नवाज सरिफलाई भेट्न पाकिस्तानी प्रधानमन्त्री लण्डनमा- विश्व - कान्तिपुर समाचार

नवाज सरिफलाई भेट्न पाकिस्तानी प्रधानमन्त्री लण्डनमा

एजेन्सी

काठमाडौँ — पाकिस्तानी प्रधानमन्त्री शहबाज सरिफ पाकिस्तान मुस्लिम लिग-एन (पीएमएल-एन) का अध्यक्ष नवाज सरिफलाई भेट्न बेलायतको लन्डन पुगेका छन् । भ्रष्टाचार मुद्दामा दोषी ठहर भइ सजाय भुक्तान गरिरहेका सरिफ भने उपचारका लागि लण्डन गएर अदालतको आदेशविपरीत लण्डनमै रहँदै आएका छन् ।

स्थानीय मिडियाका अनुसार शहबाजसँगै संघीय मन्त्रीहरू र सत्तारुढ दल पीएमएल-एनका नेताहरू पनि सामेल छन् ।

उक्त टोलीमा अहसान इकबाल, मिफ्ताह इस्माइल, अयाज सादिक, मरियम औरंगजेब, साद रफिक र ख्वाजा आसिफ रहेको पाकिस्तानी मिडियाले जनाएका छन् । लण्डनमा सरिफले पीएमएल-एनका नेताहरूसँग केही महत्त्वपूर्ण मुद्दामा परामर्श गर्ने अपेक्षा गरिएको छ ।

यसैबीच नवाजले लन्डनमा मिडियासँग कुरा गर्दै शहबाज सरिफको टोलीसँग भेट्न उत्सुक रहेको प्रतिक्रिया दिएका छन् ।

पाकिस्तानको जेलबाट उपचारका लागि भन्दै सन् २०१९ मा लण्डन गएका नवाज पाकिस्तान फर्किएका छैनन् । अदालतको आदेश अस्वीकार गर्दै उनी लण्डनमै छन् । गत महिना पाकिस्तानमा इमरान खान प्रधानमन्त्रीबाट हटाइएपछि नवाजका भाइ शहबाज प्रधानमन्त्री नियुक्त भएका हुन् ।

प्रकाशित : वैशाख २८, २०७९ २०:४७
प्रतिक्रिया
पठाउनुहोस्

तारजाली र सीसी क्यामेराले घेरिए मतगणनास्थल

आश गुरुङ

लमजुङ — लमजुङमा मतदान नहुँदै मतदानस्थल तयार पारिएको छ । बढी सुरक्षा हुने हिसाबले सरकारी कार्यालयमा मतगणनास्थल व्यवस्थापन गरिएको हो ।

सुरक्षा संवेदनशीलतालाई ध्यानमा राखेर मतगणनास्थल तारजालीले घेरेको छ । मतगणनादेखिने गरी सीसी क्यामेरा जडान गरिएको छ । मतगणनाका बेला सुरक्षा चुनौती थपिने भन्दै सुरक्षाका सबैखाले मापदण्ड अपाइनएको प्रमुख जिल्ला अधिकारी सुशील वैद्यले बताए । ‘मतगणना निकै संवेदनशील हुन्छ । कतिबेला के हुन्छ या हुँदैन, थाह छैन’ उनले भने, ‘घटना हुन नदिनु नै हाम्रो कर्तव्य हो ।’

२०७४ को स्थानीय तह चुनावमा भरतपुरमा मतपत्र च्यातेको घटनापछि सुरक्षा संवेदनशीलतालाई ध्यानमा राखेर निर्वाचन आयोगले तारजालीको व्यवस्था गरेको छ । मतदानस्थलमा हुने असुरक्षा र हुनसक्ने धाँधलीलगायतका गतिविधि नियन्त्रण गर्न तथा नियाल्न सीसी क्यामेरा जडान गरिएको मुख्य निर्वाचन अधिकृत शिवप्रसाद खनालले बताए । ‘मतदान सकिएपछि मतपत्र राखिएको बाकस सुरक्षित राख्नुपर्ने हुन्छ । मतगणना सुरक्षित तबरले हुनुपर्छ । हामी निष्पक्ष चाहन्छौं,’ उनले भने, ‘धाँधली हुनबाट रोक्न र सुरक्षा सतर्कता अपनाउन तारबार र सीसी क्यामेरा जडान गरेका छौं ।’

मुख्य निर्वाचन अधिकृतको कार्यालयले बेंसीसहरमा करिब साढे ४ लाख रुपैयाँबराबरको सीसी क्यामेरा जडान गरेको छ । स्थानीय तहमार्फत जडान हुने उक्त सीसी क्यामेरापछि स्थानीय तहले नै लानेछन् । ‘बेंसीसहरमा जडान भएको सीसी क्यामेरामार्फत आयोगले सिधै यहाँ मनिटरिङ गर्न सक्छ । सिधै निर्वाचन आयोगले हेर्न मिल्छ,’ मुख्य निर्वाचन अधिकृत खनालले भने । अन्य स्थानीय तहमा रहेको निर्वाचन आयोगको कार्यालयमा पनि स्थानीय तहकै सहयोगमा सीसी क्यामेरा जडान भएको छ । तारजालीका लागि सिँचाई कार्यालयसँग समन्वय गरिएको र मतगणना सकिएपछि फिर्ता गरिने बताए । ‘बाँसहरु, काम गर्दा लागेको ज्याला हामी मुख्य निर्वाचन अधिकृत, निर्वाचन अधिकृतको कार्यालयले बेहोरेका छौं,’ उनले भने ।

लमजुङमा ४ नगरपालिका र ४ गाउँपालिका छन् । मुख्य निर्वाचन कार्यालयका अनुसार बेंसीसहर नगरपालिकाको जिल्ला समन्वय समितिको हलमा मतगणना हुनेछ । सुन्दरबजार नगरपालिका, राइनास नगरपालिका, मर्स्याङ्दी गाउँपालिका, दूधपोखरी गाउँपालिका र दोर्दी गाउँपालिकाको कार्यालय रहेको भवनमा मतगणनास्थल बनाइएको छ । मध्यनेपाल नगरपालिकामा एउटा भवन भाडामा लिएर मतगणनास्थल बनाइएको छ । क्व्होलासोंथर गाउँपालिकाको मतगणना शारदा माविको भवनमा हुनेछ । सबै ठाउँमा तारजाली र सीसी क्यामरासहित मतगणनास्थल बनाइएको मुख्य निर्वाचन अधिकृतको कार्यालयले जनाएको छ ।

प्रकाशित : वैशाख २८, २०७९ २०:४४
पूरा पढ्नुहोस्
प्रतिक्रिया
पठाउनुहोस्
x
×