चीनमा १४ वर्षमुनिका प्रयोगकर्ताले दैनिक ४० मिनेटभन्दा बढी टिकटक चलाउन नपाउने- विश्व - कान्तिपुर समाचार

चीनमा १४ वर्षमुनिका प्रयोगकर्ताले दैनिक ४० मिनेटभन्दा बढी टिकटक चलाउन नपाउने

कान्तिपुर संवाददाता

काठमाडौँ — चीनमा १४ वर्षमुनिका बालबालिकाले दिनको ४० मिनेटभन्दा बढी टिकटक चलाउन नपाउने भएका छन् । चिनियाँ भर्जनको टिकटक ‘दोयिन’ ले ‘टिनेज मोड’ सुरु गरेको हो ।

टिकटकको ‘प्यारेन्ट कम्पनी’ बाइटडान्सले शनिबार एउटा वक्तव्य जारी गर्दै १४ वर्षमुनिका प्रयोगकर्तालाई समयावधि तोकिएको जानकारी दिएको छ । साथै उक्त उमेर समूहका प्रयोगकर्ताले बिहान ६ बजेदेखि राति १० बजेको बीचमा मात्रै टिकटक चलाउन पाउनेछन् । साथै प्रयोगकर्ताले वास्तविक नाममा टिकटक आइडी बनाउनुपर्नेछ ।

वास्तविक नामबिना बनाइने टिकटकमाथि कसरी निगरानी गरिन्छ भन्नेबारे भने केही खुलाइएको छैन । कम्पनीले युवा उमेर समूहका प्रयोगकर्तालाई लक्षित गरेर विज्ञान, संग्रहालय र प्राकृतिक दृश्यसहितका सामग्रीलाई प्राथमिकता दिने पनि बताएको छ ।

त्यस्तै तियानमेन स्क्वायर, जिन्जियाङ उइघुर मुस्लिमलगायतका राजनीतिक रूपले संवदेनशील विषयमा बनाइने भिडियोमाथि पनि कडा निगरानी राखिने र उक्त सामग्री तुरुन्त हटाइनेछ ।

सीएनबीसीका अनुसार चीनमा करिब ६० करोड टिकटक प्रयोगकर्ता रहेका छन् । बाइटडान्स चीनको सीईओ केली चाङका अनुसार गत वर्ष २ करोड २० लाखभन्दा बढी प्रयोगकर्ताले आफ्ना भिडियो सामग्रीमार्फत झन्डै ४१ बिलियन युआन कमाएका थिए ।

पछिल्लो समय युवा पुस्तामाझ टिकटक एप निकै लोकप्रिय बनिरहेको छ । त्यस्तै सञ्चारमाध्यम, व्यावसायिक कम्पनी र सेलेब्रिटीहरूले समेत टिकटकमार्फत आफ्ना सामग्री प्रवद्र्धन गर्दै आएका छन् ।

प्रकाशित : आश्विन ५, २०७८ ०९:५९
प्रतिक्रिया
पठाउनुहोस्

उपचार गर्न जाने भन्दै ‘पतिलाई भारत पुर्‍याएर हत्या’

भदौ १८ गते शव भेटिएका सिरहाका दुखरन यादवको हत्या आरोपमा पत्नी हरिहरदेवी पक्राउ, ६० हजार रुपैयाँ ‘सुपारी’ दिएर प्रेमीमार्फत हत्या गराएको प्रहरीको दाबी
भरत जर्घामगर

सिरहा — सिरहाको गोलबजार नगरपालिका–४ निपनियाका ३९ वर्षीय दुखरन महरा मोचीको हत्यामा संलग्नता देखिएको भन्दै प्रहरीले उनकै पत्नीलाई पक्राउ गरेको छ । हत्याको मुख्य योजनाकार नै दुखरनकी पत्नी हरिहरदेवी रहेको प्रहरीको दाबी छ ।

हरिहरदेवीले उपचारको बहानामा भारत, जयनगर पुर्‍याई भारतीय नागरिक मुकेश यादवको समूहलाई ६० हजार रुपैयाँ दिएर पतिको हत्या गराएको अनुसन्धानमा खुलेको जिल्ला प्रहरी कार्यालय सिरहाका प्रवक्ता सुवास बुढाथोकीले जानकारी दिए ।

दुखरन भारत, बिहारको जयनगर बजारनजिकै बरही गाउँमा भदौ १८ गते मृत फेला परेका थिए । धारिलो हतियारले घाँटी रेटिएको र अन्य विभिन्न भागमा चोट लागेको अवस्थामा शव भेटिएको थियो । ‘३८ वर्षीया हरिहरदेवीले भारतीय नागरिक २६ वर्षीय मुकेश यादवसँग मिलेर पतिको हत्या गरेको प्रारम्भिक अनुसन्धानबाट देखिएको छ,’ बुढाथोकीले भने । हरिहरदेवीलाई जिल्ला प्रहरी कार्यालयको हिरासतमा राखी अनुसन्धान अघि बढाइएको छ ।

प्रेमीसँग मिलेर हत्या योजना

दुखरन र हरिहरदेवीका ४ सन्तान छन् । पति १० वर्ष कतारमा काम गरे फर्केपछि गाउँमै फर्निचर र किराना पसल व्यवसाय गरिरहेका थिए । प्रहरी अनुसन्धानले देखाएअनुसार विदेशमा कमाएको रकम बचत नभएको भन्दै पति–पत्नी बीच बारम्बार झगडा हुने गथ्र्यो । दुखरन मादक पदार्थ सेवन गर्थे । पैसा कहाँ खर्च गरेको भन्दै पत्नीलाई कुटपिट गर्ने, पसलका सामान फालिदिने तथा आगो लगाइदिने गर्थे । बारम्बारको यातनाबाट छुटकारा पाउन हरिहरदेवीले हत्या योजना बुनेको प्रहरीले जनाएको छ ।

दुई वर्षअघि हरिहरदेवी पाठेघरको अप्रेसन गर्न एम्बुलेन्समा भारत, जयनगरस्थित अस्पताल गइन् । त्यही बेला चिनजान भएका एम्बुलेन्स चालक मुकेश यादवसँग उनको प्रेम बस्यो । प्रहरीका अनुसार हरिहरदेवीले प्रेमी मुकेशसँग पतिको हत्या गर्ने सल्लाह गरिन् ।

‘प्रेमीले भारतीय १ लाख रुपैंयाँ लाग्छ भनेको र मसँग त्यति धेरै पैसा छैन, ४०–५० हजार सम्म दिन सक्छु भनेपछि हत्याको योजना बनाएको देखिन्छ,’ डीएसपी बुढाथोकीले भने, ‘आवश्यक रकम व्यवस्थापन गर्नका लागि घरखर्चको अभाव भएकाले ऋण निकाल्नु पर्‍यो भनेर श्रीमान्सँग सल्लाह गरी गत भदौ १७ गते गोलबजारस्थित छिमेक लघुवित्तबाट ६० हजार ऋण लिइन् ।’

बुढाथोकीका अनुसार ऋण लिएपछि हरिहरदेवीले आफूलाई सन्चो नभएको र जयनगर गई उपचार गर्नुपर्ने भन्दै श्रीमान्लाई फकाइन् । उनीहरू भदौ १७ गते नै भारत पुगे । त्यसअघि नै हरिहरदेवीले सिरहाको माडरबाट प्रेमी मुकेशलाई आफूहरू आउँदै गरेको फोनबाट जानकारी दिइन् । योजनाअनुसार हत्याका लागि आवश्यक रकम पतिको खल्तीमै रहेको खबर पनि दिइन् ।

साँझ ६ बजे जयनगर रेल्वे स्टेसन पुगेपछि उनीहरू पसलमा चिया खान बसे । मुकेश पनि त्यहीँ आए । चिया खाएपछि मुकेशले दुखरनलाई बुलेट मोटरसाइकलमा राखेर लगेको र अन्य दुई भारतीयको सहयोगमा उनलाई बरही गाउँको नहरमा पुर्‍याई हत्या गरेको प्रहरीले जनाएको छ । घाँटी रेटेर हत्या गरेपछि उनीहरूले दुखरनको साथमा रहेको ६० हजार रुपैयाँसमेत लगे ।

हरिहरदेवी भदौ १८ गते बिहान जयनगरबाट आफ्नो घर निपनिया पुगिन् । प्रहरीले उनलाई पक्राउ गरी ज्यानसम्बन्धी मुद्दामा अनुसन्धान गर्न जिल्ला अदालतबाट ५ दिन थुनामा राख्न अनुमति लिएको छ । एम्बुलेन्स चालक मुकेशलाई भारतीय प्रहरीले पक्राउ गरी जयनगर थानामा राखेको र अनुसन्धान भइरहेको प्रहरीले जनाएको छ ।

प्रकाशित : आश्विन ५, २०७८ ०९:५५
पूरा पढ्नुहोस्
प्रतिक्रिया
पठाउनुहोस्
×