फिलिपिन्सको राष्ट्रपतिमा मार्कोस जुनियर- विश्व - कान्तिपुर समाचार

फिलिपिन्सको राष्ट्रपतिमा मार्कोस जुनियर

एजेन्सी

मनिला — फिलिपिन्सको राष्ट्रपतिमा फर्डिनान्ड मार्कोस जुनियर निर्वाचित भएका छन् । उनी पूर्वराष्ट्रपति तथा तानाशाही फर्डिनान्ड मार्कोसका छोरा हुन् । ६४ वर्षीय मार्कोस पूर्वसिनेटरसमेत हुन् । 


त्यसैगरी, राष्ट्रपति रोड्रिगो डुटेर्टेकी छोरी सारा उपराष्ट्रपतिमा निर्वाचित भएकी छन् । पूर्वराष्ट्रपति मार्कोस र वर्तमान राष्ट्रपति डुटेर्टेले चुनावी तालमेल गरेर राष्ट्रपति र उपराष्ट्रपति पदका लागि आफ्ना छोरा र छोरीलाई उम्मेदवार बनाएका थिए ।

निर्वाचन आयोगका अनुसार राष्ट्रपतिमा निर्वाचित मार्कोस जुनियरले ५६ प्रतिशत मत पाएका छन् । यो उनका निकटतम प्रतिस्पर्धीको भन्दा दोब्बर हो । आयोगका अनुसार मार्कोस जुनियरले प्रतिस्पर्धी वर्तमान उपराष्ट्रपति लेनी रोब्रेडोको भन्दा १ करोड ६० लाखभन्दा बढी मत पाएका हुन् ।

फिलिपिन्सको राजनीतिमा मार्कोस र डुटेर्टो परिवार प्रभावशाली मानिन्छन् । जसका कारण उनीहरूको चुनावी तालमेल सफल भएको जनाइएको छ । मार्कोस जुनियरको जितसँगै फिलिपिन्समा ३६ वर्षपछि मार्कोस परिवार सत्तामा आएको छ । फर्डिनान्ड मार्कोस सन् १९६५ मा राष्ट्रपति बनेका थिए । निकै क्रूर शासकका रूपमा परिचित उनले सन् १९७२ मा मार्शल कानुन जारी गरी आफ्नो आलोचना गर्ने तथा फरक मत राख्ने हजारौंको ज्यान लिएका थिए ।

सन् १९८६ को विवादास्पद चुनावपछिको विद्रोहका कारण सत्ताच्युत भएपछि मार्कोस श्रीमती इमेल्दासहित अमेरिका भागेका थिए । देश छाडेर भाग्ने क्रममा मार्कोस दम्पतीले अर्बौं अमेरिकी डलर बराबरको नगद, गहना तथा अन्य बहुमूल्य सामग्री लिएर गएका थिए । सन् १९८९ मा मार्कोसको मृत्यु भएको २ वर्षपछि उनको परिवार फिलिपिन्स फर्केको हो । करिब १० अर्बको सम्पत्ति लिएर अमेरिका भागेको मार्कोस परिवारबाट सन् २०१३ मा ४ अर्ब बराबरको सम्पत्ति मात्र असुल गरिएको थियो ।

राष्ट्रपतिसहित देशभरबाट झन्डै १८ हजार प्रतिनिधि चयनका लागि फिलिपिन्समा सोमबार मतदान भएको हो । राष्ट्रपति, उपराष्ट्रपति, सांसद तथा स्थानीय प्रतिनिधिहरू चयनका लागि चुनाव गरिएको हो ।

नवनिर्वाचित राष्ट्रपति मार्कोसले गरिबी घटाउनेदेखि लोकतन्त्रलाई थप सुदृढ बनाउनेलगायतका प्रतिबद्धतासहित प्रतिस्पर्धामा उत्रेका थिए । त्यस्तै, कोरोनाका कारण थलिएको आर्थिक अवस्था सुधार्ने, रोजगारी बढाउनेलगायतका विषय उनका प्रमुख एजेन्डा छन् । फिलिपिन्सको राष्ट्रपतिका लागि दस जना चुनावी मैदानमा थिए ।

प्रकाशित : वैशाख २८, २०७९ ०७:२७
प्रतिक्रिया
पठाउनुहोस्

उपत्यकाका सबै केन्द्रमा पुग्यो निर्वाचन सामग्री

कर्मचारी र सुरक्षाकर्मी पनि खटाइयो, तीनै जिल्लामा निर्वाचनको तयारी अन्तिम चरणमा
कान्तिपुर संवाददाता

काठमाडौँ — स्थानीय तह निर्वाचनका लागि निर्वाचन सामग्रीसहित कर्मचारी मतदान केन्द्रमा खटिएका छन् । मतदाता परिचयपत्र, मतपेटिकालगायत निर्वाचनमा चाहिने ५८ प्रकारका सामग्रीसहित मतदान अधिकृतसहितका कर्मचारी उपत्यकाका तीनवटै जिल्लाका प्रत्येक निर्वाचन केन्द्रमा खटिएका हुन् ।

भक्तपुरमा कुल १ हजार ९८ जना कर्मचारी मतदान केन्द्रमा खटिएका जिल्ला निर्वाचन कार्यालय प्रमुख नरेन्द्रप्रसाद न्यौपानेले बताए । उनका अनुसार जिल्लाभर ७७ मतदाता स्थलमा २१९ मतदान केन्द्र तोकिएको छ । प्रत्येक केन्द्रमा मतदान अधिकृत, सहायक मतदान अधिकृत, २ जना सहायक कर्मचारी, सहयोगी कर्मचारी र ३ स्वयंसेवक गरी ८ जना कर्मचारी खटाइएको छ । ‘पाँच सयभन्दा बढी मतदाता भएको केन्द्रमा मतदान अधिकृतसहित ५ जना कर्मचारी र ३ स्वयंसेवक खटिनुभएको छ,’ उनले भने, ‘भक्तपुरका सबै मतदान केन्द्रमा ५ सयभन्दा बढी नै मतदाता हुनुहुन्छ ।’

मतदान केन्द्रमा खटिएका कर्मचारीले मतदाता परिचयपत्र वितरण गर्ने, मतदाता शिक्षा दिने र मतदान केन्द्र निर्माण गरी निर्वाचनको तयारी गर्नेछन् । जिल्लाका ४ स्थानीय तहमा ९७ हजार ३ सय १४ महिला, ९२ हजार २ सय ६५ पुरुष र अन्य ५ सहित १ लाख ८९ हजार ५ सय ८४ मतदाता छन् । भक्तपुरकी प्रमुख जिल्ला अधिकारी रुद्रादेवी शर्माका अनुसार निर्वाचन सुरक्षाका लागि मतदान केन्द्रहरूमा ५१५ नेपाल प्रहरी, २०३ सशस्त्र प्रहरी, ७७० म्यादी प्रहरी र नेपाली सेना परिचालन भइसकेका छन् ।

जिल्ला निर्वाचन कार्यालय ललितपुरकी निर्वाचन अधिकृत गोमा धमला घिमिरेले शुक्रबार हुने स्थानीय तह निर्वाचनको ९० प्रतिशत काम सम्पन्न भइसकेको बताइन् । जिल्लाका ६ स्थानीय तहमा १ लाख २४ हजार ९ सय ५० महिला, १ लाख १८ हजार ९ सय ३३ पुरुष र अन्य १ सहित २ लाख ४३ हजार ८ सय ८४ मतदाता छन् । १३१ मतदानस्थलका २८८ केन्द्रमा १ हजार ४ सय ४० कर्मचारी निर्वाचन सामग्रीसहित खटिइसकेका उनले जनाइन् । ‘जिल्लाको ग्रामीण भेगका मतदान केन्द्रमा सोमबार नै निर्वाचन सामग्री पुगेर निर्वाचनको तयारी भइरहेको छ,’ उनले भनिन् ।

काठमाडौं जिल्लामा पनि आसन्न निर्वाचनको तयारी अन्तिम चरणमा पुगेको जनाएको छ । काठमाडौं महानगरपालिकासहितका ११ वटै स्थानीय तहका मतदान केन्द्रमा कर्मचारी खटिइसकेका जिल्ला निर्वाचन कार्यालय काठमाडौंले जनाएको छ । जिल्लामा ६ लाख ३७ हजार ७ सय मतदाता छन् । निर्वाचनका लागि ३२० मतदानस्थल छन् । मतदाताको संख्या धेरै भएकाले ‘क’, ‘ख’ र ‘ग’ गरी ७५९ मतदान केन्द्र छुट्याइएको कार्यालय प्रमुख ठाकुर भट्टराईले बताए । ‘मतदानको तयारी अन्तिम अवस्थामा छ,’ उनले भने, ‘कर्मचारीको टोली मतदानस्थल पुगिसकेको छ ।’

निर्वाचनलाई स्वच्छ, निष्पक्ष र भयरहित रूपमा सम्पन्न गर्न सोमबार भक्तपुरकी प्रमुख जिल्ला अधिकारी रुद्रादेवी शर्माको अध्यक्षतामा तीनवटै जिल्लाका प्रजिअ र सुरक्षा समितिका पदाधिकारीहरूको बैठक बसेको छ । बैठकले शान्तिसुरक्षा, अपराध न्यूनीकरण, स्थानीय तह निर्वाचनलाई स्वच्छ, स्वतन्त्र, निष्पक्ष, भयरहित रूपमा सम्पन्न गर्नेलगायत निर्णय गरेको छ ।

प्रकाशित : वैशाख २८, २०७९ ०७:१३
पूरा पढ्नुहोस्
प्रतिक्रिया
पठाउनुहोस्
x
×