भारतमा कोरोनाको चौथो लहरको जोखिम : उच्च सतर्कता अपनाउन निर्देशन- विश्व - कान्तिपुर समाचार

भारतमा कोरोनाको चौथो लहरको जोखिम : उच्च सतर्कता अपनाउन निर्देशन

राजेश मिश्र

नयाँदिल्ली — कोरोनाको तेस्रो लहर सकिएको केही महिनामै भारतको राजधानी नयाँदिल्लीसहित केही सहरलाई चौथो लहरले तर्साउन थालेको छ । दिल्ली, महाराष्ट्र, हरियाणा, केरल, मिजोरम र अरुणाचल प्रदेशमा कोरोनाका नयाँ भेरियन्टबाट संक्रमितहरू देखिन थालेपछि चौथो लहरको आशंका गर्न थालिएको हो । 

दिल्लीमा कोरानाका लागि लगाइएको सम्पूर्ण प्रतिबन्ध हटाइएको एक महिना पनि नबित्दै नयाँ संक्रमितहरू भेटिएका छन् । राजधानी दिल्लीमा कोरोना संक्रमणको स्थिति दुई महिनापूर्वको अवस्थामा फर्केको छ । लगातार दुई दिनयता संक्रमण दर दुई प्रतिशतमाथि छ । एक सातायात क्रमशः होम आइसोलेनमा बस्नेहरुको संख्यामा ४८ प्रतिशतले वृद्धि भएको छ । संक्रमणदरमा दैनिक रूपमै बढोत्तरी देखिनु चिन्ताको विषय मानिएको छ । यसअघि गत पुसमा २ प्रतिशतभन्दा माथि संक्रमणदर पुगेपछि दिल्ली सरकारले विभिन्न सतर्कताहरु अपनाउन थालेको थियो ।

यतिबेला दिल्लीमा मास्क लगाउन आग्रह गरिए पनि त्यसलाई अनिवार्य नियममा राखिएको छैन । मेट्रो, बस र बजार सबैलाई पूर्ण रुपमा खुलाइएको छ । अनलाइन कक्षा पूर्ण रूपले हटाएर विद्यालय र कलेज खोलिसकिएको छ । अन्तर्राष्ट्रिय उडानहरु खुलाइसकिएको छ । तेस्रो लहरको मारबाट तंग्रिन खोजेका बेला चौथो लहरको खतरा बढेर गएको छ । विद्यालायमा विद्यार्थी र शिक्षकलाई समेत संक्रमण देखिन थालेको छ । संक्रमण देखिएपछि कतिपय विद्यालय अस्थायी रूपमा बन्दसमेत गराइएको छ ।

केन्द्रीय स्वास्थ्यमन्त्री मनसुख मंडावियाले कोरोनालाई लिएर लापर्बाही नगर्न सर्वसाधारणलाई आह्वान गरेका छन् । उनले विशेषज्ञहरूसँगको बैठकपछि सबै राज्य सरकारलाई उच्च सतर्ककता अपनाउन भनेका छन् । केन्द्रीय स्वास्थ्य तथा परिवार कल्याण मन्त्रालयले दिल्ली, हरियाणा, केरल, महाराष्ट्र र मिजोरम सरकारलाई चिठी लेखेर कोरोनालाई लिएर विशेष तयारी र सतर्कता अपनाउन भनेको छ ।

आवश्यकताअनुसार कोरोनाका लागि नयाँ गाइडलाइन जारी गर्न पनि केन्द्रले राज्य सरकारहरूलाई भनेको छ । भारतमा अहिलेसम्म कोरोनाको विभिन्न लहरबाट ४ करोड ३० लाखभन्दा बढी व्यक्तिहरू संक्रमित भइसकेका छन् । ५ लाख २१ हजारभन्दा बढीले ज्यान गुमाएका छन् ।

कोरोनाको नयाँ संक्रमणलाई ‘स्टेल्थ ओमिक्रोन’ भनिएको छ । यसका लागि ओमिक्रोनको सब भेरियन्ट बीए.२ र एक्स ई भेरिएन्टलाई जिम्मेवार मानिएको छ । साउथ कोरिया, जर्मनी, चीनमा यो भेरियन्टले धेरैलाई संक्रमित बनाएको छ ।

प्रकाशित : वैशाख २, २०७९ १९:३४
प्रतिक्रिया
पठाउनुहोस्

कांग्रेसकै भरमा मात्रै माओवादी र समाजवादीलाई जिताउन सकिँदैन : बलायर

कान्तिपुर संवाददाता

काठमाडौँ — नेपाली कांग्रेसका सुदूरपश्चिम प्रदेश सभापति बीरबहादुर वलायरले चुनावी तालमेल गर्दा कांग्रेसकै भरमा मात्रै नेकपा (माओवादी केन्द्र) र नेकपा एकीकृत समाजवादीका उम्मेदवारलाई जिताउन नसकिने बताएका छन् । उनले गठबन्धन केन्द्रको सहमतिबमोजिम मतभारलाई हेरेर तालमेलका ढाँचा तयार हुनुपर्ने र त्यसआधारमा गठबन्धन भए शतप्रतिशत नतिजा आउने बताए ।

‘गठबन्धन नगर्ने भन्दा–भन्दै हामी गठबन्धन गर्ने भन्ने राष्ट्रिय आवश्यकतालाई महसुस गरेर अघि बढेका छौँ,’ सभापति बलायरले इकान्तिपुरसँग भने, ‘तर कांग्रेसलाई मात्रै टेकेर, कांग्रेसकै भरमा मात्रै माओवादी र समाजवादीले चुनाव जित्न, फाइदा उठाउन खोजे भने त्यो सम्भव छैन । कांग्रेसकै भरमा मात्रै जिताउन सकिदैँन ।’

उनले केन्द्रमा गठबन्धन गर्ने समझदारी बनेपनि स्थानीय तहमा अझैपनि गठबन्धन गर्न नहुने र गठबन्धन गर्दा पार्टीलाई क्षति हुने मत बलियो रहेको बताए । ‘कोही गठबन्धन गर्नै हुँदैन भनेका छन्, कोहीले गठबन्धन गर्ने भनेर तालमेल गर्ने निर्णय नै गरिसके,’ उनले भने, ‘प्रदेश तहमा हामी गठबन्धन दलबीच संयन्त्रको बैठकको तयारीमा छौँ, भोलिदेखि त्यसबारे छलफल हुन्छ ।’

उनले गक्षअनुसारको माग राखे सुदूरपश्चिमका सबै पालिकामा गठबन्धनको सम्भावना रहेको बताए । ‘जहाँ जसको मतभार जति छ, त्यहीअनुसारको सिट माग गर्नुभयो भने गठबन्धन सम्भव छ, नभए गठबन्धन गरेर कांग्रेस मास्ने, उहाँहरूलाई उकास्नुपर्ने आवश्यक छैन,’ उनले भने, ‘यदि त्यस्तो भयो भने एक्ला–एक्लै लड्नुपर्ने परिस्थिति आउन सक्छ ।’

प्रकाशित : वैशाख २, २०७९ १९:१६
पूरा पढ्नुहोस्
प्रतिक्रिया
पठाउनुहोस्
×