अमेरिकाका ५ राज्यमा ओमिक्रोन भेरिएन्ट देखियो, यात्रामा कडाइ- विश्व - कान्तिपुर समाचार
कान्तिपुर वेबसाईट
AdvertisementAdvertisement

अमेरिकाका ५ राज्यमा ओमिक्रोन भेरिएन्ट देखियो, यात्रामा कडाइ

भारत र श्रीलंकासहित ३१ देशमा ओमिक्रोन भेरिएन्टको संक्रमण पुष्टि
कान्तिपुर संवाददाता

काठमाडौँ — ओमिक्रोन भेरिएन्टका संक्रमित देखिन थालेपछि अमेरिकामा यात्रासम्बन्धी प्रावधानमा कडाइ गर्न थालिएको छ । अमेरिकी राष्ट्रपति जो बाइडेनले यात्रासम्बन्धी कडा नियमहरूको घोषणा गरेका हुन् ।

राष्ट्रपति बाइडेनको योजनामा लकडाउन र कोरोना खोपसम्बन्धी विद्यमान प्रावधानमा परिवर्तन गर्ने कुरा भने नभएको बताइएको छ ।

अमेरिकाका क्यालिफोर्निया, कोलोराडो, मिनेसोटा, न्युयोर्क र हवाई राज्यमा कोरोना भाइरसको ओमिक्रोन भेरिएन्ट देखिएको छ । अमेरिकी स्वास्थ्य अधिकारीहरूका अनुसार संक्रमण पुष्टि भएका व्यक्ति पछिल्लो समय कतै यात्रा गरेका थिएनन् । उनीहरूलाई हल्का लक्षण मात्र देखिएको पनि स्वास्थ्य अधिकारीहरूको भनाइ छ ।

नयाँ नियमानुसार सबै अन्तर्राष्ट्रिय यात्रुहरूले अमेरिका प्रवेश गर्नुअघि कोरोनाको नेगेटिभ परीक्षण रिपोर्ट पेस गर्नुपर्नेछ । त्यस्तै विमान, रेल र बसमा मार्चसम्मलाई मास्क अनिवार्य गरिएको छ । त्यस्तै अमेरिकी सरकारले परीक्षणको दायरा बढाउनका लागि घर-घरमै परीक्षणको व्यवस्था गर्ने पनि बताएको छ ।

अहिलेसम्म दक्षिण एसियाका भारत र श्रीलंकासहित विश्वका ३१ देशमा कोरोनाको यो भेरिएन्ट फैलिइसकेको छ । भारतमा बिहीबार नयाँ भेरिएन्टको संक्रमण पुष्टि भएको थियो भने श्रीलंकामा शुक्रबार एक जनामा संक्रमण पुष्टि भएको हो । नाइजेरियाबाट नोभेम्बर २३ मा फर्किएका एक नागरिकलाई ओमिक्रोनको संक्रमण देखिएको श्रीलंकाली सञ्चारमाध्यम न्युजफर्स्टले जनाएको छ ।

३० पटकभन्दा बढी उत्परिवर्तित भएको भनिएको ओमिक्रोन भेरिएन्ट कति संक्रामक छ र खोप कति प्रभावकारी छ भन्नेबारे भने प्रस्ट भइसकेको छैन । ओमिक्रोन भेरिएन्टले कोरोनाको अर्को लहर निम्तिन सक्ने भन्दै विश्वका अधिकांश देशले अफ्रिकी देशहरूबाट हुने यात्रामा रोक लगाएका छन् । नेपाले पनि बिहीबार ९ देशबाट नेपाल आउन प्रतिबन्ध लगाएको छ ।

कोभिड–१९ को नयाँ भेरिएन्ट ‘ओमिक्रोन’ को जोखिम बढेको भन्दै सरकारले दक्षिण अफ्रिकासहित ९ देशबाट नेपाल आउन प्रतिबन्ध लगाएको छ । बिहीबार रातिदेखि लागू हुने गरी दक्षिण अफ्रिका, बोत्सवाना, जिम्बावे, नामिबिया, लेसोथो, इसवाटिनी, मोजाम्बिक, मलावी र हङकङबाट नेपाल आउन रोक लगाइएको हो।

अहिलेसम्म ओमिक्रोन देखिएका मुलुकहरू

  • श्रीलंका
  • भारत
  • दक्षिण अफ्रिका
  • बोत्सवाना
  • नेदरल्यान्ड्स
  • हङकङ
  • इजरायल
  • बेल्जियम
  • बेलायत
  • जर्मनी
  • अष्ट्रेलिया
  • इटाली
  • चेक गणतन्त्र
  • डेनमार्क
  • अस्ट्रिया
  • क्यानडा
  • स्विडेन
  • स्विजरल्यान्ड
  • स्पेन
  • पोर्चुगल
  • जापान
  • फ्रान्स
  • घाना
  • दक्षिण कोरिया
  • नाइजेरिया
  • ब्राजिल
  • नर्वे
  • अमेरिका
  • साउदी अरेबिया
  • आयरल्यान्ड
  • संयुक्त अरब इमिरेट्स

प्रकाशित : मंसिर १७, २०७८ १२:४२
प्रतिक्रिया
पठाउनुहोस्

माओवादी केन्द्र राष्ट्रिय सम्मेलन :  विधान परिमार्जनका लागि उपसमिति गठन

कान्तिपुर संवाददाता

काठमाडौँ — नेकपा (माओवादी केन्द्र) को स्थायी कमिटी बैठकले विधान परिमार्जन गर्नको लागि ५ सदस्यीय उपसमिति बनाउने निर्णय गरेको छ । शुक्रबार पार्टी कार्यालय पेरिसडाँडामा बसेको पार्टीको स्थायी कमिटीको बैठकले विधान परिमार्जनका लागि ५ सदस्यीय उपसमिति बनाउने निर्णय गरेको हो ।

विधान परिमार्जन उपसमितिमा देव गुरुङ, पम्फा भुसाल, लिलामणि पोखरेल, जनार्दन शर्मा र मात्रिका यादव रहेको र उक्त उपसमितिले आउँदो मंसिर २५ गतेसम्म विधान परिमार्जन गरिसक्ने पार्टी प्रवक्ता कृष्णबहादुर महराले बताए । प्रवक्ता महाराले राष्ट्रिय सम्मेलनमा आउने प्रत्येक सदस्यहरुको प्रवेश शुल्क दुई हजार रुपैयाँ तोकेको पनि उनले जानकारी दिए ।

राष्ट्रिय सम्मेलनको लागि व्यवस्थापन उपसमितिहरु बनाइएको प्रवक्ता महराको भनाइ छ । बैठकले हितमान शाक्यको नेतृत्वमा व्यवस्थापन उपसमिति र कृष्णबहादुर महराको नेतृत्वमा प्रचारप्रसार उपसमिति बनाउने निर्णय गरेको छ । त्यस्तै बैठकले राष्ट्रिय सम्मेलनका लागि स्वयंसेवक उपसमिति र स्वास्थ्य उपसमिति बनाउने निर्णय गरेको पनि उनले बताए ।

प्रवक्ता महराले भने, ‘खास गरेर केन्द्रीय प्रतिनिधिको विषयमा हिजो जुन निर्णय गरेका छौँ, त्यसलाई प्रश्तावकै रुपमा कायम राख्दै अन्य थप केन्द्रीय प्रतिनिधिहरु पठाउने ठाउँहरु धेरै छन्, उनीहरु सबैलाई फेरि थप प्रस्ताव तयार गरेर अर्को बैठकमा ल्याउने गरी अध्यक्षलाई जिम्मा दिएको छ । प्रतिनिधिहरु छान्ने विषयमा पनि छलफल भएको छ । राष्ट्रिय सम्मेलनको विषयमा प्रतिनिधि छान्नको निम्ति हरेक प्रदेशले ३० जना ल्याउने र बाँकी पार्टी सदस्य नवीकरणको संख्याको आधारमा कुन प्रदेशले कति गर्‍यो त्यसको आधारमा ठोस गर्ने भन्ने निर्णय गरिएको छ ।’

त्यस्तै स्थायी कमिटी बैठकले राष्ट्रिय सम्मेलनमा आउने प्रतिनिधिहरुको प्रवेश शुल्क तोकेको छ । प्रवक्ता महराका अनुसार प्रत्येक पार्टी सदस्यलाई २ हजार प्रवेश शुल्क तोकिएको छ । त्यस्तै राष्ट्रिय सम्मेलनका लागि व्यवस्थापन उपसमितिहरु निर्माण गरिएको छ । हितमान शाक्यको नेतृत्वमा एउटा व्यवस्थापन उपसमिति निर्माण गरिएको छ । प्रचारप्रसार उपसमितिमा कृष्णबहादुर महराको नेतृत्वमा अर्को उपसमिति बनाइएको छ ।

प्रकाशित : मंसिर १७, २०७८ १२:२४
पूरा पढ्नुहोस्
प्रतिक्रिया
पठाउनुहोस्
×