भारतमा २ लाख ७१ हजार संक्रमित थपिए- विश्व - कान्तिपुर समाचार

भारतमा २ लाख ७१ हजार संक्रमित थपिए

एजेन्सी

नयाँदिल्ली — भारतमा पछिल्लो २४ घण्टामा कोभिड–१९ बाट थप २ लाख ७१ हजार २ सय २ जना संक्रमित भएका छन् । भारतको स्वास्थ्य र परिवार कल्याण मन्त्रालयका अनुसार शनिबार परीक्षण गरिएका १६.२८ प्रतिशतको रिपोर्ट पोजिटिभ आएको हो । योसँगै भारतमा कुल संक्रमितको संख्या ३ करोड ७१ लाख २२ हजार १ सय ६४ पुगेको छ ।

भाइरसको संक्रमणका कारण उक्त अवधिमा थप ३ सय १४ जनाको मृत्यु भएको छ । भारतमा हालसम्म कोभिडका कारण ज्यान गुमाउनेको संख्या ४ लाख ८६ हजार ६६ पुगेको मन्त्रालयले जनाएको छ । त्यस्तै, १५ लाख ५० हजार ३ सय ७७ जना सक्रिय संक्रमणको अवस्थामा छन् । यो कुल संक्रमितको ४.१८ प्रतिशत हो ।

मन्त्रालयका अनुसार बैंग्लोरमा २२ हजार २ सय ८४, दिल्लीमा २० हजार ७ सय १८, मुम्बईमा १० हजार ६ सय ६१, चेन्नईमा ८ हजार ९ सय ७८ र कोलकातामा ४ हजार ८ सय ३१ संक्रमित थपिएका हुन् ।

भारतमा पछिल्लो समय ओमिक्रोन भेरिएन्टको संक्रमण पनि तीव्र बन्दै गएको छ । हालसम्म ७ हजार ७ सय ४३ जना ओमिक्रोनबाट संक्रमित भइसकेको मन्त्रालयले शुक्रबार जानकारी दिएको छ । भारतमा एक लाख ३८ हजार ३ सय ३१ कोरोनाबाट मुक्त भएका छन् । यसैसँगै संक्रमण सुरु भएयता ३ करोड ५० लाख ८५ हजार ७ सय २१ जना निको भएको छ । भाइरस निको हुने दर ९५.५१ प्रतिशत रहेको जनाइएको छ ।

कोभिड–१९ को संक्रमण सुरु भएदेखि हालसम्म भारतमा ७० करोड २४ लाख ४८ हजार ८ सय ३८ भन्दा बढीमा परीक्षण गरिसकिएको छ । भारतले सन् २०२१ को जनवरी १६ बाट भाइरसविरुद्ध खोप अभियान सुुरु गरेको हो । त्यसयता १ अर्ब ५६ करोड ७६ लाखभन्दा बढी डोज खोप लगाइसकिएको छ ।

भारतको राजधानी नयाँदिल्लीमा कोभिड–१९ विरुद्ध जारी प्रतिबन्धहरूको कडाइ गर्दै सुरक्षाकर्मी । तस्बिर : एपी

प्रकाशित : माघ २, २०७८ २०:५६
प्रतिक्रिया
पठाउनुहोस्

कोरोनाविरुद्धको तयारी बुझ्न वाग्मतीका स्वास्थ्यमन्त्रीद्वारा स्थलगत भ्रमण

नगेन्द्र अधिकारी

काभ्रे — कोरोना संक्रमण रोकथाम, नियन्त्रण र उपचारका लागि भइरहेको तयारी बुझ्न वाग्मती प्रदेशका स्वास्थमन्त्री निमा लामा आइतबार धुलिखेलस्थित जनस्वास्थ्य प्रयोशगाला र स्वास्थ्य कार्यालय काभ्रे पुगेका छन्।

‘पछिल्लो एक सातामा कोरोना संक्रमण दर बढेपछि मातहतका सबै स्वास्थ्य कार्यालय, जिल्ला अस्पताल र स्वास्थ्य संस्थालाई तयारी अवस्थामा रहन निर्देशन दिइसकेका छौं,’ जनस्वास्थ्य प्रयोगशालामा भेटिएका मन्त्री लामाले भने, ‘तयारी अवस्थामा रहेको कागजी बिफ्रिङ त लिएँ तर स्थलगत नै बुझौं भनेर आएको हुँ ।’

जनस्वास्थ्य प्रयोगशालामा उनले परीक्षणको संख्या र संक्रमण दरबारे चासो लिएका थिए । परीक्षणका क्रममा हुने समस्याबारे जानकारी लिँदै उनले कुनै पनि सहयोग गर्न आफू तयार रहेको प्रतिवद्धता जनाए । प्रयोगशालाका निमित्त निर्देशक डा. नारायण कार्कीले जिल्ला जिल्लामा परीक्षण सुरु भएको भन्दै चाप केही कम भएको बताए ।

स्वास्थ्य कार्यालय काभ्रेमा वरिष्ठ स्वास्थ्य प्रशासक डा. पुरुषोतम सेढाईले उनलाई जिल्लामा संक्रमणको अवस्था, खोपको उपलव्धता, आइसोलेसन र अन्य तयारीका बारेमा जानकारी गराएका थिए ।

उनले तीन प्रमुख नाकामा एन्टिजेन विधिबाट कोरोना परीक्षण सुरु भएको जानकारी गराएका थिए । १८ वर्षमाथिका ९० प्रतिशत जनसंख्यालाई खोपको पहुँच पुगेको भन्दै उनले बाँकीलाई पनि खोप दिन अभियान चलाएको बताए ।

मन्त्री लामाले कोरोना नियन्त्रणको लागि खोप नै प्रभावकारी माध्यम भएको भन्दै प्रदेशमा ७४ प्रतिशतले खोप पाइसकेको र बाँकीलाई समुदायमै गएर खोप लगाउने गरी तयारीसमेत भएको बताए ।

यस्तै १२ देखि १७ वर्ष उमेर समूहका बालबालिकाको लागि ७ जिल्लामा मोडर्ना र ६ जिल्लामा फाइजर खोप स्कुल–स्कुलमा गएर लगाउने अभियान तीव्र पारिएको पनि उनले बताए । महामारीमा नागरिक बचाउनु पहिलो प्राथमिकता भएको भन्दै उनले अग्रपंक्तिमा खटिनेहरूलाई पहिलो चरणमा र त्यसपछि दीर्घरोगी, जेष्ठ नागरिकलाई बुस्टर डोज दिन सुरु गरिने जानकारी दिए ।

प्रकाशित : माघ २, २०७८ २०:४९
पूरा पढ्नुहोस्
प्रतिक्रिया
पठाउनुहोस्
×