अफगानिस्तानमा महिला प्रदर्शन खुर्सानीको धुलो फ्याँक्दै तालिबान सेना- विश्व - कान्तिपुर समाचार

अफगानिस्तानमा महिला प्रदर्शन खुर्सानीको धुलो फ्याँक्दै तालिबान सेना

एजेन्सी

काबुल — अफगानिस्तानमा काम र शिक्षाको अधिकार माग्दै आइतबार प्रदर्शनमा उत्रिएका महिलाहरूको आन्दोलन दबाउने प्रयास गर्दै तालिबान सेनाले खुर्सानीको धुलो (पिरो पदार्थ) फ्याँकेको छ ।

गत अगस्टमा तालिबानले सत्ता कब्जा गरेपछि महिलाहरूले स्वतन्त्र रुपमा काम गर्न पाएका छैनन् । साथै शिक्षाको हकबाट पनि उनीहरूलाई वञ्चित गरिएको छ । आइतबार भने २० भन्दा बढी महिलाहरूले काबुल विश्वविद्यालय अगाडि समानता र न्यायको माग गर्दै नाराबाजी गरेका थिए ।

महिला अधिकारकर्मीहरूले अधिकारीसम्बन्धी नारा लेखिएका व्यानरसहित प्रदर्शन गरेका थिए । यद्यपि तालिबान सेनाले प्रदर्शन दबाउन पिरो पदार्थ फ्याँकेको हो । 'हामी जब काबुल विश्वविद्यालय अगाडि थियौं त्यसबेला तालिबान लडाकुहरू गाडीमा आएर हामीमाथि खुर्सानीको धुलो फ्याँके,' आन्दोलनकारीमध्ये एक महिलाले भनिन् । साथै तालिबान सेनाले उनीहरूमाथि बन्दुक तेर्स्याएर धम्क्याएको पनि अन्तर्राष्ट्रिय सञ्चारमाध्यममा लेखिएको छ ।

पिरो पदार्थबाट भएको एलर्जी उपचारका लागि एक प्रदर्शनकारीलाई अस्पताल लगिएको पनि बताइएको छ । अफगानिस्तानमा यसअघि पनि शिक्षाको अधिकार माग्दै महिलाहरू प्रदर्शनमा उत्रिएका थिए ।

तालिबान सरकारले महिलाहरूलाई स्वतन्त्र रुपमा काममा जान प्रतिबन्ध लगाएको छ । साथै महिलालाई स्कुल तथा कलेज पनि बन्द गरिएको छ । कतिपय सार्वजनिक छवि भएका महिलाहरूले भने आफ्नो पहिचान लुकाउने गरेको अन्तर्राष्ट्रिय सञ्चारमाध्यमले जनाएका छन् ।

प्रकाशित : माघ २, २०७८ २१:१९
प्रतिक्रिया
पठाउनुहोस्

भारतमा २ लाख ७१ हजार संक्रमित थपिए

एजेन्सी

नयाँदिल्ली — भारतमा पछिल्लो २४ घण्टामा कोभिड–१९ बाट थप २ लाख ७१ हजार २ सय २ जना संक्रमित भएका छन् । भारतको स्वास्थ्य र परिवार कल्याण मन्त्रालयका अनुसार शनिबार परीक्षण गरिएका १६.२८ प्रतिशतको रिपोर्ट पोजिटिभ आएको हो । योसँगै भारतमा कुल संक्रमितको संख्या ३ करोड ७१ लाख २२ हजार १ सय ६४ पुगेको छ ।

भाइरसको संक्रमणका कारण उक्त अवधिमा थप ३ सय १४ जनाको मृत्यु भएको छ । भारतमा हालसम्म कोभिडका कारण ज्यान गुमाउनेको संख्या ४ लाख ८६ हजार ६६ पुगेको मन्त्रालयले जनाएको छ । त्यस्तै, १५ लाख ५० हजार ३ सय ७७ जना सक्रिय संक्रमणको अवस्थामा छन् । यो कुल संक्रमितको ४.१८ प्रतिशत हो ।

मन्त्रालयका अनुसार बैंग्लोरमा २२ हजार २ सय ८४, दिल्लीमा २० हजार ७ सय १८, मुम्बईमा १० हजार ६ सय ६१, चेन्नईमा ८ हजार ९ सय ७८ र कोलकातामा ४ हजार ८ सय ३१ संक्रमित थपिएका हुन् ।

भारतमा पछिल्लो समय ओमिक्रोन भेरिएन्टको संक्रमण पनि तीव्र बन्दै गएको छ । हालसम्म ७ हजार ७ सय ४३ जना ओमिक्रोनबाट संक्रमित भइसकेको मन्त्रालयले शुक्रबार जानकारी दिएको छ । भारतमा एक लाख ३८ हजार ३ सय ३१ कोरोनाबाट मुक्त भएका छन् । यसैसँगै संक्रमण सुरु भएयता ३ करोड ५० लाख ८५ हजार ७ सय २१ जना निको भएको छ । भाइरस निको हुने दर ९५.५१ प्रतिशत रहेको जनाइएको छ ।

कोभिड–१९ को संक्रमण सुरु भएदेखि हालसम्म भारतमा ७० करोड २४ लाख ४८ हजार ८ सय ३८ भन्दा बढीमा परीक्षण गरिसकिएको छ । भारतले सन् २०२१ को जनवरी १६ बाट भाइरसविरुद्ध खोप अभियान सुुरु गरेको हो । त्यसयता १ अर्ब ५६ करोड ७६ लाखभन्दा बढी डोज खोप लगाइसकिएको छ ।

भारतको राजधानी नयाँदिल्लीमा कोभिड–१९ विरुद्ध जारी प्रतिबन्धहरूको कडाइ गर्दै सुरक्षाकर्मी । तस्बिर : एपी

प्रकाशित : माघ २, २०७८ २०:५६
पूरा पढ्नुहोस्
प्रतिक्रिया
पठाउनुहोस्
×