युरोपमा कोरोनाको पाँचौं लहर, फ्रान्समा तेस्रो खोप लगाउनुपर्ने घोषणा- विश्व - कान्तिपुर समाचार

युरोपमा कोरोनाको पाँचौं लहर, फ्रान्समा तेस्रो खोप लगाउनुपर्ने घोषणा

ददी सापकोटा

पेरिस — फ्रान्सका राष्ट्रपति इमान्युएल म्याक्रोंले युरोपभरि कोरोना भाइरसको पाँचौं लहर आएको घोषणा गर्दै फ्रान्समा कोरोनाको तेस्रो डोज लगाउनुपर्ने बताएका छन् ।


राष्ट्रपतिले फ्रान्समा संक्रमणको संख्यामा भएको वृद्धिलाई रोक्न वृद्धवृद्धाहरूलाई कोरोना भाइरसविरुद्ध तेस्रो खोप लगाउन प्रोत्साहित गर्ने नयाँ उपायहरूको घोषणा गरेका हुन् ।

राष्ट्रिय टेलिभिजनमार्फत् राष्ट्रका नाममा सम्बोधन गर्दै फ्रान्सेली राष्ट्रपति म्याक्रोंले भने, 'डिसेम्बरको मध्यदेखि ६५ वर्ष भन्दा माथिका मानिसहरूलाई उनीहरूको स्वास्थ्य पासहरू विस्तार गर्नको लागि 'बुस्टर डोज' आवश्यक हुने छ । जसले तेस्रो खोप लगाउँदैनन् तिनको स्वास्थ्य पास रद्द गरिने छ ।'

सेप्टेम्बरदेखिनै एक-डोज बुस्टर ज्याबहरू वृद्धवृद्धा, स्वास्थ्यका हिसावले सबैभन्दा कमजोर, दिर्घ रोगी, वृद्धवृद्धा र रोगीको हेरचाहकर्ता र स्वास्थ्यकर्मीहरूका लागि उपलब्ध गरिएको थियो । तर यसको प्रभावकारिता भने अत्यन्तै ढिलो भएको थियो ।

फ्रान्समा तेस्रो डोज लगाउन योग्य नागरिक ७७ लाख भएको र गत सातासम्म जम्मा ३४ लाखले मात्रै तेस्रो डोज लगाएको युरोन्युजले उल्लेख गरेको छ ।

राष्ट्रपति म्याक्रोंले कोरोना खोपले विकास गर्ने रोग प्रतिरोधी क्षमता छ महिनापछि घट्दै जाने हुनाले त्यो क्षमतालाई बढाउन तेस्रो डोज लगाउनुपर्ने उल्लेख गरेका हुन् ।

'हामीले कोरोना संक्रमण रोकथामका उपायहरुलाई गतिदिन आवश्यक छ,' म्याक्रोंले भने 'डिसेम्बर १५ देखि आफ्नो स्वास्थ्य पासलाई नवीकरण गर्न तेस्रो डोज लगाएको प्रमाण चाहिन्छ ।'

गत गर्मीयामदेखि फ्रान्समा होटेल, रेस्टुरेन्ट, बार, सिनेमा घर, हजाम पसल, विमान यात्रा आदिको लागि स्वास्थ्य पास अनिवार्य गरिएको छ । स्वास्थ्य पासले पूर्ण खोप स्थिति, हालैको कोरोना नेगेटिभ परीक्षण वा कोरोना लागेर निको भएको प्रमाण देखाउँछ ।

म्याक्रोंले ५० देखि ६४ वर्षका वृद्धहरू डिसेम्बरको सुरुदेखि बुस्टर खुराकको लागि योग्य हुनेसमेत बताएका छन् ।

कोरोना भाइरस संक्रमणका रोगी हप्तैपिच्छे ४० प्रतिशतले बढेको र हाल अस्पताल भर्ना भएका मध्ये ८० प्रतिशत विरामी ५० वर्ष माथिका रहेकाले डिसेम्बरको सुरुदेखिनै ५० देखि ६४ वर्षका नागरिकलाई तेस्रो डोज (बुस्टर डोज) अभियान गरिने बताएका हुन् ।

स्वास्थ्य सेवा विभागले मंगलबार जारी गरेको तथ्यांकअनुसार फ्रान्समा गत २४ घण्टामा १२ हजार चार सय ७६ नयाँ व्यक्तिमा कोरोना संक्रमण भएको छ । कोरोनाको खोप नलगाएका व्यक्तिमा ११ गुणा बढी कोरोना संक्रमित हुने देखिएको छ ।

आगामी दिनहरूमा व्यवहारिक विधिहरू र समयसीमा पालना गर्न संकेत गर्न सकुन् भनेर सरकारले वैज्ञानिक अधिकारीहरूलाई सचेत गराएको उनले उल्लेख गरेका छन् ।

फ्रान्सले जनवरीबाट छ महिनाको ईयूको अध्यक्षता लिने र विश्वका चुनौतीहरूको सामना गर्न युरोपसँग मिलेर काम गर्ने आशा राखेको तथ्य पनि उनले उजागर गरेका छन् ।

म्याक्रोंले कोरोनाले विश्वभरिनै पीडित बनाएकाले विश्वभरिकै जनताले खोप लगाएर रोग प्रतिरक्षा बढाएपछि मात्रै सबै सुरक्षित हुने बताएका छन् । 'त्यसैले हामीले कोभाक्स अभियान अन्तर्गत बिपन्न देशहरुलाई खोप निःशुल्क उपलब्ध गराएका छौं । विश्वका सम्पूर्ण जनताले खोप लगाएर सुरक्षित नबनेसम्म हामी सबै कोरोना भाइरससितै लडेर बाँच्न सिक्नुपर्छ ।'

फ्रान्सले महामारीदेखि आतंकवादसम्म संकटको अभूतपूर्व समयसँग लडिरहेका बेला जनताको चिन्ता र आक्रोशलाई स्वीकार गरेको समेत बताए । तर उनले मानिसहरूलाई फ्रान्स र यसको मूल्यमान्यतामा विश्वास गर्न र कट्टरपन्थी वा राष्ट्रवादलाई नफर्काउन आग्रह गर्दै नडराऊन आग्रहसमेत गरेका छन् ।

म्याक्रोंको सम्बोधन सन् २०२२ को राष्ट्रपतिय निर्वाचनको पहिलो चरणको पाँच महिना अघि आएको छ । आफ्नो राष्ट्रपतीय उम्मेदवारीलाई प्रभाव पार्न, अतिवादी, कट्टरपन्थीहरुलाई मतदान नगरुन भनेर प्रभाव पार्न पनि उनले त्यस्तो बताएको फ्रान्सेली मिडियाहरुले उल्लेख गरेका छन् ।

प्रकाशित : कार्तिक २४, २०७८ ११:०८
प्रतिक्रिया
पठाउनुहोस्

अमेरिका छिर्ने क्रममा ५ दर्जन नेपाली जर्मनीमा पक्राउ

दुबईबाट मस्को हुँदै फ्र्यांकफर्ट पुगेका अन्य नेपालीलाई पनि जर्मन प्रहरीले नियन्त्रणमा लिएको आशंका
ददी सापकोटा

पेरिस — काठमाडौंबाट दुबई, मस्को र मेक्सिको हुँदै गैरकानुनी रूपमा अमेरिका छिर्न खोज्ने झन्डै पाँच दर्जन नेपाली फ्र्यांकफर्ट विमानस्थलमा पक्राउ परेका छन् । यही रुटबाट मेक्सिको पुगेका केही व्यक्तिलाई मेक्सिको प्रहरीले फ्र्यांकफर्ट डिपोर्ट गरेको थियो । अन्य केही भने मेक्सिको उड्ने तयारीमा थिए ।

मेक्सिकोबाट डिपोर्ट भएकाहरूलाई भने मस्को फिर्ता पठाउन लागिएको जर्मन सुरक्षा निकायले बताएको जर्मनीस्थित नेपाली राजदूत रामकाजी खड्काले जानकारी दिए । विमानस्थलको ट्रान्जिटस्थित प्रहरी सुरक्षा घेरामा रहेकामध्ये एक नेपालीले सुरक्षाका कारण आफ्नो नाम नखुलाइदिन आग्रह गर्दै कान्तिपुरसँग भने, ‘हामी यहाँ ६ दिनदेखि सुरक्षा घेरामा छौं । प्रहरी नियमानुसार अब दुई दिनभन्दा राख्दैन । हामी अझै मेक्सिको जाने आसमा छौं ।’

ती नेपालीका अनुसार आफन्तको विश्वासमा परेर उनीहरूले अमेरिका छिर्नका लागि जनही ३८ लाख रुपैयाँ तिरेका थिए । राजदूत खड्काका अनुसार दूतावासले जर्मनीको सुरक्षा एजेन्सीसँग सम्पर्क गर्दा १८ जना नेपाली आफ्नो नियन्त्रणमा रहेको बताएको छ । पक्राउ परेकामध्ये ६ जनासँग जापानको नक्कली भिसा भएकाले शंका लागेर समूहका सबैलाई नियन्त्रणमा लिइएको जर्मन सुरक्षा संस्थाले जानकारी दिएको खड्काले बताए ।

फ्र्यांकफर्ट विमानस्थलमा कार्यरत श्याम खनालका अनुसार १८ जनाबाहेक मेक्सिकोबाट फर्काइएका र मस्कोदेखि मेक्सिको जान उडेका अन्य नेपाली पनि थपिएका छन् । उनका अनुसार विमानस्थलको अर्को टर्मिनलबाट पक्राउ पर्नेको संख्या यकिन भइसकेको छैन ।

अलपत्र परेका अर्का एक नेपालीले आफूहरू नियन्त्रणमा रहेका भए पनि प्रहरीले अन्य केही नगरेको बताएका छन् । ‘हामीलाई प्रहरीले रोकेको त हो । तर पक्राउ गरेको जस्तो छनक दिएको छैन । हामी अझै पनि मेक्सिकोको टिकट बनाएर उतै उड्ने पर्खाइमा छौं,’ उनले भने । मोटो रकम तिरेर हिँडेकाले जसरी पनि मेक्सिको गएर अमेरिका छिर्ने आसमा रहेको बताउँदै उनले भने, ‘३८ लाख तिरेर आएको हो । दलालले थाहा पायो भने झन् दुःख दिन सक्छ र आमाबुबाले यो सुन्नुभयो भने चिन्ताले मर्नुहुन्छ ।’

कान्तिपुरसँगको टेलिफोन कुराकानीमा ती नेपालीले आफूहरूमध्ये अधिकांशलाई आले थरका नेपाली दलालले दुई साताअघि काठमाडौंबाट दुबई (यूएई) उडाएका थिए । एक सातासम्म दुबईको एक होटलमा राखिएपछि उनीहरू आफैं टिकट काटेर मस्को (रुस) उडेका थिए । मस्को उड्ने प्रबन्ध भने एक पाकिस्तानी दलालले मिलाइदिएका हुन् ।

मस्कोमा एकरात बसेपछि आफूहरू आफ्नै टिकटमा मेक्सिको उडेका थिए । उनीहरू सबैको जर्मनीको फ्र्यांकफर्टमा ट्रान्जिट परेको थियो । त्यहाँ प्रहरीले जाँचबुझ गर्दा उनीहरू पक्राउ परेका हुन् । केहीको नक्कली भिसा भेटिएका कारण समूहका सबै जनालाई जर्मनीको सुरक्षा निकायले रोकेको हो ।

राजदूत खड्काले आफूहरूसमक्ष आधिकारिक रूपमा उद्धार वा अन्य सहयोगका लागि आग्रह नगरिएको उल्लेख गर्दै भने, ‘कसैले उद्धार गरिदिनुपर्‍यो भन्यो भने दूतावासले पहल गर्ने हो । आधिकारिक रूपमा केही आएको छैन । तर नेपालीहरूलाई यस्तो भयो भन्ने सुनेपछि हामी सुरक्षा निकायको सम्पर्कमा छौं । थप जानकारी लिने प्रयासमा छौं ।’

प्रकाशित : आश्विन ३, २०७८ २१:४८
पूरा पढ्नुहोस्
प्रतिक्रिया
पठाउनुहोस्
×