महामारीमा पनि बीआरआई सहयोगका लागि अघि बढिरह्यो :  चिनियाँ परराष्ट्रमन्त्री वाङ यी- विश्व - कान्तिपुर समाचार

महामारीमा पनि बीआरआई सहयोगका लागि अघि बढिरह्यो :  चिनियाँ परराष्ट्रमन्त्री वाङ यी

लक्ष्मी लम्साल

बेइजिङ — चिनियाँ परराष्ट्रमन्त्री वाङ यीले कोरोना महामारीको बीच पनि बेल्ट एन्ड रोड इनिसियटिभ (बीआरआई) ले सहयोग स्थगन नगरेको बताएका छन् । यसका विरुद्ध विभिन्न प्रयास भए पनि त्यसलाई प्रतिरोध गर्दै अघि बढेको उनको भनाइ छ । 

बेइजिङबाट बुधबार बीआरआई एसिया प्रशान्तक्षेत्रीय अन्तर्राष्ट्रिय सहकार्य उच्चस्तरीय भिडियो सम्मेलनको अध्यक्षता गर्दै वाङले भने, ‘हामीले महामारी प्रतिरोधमा अन्तर्राष्ट्रिय ‘फायरवाल’ निर्माण गर्न हातमा हात मिलाएका छौं ।’

नेपालका तर्फबाट उपप्रधान एवं अर्थमन्त्री विष्णु पौडेलसमेत सहभागी भिडियो सम्मेलनमा एसिया प्रशान्तक्षेत्रका ३० मुलुकका परराष्ट्र तथा अर्थमन्त्रीहरू सहभागी भएको चिनियाँ सञ्चारमाध्यमले जनाएका छन् ।

मन्त्री वाङका अनुसार चीनले महामारीयता विश्वका १ सयभन्दा बढी पक्षसँग महामारी रोकथाम तथा नियन्त्रणको अनुभव आदानप्रदान गर्न बैठकहरू गरेको छ । यही जुन महिनासम्ममा चीनले २९० बिलियन मास्क, साढे ३ बिलियनभन्दा बढी पीपीई र साढे ४ बिलियनभन्दा बढी परीक्षण सामग्रीहरू विभिन्न देशलाई प्रदान गरिसकेको मन्त्री वाङले बताए । ‘चीनले विश्वका धेरै देशलाई भाइरस परीक्षण प्रयोगशाला निर्माणमा सघाएको छ । धेरै देशलाई ४ सय मिलियन डोज खोप सहयोग गरिसकेको छ । बीआरआईमा संलग्न भएका र नभएका गरी ९० भन्दा बढी मुलुकमा अनुदान तथा निर्यातमार्फत स्वास्थ्य सहयोग गरेको छ,’ उनले भने ।

विश्वव्यापी आर्थिक स्थिरताका लागि काम गरिरहेको जनाउँदै मन्त्री वाङले विकास अनुभव आदानप्रदान गर्न, विकास नीतिहरूमा समन्वय गर्न र व्यावहारिक सहकार्यलाई बढाउन दर्जनौं ‘बेल्ट एन्ड रोड’ अन्तर्राष्ट्रिय सम्मेलनहरू क्रमिक रूपमा सम्पन्न भएको बताए । उनले चीन–पाकिस्तान आर्थिक करिडोर ऊर्जा सहयोगमार्फत पाकिस्तानको एक तिहाइ बिजुली आपूर्ति गर्न सकेको र श्रीलंकाको कटाना पानी आपूर्ति परियोजनाले ४५ स्थानीय गाउँमा खानेपानीको समस्या समाधान गरेको फेहरिस्त सुनाए ।

तथ्यांकअनुसार गत वर्ष चीन र यसका ‘बेल्ट एन्ड रोड’ साझेदारहरूबीचको व्यापार १.३५ ट्रिलियन अमेरिकी डलर पुगेको छ । यसले महामारीको प्रतिकार गर्न, अर्थव्यवस्थामा स्थायित्व ल्याउन सकारात्मक योगदान गर्नुका साथै जनजीविकाको संरक्षण गर्न पनि टेवा पुर्‍याएको उनको भनाइ छ ।

चीनले हालसम्म २२ वटा मुलुकमा ‘सिल्क रोड ई–कमर्स’ सहयोग सुरु गरेको छ जसले महामारीको स्थितिमा सहज रूपमा व्यापारिक गतिविधिलाई स्थिरता दिइरहेको अर्थविश्लेषकहरूले बताएका छन् । गत वर्ष सन् २०२० मा एसिया र युरोपलाई जोड्ने चीन–युरोप कार्गो रेलमार्फत ढुवानी संख्याले नयाँ रेकर्ड स्थापित गरेको छ ।

उच्चस्तरीय भिडियो सम्मेलनमा चिनियाँ राष्ट्रपति सी चिनफिङले लिखित भाषण पठाएका थिए ।

प्रकाशित : असार १०, २०७८ १२:५०
प्रतिक्रिया
पठाउनुहोस्

दुई वर्षपछि खुल्यो बेइजिङको श्वेत चैत्य

लक्ष्मी लम्साल

बेइजिङ — झण्डै २ वर्षको अन्तरालपछि नेपाली कालिगढ अरनिकोले बनाएको बेइजिङको श्वेत चैत्य सर्वसाधारणका लागि खुला गरिएको छ। जीर्णोद्धारका क्रममा सन् २०१९ नोभेम्बरदेखि बन्द रहेको श्वेत चैत्य सन् २०२१ को जुन दोस्रो सातादेखि खोलिएको हो । 

श्वेत चैत्य मन्दिर व्यवस्थापन कार्यालयले चिनियाँ सामाजिक सञ्जाल ‘वोइपो’ को आफ्नो आधिकारिक अकाउन्टबाट जारी गरेको सूचना अनुसार मर्मत कार्य पूरा भएपछि प्यागोडा घुमघाम गर्न सर्वसाधारण समक्ष खुल्ला गरिएको छ। यसअघि मन्दि सञ्चालकले औपचारिक कार्यक्रमका साथ पुनः खुल्ला गर्ने योजना बनाएपनि कोरोना महामारीलाई मध्यनजर राखेर त्वानवुच्ये अर्थात् ड्रागन बोट फेस्टिभलको अवसर पारेर पर्यटकलाई प्रवेश गराएको थियो । बेइजिङस्थित नेपाली राजदूतावासले पनि कुनै औपचारिक कार्यक्रम नगरिएको र महामारी नियन्त्रणलाई समर्थन गरिएको बतायो ।

जीर्णोद्धार अघि राष्ट्रपति विद्यादेवी भण्डारीले सन् २०१९ को अप्रिलमा श्वेतचैत्यको भ्रमण गरेकी थिइन्। दोस्रो अन्तर्राष्ट्रिय बीआरआई सम्मेलनमा भाग लिने क्रममा बेइजिङ उत्रिएकी भण्डारी नै श्वेतचैत्यको भ्रमण गर्ने पछिल्लो नेपाली उच्च अधिकारी थिइन्। प्यागोडा परिसरभित्र एउटा कक्षमा हालसम्म नेपाली उच्च तहबाट गरिएका भ्रमण गतिविधिका फोटोहरू संग्रह गरिएको छ ।

श्वेत चैत्यको जीर्णोद्धार गरिएको यो पाँचौ पटक हो । सन् १९४९ मा नयाँ चीन स्थापनापछि चीनले श्वेत चैत्यलाई उच्च महत्व दिएका कारण ऐतिहासिक सांस्कृतिक क्रान्तिका क्रममा पनि यो भत्किनबाट जोगिएको थियो । त्यसयता हालसम्ममा पाँच पटक जीर्णोद्धार भइसकेको चिनियाँ सञ्चारमाध्यमहरूले जनाएका छन् । यसपटकको मर्मतमा मुख्यतया चार मुख्य हलहरूको छत उठाउँदै छाना चुहावट तथा बीचका बाटोमा विकृत भएका बीम फ्रेमहरू सुधारिएको छ । एक चिनियाँ स्थानीयले भने, ‘म श्वेत चैत्य नजिकै काम गर्छु। प्रत्येक पटक प्यागोडालाई टाढैबाट मात्र देख्नसक्थें। मन्दिर खुलेपछि देखें कि, रातो पर्खाल र सेतो टावरहरू कति सुन्दर रहेछन् ! ’

सांस्कृतिक अवशेष तथा वास्तु मर्मत सम्बन्धी उपलब्धिहरूको प्रदर्शनीपछि बेइजिङको केन्द्र फुछङमनमा रहेको श्वेतचैत्य आसपासका स्थानीयवासीहरू आकर्षित भएको चिनियाँ सामाजिक सञ्जालहरूमा लेखिएको छ । श्वेत चैत्यमा रौनक बढेलगत्तै आसपासको व्यापार व्यवसाय चलमलाउन थालेको स्थानीयले बताए । चिनियाँहरूका अनुसार तिब्बती शैलीको यो प्यागोडा चीनमा बनेको सबैभन्दा पुरानो र सबैभन्दा ठूलो सम्पदा हो । चिनियाँहरूले ‘मियाओयिङ वा पाइ था स्’ भन्ने श्वेत चैत्य टावरलाई सन् १९६१ मा राष्ट्रिय प्रमुख सांस्कृतिक अवशेष संरक्षण इकाईहरूको पहिलो समूहमा सूचिबद्ध गरिएको थियो।

सन् १२४४ मा मल्ल राजवंशकालमा नेपालको पाटनमा जन्मिएका कलाकार अरनिकोले चीनमा आएर ३ वटा प्रसिद्ध बौद्ध धार्मिक प्यागोडा निर्माण गरेका थिए। तिब्बती सुनौलो प्यागोडा, बेइजिङको सेतो प्यागोडा र वल्लो शान्सी प्रान्तस्थित उथाइशान प्यागोडा निर्माण गरेका थिए । चिनियाँ युआन राजवंशकालमा सन् १२७९ मा करिब ८ वर्ष लगाएर बनाइएको श्वेत चैत्य तत्कालीन युगको सबैभन्दा अग्लो र भव्य संरचना मानिन्थ्यो ।

श्वेतचैत्यमा प्रवेश गर्न चिनियाँ पर्यटकलाई २० आरएमबी शूल्क लाग्छ भने नेपालीका लागि प्रवेश निःशुल्क छ।

प्रकाशित : असार ८, २०७८ १५:५३
पूरा पढ्नुहोस्
प्रतिक्रिया
पठाउनुहोस्
थप केही विश्वबाट
×