बिहारमा जसले गरे कोभिडविरुद्धको ११ डोज भ्याक्सिन लिएको दाबी !- विश्व - कान्तिपुर समाचार
कान्तिपुर वेबसाईट
AdvertisementAdvertisement

बिहारमा जसले गरे कोभिडविरुद्धको ११ डोज भ्याक्सिन लिएको दाबी !

कान्तिपुर संवाददाता

काठमाडौँ — बिहारको मधेपुरा जिल्लाका एक व्यक्तिले आफूले ११ डोज कोरोनाविरुद्धको भ्याक्सिन लिएको दाबी गरेका छन् । हाल बिहारको पुरैनीमा रहँदै आएका ८४ वर्षीय ब्रह्मदेव मण्डलले भ्याक्सिन लगाउन सुरु गरेदेखि आफूलाई कुनै पनि रोगले नछोएको र पूर्ण रुपमा स्वस्थ रहेको दाबी गरेको बीबीसी हिन्दीले उल्लेख गरेको छ ।

यसैगरी मधेपुराकै सिभिल शल्यचिकित्सक डा अमरेन्द्र प्रताप शाहीले भने मण्डलको दाबी साँचो भए/नभएको बारेमा अनुसन्धान हुने बताएका छन् ।

मण्डलले भ्याक्सिन लगाएको अस्पतालमा भएको रेकर्ड हेरेपछि थाहा हुने भन्दै यदि यो कुरा साँचो रहेछ भने सम्बन्धित व्यक्तिविरुद्ध कारबाही हुने डा शाहीले दाबी गरेका छन् ।

अहिले भारतमा कोरोना संक्रमणको तेस्रो लहर चलिरहेको छ । बुधबारमात्रै भारतमा ९० हजारभन्दा बढीमा संक्रमण पुष्टि भएको थियो । गतमहिना भारतीय प्रधानमन्त्री नरेन्द्र मोदीले जनवरी १० देखि ६० वर्षमाथि उमेरसमूहका नागरिकलाई कोभिडविरुद्धको तेस्रो डोज भ्याक्सिन लगाइने बताएका थिए । अहिलेसम्म भारतमा भ्याक्सिनको दुई डोजमात्र लगाउन मिल्नेगरी अनुमति दिइएको छ ।

प्रकाशित : पुस २२, २०७८ १४:१७
प्रतिक्रिया
पठाउनुहोस्

नारायणहिटीमा रेस्टुरेन्ट सञ्चालनबारे छानबिन समिति गठन

कान्तिपुर संवाददाता

काठमाडौँ — नारायणहिटी दरबार संग्रहालय परिसरमा बतास समूहले रेस्टुरेन्ट सञ्चालनका लागि गरेको ठेक्का सम्झौता प्रकरणबारे छानबिन गर्न पर्यटन मन्त्रालयका सहसचिव होमप्रसाद लुइँटेलको संयोजकत्वमा बिहीबार ५ सदस्यीय समिति गठन गरिएको छ ।

मन्त्रीस्तरीय निर्णयबाट उक्त समितिलाई तीन दिनभित्र राय सुझावसहित प्रतिवेदन पेस गर्न भनिएको छ । समितिका सदस्यमा मन्त्रालयका उपसचिवहरू टेकनारायण पौडेल, सूर्यमणि गौतम र पुरुषोत्तम खतिवडा तथा सदस्य सचिवमा शाखा अधिकृत टंकबहादुर नेगी छन् ।

शाहवंशीय राजाहरूले १ सय २२ वर्षसम्म शासन गरेको नारायणहिटी दरबार संरक्षण गर्नुको सट्टा सरकारले परिसरभित्रको जग्गा र भवन सस्तो भाडादरमा दिन एक वर्षअघि सम्झौता गरेको थियो । छानबिन समिति गठन गरेलगत्तै पर्यटनमन्त्री प्रेमबहादुर आलेले संग्रहालयका कार्यकारी निर्देशक भेषनारायण दाहाललाई ठेक्का प्रकरणबारे सोधपुछका लागि बोलाएका थिए । दाहालले नारायणहिटी परिसरमा क्याफे सञ्चालन गर्न माथिल्लो तहबाट त्यसताका दबाब आएको बताएको स्रोतले जानकारी दियो ।

०७५ अघि नारायणहिटी दरबार संग्रहालयमा रोहित ढुंगाना प्रमुख भएका बेला तत्कालीन पर्यटन सचिव शंकर अधिकारीले अध्ययनसहित राय मागेका थिए । त्यसबेला ढुंगानाले नारायणहिटी परिसर व्यावसायिक प्रयोजनका लागि प्रयोग गर्न नसकिने प्रतिवेदन बुझाएका थिए । प्रतिवेदनमा सचिव अधिकारीले ‘नारायणहिटीबारे गुरुयोजना बनाई उक्त योजनाले निर्देश गरेअनुसार संग्रहालयको व्यवस्थापन गरिने’ निर्णय गर्दै फाइल बन्द गरेको स्रोतको भनाइ छ ।

तर, पुरातत्त्व विभागका महानिर्देशक हुँदा दाहालले त्यसपछि विभागकै कर्मचारीबाट अध्ययन गराई ‘नारायणहिटी परिसर व्यावसायिक हेतुले’ प्रयोग गर्न सकिने प्रतिवेदन पर्यटन मन्त्रालयमा पठाएका थिए । यो प्रतिवेदनमा शंका व्यक्त गर्दै सचिव अधिकारीपछि पर्यटनमा आइपुगेका सचिव कृष्ण देवकोटाले पनि नारायणहिटी दरबारभित्र व्यवसाय सञ्चालन गर्न नसकिने भन्दै महानिर्देशक दाहालले दोस्रोपटक पठाएको फाइल रोकेका थिए ।

‘दुईवटा सचिवले रोकेको तर पछिल्ला दुई सचिव केदारबहादुर अधिकारी र यादव कोइराला मन्त्रालयमा रहँदा तत्कालीन पर्यटनमन्त्री योगेश भट्टराईको निर्देशनमा नारायणहिटीमा व्यापारीलाई क्याफे सञ्चालन गर्न दिनेबारे विभिन्न निर्णय सदर गरेको देखिएकाले समितिले यसबारे पनि अध्ययन गर्नुपर्छ,’ मन्त्रालयका एक अधिकारीले भने ।

नारायणहिटी संग्रहालय सम्हालिसकेका अर्का पूर्वप्रमुखले नेपालमा संग्रहालयबारे ऐन नै नभएकाले व्यापारीहरूले सांस्कृतिक तथा ऐतिहासिक स्थल राजनीतिक आडमा सस्तोमा भाडामा लिई अत्यधिक मुनाफा आर्जन गर्ने बाटो खुला भएकाले तत्काल संग्रहालय ऐन जारी हुनुपर्ने बताए ।

यसैबीच, पर्यटनमन्त्री आलेले प्रारम्भिक अध्ययनमा क्याफे ठेक्का प्रक्रिया कानुनी रूपमा नमिलेको देखिएको दाबी गरेका छन् । ‘मैले प्रारम्भिक अध्ययनबाट थुप्रै कानुन नमिलेको देखेको छु,’ बिहीबार मन्त्रालयमा सञ्चारकर्मी तथा नारायणहिटी छानबिन गर्न ज्ञापन बुझाउन गएका सरोकारवालासँग उनले भने, ‘त्यसबाहेक आनाको करोडौं पर्ने दरबारमार्गमा कौडीको भाउ बराबरको दरमा भाडा लगाउने निर्णय भएको रहेछ । यसको सत्यतथ्य अध्ययन गरेर प्रतिवेदन सार्वजनिक गर्नेछौं ।’

प्रकाशित : पुस २२, २०७८ १४:०८
पूरा पढ्नुहोस्
प्रतिक्रिया
पठाउनुहोस्
×