सीमामै रोकिए कोभिड प्रतिबन्धविरूद्ध ब्रसेल्स हिँडेका प्रदर्शनकारी- विश्व - कान्तिपुर समाचार
कान्तिपुर वेबसाईट
AdvertisementAdvertisement

सीमामै रोकिए कोभिड प्रतिबन्धविरूद्ध ब्रसेल्स हिँडेका प्रदर्शनकारी

ददि सापकोटा

काठमाडौँ — बेल्जियमको राजधानी ब्रसेल्समा प्रदर्शन गर्न भन्दै हिँडेका प्रदर्शनकारीहरूलाई प्रहरीले फ्रान्सको सीमामै रोकेको छ । सरकारले कोरोना संक्रमण नियन्त्रण गर्नका लागि देशभर लगाएको प्रतिबन्ध र कोभिडविरुद्धको खोपविरुद्ध प्रदर्शन गर्न बेल्जियमको राजधानी ब्रसेल्समा प्रदर्शनका लागि जाँदै गर्दा उनीहरूलाई सोमबार फ्रान्सको सीमामै रोकिएको हो ।

कोभिड-१९ लाई मध्यनजर गर्दै क्यानडाले लगाएको प्रतिबन्ध र अनिवार्य खोप लगाउनुपर्ने नियमका कारण केहि समययता क्यानडाका ट्रक चालकहरूले सरकारको विरोध गर्दै आएको र त्यहि शैलीमा विरोध गर्न ब्रसेल्सका लागि हिँडेका सयौं कार, क्याम्परभ्यान्स र ट्रकलाई प्रहरीले फ्रान्सेली सीमामै रोकिदिएका हुन् ।

पेरिसमा ट्रक ड्राइभरहरूले प्रदर्शन गरेको देख्नासाथ बेल्जियमका अधिकारीहरूले प्रदर्शनमा प्रतिबन्ध लगाएका थिए ।

फ्रान्सेली प्रहरीका अनुसार बेल्जियम प्रवेश गर्नका लागि फ्रान्सबाट करिब एक हजार तीन सय सवारी साधन आइतबार फ्रान्सेली सीमावर्ती सहर लिल नजिक पुगेका थिए ।

फ्रान्सेली झन्डा बोकेका प्रदर्शनकारीहरू लिल नजिकै पार्किङ स्थलमा क्याम्प लगाएर बसेका थिए । बेल्जियम प्रवेश गर्न लागेका उनीहरूलाई प्रहरीले रोकिदिएपछि प्रदर्शनकारीहरूले ‘हामी हार मान्ने छैनौं’‚ ‘स्वतन्त्रता चाहिन्छ, स्वतन्त्रता गुम्न दिँदैनौं’ लगायत नारा लगाएका थिए ।

‘हामीलाई रोक्ने प्रयास गरे पनि जसर भए पनि हामी ब्रसेल्स जान्छौं । स्थायी नियन्त्रणको यो नीतिविरूद्ध लड्न पनि हामी गएरै छाड्छौं‚’ आन्दोलनकारीको भनाइलाई उद्धृत गर्दै फ्रान्सेली मिडियाहरूले उल्लेख गरेका छन् ।

यहि सप्ताहन्तमा हजारौं प्रदर्शनकारीहरूले फ्रान्सेली राजधानीमा स्वास्थ्य प्रतिबन्ध र खोप पासविरुद्ध राजधानीलाई नाकाबन्दी गर्ने प्रयास गरेपछि प्रधानमन्त्री जँ कास्टेक्सले शहरलाई नाकाबन्दी गर्ने गरी प्रदर्शन गर्न नपाइने भन्दै प्रतिबन्धको घोषणा गरेका थिए ।

फ्रान्समा राष्ट्रपति इमानुएल म्याक्रोन नेतृत्वको सरकारले रेस्टुरेन्ट, क्याफे र अन्य सार्वजनिक स्थानहरूमा प्रवेश गर्न ‘भ्याक्सिन पास’ हुनुपर्ने नियम बनाइदिएपछि खोपविरोधी प्रदर्शनकारीहरूले त्यसविरुद्ध प्रदर्शन गर्दै आएका छन् ।

बेल्जियमका अधिकारीहरूले राजधानीमा ‘मोटराइज्ड’ गाडीहरू लिएर गरिने सबै प्रदर्शनहरूलाई प्रतिबन्ध लगाएका छन् । उनीहरूले राजधानी ब्रसेल्स युरोपेली राजधानीसमेत भएकाले उक्त क्षेत्रलाई अवरुद्ध हुनबाट रोक्नका लागि कदम चालेको बताएका छन् ।

ब्रसेल्स प्रहरीले सामाजिक सञ्जालमार्फत सबै नागरिकलाई कार वा सार्वजनिक यातायातबाट यात्रा गर्न सुझाव दिएको छ ।

अन्तर्राष्ट्रिय उच्च अदालत रहेको नेदरल्यान्ड्सको शहर द हेगमा आयोजना गरिएको यस्तै प्रदर्शनमा सहभागी केहीले बेल्जियम जाने आफ्नो मनशाय रहेको घोषणा गरेपछि बेल्जियमको प्रहरीले नेदरल्यान्ड्स र बेल्जियमको सीमामा पनि थप कडाइ गरेको छ ।

बेल्जियमको प्रहरीले सीमामा सवारी चेक गर्ने योजना बनाइएको भन्दै प्रतिबन्धको बाबजुद सवारी साधन राजधानी आएमा अन्यत्रै डाइभर्ट गरिने चेतावनी दिएको छ ।

ब्रसेल्स विमानस्थलका अधिकारीहरूले आफ्ना यात्रुहरूलाई सावधानी अपनाउन र सडक अवरुद्ध हुन सक्ने भन्दै रेलबाट यात्रा गर्न सुझाव दिएको छ ।

फ्रान्सेली प्रहरीले पेरिसमा करिब एक सय ट्रकवाहकहरूले नाराबाजी गर्ने र सडक अवरुद्ध पार्न थालेपछि तिनलाई तितरबितर पार्न शुक्रबार साँझ केहि राउन्ड अश्रु ग्यास प्रहार गरेको थियो ।

प्रकाशित : फाल्गुन २, २०७८ १७:३२
प्रतिक्रिया
पठाउनुहोस्

अनिवार्य खोप र प्रतिबन्धको विरोध गर्दै पेरिसमा विशाल प्रदर्शन

ददि सापकोटा

पेरिस — आफूलाई स्वतन्त्र आन्दोलनका पक्षधर बताउनेहरू शुक्रबार फ्रान्सभरबाट कोरोना प्रतिबन्ध र खोपको विरोध गर्न पेरिसमा भेला भएका छन् । फ्रान्सभरका प्रदर्शनकारीहरूले शुक्रबार क्यानडाबाट प्रेरित 'स्वतन्त्रता संरक्षण' को नाममा पेरिसमा देशको कोभिड-१९ खोप र सार्वजनिक स्वास्थ्य नीतिहरूको विरोधमा आवाज उठाउने योजनास्वरुप भेला भएका हुन् ।

आयोजकहरूले शान्तिपूर्ण रूपमा स्वतन्त्रता र मौलिक अधिकार उल्लङ्घनको विरोधमा आवाज उठाउने आफ्नो लक्ष्य रहेको दाबी गरेका छन् ।

तर देशभरबाट खोप र स्वास्थ्य प्रतिबन्धका विरोधीहरूले पटक पटक पेरिसको सार्वजनिक स्थल, यातायात बन्द गर्ने, घेराबन्दीको प्रयास गर्ने गरेकाले शुक्रबार मन्यान्हमा प्रधानमन्त्री जँ कास्टेक्सले राजधानीलाई 'ब्लक' गर्ने कुनै पनि र्‍यालीमाथि बन्देज लगाइने घोषणा गरेका छन् ।

'स्वतन्त्र रुपमा कुनै पनि कुराको, सरकारको, पार्टीको, पद्दतिको विरोधी बन्न पाइन्छ । तर आफ्नो अधिकार लिन खोज्दा अरुको अधिकारमाथि हनन् गर्न पाइन्न । त्यसैले राजधानीको स्वास्थ्य, ब्यापार, यातायात बन्द गर्ने र राजधानीलाई अप्ठेरोमा पार्ने र्‍याली गर्न बन्देज लगाइएको छ । सुरक्षाकर्मीले त्यसको पालना गराउने छन्' प्रधानमन्त्रीले शुक्रबार राष्ट्रिय टेलिभिजन मार्फत् घोषणा गरेका हुन् ।

अधिकारीहरूले आन्दोलनको उद्देश्य राजधानीलाई अवरुद्ध गर्नु भएकाले पेरिसमा नियोजित प्रदर्शनलाई प्रतिबन्ध लगाएको दाबी गरेका छन् । फ्रान्सको आन्दोलनलाई प्रेरित गर्ने ट्रकहरूको विरोधले क्यानाडाको राजधानी ओटावालाई पक्षघात बनाएको अधिकारीहरुको भनाइ छ । आन्दोलनकारीले आफ्ना पक्षका गाडी खासमा ट्रक ल्याएर राजधानीको नाकामा राखिदिने र राजधानी प्रवेश नै रोकिदिने गरेकाले फ्रान्स सरकारले यस्तो आन्दोलनमाथि प्रतिबन्ध लगाएको हो ।

आन्दोलनकारीले शुक्रबार बिहानसम्म ३ लाखभन्दा बढी व्यक्ति आन्दोलनमा सहभागी हुने फेसबूकमार्फत् घोषणा गरेपछि फ्रान्सको सरकारले प्रतिबन्ध लगाउने निर्णय गरेको हो ।

शुक्रबार रातिसम्म राजधानी पुग्ने लक्ष्य राख्दै दक्षिणमा निस, ब्ययोन, पर्पिन्यियँबाट धेरै आन्दोलनकर्मी पेरिसतर्फ प्रस्थान गरेका थिए । उनीहरूले शुक्रबार रातिदेखि राजधानी पेरिसलाई 'ब्लक' वा घेराबन्दी गर्ने निर्णय गरेको मेडियाले उल्लेख गरेका छन् ।

तिनै आन्दोलनकारीहरू सोमबार बेल्जियमको राजधानी ब्रसेल्स पुग्ने कार्यक्रम छ । तिनले 'युरोपियन कन्भर्जन्स' को नाममा ब्रसेल्समा यस्तै कार्यक्रमको घोषणा गरेका छन् ।

प्रकाशित : माघ २८, २०७८ २१:४५
पूरा पढ्नुहोस्
प्रतिक्रिया
पठाउनुहोस्
×