दासी बालिकामाथि युद्ध अपराध गरेको भन्दै आईएस महिलालाई १० वर्ष जेल सजाय
बर्लिन — स्लामिक स्टेट सशस्त्र समूहमा संलग्न जर्मन महिलाविरुद्ध म्युनिख अदालतले १० बर्षको जेल सजाय सुनाएको छ । ५ वर्षीया दासी बालिकाको मृत्युमा उनले युद्ध अपराध गरेको ठहर गर्दै अदालतले सोमबार यस्तो फैसला सुनाएको हो ।
दक्षिणी जर्मन सहरस्थित उच्च क्षेत्रीय अदालतका प्रधानन्यायाधीश रेनहोल्ड बेयरले ३० वर्षीया जेनिफर वेनिसलाई याजिदी समुदायमाथि गरेको उत्पीडन सम्बन्धमा यस्तो सजाय तोकेको हो । इस्लामिक स्टेटको उत्पीडनबारे यहाँको अदालतले गरेको यो पहिलो फैसला हो ।
यससँगै वेनिसलाई दासत्वको स्वरुपमा मानवता विरुद्ध गरिएका दुई अपराधमा दोषी ठहर गरिएको हो । साथै उनले बालिकाको हत्यामा सहयोगी भूमिका खेलेको अर्थात् दुरुत्साहन गरेको अदालतको ठहर छ ।
२०१५ मा इराकको मोसुललाई आईएसले कब्जामा लिने क्रममा वेनिस र उनका आईएस लडाकू श्रीमानले याजिदी महिला र एक बालिकालाई घरेलु दासको रुपमा खरिद गरेको अदालतले जनाएको छ ।
ती याजिदी बालिका बिरामी भई तिर्खाएको अवस्थामा वेनिसका दम्पत्तिले घर बाहिर बाँधेर राखी मृत्युको मुखमा पुर्याएको अदालतको ठहर छ । उनीहरुले बालिकालाई बचाउन केही पहल नगरेको पनि बताइएको छ । वेनिसका पति ताहा अल जुमैलीले पनि फ्रांकफर्टमा अर्को मुद्दाको सामना गरिरहेका छन् ।
प्रकाशित : कार्तिक ८, २०७८ २०:४९