नर्वेमा ५-११ वर्षसम्मका बालबालिकालाई पनि खोप लगाउन पाइने- विश्व - कान्तिपुर समाचार
कान्तिपुर वेबसाईट
AdvertisementAdvertisement

नर्वेमा ५-११ वर्षसम्मका बालबालिकालाई पनि खोप लगाउन पाइने

कान्तिपुर संवाददाता

ओस्लो — नर्वेमा ५ देखि ११ वर्षसम्मका बालबालिकालाई पनि कोरोनाभाइरस विरूद्धको खोप लगाउन पाइने भएको छ । सरकारी अधिकारीले नै सो उमेर समूहका बालबालिकालाई खोप लगाउन मिल्ने सिफारिस गरेको समाचारमा जनाइएको छ । 

फाइल तस्बिर : रोयटर्स

नर्वेमा यसअघि १२ देखि १५ वर्षसम्मका बालबालिकाहरुलाई खोप लगाइदै आएको अधिकारीले जानकारी दिएका छन् । उनीहरूले अहिले खोपको पहिलो मात्रा लगाएका छन् भने अभिभावकले चाहेमा उनीहरुलाई दोस्रो मात्रा खोप पनि लगाउन सकिने अधिकारीको भनाइ छ ।

स्वास्थ्य मन्त्री इङभील्ड जेर्कोलद्वारा जारी वक्तव्यअनुसार सवै प्रकारका बालबालिकालाई भने खोप लगाउन सिफारिस गरिएको छैन । ‘निश्चित समूह’का बालबालिकालाई मात्रै खोप दिन मिल्ने विज्ञहरूले सिफारिस गरेको उनले स्पष्ट पारे । उनले दीर्घरोगी र जटील स्वास्थ्य समस्या भएका अविभावकको प्रत्यक्ष सम्पर्कमा रहने बालबालिका र कोभिडको पछिल्लो महामारी फैलिएका र राम्रो स्वास्थ्य सेवामा पहुँच नभएका मुलुकमा जाने बालबालिकालाई खोप नलगाउन सुझाब दिइएको बताएका छन् ।

नर्वेका वयस्कहरूमध्ये अधिकांशले भने खोपको दुवै मात्रा लगाइसकेका छन् । स्वास्थ्य मन्त्रालयका अनुसार खोप लगाउन मिल्ने वयस्क र वृद्धवृद्धामध्ये ९० प्रतिशतभन्दा बढीले कोरोना भाइरसविरुद्धको दुवै मात्रा खोप लगाइसकेका छन् ।

प्रकाशित : पुस ३०, २०७८ २२:२२
प्रतिक्रिया
पठाउनुहोस्

मृगस्थलीमै मृगको बिजोग

स्वतन्त्र रूपमा विचरण गर्न नपाएका मृग उचित वातावरण र आहारबाट समेत वञ्चित
कान्तिपुर संवाददाता

काठमाडौँ — बुधबार दिउँसो पशुपतिको मृगस्थलीमा दुई प्याकेट बिस्कुट लिएर यताउता घुमिरहेका थिए, एक युवक । उनी यहाँ मृगका लागि बिस्कुट बेच्दा रहेछन् । उनी दैनिक एक कार्टुन बिस्कुट बेच्छन् । मृगस्थलीमा उनीजस्तै बिस्कुट बेच्ने १० जनाभन्दा बढी छन् । हरेक कार्टुनमा ४० प्याकेट बिस्कुट हुन्छ । कहिलेकाहीँ एक जनाले कार्टुन नै किनेर मृगलाई खुवाउँछन् । १० जनाले एक–एक कार्टुन बेचे पनि दैनिक ४ सय प्याकेट बिस्कुट मृगका लागि खपत हुन्छ ।

फलामे जालीभित्र राखिएका मृग मान्छे देख्नेबित्तिकै खानेकुरा पाउने आसमा नजिक आउँछन् र बिस्कुटका लागि तँछाडमछाड गर्छन् । मृगको मुख्य खाना घाँस हो तर उनीहरूलाई बिस्कुट खानुपर्ने बाध्यता छ किनकि यहाँ घाँस छैन । मृग मात्रै होइन, पशुपतिका बाँदरलाई पनि बिस्कुट दिने गरिएको छ ।

पशुपति क्षेत्र विकास कोषका कार्यकारी निर्देशक घनश्याम खतिवडा मृगलाई नियमित तीन पटकसम्म घाँस, दाना र चोक्कर दिने गरेको बताउँछन्, यद्यपि तिनको लगाव भने बिस्कुटतिर देखिन्छ ।

पौराणिक कथाअनुसार पशुपति क्षेत्रमा अवस्थित मृगस्थलीमा भगवान् शिवले मृग रूप लिएर हजारौं वर्षसम्म ध्यान गरेका थिए । हिन्दुहरू मृगस्थलीलाई पुण्य क्षेत्रका रूपमा लिन्छन् । पौराणिक कथालाई पुनर्जीवित गर्ने भनेर २०६२ सालमा यहाँ २१ वटा मृग ल्याइएको थियो । कोषका अनुसार मृगस्थली–श्लेषमान्तक वनको क्षेत्रफल २८ हेक्टर छ । मृगहरूकै लागि भनेर वनभित्रै मृग वाटिका बनाइयो । तर, संख्या बढेपछि यहाँका मृगले न स्वतन्त्र रूपमा कुद्न/उफ्रन पाएका छन् न त राम्रोसँग बस्न नै । खतिवडाका अनुसार मृगको संख्या बढेर १६७ पुगेको छ । यहाँ राखिएका मृगको बिजोग यतिसम्म छ कि उनीहरू झारसमेत देख्न पाउँदैनन् । जमिनमा ढुंगा र प्लास्टिक मात्रै छन् । जसका कारण उनीहरूका लागि मृगस्थलीको वातावरण असहज बन्दै गएको छ ।

पूरा पढ्न : मृगस्थलीमै मृगको बिजोग

प्रकाशित : पुस ३०, २०७८ २१:४६
पूरा पढ्नुहोस्
प्रतिक्रिया
पठाउनुहोस्
x
×