बिहारमा जसले गरे कोभिडविरुद्धको ११ डोज भ्याक्सिन लिएको दाबी !
काठमाडौँ — बिहारको मधेपुरा जिल्लाका एक व्यक्तिले आफूले ११ डोज कोरोनाविरुद्धको भ्याक्सिन लिएको दाबी गरेका छन् । हाल बिहारको पुरैनीमा रहँदै आएका ८४ वर्षीय ब्रह्मदेव मण्डलले भ्याक्सिन लगाउन सुरु गरेदेखि आफूलाई कुनै पनि रोगले नछोएको र पूर्ण रुपमा स्वस्थ रहेको दाबी गरेको बीबीसी हिन्दीले उल्लेख गरेको छ ।
यसैगरी मधेपुराकै सिभिल शल्यचिकित्सक डा अमरेन्द्र प्रताप शाहीले भने मण्डलको दाबी साँचो भए/नभएको बारेमा अनुसन्धान हुने बताएका छन् ।
मण्डलले भ्याक्सिन लगाएको अस्पतालमा भएको रेकर्ड हेरेपछि थाहा हुने भन्दै यदि यो कुरा साँचो रहेछ भने सम्बन्धित व्यक्तिविरुद्ध कारबाही हुने डा शाहीले दाबी गरेका छन् ।
Bihar: 84-year-old Brahamdev Mandal, a resident of the Puraini area of Madhepura district, claims that he has taken 11 doses of Covid vaccine
— ANI (@ANI) January 6, 2022
"I never fell ill since I started taking the vaccine and my health has started to improve," says Brahamdev pic.twitter.com/A23E690A4W
अहिले भारतमा कोरोना संक्रमणको तेस्रो लहर चलिरहेको छ । बुधबारमात्रै भारतमा ९० हजारभन्दा बढीमा संक्रमण पुष्टि भएको थियो । गतमहिना भारतीय प्रधानमन्त्री नरेन्द्र मोदीले जनवरी १० देखि ६० वर्षमाथि उमेरसमूहका नागरिकलाई कोभिडविरुद्धको तेस्रो डोज भ्याक्सिन लगाइने बताएका थिए । अहिलेसम्म भारतमा भ्याक्सिनको दुई डोजमात्र लगाउन मिल्नेगरी अनुमति दिइएको छ ।
प्रकाशित : पुस २२, २०७८ १४:१७