भारतको केरलामा भेटियो जिका भाइरस- विश्व - कान्तिपुर समाचार

भारतको केरलामा भेटियो जिका भाइरस

कान्तिपुर संवाददाता

काठमाडौँ — भारतको केरलामा जिका भाइरस भेटिएको छ । भाइरस भेटिएपछि केरला राज्यका स्वास्थ्य अधिकारीहरुले त्यहाँका सबै जिल्लाहरुमा सतर्क रहन आग्रह गरेका छन् । केरलाका १४ जना मानिसमा जिका संक्रमण भेटिएको छ । यो भाइरस लामखुट्टेबाट मानिसमा फैलिन्छ ।

केरलाकी स्वास्थ्यमन्त्री भिना जर्जले केरलाको त्रिवेन्द्रम(तिरुवनन्तपुरम) मा संक्रमण भेटिएको पुष्टि गरेकी छन् । सन् २०१६–२०१७ मा गुजरातमा जिका प्रकोपको रुपमा फैलिएको थियो ।

जर्जका अनुसार पहिलो पटक तामिलनाडुकी २४ वर्षीया गर्भवती महिलामा यो भाइरस देखिएको हो । ज्वरो, टाउको दुख्ने तथा रातो बिबिरा आउने लक्षणसहित उनी त्रिवेन्द्रमको अस्पतालमा जुन २८ मा भर्ना भएकी थिइन् । उनले बुधबार बच्चा पनि जन्माइन् ।

जर्जले उनको अवस्था सामान्य रहेको, डेलिभरी पनि समान्य अवस्थामा नै भएको बताउँदै राज्य बाहिर उनको कुनै ट्राभल हिस्ट्री नरहेको जनाइन् । मनसुन सँगै लामखुट्टेको संख्या पनि बढ्दै गएकाले सतर्कता अपनाउन उनले आग्रह गरिन् ।

केरलाका स्वास्थ्य सचिव डा. राज खोब्रागेडले संक्रमण देखिएका ठाउँहरुमा उच्च निगरानी बढाएको भन्दै मानिसहरुलाई यसप्रति सजग रहन आग्रह गरेका छन् ।

प्रकाशित : असार २५, २०७८ १७:१६
प्रतिक्रिया
पठाउनुहोस्

थपिए १ हजार ४७९ कोरोना संक्रमित, १ हजार ३१६ संक्रमणमुक्त, २० को मृत्यु 

कान्तिपुर संवाददाता

काठमाडौँ — २४ घण्टामा देशभर १ हजार ४७९ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार शुक्रबार विभिन्न जिल्लामा गरिएको ६ हजार ६५७ पीसीआर परीक्षणमा १ हजार ४७९ जनामा कोरोना पुष्टि भएको हो ।

४ हजार ६५६ एन्टिजेन परीक्षणमा ७६० जनामा कोरोना संक्रमण देखिएको छ । पीसीआर र एन्टिजेन परीक्षणबाट कुल २ हजार २३९ जनामा संक्रमण पुष्टि भएको मन्त्रालयले जनाएको छ । योसँगै नेपालमा पीसीआर परीक्षणमा कोरोना देखिनेको संख्या ६ लाख ५२ हजार ८५९ पुगेको छ ।

यस्तै, २४ घण्टामा १ हजार ३१६ जना कोरोना संक्रमणमुक्त भएका छन् । योसँगै कोरोना संक्रमण भइ निको हुनेको संख्या ६ लाख १६ हजार ९२९ पुगेको छ ।

मन्त्रालयले दिएको जानकारी अनुसार देशभर गरी थप २० जनाको मृत्यु भएको छ । योसँगै नेपालमा कोरोनाबाट मृत्यु हुनेको संख्या ९ हजार ३४० पुगेको छ ।

प्रकाशित : असार २५, २०७८ १६:५१
पूरा पढ्नुहोस्
प्रतिक्रिया
पठाउनुहोस्
x
×