समलिंगी विवाहबारे जापानका प्रधानमन्त्री उम्मेदवारहरु अनुदार- विश्व - कान्तिपुर समाचार

समलिंगी विवाहबारे जापानका प्रधानमन्त्री उम्मेदवारहरु अनुदार

एजेन्सी

टोकियो — जापानमा नयाँ प्रधानमन्त्री चयनको अभ्यास भइरहँदा भावी प्रधानमन्त्रीका उम्मेदवारहरु विभिन्न मुद्दामा गम्भीर बहस र विवाद गर्दैछन् । महामारी नियन्त्रण, आम्दानीमा समानतालगायत मुद्दा प्राय: उनीहरुका मुद्दा बन्ने गरेका छन् ।

तर प्रधानमन्त्रीका सबैजसो उम्मेदवारहरु समलिंगी विवाहलगायत लैंगिक मुद्दाबारे मौन वा विभाजित देखिएका छन् । पछिल्लो समय भएका टेलिभिजन अन्तर्वार्तामा उनीहरुमध्ये धेरैजसो लैंगिक समानताको मुद्दाबारे अनुदार देखिएका छन् ।

विशेषगरी लिबरल डेमोक्रेटिक पार्टीको उम्मेदवार जो बन्छ उही नेता नै सेप्टेम्बर २९ मा हुने चुनावबाट प्रधानमन्त्री बन्ने सम्भावना प्रवल छ । किनकि संसद्‌मा लिबरल डेमोक्रेटिक पार्टीको बाहुल्यताका कारण उक्त पार्टीको उम्मेदवारले जित्ने पक्कापक्की छ ।

प्रधानमन्त्री पदका प्रवल दाबेदार मानिएका खोपमन्त्री तारो कोनोले भने हालै टेलिभिजन अन्तर्वार्ताको क्रममा आफ्नो पार्टीको नीतिविपरीत आफू समलिंगी विवाहलाई पहिचान दिने पक्षमा रहेको बताए । तर उनका प्रतिद्वन्द्वी मानिएका पूर्वपरराष्ट्रमन्त्री फुमिओ किशिदाले आफू समलिंगी विवाहको पक्षमा अझै नपुगेको प्रतिक्रिया दिए ।

अरु दुई महिला उम्मेदवारहरु सेइको नोडा र सानाए ताकाइची पनि समलिंगी विवाहको पक्षमा अनुदार नै देखिएका छन् । जबकि ६१ वर्षीया सेइको पूर्वलैंगिक समानतामन्त्री हुन् भने ६० वर्षीया सानाए पूर्वआन्तरिक मामिलामन्त्री हुन् ।

लैंगिक समानताबारे दुबै महिला नेत्रीको प्रतिक्रियालाई अनपेक्षित रुपमा हेरिएको छ । जबकि संसदीय समिकरणमा फेरबदल आएमा उनीहरुमध्ये एक पहिलो महिला प्रधानमन्त्री बन्ने अवसर पाउनेछन् । अरु चार उम्मेदवार फेरि टेलिभिजन बहसमा उत्रने तयारीमा छन् । तर सबैजसो उम्मेदवारहरु यस्तै लैंगिक समानताको मुद्दामा विभाजित बन्ने गरेका छन् ।

यस्तै विवाहित जोडीले निजी थर लेख्न पाउने कि नपाउने भन्ने प्रश्न पनि उनीहरुका लागि पेचिलो बन्ने गरेको छ । जापानमा नयाँ प्रधानमन्त्री चयनको तयारी भइरहँदा महिलासहित लैंगिक अल्पसंख्यकका मुद्दालाई आगामी दिनमा सम्बोधन गर्न नेताहरु कति प्रतिबद्ध छन् भनेर पनि बहस हुँदैछ ।

प्रकाशित : आश्विन १०, २०७८ २१:१५
प्रतिक्रिया
पठाउनुहोस्

नेकपा (एस) निकट खेलकुद महासंघ गठन

रासस

काठमाडौँ — नेकपा (एकीकृत समाजवादी) निकट नेपाल खेलकुद महासंघ गठन गरिएको छ । यहाँ आइतबार आयोजित कार्यक्रममा राष्ट्रिय खेलकुद परिषद्का पूर्वसदस्य–सचिव केशव विष्टको नेतृत्वमा नयाँ समिति गठन गरिएको हो । 

एमाले निकट उक्त महासंघ ३३६ सदस्यीय केन्द्रीय समिति रहेकामा ३०७ केन्द्रीय सदस्यले एकीकृत समाजवादीको जनवर्गीय संगठनका रूपमा महासंघमा रहने निर्णय गरेका हुन् । आगामी कात्तिक १२ र १३ गते काठमाडौंमा राष्ट्रिय भेला गरिने महासंघको १२ सदस्यीय पदाधिकारी तथा ७५ सदस्यीय सचिवालयसमेत गठन गरिएको छ ।

पार्टीका उपमहासचिव विजय पौडेलले नयाँ कार्यसमितिलाई खेलकुदका माध्यमबाट देशभर संगठनलाई प्रभावकारी ढंगबाट सञ्चालन गरी जनताको सेवालाई केन्द्रमा राखेर राष्ट्र निर्माणमा लाग्न आग्रह गरे । संघीय, प्रतिनिधिसभा सदस्य एवं नेपाल ओलम्पिक कमिटीका अध्यक्ष जीवनराम श्रेष्ठले देशका विभिन्न स्थानमा लुकेका प्रतिभाशाली खेलाडीलाई पहिचान गरी उनीहरूलाई आवश्यक समन्वय र सहयोग गरी राष्ट्रिय खेलाडीका रूपमा विकास गर्नुपर्नेमा जोड दिए । नवगठित कार्यसमितिका अध्यक्ष विष्टले खेलकुदका माध्यमबाट अन्तर्राष्ट्रिय तहमा मुलुकको गौरव बढाउन सकिने विश्वास व्यक्त गरे ।


प्रकाशित : आश्विन १०, २०७८ २०:३१
पूरा पढ्नुहोस्
प्रतिक्रिया
पठाउनुहोस्
×