नवाज सरिफलाई भेट्न पाकिस्तानी प्रधानमन्त्री लण्डनमा- विश्व - कान्तिपुर समाचार

नवाज सरिफलाई भेट्न पाकिस्तानी प्रधानमन्त्री लण्डनमा

एजेन्सी

काठमाडौँ — पाकिस्तानी प्रधानमन्त्री शहबाज सरिफ पाकिस्तान मुस्लिम लिग-एन (पीएमएल-एन) का अध्यक्ष नवाज सरिफलाई भेट्न बेलायतको लन्डन पुगेका छन् । भ्रष्टाचार मुद्दामा दोषी ठहर भइ सजाय भुक्तान गरिरहेका सरिफ भने उपचारका लागि लण्डन गएर अदालतको आदेशविपरीत लण्डनमै रहँदै आएका छन् ।

स्थानीय मिडियाका अनुसार शहबाजसँगै संघीय मन्त्रीहरू र सत्तारुढ दल पीएमएल-एनका नेताहरू पनि सामेल छन् ।

उक्त टोलीमा अहसान इकबाल, मिफ्ताह इस्माइल, अयाज सादिक, मरियम औरंगजेब, साद रफिक र ख्वाजा आसिफ रहेको पाकिस्तानी मिडियाले जनाएका छन् । लण्डनमा सरिफले पीएमएल-एनका नेताहरूसँग केही महत्त्वपूर्ण मुद्दामा परामर्श गर्ने अपेक्षा गरिएको छ ।

यसैबीच नवाजले लन्डनमा मिडियासँग कुरा गर्दै शहबाज सरिफको टोलीसँग भेट्न उत्सुक रहेको प्रतिक्रिया दिएका छन् ।

पाकिस्तानको जेलबाट उपचारका लागि भन्दै सन् २०१९ मा लण्डन गएका नवाज पाकिस्तान फर्किएका छैनन् । अदालतको आदेश अस्वीकार गर्दै उनी लण्डनमै छन् । गत महिना पाकिस्तानमा इमरान खान प्रधानमन्त्रीबाट हटाइएपछि नवाजका भाइ शहबाज प्रधानमन्त्री नियुक्त भएका हुन् ।

प्रकाशित : वैशाख २८, २०७९ २०:४७
प्रतिक्रिया
पठाउनुहोस्

तालिबानद्वारा महिलालाई सवारी चालक अनुमतिमा प्रतिबन्ध

एजेन्सी

काठमाडौँ — अफगानिस्तानमा तालिबान अधिकारीहरूले ड्राइभिङ प्रशिक्षकहरूलाई महिलालाई चालक अनुमतिपत्र जारी नगर्न भनेका छन् ।


पितृसत्तात्मक र अनुदार अफगानिस्तानका कतिपय ठूला सहरहरूमा महिलाहरूले सवारी चलाउने गरे पनि तालिबान अधिकारीहरूले महिलाहरूलाई सवारी अनुमति नदिन भनेका हुन् । विशेषगरी उत्तरपश्चिम सहर हेरातमा महिलाहरूले सवारी चलाउने गरेका छन् ।

तालिबान अधिकारीले मौखिक रुपमा महिलालाई लाइसेन्स जारी नगर्न भने पनि लिखित रुपमा निर्देशन आइसकेको छैन । हेरात सहरस्थित ट्राफिक व्यवस्थापन संस्थानका प्रमुख जान अघा अचक्जाइले भने आफूहरूलाई मौखिक रुपमा लाइसेन्स रोक्न भनिए पनि निर्देशन नआएको बताए ।

'हामीलाई मौखिक रुपमा लाइसेन्स दिने काम रोक्न भनिएको छ । तर महिलालाई लाइसेन्स रोक्न भनेर निर्देशन आएको छैन,' अचक्जाइले भनेका छन् ।

सवारी चालक तालिम दिने इन्स्टिच्युटकी संचालक तथा प्रशिक्षक अदिला अदीलले तालिबानले नयाँ पुस्ताहरू पनि आफ्ना आमा जस्तै अवसरबाट वञ्चित बनाउन चाहेको प्रतिक्रिया दिएकी छन् । उनले आफूहरूलाई महिलालाई सवारी चालक तालिम नदिन भनिएको बताइन् ।

तालिबानले गत वर्ष अफगानिस्तानको सत्ता कब्जा गरेसँगै आफूहरू महिला अधिकारका लागि लचिलो बन्ने प्रतिबद्धता व्यक्त गरे पनि शासन लिएसँगै महिला अधिकारमा अनुदार देखिँदै आएको छ । यतिसम्म कि तालिबानले शासन कब्जामा लिएपछि महिलालाई कार्यालय र स्कुल जानसमेत रोक लगाएको छ ।

प्रकाशित : वैशाख २०, २०७९ १८:२६
पूरा पढ्नुहोस्
प्रतिक्रिया
पठाउनुहोस्
x
×