नवाज सरिफलाई भेट्न पाकिस्तानी प्रधानमन्त्री लण्डनमा

स्थानीय मिडियाका अनुसार शहबाजसँगै संघीय मन्त्रीहरू र सत्तारुढ दल पीएमएल-एनका नेताहरू पनि सामेल छन् ।

उक्त टोलीमा अहसान इकबाल, मिफ्ताह इस्माइल, अयाज सादिक, मरियम औरंगजेब, साद रफिक र ख्वाजा आसिफ रहेको पाकिस्तानी मिडियाले जनाएका छन् । लण्डनमा सरिफले पीएमएल-एनका नेताहरूसँग केही महत्त्वपूर्ण मुद्दामा परामर्श गर्ने अपेक्षा गरिएको छ ।

यसैबीच नवाजले लन्डनमा मिडियासँग कुरा गर्दै शहबाज सरिफको टोलीसँग भेट्न उत्सुक रहेको प्रतिक्रिया दिएका छन् ।

पाकिस्तानको जेलबाट उपचारका लागि भन्दै सन् २०१९ मा लण्डन गएका नवाज पाकिस्तान फर्किएका छैनन् । अदालतको आदेश अस्वीकार गर्दै उनी लण्डनमै छन् । गत महिना पाकिस्तानमा इमरान खान प्रधानमन्त्रीबाट हटाइएपछि नवाजका भाइ शहबाज प्रधानमन्त्री नियुक्त भएका हुन् ।