फ्रान्सको क्षेत्रीय निर्वाचनमा इतिहासकै सबैभन्दा कम मतदान- विश्व - कान्तिपुर समाचार

फ्रान्सको क्षेत्रीय निर्वाचनमा इतिहासकै सबैभन्दा कम मतदान

ददि सापकोटा

पेरिस — फ्रान्समा आइतबार भएको क्षेत्रीय र विभागीय (डिपार्मेन्टल) तहको पहिलो चरणको निर्वाचनमा ऐतिहासिक रुपमै कम मतदान भएको छ । यो निर्वाचनमा ६८ प्रतिशतले मतदान गरेनन् ।

तस्बिर : एएफपी

खसेको मत मध्येपनि परम्परागत पार्टीहरुलाई पछि पार्दै रिपब्लिकन र अन्य विभिन्न दक्षिणपन्थी पार्टीहरु राष्ट्रिय तहको नेतृत्वमा देखा परेका छन् ।

फ्रान्समा आइतबार भएको मतदानमा ६८ प्रतिशतले भाग लिएनन् । सन् १९८६ मा पहिलो क्षेत्रीय र विभागीय निर्वाचनपछि हाल सबैभन्दा कम मतदान भएको हो । सन् २०१० को निर्वाचनमा ५०‍.०९ प्रतिशतले मतदान गरेका थिए ।

क्षेत्रहरु(यातायात, उच्च माध्यमिक विद्यालय, व्यावसायिक प्रशिक्षण, श्रम ऐन आदि) र विभागहरु (कलेज, दैनिक जीवनयापनको भत्ता, सामाजिक सहायता, आदि) मा बदलिएको र त्यसले फ्रान्सेलीको दैनिक जीवनलाई निकै प्रभावित गराएकाले निर्वाचनमा निराशा उत्पन्न भएको फ्रान्सेली मिडियाहरुले उल्लेख गरेका छन् ।

क्षेत्रीय चुनावको पहिलो चरणमा तीनमध्ये दुई जना भन्दा बढी फ्रान्सेलीहरूले चुनावमा नजाने निर्णय गरेका छन् । यसले प्रजातन्त्र, गणतन्त्रका लागि प्रतिनिधित्व गर्ने कि नगर्ने भन्ने बहस आइतबार साँझबाटै मिडिया र विश्लेषकहरुले सुरु गरेका छन् । जनताको यो सहभागितालाई उनीहरुले चिन्ताजनक भनेका छन् ।

दक्षिणपन्थी समूहले २७ देखि २९ प्रतिशत मत पाएर अगाडि देखिएका छन् । जबकि पुराना ठूला पार्टीमध्ये सोसलिस्ट पार्टीले १७ दशमलव ६ प्रतिशत, राष्ट्रपतिको ला रेपब्लिक अँ माश पार्टीले ११.२ प्रतिशत ल्याएका छन् । मुख्य दक्षिणपन्थी पार्टी भनेर चिनिएको रासँब्लमँ नेसनलले १९ प्रतिशत र युरोप इकोलोजी भन्ने ग्रिन पार्टीले १३.२ प्रतिशत मत पाएको छ ।

दक्षिणपन्थी भनेर चिनिएको रासँब्लमँ ने;नलको अवस्था सन् २०१५ को अनुपातमा खस्किएको हो । त्यो बेला त्यसले २७.७ प्रतिशत मत ल्याएको थियो ।

क्षेत्रीय र विभागीय निर्वाचनमा प्राजातान्त्रिक, गणतान्त्रिक भनिएका पार्टीको अवस्था कमजोर भएपछि अति दक्षिणपन्थीहरुलाई हराउन प्रजातान्त्रिक पार्टीहरुबीच कार्यगत एकताको मोर्चा निर्माण गर्ने प्रयास पनि थालिएको छ ।

राष्ट्रपति एमानुयल माक्रोंनको पार्टी ला रिपब्लिक अँ माशका नेता सानिस्ला गुएरिनिले आरटीएल रेडियोसितको अन्तर्वार्तामा आइतबार साँझ भनेका छन्, 'दक्षिणपन्थीहरुलाई हराउन रिपब्लिकन दलहरुबीच प्रभावकारिता बढाउन मोर्चा निर्माणको लागि भेला गराउने छु ।'

प्रकाशित : असार ७, २०७८ ०८:१०
प्रतिक्रिया
पठाउनुहोस्

कविता कोर्न गाई !

ददि सापकोटा

पेरिस — कालो कोट । कालै पाइन्ट । घाँटीमा बेराले लगाउने कालै रङको बो टाई । ढाडमा पुरानो झोला । दाम्लो चट्ट समातेर गाई डोर्‍याउँदै देशका विभिन्न सहरमा यात्रा गरिरहेछन् एक फ्रान्सेली । गाउँसहरका जनजीवन, रहनसहन र दैनिक चर्यामा कविता प्रस्फुटन गर्न भन्दै रोबर्ट डु मोइन्सले गरिरहेको ‘कविताका लागि गाईयात्रा’ ले फ्रान्समा चर्चा बटुलिरहेको छ । फ्रान्सको सामाजिक सञ्जालमा उनको गाई ओल्हा र रोबर्ट दुवै अभिनेता जस्ता बनेका छन् ।

गाई ओल्हासँगै रोबर्ट डु मोइन्स ।

कतिपय सहरका नागरिकहरूले गाडीवालालाई सचेत गराइरहेका छन्, ‘सतर्क रहनुहोला । तपाईंले गाई डोर्‍याइरहेका एक सज्जनलाई सडकमा जतनले पार गरेर जानुपर्ने हुन सक्छ ।’ आफू आफैंमा हराउनु, आवश्यक वस्तुहरू बिर्सनुको बिन्दुमा बाँच्न र सास फेर्न चाहेको रोबर्टले बताउने गरेका छन् । उनको मूल उद्देश्य गाउँठाउँमा आफूले यात्रा गर्दा देखेभोगेका विषयलाई समेटेर कविता सिर्जना गर्नु हो ।

रोबर्टको भनाइमा यो गाई पनि भाग्न चाहन्थ्यो । लामा सिङ भएका बहरहरूबाट भाग्न चाहने गाई र व्यस्त र निकै व्यस्तताले झेलिएको जिन्दगीबाट भाग्न चाहने रोबर्ट दुवैको उद्देश्य मिलेकाले सहयात्रा सम्भव भएको हो । रोबर्टको खास घर राजधानी पेरिसबाट करिब ३ सय ४५ किमि टाढाको नात सहर हो । उनले नातबाट सोल्तेन, भालेन्सिन, सेबुर्ग, पैइ द कन्देलगायत सहरहरूको यात्रा गरिसकेका छन् ।

मुख्य सहर पार गरिसकेपछि रोबर्ट गाउँ पस्छन् । त्यहाँका मानिसहरूसँग बातचित गर्छन् । भन्छन्, ‘गाईसँग गाउँ तथा सहर छिरेपछि स्थानीयसँग गफगाफ गर्न सजिलो हुन्छ ।’

रोबर्टसँग एउटा पुरानो जग भने छुट्दैन । किनभने बिहान र साँझ उनले त्यही जगमा गाई दुहुन्छन् । बास नपाए वरिपरि कतै अँगेनो बनाउँछन् । दूध तताएर पिउँछन् । आफ्नो यात्राका घटनाहरू सबै पुरानो नोटबुकमा उतारेर राख्छन् । आफू नात क्षेत्रको एक होटलका पूर्वकर्मचारी प्रमुख भएको उनी बताउँछन् । उनले संसारलाई अवलोकन गर्न चाहेकाले गाई यात्रामा निस्केको बताउने गरेका छन् । रोबर्टलाई गाई भने एक किसानले सापट दिएका हुन् । स्थानीयहरू उनको रहस्यमय चरित्र देखेर उत्सुक हुने गरेका छन् । किनभने कुनै ठाउँको दिशा पत्ता लगाउनुपर्दा उनी आफूसित भएको गोलाकार ट्रपी झिक्छन् । त्यसैमा भएको नक्सा हेर्दै यात्रा गर्छन् । फ्रान्सेली भाषामा एउटा लोकप्रिय भनाइ छ, ‘हामी कता जाने भनेर हामीलाई जति कम जानकारी हुन्छ हामी त्यति नै हराउँछौं ।’ यो रोबर्टमा ठ्याक्कै लागू हुन्छ । उनलाई धेरैले ‘ल भ्वाइयाज पोएत’ अर्थात् यात्रु कवि पनि भन्छन् ।

‘हामी हरेक घण्टा तालिकामा हिँड्छौं । मेट्रो, रेल, बस, गाडी, काम, खाना, कम्प्युटर, मोबाइल, सुत्ने र उठ्ने सबै तालिकामा निर्भर भएका बेला अहिले पनि एउटा गाई डोर्‍याएर सडकसडक हिँडेरै आफ्नो इच्छा पूरा गर्न सक्नु अचम्मको जीवनशैली हो । यो देख्दा त जीवनशैली बदल्न मन लाग्दो रहेछ,’ उनको यात्रालाई उद्धृत गर्दै सामाजिक सञ्जालमा एक पुष्प व्यापारीले लेखेका छन् ।

यो यात्राबाट रोबर्ट भने आफैं जिल्ल छन् । किनभने सडकमा उनले सोचेभन्दा धेरै उदार मानिसहरू भेटेका छन् जसले उनलाई यात्रामा सम्पूर्ण भोजन प्रदान गर्छन् । मिठो मुस्कान छर्दै बास दिन्छन् । उनीसित सुन्दर, परोपकारीहरूको मात्रै जम्काभेट हुन्छ । ‘हामीले बाटोमा सपना देख्नुपर्ने सबै अद्भुत छालको सामना गर्यौं,’ रोबर्ट साहित्यिक पारामा सुनाउँछन् ।

प्रत्येक गाउँमा पुग्दा रोबर्टले कागजको सानो टुक्रामा धागोले बाँधेको एउटा चिर्कटो दिन्छन्, गाउँलेहरूलाई । त्यसमा उनी आफूलाई भेटेर आफ्ना कुरा सुन्न निम्ता दिन्छन् । किनभने बास बसेको गाउँमा उनले आफ्नो यात्राबारे सुनाउने गरेका छन् ।

प्रकाशित : असार ६, २०७८ १९:११
पूरा पढ्नुहोस्
प्रतिक्रिया
पठाउनुहोस्
×