नेपालसँग सीमा जोडिएको उत्तर प्रदेशमा 'जिका भाइरस' संक्रमितको संख्या ७९ पुग्यो  - विश्व - कान्तिपुर समाचार

नेपालसँग सीमा जोडिएको उत्तर प्रदेशमा 'जिका भाइरस' संक्रमितको संख्या ७९ पुग्यो  

१३ नयाँ संक्रमित भेटिए 
एजेन्सी

काठमाडौँ — नेपालसँग सीमा जोडिएको भारत उत्तर प्रदेश राज्यको कानपुरमा लामखुट्टेले सार्ने जिका भाइरस संक्रमित १३ नयाँ रोगी भेटिएका छन् । योसँगै उत्तर प्रदेश राज्यमा जिका भाइरस संक्रमित रोगीको संख्या ७९ पुगेको छ ।

कानपुरका स्वास्थ्य अधिकारीहरुले त्यस क्षेत्रमा जिका भाइरस तीव्रगतिमा फैलिएको र त्यसलाई नियन्त्रण गर्न विशेष सतर्कता आवश्यक रहेको बताएका छन् ।

'द हिन्दुस्तान टाइम्स'ले कानपुरका सबै अस्पतालमा जिका भाइरस संक्रमितको उपचारका लागि आवश्यक प्रबन्ध गरिएको र सबै बिरामीको स्वास्थ्य निरन्तर रुपमा निरीक्षण गरिएको बताएका छन् । कानपुर उत्तर प्रदेश राज्यको राजधानी लखनउबाट ८० किलोमिटर पश्चिमतर्फ छ।

जिका भाइरस सम्बन्धी रोगीहरु देखिन थाले उत्तर प्रदेशका मुख्यमन्त्री योगी आदित्यनाथले अधिकारीहरुलाई कानपुरमा सरसफाइको कामलाई तीव्रता दिन निर्देशन दिएका छन् ।

मुख्यमन्त्री योगीले यस विषयलाई गम्भीरतासाथ लिन र परीक्षणलाई तीव्रता दिन निर्देशन दिएका छन् । मुख्यमन्त्रीको कार्यालयले अनुगमन समितिलाई पूर्ण रुपमा सहयोग हुने जनाएको छ ।

संक्रमित एडिज प्रजातिको लामखुट्टेले टोकेका व्यक्तिमा जिका भाइरस सर्छ । संक्रमित हुनेमा हल्का ज्वरो, डाबर आउने, आँखा रातो हुने, मासंपेशी र जोर्नीमा पीडा हुने र टाउको दुख्ने लक्षण हुन्छन्। यसले गर्भवती महिलामा भने असर गर्छ । संक्रमित गर्भवती महिलाबाट जन्मने सन्तानको उही उमेरका बालबालिका भन्दा टाउको सानो हुने माइक्रोसेफली हुन्छ । विश्व स्वास्थ्य संगठनकाअनुसार १९४७ मा सबैभन्दा पहिले युगाण्डा बाँदरमा पहिचान गरिएको थियो । पछि १९५२ मा तान्जानिया र युगाण्डामा मानिसमा भेटिएको थियो । यसअघि पनि एसिया तथा प्रशान्त क्षेत्र, अफ्रिका, अमेरिकामा जिकाले महामारीको रुप लिएको थियो ।

प्रकाशित : कार्तिक २१, २०७८ १४:४९
प्रतिक्रिया
पठाउनुहोस्

गुडगाउँमा मुस्लिम प्रार्थना रोक्दै हिन्दु कार्यक्रम

एजेन्सी

भारत — नाजिस मोहम्मद हरेक दिन गुडगाउँस्थित आफ्नो सेलुन नजिकै रहेको सार्वजनिक स्थलमा प्रार्थना गर्न जान्थे । तर यस शुक्रबार उनका लागि प्रार्थना गर्ने ठाउँ थिएन । 'आज म कतै नमाज पढ्नसक्छु जस्तो नै लागेन' नाजिसले भने ।

यसको कारण के भने उनले नमाज पढ्ने उक्त खुला मैदानमा हाल दसौं हजार हिन्दु समूह भेला भई धार्मिक सभा तथा कार्यक्रम गरिरहेका छन् । जहाँ भाजपासँग आवद्ध कपिल मिश्रसहित थुप्रै राजनीतिज्ञ र हिन्दु पूजारीहरू सहभागी छन्। मिश्र त्यस्ता नेता हुन् जसमाथि गत वर्ष नयाँदिल्लीमा धार्मिक हिंसा भड्काएको आरोप लागेको थियो । जुन हिंसामा अधिकांश मुस्लिमसहित ५३ जना मारिएका थिए ।

मुस्लिम प्रार्थनाको अनुमति खारेज

शुक्रबारको उक्त कार्यक्रम त्यस्तो बेलामा आएको छ कि यसअघि उत्तर भारतको हरियाणाका अधिकारीहरूले गुडगाउँमा ३७ मध्ये ८ वटा सार्वजनिक स्थलमा प्रार्थना अनुमति खारेज गरिसकेका छन् । '८ वटा स्थान प्रार्थनास्थलमा अनुमति खारेज गरिएको छ,' गुडगाउँ प्रहरीले मंगलबार विज्ञप्तिमार्फत् भनेको छ । विज्ञप्तिमा भनिएको छ, 'यदी अन्य ठाउँमा बासिन्दाहरूले आपत्ति उठाए भने त्यहाँ पनि प्रार्थना गर्ने अनुमति रद्द गरिनेछ ।'

हिन्दु समूहहरूले हप्तौँदेखि धार्मिक गीत तथा नारावाजी गरेसँगै प्रहरीले यहाँ मुस्लिमहरूको प्रार्थनामा रोक लगाएको हो । हिन्दुहरूको छाता संगठन संयुक्त हिन्दु संघर्ष समितिले यसअघि नै यदी प्रहरीले मुस्लिम प्रार्थना रोक्न नसकेमा आफूहरूले नै रोक्ने चेतावनी दिएको छ ।

यसबीचमा उक्त समितिका नेताहरूले नै मुस्लिम प्रार्थना रोक्न आफूहरू लाठी लिएर पनि उत्रनसक्ने भन्दै खुला रुपमा चेतावनी दिएका छन् । साथै सम्भावित असुरक्षा नियन्त्रण गर्ने जिम्मा प्रशासनको भएको भन्दै उनीहरूले आफूहरू जेल जान समेत तयार रहेको बरु मुस्लिम प्रार्थना रोकेरै छाड्ने बताएका छन् ।

भारतीय सञ्चारमाध्यमका अनुसार गुडगाउँमा २२ वटा मस्जिद छन् । १० लाखभन्दा बढी मानिसको बसोबास रहेको यस ठाउँमा ५ प्रतिशतभन्दा कम मुस्लिम छन् । 'शुक्रबारको प्रार्थनाका लागि हाम्रो नजिकै कुनै मस्जिद छैन । नजिकैको मस्जिद भनेको ४ किलोमिटर टाढा मात्रै छ,' नजिसले भनेका छन् ।

मुस्लिम नेता तथा सांसद्‍ असदुद्दीन ओवैसीले भने गुडगाउँ प्रशासनले केही क्षेत्रहरूमा शुक्रबार प्रार्थना प्रतिबन्ध लगाउने निर्णय गर्नु भनेको भारतको संविधानको धारा २५ उल्लंघन गर्नु भएको बताएका छन् । जस अन्तर्गत भारतीय नागरिकलाई धर्मको अभ्यास र प्रचार गर्ने अधिकार दिएको छ । 'मेरो धर्म अभ्यास गर्दा वा हप्तामा एक पटक १५ देखि २० मिनेट नमाज पढ्दा कसैलाई कसरी चोट पुग्छ ?' उनले सोधेका छन् ।

साथै उनले यहाँ प्रदर्शन गरेका हिन्दु समूहहरूलाई लक्षित गर्दै उनीहरू कट्टरपन्थी बन्दैगएको र मुस्लिमप्रति उनीहरूको घृणा स्पष्ट देखिएको उनले बताएका छन् ।

यसैबीच भाजपाका नेता तथा गृहमन्त्री अमित शाहले गत साता उत्तरी राज्य उत्तराखण्डमा बीजेपीको चुनावी अभियान सुरु गर्दा मुख्य विपक्षी दलले सडकमा मुस्लिम प्रार्थनालाई अनुमति दिएर 'तुष्टीकरणको राजनीति' गरेको बताएका थिए।

तर गुडगाउँका मुस्लिम नेता तथा बासिन्दाहरू भने यहाँका हिन्दु बासिन्दाहरू आफ्नो विरुद्धमा नभएको तर केही सिमित नेताहरूले यस्ता गतिविधि गर्ने गरेको बताउँछन् । पछिल्लो शुक्रबार प्रार्थना रोक्ने काममा केही सिमित व्यक्तिहरूको हात रहेको मुस्लिम एकता मञ्चका नेताहरूको भनाइ छ ।

(अलजजिराबाट)


प्रकाशित : कार्तिक १९, २०७८ २०:४४
पूरा पढ्नुहोस्
प्रतिक्रिया
पठाउनुहोस्
×