बेलायती महारानीले सम्झिइन् दुई ऐतिहासिक नेपाल भ्रमण- विश्व - कान्तिपुर समाचार
कान्तिपुर वेबसाईट
AdvertisementAdvertisement

बेलायती महारानीले सम्झिइन् दुई ऐतिहासिक नेपाल भ्रमण

नवीन पोखरेल

लन्डन — बेलायती महारानी एलिजावेथ द्वितीयाले नेपालमा आफूले गरेको दुई ऐतिहासिक राजकीय भ्रमणको स्मरण गरेकी छन् । महारानीले बेलायत नेपालबीच सदियौं लामो मैत्रीपूर्ण तथा आत्मीय सम्बन्धको पनि चर्चा गरेकी छन् ।


बेलायतका लागि २२औँ नेपाली राजदूत ज्ञानचन्द्र आचार्यले बिहीबार बकिङहम प्यालेसमा आफ्नो ओहोदाको प्रमाणपत्र पेश गर्ने क्रममा भिडियो लिंकमार्फत विन्डसोर क्यासलस्थित आफ्नो निवासबाटै जोडिएकी महारानीले राजदूत आचार्यको कार्यकाल सफलताको शुभकामना दिँदै उनको पालामा बेलायत-नेपाल सम्बन्ध थप सुमधुर बन्ने आशासमेत व्यक्त गरेकी थिइन् ।

करिब १० मिनेट लामो संवादमा राजदूत आचार्यले नेपालको सामाजिक-आर्थिक विकास तथा हालै कोभिड महामारीसँग जुध्न बेलायतले गरेको सहायताका लागि आभार प्रकट गरे ।

राजदूत आचार्यले आफ्नो कार्यकालमा नेपाल-बेलायत सम्बन्ध थप सुदृढ, बलियो र बहुआयामिक बनाउने प्रतिबद्धतासमेत व्यक्त गरेका थिए ।

उनले नेपालकी राष्ट्रपति विद्यादेवी भण्डारी र प्रधानमन्त्री शेरबहादुर देउवाको तर्फबाट महारानी र बेलायती जनतालाई पठाएको शुभकामना सन्देश सुनाएका थिए ।

राजदूत आचार्यले गत फेब्रुअरी २३ देखि आफ्नो कार्यभार सम्हालेका थिए । महारानीलाई ओहोदाको प्रमाणपत्र बुझाएको अवसरमा दिउँसो दूतावासमा एक रिसेप्सन आयोजना गरियो ।

प्रकाशित : चैत्र १८, २०७८ १२:३३
प्रतिक्रिया
पठाउनुहोस्

गोविन्दको कला:लन्डन हुँदै दुबई

नवीन पोखरेल

लन्डन — कक्षा कोठामा लेखपढ भन्दा चित्र कोरेर समय बिताउन रमाउँथे उनी । न प्रशिक्षण, न पढाइ । भित्तामा जे देख्यो त्यही उतार्न तम्सिने उनको जोश थियो । पढाइमा तेज छोरालाई इन्जिनियर बनाउने बाबुआमाको चाहना उनको चित्रकला लहड अगाडि के लाग्थ्यो र ? 

सप्तरी राजविराजका गोविन्दप्रसाद साह साथीकै उक्साहटमा भागेर दिल्ली पुगे साइनबोर्ड लेख्न । उनको साथी साइनबोर्ड लेख्ने काम गर्दथ्यो । गोविन्दले एसएसलसी पास भएको पनि धेरै पछि दिल्लीमै थाहा पाएका थिए ।

सन् १९९१ देखि ०९४ सम्म दिल्लीमा बस्दा उनले सुरुमा केही महिना साइनबोर्ड र भित्तामा लेख्ने काम गरे, पछि मारुती फ्याक्ट्रीमा रंगरोगनकै काम थाले । जीविकोपार्जनका लागि कमाइ राम्रै भएपनि गोविन्दको चाहना व्यवसायिक कलाकार बनेर विश्व जगतमा छाउने थियो । उनी त्यहाँ धेरै टिकेनन् ।

करिब ५ वर्षपछि सन् १९९५ मा काठमाडौं फिरे । भौतारिँदै जाँदा उनले सामाखुशीमा कलाकार कृष्णगोपाल रन्जितलाई भेटे । गोविन्दले आफ्नो इच्छा कृष्णगोपाललाई बताएपछि उनले आफैं चित्र कोर्न नसिकाउने बरु भोटाहिटी ललितकला क्याम्पस जान सुझाए ।

२०५१ साल तिर उनले कला अध्ययन अगाडि बढाए । अध्ययनका क्रममा उनले विभिन्न सामूहिक प्रदर्शनीमा भाग लिएर सन् १९९९ मा एकल चित्रकला प्रदर्शनी गर्न सफल भए ।

सन् २००३ मा ललितकलाबाट बीएफए उत्तिर्ण गरेपछि गोविन्दले सन् २००६ तिर ढाकाको युनिभर्सिटी अफ डेभलप्मेन्ट अल्टरनेटिभबाट फाइन आर्टमा एमए गर्ने अवसर पाए । लगत्तै सन् २००८ मा लन्डनको वीम्बल्डन कलेज अफ आर्टबाट फेरि एमएफए गरे ।

सन् २००७ मा लन्डन टेकेका गोविन्दप्रसाद साह 'आजाद' अहिले अन्तर्राष्ट्रिय कलाकारको रुपमा स्थापित छन् । उनी सेन्ट्रल लन्डनस्थित प्रख्यात आर्ट ग्यालरी अक्टोबर ग्यालरीसँग आवद्ध छन् ।

अक्टोबर ग्यालरीमा उनको पहिलो चित्रकला प्रदर्शनी सन् २०११ मा भएको थियो । त्यसको वर्षदिनपछि सन् २०१२ मा रोयल एकेडेमी अफ आर्टस् लन्डनमा समर एक्जिविसनमा उनका चित्र सामेल भए ।

सन् २०१३ मा अक्टोबर ग्यालरीमै गोविन्दको दोस्रो र सन् २०१६ मा तेस्रो एकल चित्रकला प्रदर्शनी भयो । गोविन्द अक्टोबर ग्यालरीमा केही साताअघि फेरि उदाए । गत फेब्रुअरी २ देखि मार्च १२ सम्म करिब ५ हप्ता चलेको प्रदर्शनीमा उनका करिब ५० चित्र थिए । एसिया (जापान, चीन, साउथ कोरिया र नेपाल) मुलका अन्तर्राष्ट्रिय कलाकारहरुका चित्र उक्त प्रदर्शनीमा सामेल थिए ।

यतिखेर गोविन्द फाइन आर्ट अध्ययनरत विद्यार्थीसँग अन्तरक्रिया गर्न दुबई पुगेका छन् । २९ मार्चमा टक शो सकेर उनी ३० मार्च मा लन्डन फर्कने कार्यक्रम छ ।

चित्रकला संकलनका सौखिन रमिज मोमिनले आयोजना गरेको 'भ्वाइस अफ आर्ट' 
अन्तरक्रियात्मक सेसनमा पिकासोसँग दाजिने एमएफ हुसेन पनि सहभागी हुँदैछन् ।

यो कार्यक्रम आफ्ना लागि बेग्लै महत्वको भएको साहले बताए । नेपाली राजदूतसमेत सहभागी हुने बताइएको उक्त कार्यक्रममा उनले फाइन आर्ट पढिरहेका किशोरकिशोरीसँग साक्षात्कार 
गर्नेछन् । दुबईको शाही परिवारले सन् २०११ देखि नै आफ्नो चित्र किनेकाले दुबईसँग उनको बेग्लै भावनात्मक सम्बन्ध गाँसिएको छ ।

इङ्ल्याण्डमा उनी पूर्ण रुपमा यही पेशामा व्यस्त छन् । विश्वका कयौं देशमा आफ्नो चित्र पुगेको बताउने उनले आफ्नो एउटा चित्र ३० लाख रुपैयाँसम्म बिक्री भएको बताए ।

उनका चित्र अमूर्त हुन्छन् । पहिला हिमाल, ल्याण्डस्केप, मठ मन्दिर, मानिस आदिको चित्र कोर्थे उनी । तर अहिले अमूर्त पेन्टिङमा रमाइरहेका छन् साह ।

'मेरो अमूर्त पेन्टिङले मनको भाव व्यक्त गर्छ, सबैलाई टच गर्ने भएर मानिसहरु मेरो कला रुचाउँछन्', उनले भने, 'संगीत सुनेर मानिस रोए जस्तै मेरो चित्रले पनि मन पगाल्छ । कतिपय मानिसहरु पेन्टिङको अगाडि रुन्छन् ।'

क्यानभासमा तेल र एक्रेलिक कलर (पानी रंग) प्रयोग गर्ने उनी आर्टमा थ्योरी नहुने बताउँछन् । 'पहिला आर्ट हुन्छ अनि पछि थ्योरी'- उनले प्रष्टयाए-'आर्ट जति सिक्यो उति व्यापकता हुने रहेछ ।'

पश्चिमी देशहरुले समाज निर्माणमा कला, दर्शन र विज्ञानलाई मेरुदण्ड माने पनि नेपालमा यो अभ्यास नभएको उनले सुनाए ।

'हामीले अझै यसको महत्व बुझेका छैनौं', उनले भने, 'अन्तर्राष्ट्रिय बजारमा नेपाली कलाकार कम भएकाले नेपाली आर्टलाई प्रवर्द्धन गर्न सकिएको छैन ।'


प्रकाशित : चैत्र १६, २०७८ १५:१२
पूरा पढ्नुहोस्
प्रतिक्रिया
पठाउनुहोस्
×