मधेसलाई अवसर बन्दै दरभंगामा विमानस्थल- विश्व - कान्तिपुर समाचार
कान्तिपुर वेबसाईट
AdvertisementAdvertisement

मधेसलाई अवसर बन्दै दरभंगामा विमानस्थल

‘एयर कनेक्टिभिटी’ का कारण भारतका प्रमुख सहरसँग सीमा क्षेत्रका नेपालीको पहुँच सहज
राजेश मिश्र

दरभंगा, बिहार — नेपालसँग सीमा जोडिएको भारतीय राज्य बिहारको दरभंगास्थित विमानस्थलका कारण नेपालको मधेस प्रदेशवासीले पनि लाभ उठाउन पाउने भएका छन् । विमानस्थल सञ्चालन आएसँगै मधेसका कतिपय जिल्लाका स्थानीय केही घण्टामै मुम्बई, दिल्लीलगायत भारतीय सहर पुग्न सक्ने भएका हुन् । उक्त विमानस्थल प्रदेश राजधानी जनकपुरबाट ८० किलोमिटरको दूरीमा छ ।

दरभंगामा विकसित ‘एयर कनेक्टिभिटी’ ले सिंगो प्राचीन मिथिला (नेपाल र भारत दुवै क्षेत्रका) लाई आधुनिकता र वैभवताले सम्पन्न सहरसँग जोडेको हो । दरभंगाबाट अहिले डेढदेखि अढाई घण्टाभित्रै दिल्ली, मुम्बई, कोलकाता, बैंग्लोर र हैदराबाद पुग्न सकिने भएको छ । सर्वसाधारणका लागि उक्त विमानस्थल सञ्चालनमा आएको डेढ वर्ष पुग्दै छ । यस अवधिमा ७ लाख बढीले आउजाउ गरेको तथ्यांक छ । तीमध्ये नेपालीको संख्या पनि उल्लेख्य रहेको विमानस्थल स्रोतले बतायो ।

जनकपुरबाहेक मधेस प्रदेशका सीमावर्ती सहर मलंगवा, जलेश्वर, माडर र राजविराजको पनि दरभंगासँग निकटता छ । पूर्वमा सुनसरी, मोरङ, झापादेखि पहाडी जिल्लाका बासिन्दालाई पश्चिम बंगालको बागडोग्रा विमानस्थलले भारतका विभिन्न सहरसँग जोडेको छ । त्यस्तै, पश्चिममा गोरखपुर र लखनउ विमानस्थलले त्यस क्षेत्रका नेपालीलाई हवाई यात्रामा सहज बनाएको छ । मध्यतराई र नजिकैका पहाडी जिल्लाका लागि दरभंगा विमानस्थलले गोरखपुर र बागडोगरा विमानस्थल जत्तिकै सम्भावना दिएको छ ।

हिन्दुस्तान टाइम्सका दरभंगा ब्युरो प्रमुख विष्णुकुमार झा विमानस्थल सञ्चालनका कारण यस क्षेत्रले आर्थिक, सामाजिक र सांस्कृतिक पक्षमा धेरै ठूलो फड्को मार्ने आशा व्यक्त गर्छन् । त्यसका संकेतहरू देखा पर्न थालिसकेको उनको भनाइ छ । गत वर्ष मिथिलाञ्चलका आँप र लिची विमानमार्फत विभिन्न भारतीय सहर पुगेको जनाउँदै उनले नेपाली किसानले लाभ उठाएको बताए । ‘प्राचीन मिथिलाञ्चल भनेपछि भारतको मात्रै होइन, नेपालको पनि तराई क्षेत्रको ठूलो हिस्सा समेटिन्छ,’ उनले भने । भारतीय पर्यटकलाई जनकपुर भित्र्याउन पनि विमानस्थलले ठूलो भूमिका खेल्ने उनको भनाइ छ । दक्षिण भारतका प्रमुख सहर हैदराबाद र बैंग्लोरमा दरभंगाबाट दैनिक उडान छ । नेपालमा पशुपतिनाथ र मुक्तिनाथ दर्शनका लागि आउने भारतीय धार्मिक पर्यटकमा दक्षिणी भारतीयको संख्या उल्लेख्य छ । तर उनीहरू जनकपुर भने पुग्दैनन् ।

दक्षिण भारतका धार्मिक पर्यटक तान्न सके जनकपुरले लाभ उठाउन सक्छ । हाल भारतका विभिन्न सहरमा स्वास्थ्य उपचार, अध्ययन र काम विशेषले जाने मध्य तराईवासीले दरभंगा रुटको प्रयोग गर्न थालिसकेका छन् । पटना विमानस्थलको तुलनामा छोटो र सहज भएकाले सीमा क्षेत्रका नेपालीलाई सहजता मिलेको हो । ‘दरभंगा आउने हरेक विमानमा केही संख्यामा नेपाली नागरिक हुन्छन् नै,’ पत्रकार झाले थपे, ‘विमानस्थलबाहिर ट्याक्सी तथा भाडाका गाडीले त्यताका यात्रु तान्न जनकपुर, जनकपुर भन्दै कराएको सुनिन्छ ।’

जनकपुरका व्यवसायी सञ्जय रौनियार दरभंगा रुटको प्रयोग गर्ने नेपालीको संख्या बढ्दै गएको बताउँछन् । उनी आफैं पनि दरभंगाबाट दिल्ली आउजाउ गरिरहन्छन् । दिल्लीस्थित एनबी टुर एन्ड ट्राभल्सका सञ्चालक विष्णु शाही तराईका बासिन्दालाई दरभंगा रुटले सहज बनाएको बताउँछन् । ‘जनकपुरतिर जानुपर्ने धेरैले दरभंगा रुटबारे सोधीखोजी गर्ने र टिकट काट्ने गरिरहनुभएको छ,’ उनले भने । हवाई यात्राबाट दरभंगा हुँदै केही घण्टामै जनकपुर पुग्न सकिनेबारे भारतीय पर्यटकलाई जानकारी दिन सके धार्मिक पर्यटक तान्न सकिने रौनियारको बुझाइ छ ।

भारतीय हवाई सेनाको अधीनमा रहेको दरभंगा विमानस्थललाई सन् २०२० को नोभेम्बर ८ देखि नागरिक उड्डयनका लागि प्रयोगमा ल्याइएको हो । विमानस्थलमा ९ हजार फिट लामो रनवे भएकाले ठूला विमान उड्न र अवतरण गर्न सहज हुन्छ । हाल दरभंगाबाट दिल्ली, मुम्बई र बैंग्लोरमा दैनिक २/२ उडान हुन्छन् । कोलकाता र हैदराबादका लागि १/१ उडान छन् । ‘रिजनल कनेक्टिभिटी’ योजनाअन्तर्गत भारत सरकारले देशका विभिन्न ९ सय हवाई रुट स्वीकृत गरिसकेको छ । ३ सय ५० स्थानमा हवाई सेवा सुरु भइसकेको छ । त्यसैअन्तर्गत दरभंगामा उडान सुरु भएको हो । विमानस्थलमा नयाँ आधुनिक टर्मिनल भवन निर्माणका लागि बिहार सरकारले बजेटसमेत छुट्याइसकेको छ ।

प्रकाशित : वैशाख ९, २०७९ ११:००
प्रतिक्रिया
पठाउनुहोस्

भारतमा एकै दिन ९० प्रतिशतले बढ्यो

राजेश मिश्र

नयाँदिल्ली — भारतमा कोरोनाको चौथो लहरको संकेत देखिन थालेको छ । एकै दिनमा संक्रमितको संख्या झन्डै ९० प्रतिशतले बढेको छ । पछिल्लो २४ घण्टामा भारतभर २ हजार १ सय ८३ नयाँ संक्रमित भेटिएका छन् । अघिल्लो दिन संक्रमितको संख्या १ हजार १ सय ५० थियो । भारतको केन्द्रीय स्वास्थ्य मन्त्रालयका अनुसार कोरोनाका कारण पछिल्लो २४ घण्टामा २ सय १४ जनाको मृत्यु भएको छ ।

भारतमा संक्रमितको संख्या एकाएक बढ्न थालेपछि राज्य सरकारहरूले फेरि आम मानिसले अपनाउनुपर्ने स्वास्थ्य मापदण्ड जारी गर्न थालेका छन् । नेपालसँग सीमा जोडिएको उत्तर प्रदेशका केही सहरमा मास्कलाई पुनः अनिवार्य गरिएको छ भने सभा, सम्मेलनमा रोक लगाइएको छ ।

उत्तर प्रदेशमा तीन दिनमै २ सय नयाँ संक्रमित भेटिएपछि मुख्यमन्क्री योगी आदित्यनाथले संत्रमणको पछिल्लो अवस्थाबारे सोमबार समीक्षा बैठक गरेका थिए । बैठकपछि उनले गौतमबुद्ध नगर, गाजियावाद, हापुड, मेरठ, बुलंदशहर, बागपत र लखनउमा सार्वजनिक स्थानमा मास्कलाई अनिवार्य गर्न निर्देशन दिएका छन् । खोप नलगाएका व्यक्तिको पहिचान गरी खोप कार्यक्रमलाई थप गति दिन पनि उनले निर्देश गरेका छन् ।

उत्तर प्रदेशमा पछिल्लो २४ घण्टामा १३५ जना नयाँ संक्रमित भेटिएका छन् भने एक जनाको मृत्यु झएको छ । सक्रिय संत्रमितको संख्या ६९५ छ । केन्द्रीय राजधानी दिल्लीसँगैको गाजियावादका १२ स्कुलमा पनि संक्रमित भेटिएका छन् । त्यहाँ स्थानीय प्रशासनले जुन १० सम्म कुनै पनि सभा, सम्मेलन, जुलुस नगर्न निर्देशन जारी गरेको छ । त्यहाँ ३२ छाक्र र ५ शिक्षकमा संत्रमण पुष्टि भएको छ । त्यसमा १२ वर्षमुनिका ३ र २० वर्षसम्मका ५ जना छात्र पनि छन् । प्रशासनले नयाँ गाइडलाइन दिए पनि विद्यालय भने बन्द गराइएको छैन ।

गत डिसेम्बरमा कोरोनाको तेस्रो लहर फैलिएको थियो । स्थिति सामान्य भएको दुई महिना नबित्दै सातायता संक्रमितको संख्या ह्वात्तै बढेको छ । दिल्ली, हरियाणा, उत्तरप्रदेश, केरला, महाराष्ट्र र मिजोरममा संक्रमितहरूको संख्या तीव्र रूपमा बढ्न थालेको हो । दिल्लीमा एक साताको अन्तरालमा १ सय ४५ प्रतिशतले संक्रमित बढेका छन् । पछिल्लो ७ दिनमा २ हजार ३ सय ७ संक्रमित भेटिएका छन् । त्योभन्दा अगाडि सातामा ९ सय ४३ संक्रमित पाइएको थियो ।

उत्तर प्रदेशसँग नेपालको लामो खुला सीमा छ भने दिल्ली र काठमाडौंको सम्पर्क बढी छ । मुम्बई–काठमाडौंबीच पनि सिधा उडान पनि छन् । २७ मार्चबाट भारतले व्यावसायिक उडानका लागि सबै विमानस्थल खुला गरेपछि दिल्ली–काठमाडौंबीच दैनिक ६ वटा फ्लाइट सञ्चालनमा छन् । त्यस्तै, नेपाल एयरलाइन्सले मुम्बईका लागि भर्खरै मात्र सातामा ३ वटा उडान थालेको छ । काठमाडौं आउँदाजाँदा दुवैतिर अनिवार्य पीसीआर परीक्षण गर्नुपर्ने गाइडलाइन हटाइएको छ । खोप कार्डले दुवैतिर मान्यता पाएको छ ।

प्रकाशित : वैशाख ६, २०७९ ०६:३८
पूरा पढ्नुहोस्
प्रतिक्रिया
पठाउनुहोस्
×