सुहेल साहिन संयुक्त राष्ट्रसंघका लागि तालिबानका ‘नयाँ राजदूत’- विश्व - कान्तिपुर समाचार

सुहेल साहिन संयुक्त राष्ट्रसंघका लागि तालिबानका ‘नयाँ राजदूत’

महासभामा सम्बोधन गर्ने व्यवस्था मिलाइदिन महासचिवसँग तालिबानको माग
कान्तिपुर संवाददाता

काठमाडौँ — तालिबानले संयुक्त राष्ट्रसंघको महासभामा सम्बोधनको व्यवस्था मिलाउन महासचिव एन्टोनियो गुटेरसलाई पत्र पठाएको छ । सोमबार महासचिव गुटेरसलाई पत्र पठाएर विश्वका प्रमुख नेताहरूका सामु आफ्ना कुरा राख्ने अवसर मिलाइदिन तालिबानले आग्रह गरेको हो । त्यस्तै तालिबानले संयुक्त राष्ट्रसंघका लागि अफगानिस्तानको राजदूतमा सुहेल साहिनलाई मनोनीत गरेको पनि जनाएको छ ।

सुहेल खान दोहामा बसेर तालिबानको प्रवक्ताको भूमिका निर्वाह गरिरहेका छन् । तालिबान सरकारका विदेशमन्त्री अमिर खान मुत्ताकीले महासचिव गुटेरसलाई पत्र लेखेर महासभामा सम्बोधन गर्न चाहेको बताएको अन्तर्राष्ट्रिय समाचार संस्था रोयटर्सले जनाएको छ ।

रोयटर्सका अनुसार गुटेरसका प्रवक्ता फरहान हकले मुत्ताकीले पत्र पठाएको पुष्टि गरेका छन् । अहिले गुलाम इसाक्जई संयुक्त राष्ट्रसंघका लागि अफगानिस्तानका राजदूतका रूपमा रहेका छन् । तालिबानको पत्रमा भनिएको छ, ‘इसाक्जईको मिसन पूरा भएको छ । अब उनले अफगानिस्तानको प्रतिनिधित्व गर्ने छैनन् । ’

किन रद्द भयो सार्क परराष्ट्रमन्त्रीस्तरीय 'साइडलाइन' बैठक ?

अफगानिस्तानको पत्र अमेरिका, रुस र चीनसमेत रहेको ९ सदस्यीय प्रमाणीकरण समितिलाई पठाइएको हकले जानकारी दिएको छ । यस विषयमा समितिले तत्काल निर्णय गर्ने अवस्था नदेखिएकाले तालिबानले विश्वमञ्चमा सम्बोधन गर्ने अवसर पाउने देखिँदैन ।

समितिले निर्णय नगरेमा इसाक्जइले नै महासभाको अन्तिम दिन सेप्टेम्बर २७ मा सम्बोधन गर्ने सम्भावना रहेको छ । तालिबानको पत्रका बारेमा सदस्य राष्ट्रहरूले अहिलेसम्म कुनै प्रतिक्रिया दिएका छैनन् । उक्त समितिका अन्य सदस्यमा बहमास, भुटान, चिली, नामिबिया, सियरा लियोन र स्विडेन रहेका छन् ।

संयुक्त राष्ट्रसंघका लागि नयाँ राजदूत मनोनीत गरेर कट्टरपन्थी मानिने तालिबानले अन्तर्राष्ट्रिय मान्यता पाउनका लागि कदम चालेको छ । लामो समयदेखि युद्धले ग्रस्त अफगानिस्तानको अर्थतन्त्र उकास्नका लागि पनि अन्तर्राष्ट्रिय सहायता आवश्यक रहेको छ ।

यसअघि सन् १९९६ देखि २००१ सम्म तालिबान सरकार रहेका बेला राष्ट्रसंघको महासभासम्बन्धी प्रमाणीकरण समितिले मान्यता नदिएका कारण पुरानै सरकारका राजदूतहरू कायम रहेका थिए ।

- यसअघिको समाचारमा सुहेल साहिन हुनेपर्नेमा सुहेल खान हुन गएकाले सच्याइएको छ ।

प्रकाशित : आश्विन ६, २०७८ १३:०८
प्रतिक्रिया
पठाउनुहोस्

राईको ‘श्वेतशार्दूलः मदन भण्डारीको जीवन’  सार्वजनिक

कान्तिपुर संवाददाता

काठमाडौँ — लेखक रमेश रुछेन राईद्वारा लिखित ‘श्वेतशार्दूलः मदन भण्डारीको जीवन’  सार्वजनिक भएको छ । पूर्वप्रधानमन्त्री तथा एमाले अध्यक्ष केपी शर्मा ओलीले मंगलबार पुस्तक विमोचन गरेका हुन् ।

सांग्रिला बुक्सद्वारा प्रकाशित यस पुस्तक नेपाली राजनीतिका प्रखर तथा गतिशील पात्र मदन भण्डारीको जीवनमार्फत वाम राजनीतिको विगत हेर्ने एउटा प्रयास हो ।

राजनीति र विकाससम्बन्धी अध्येता राई मोफलसलमा बसेर नेपाली राजनीति र विकासमा विगतको खोजी र वर्तमान निर्माणसम्बन्धी अध्ययनमा संलग्न छन् ।

पुस्तकको समीक्षा गर्दै नेकपा एमाले नेता विन्दा पाण्डेले नयाँ पुस्ताले पढ्नैपर्ने सामग्री भएको बताइन् । अर्का टिप्पणीकार पूर्वसभामुख दमननाथ ढुंगानाले नेपाली कम्युनिस्ट आन्दोलनमा मदन भण्डारीको योगदान बुझ्न युवा पुस्ताले यो पुस्तक पढ्नै पर्ने बताए ।


प्रकाशित : आश्विन ६, २०७८ १३:०१
पूरा पढ्नुहोस्
प्रतिक्रिया
पठाउनुहोस्
×