइँदैन ।’

सिन्धुलीको कमलामाई–२ चियाबारीस्थित बीपी राजमार्ग आडैमा यात्रुलाई खाना खुवाउन रोकिएका सवारीसाधन । तस्बिर : राजकुमार/कान्तिपुर

निर्वाचनमा सहभागी हुन राजधानी काठमाडौं र आसपासका क्षेत्रबाट पूर्वी नेपाल पुग्नेहरुको बुधबार बीपी राजमार्गमा भीड थियो । छोटो दूरीको यात्रामै पुग्न सकिने भएकाले पनि यात्रुको पहिलो रोजाइमा पर्छ यो राजमार्ग । पूर्वका धनकुटा, इलाम, झापा, सुनसरी, मोरङ, उदयपुर, सिरहा, मधेस प्रदेशका सप्तरी, घनुषा, सर्लाही, रौतहटलगायत जिल्लाका मतदाता यही बाटो भएर घर फर्किरहेका छन् ।

उदयपुर, ओखलढुंगा, भोजपुर, खोटाङ, सोलुखुम्बुलगायतका मतदाता पनि बीपी राजमार्ग हुँदै खुर्कोट पुगेर मध्य पहाडी लोकमार्ग प्रयोग गरिरहेका छन् । दुवै राजमार्गमा यात्रुको थामी नसक्नुको चाप रहेको सिन्धुली ट्राफिक प्रहरी कार्यालयले जनाएको छ ।

‘३ दिनयता अघिपछिको भन्दा तेब्बर संख्यामा यात्रुबाहक साना तथा ठूला सवारीसाधन चलिरहेका छन् । दिउँसोको समयमा मालबाहक सवारीलाई समेत केही समय रोक्नु परिरहेको छ,’ जिल्ला ट्रफिक प्रमुख जेजंग कार्कीले भने । उनका अनुसार सामान्य अवस्थामा बीपी राजमार्गमा दैनिक २–३ हजारसम्म सवारी साधन आवतजावत गर्छन् । अहिले यो संख्या दैनिक ७ हजारभन्दा बढी रहेको छ ।

‘भाडाका र रिजर्भ गरेर मतदान गर्न आउने सवारी साधनको संख्या पनि उल्लेख्य छ,’ उनले भने, ‘सबैजसो यात्रुले मतदान गर्न कै लागि घर फर्किन लागेको बताइरहेका छन् । त्यही भएर पनि सवारी चाप भएको हो । हामीले पनि आफ्नो सबै शक्ति परिचालन गरेर सवारीसाधनलाई गन्तव्यतर्फ पठाइरहेका छौं ।’ विभिन्न सिलसिलामा राजधानीमा बसिरहेका मतदाता ओसार्नसमेत उल्लेख्य रूपमा सवारी साधन रिजर्भ भइरहेका छन् । विभिन्न राजनीतिक दलले समेत सवारी रिजर्भ गरी नि:शुल्क रुपमा मतदातालाई झिकाइरहेका छन् ।

प्रकाशित : वैशाख २९, २०७९ १०:५५
पूरा पढ्नुहोस्
प्रतिक्रिया
पठाउनुहोस्
×