२१.१२°C काठमाडौं
अमेरिकाले भन्यो- 'आतंकवादविरोधी हमलाका लागि तालिबानसँग समन्वय जरुरी छैन'
काठमाडौँ — अमेरिकाले अफगानिस्तानमा आतंकवादविरोधी हवाई हमलाका लागि तालिबानसँग समन्वय गर्न जरुरी नरहेको जनाएको छ । अमेरिकी रक्षा मन्त्रालयले आइतबार यस्तो प्रतिक्रिया दिएको हो । पेन्टागन प्रेस सेक्रेटरी जोन किर्बीले अफगानिस्तानमा आतंकवादीविरुद्ध हवाई हमलाबारे तालिबानसँग कुरा गर्नु आवश्यक नरहेको बताएका छन् ।
यसका लागि आफूहरुले क्षितिजभन्दा परसम्म आवश्यक अधिकारीहरु राखेको जोन किर्बीको भनाइ छ । तालिबानले अफगानिस्तान युद्धमा सामेल देशहरुसँग क्षतिपूर्ति माग गरेको भोलिपल्टै अमेरिकी रक्षा मन्त्रालयबाट यस्तो प्रतिक्रिया आएको हो ।
यसैबीच अफगानिस्तानी मामिलामा हस्तक्षेप गर्न नहुने पनि तालिबानको भनाइ थियो । तालिबान सरकारका सांस्कृतिक आयोगका सदस्य जावद सरले भनेका छन्, 'हामी अमेरिकाले गैरजिम्मेवार टिप्पणी नगरोस् भन्ने चाहन्छौँ । उनीहरुले काबुलमा हवाई हमला गरेर बालबालिकासहित सर्वसाधारण मारेका थिए ।'
प्रकाशित : आश्विन १०, २०७८ २२:००
