चिनियाँ सहयोगमा पाकिस्तानमै तयार भयो कोरोना खोप ‘पाकभ्याक’- विश्व - कान्तिपुर समाचार
कान्तिपुर वेबसाईट
AdvertisementAdvertisement

चिनियाँ सहयोगमा पाकिस्तानमै तयार भयो कोरोना खोप ‘पाकभ्याक’

इकान्तिपुर डेस्क

काठमाडौँ — पाकिस्तानले चिनियाँ सहयोगमा मुलुकभित्र कोरोना भाइरसविरुद्धको खोप उत्पादन गरेको छ । पाकिस्तानले चिनियाँ औषधि निर्माता कम्पनी क्यान्सिनोको सहयोगमा ‘पाकभ्याक’ उत्पादन गरेको हो । 

मंगलबार इस्लामाबादमा कोरोना खोप पाकभ्याक सार्वजनिक गरिँदै । तस्बिर : एनआईएच पाकिस्तान

मंगलबार इस्लामाबादमा आयोजित एक समारोहमा योजना, विकास तथा विशेष पहलसम्बन्धी केन्द्रीय मन्त्री असद उमरले सार्वजनिक गरेका हुन् । पाकिस्तानी स्वास्थ्य टिम र चीनलाई धन्यवाद दिँदै पाकिस्तानका लागि यो कुनै क्रान्तिभन्दा कम नभएको बताएका छन् । पाकिस्तानमा कोरोना खोप लगाउनेहरुको पहिलो रोजाइ चीनमा बनेको सिनोफार्म भएको पनि उनले बताए ।

त्यस्तै प्रधानमन्त्री इमरान खानका स्वास्थ्य सल्लाहकार डाक्टर फैसल सुल्तानले पनि कठिन चुनौतीलाई अवसरमा रुपान्तरण गर्न आफूहरुले सफल भएको बताए । कोरोना महामारी रोकथाम र नियन्त्रणमा चीनले धेरै सहयोग गरेको उनको भनाइ थियो । ‘चीनले कच्चा पदार्थ दिएको हा तर त्यसका बाबजुद पनि यसको विकास गर्न सहज भने थिएन,’ उनले भने । उनका अनुसार केही दिनमै पाकिस्तानमा ठूलो परिमाणमा कोरोना खोप उत्पादन सुरु हुनेछ ।

पाकिस्तानी सञ्चारमाध्यम डनका अनुसार क्यान्सिनोले विकास गरेको खोपको ‘कन्सनट्रेटेड रुप’ पाकिस्तान ल्याएर इस्लामाबादस्थित नेसनल इन्स्टिच्युट अफ हेल्थ(एनआईएच) मा प्याकेजिङ गरिन्छ । क्यान्सिनो कोरोनाविरुद्धको चीनको पहिलो खोप हो । जसको चिकित्सकीय परीक्षण पाकिस्तानमा गरिएको थियो । करिब १८ हजार नागरिकमा यसको परीक्षण गरिएको बताइएको छ । पाकिस्तानमा गरिएको परीक्षणको नतिजाअनुसार उक्त खोपले ६५.७० प्रतिशतलाई संक्रमण रोक्ने र ९०.९८ प्रतिशतलाई गम्भीर हुनबाट बचाउने बताइएको थियो ।

पाकिस्तानमा केही दिनयता संक्रमण पनि घटिरहेको छ । पछिल्ला दुई दिनमा पाकिस्तानमा २ हजारभन्दा कममा संक्रमण पुष्टि भएको छ । पाकिस्तानमा अहिलेसम्म करिब ९ लाख २२ हजार जनामा कोरोना संक्रमण पुष्टि भएको छ भने २० हजार ९ सय ३० जनाको मृत्यु भइएको छ ।

प्रकाशित : जेष्ठ १९, २०७८ १४:०८
प्रतिक्रिया
पठाउनुहोस्

ढुंगागिट्टीको निकासी खाेलेर सरकार आफ्ना 'यार' पोस्न कुन हदसम्म गिर्छ भन्ने छर्लंग भयो : थापा

इकान्तिपुर डेस्क

काठमाडौँ — कांग्रेस सांसद तथा पूर्वमन्त्री गगन थापाले गिट्टी–बालुवा निकासी खोल्ने सरकारको निर्णयको विरोध गरेका छन् ।

सांसद गगनकुमार थापा । फाइल तस्बिर ।

बुधबार सामाजिक सञ्‍जालमार्फत थापाले 'संसद् नभएको बेला असंवैधानिक सरकारले अवैधानिक तवरले जस्केलाबाट ल्याएको बजेटमा 'नेपालको ढुङ्गा,गिट्टी,बालुवा निकासी गरेर व्यापार घाटा न्यूनीकरण गर्ने'कार्यक्रम घुसाएको' बताएका हुन् । सरकारको यो कदमले आफ्नो असली असली अनुहार र घटिया सोच उजागर गरेको उनको भनाइ छ । 'वातावरण र चुरे संरक्षणमा सरकार कति असंवेदनशील छ प्रस्ट भएको छ,' उनले भनेका छन् ।

आफ्ना 'यार' लाई पोस्नका लागि सरकारले नीतिगत भ्रष्टाचार गरेको पनि उनको आरोप छ । 'यो 'नीतिगत भ्रष्टाचार हो'।आफ्ना 'यार'लाई पोस्न सरकार कुन हदसम्म गिर्छ भन्ने कुरा पुन: छर्लङ्ग भएको छ,’ उनले भनेका छन्, 'चुरे क्षेत्र तहस नहस पारेर तराईलाई मरभूमीकरण गर्न उद्धत यस्ता प्रयत्नलाई विगतमा संसदीय समितिमा हुँदा पनि पटक पटक रोकेको हो।यसपटक पनि सरकारको यो निर्णय रोकेरै छाड्नेछौँ।'

अदालतको आदेश, संसदीय समितिका पटक पटकका निर्देशन र नागरिक खबरदारीलाई अन्देखा गर्दै सरकारले जस्केलाबाट ल्याएको यो जनविरोधी कार्यक्रमलाई जनप्रतिनिधिले प्रतिरोध गर्ने भन्दै सबैलाई यसको प्रतिरोध गर्न थापाले आह्वान गरेका छन् ।

सरकारले व्यापार घाटा न्यूनीकरण गर्ने बहाना बनाएर खानीजन्य ढुंगा, गिट्टी र बालुवा निकासी फुकुवा गरेको छ । ढुंगा, गिट्टी र बालुवा भारत निकासीले चुरेभावरमा अत्यधिक दोहन भएपछि २०७१ सालदेखि लगाइएको निकासी रोकलाई हटाउने घोषणा सरकारले बजेट वक्तव्यमार्फत गरेको हो ।

ढुंगा–गिट्टी निकासी : सरकार, हलो काटेर मुंग्रो नबनाऊ

बजेट वक्तव्यको बुँदा नं. १५२ मा राष्ट्रपति चुरे संरक्षण कार्यक्रमअन्तर्गत शिवालिक तथा महाभारत क्षेत्रमा २ सय पोखरी निर्माण गरी जलपुनर्भरण र चुरे क्षेत्रका १ सय ६४ नदी प्रणालीमा भूक्षय नियन्त्रणका कार्यक्रम गर्न १ अर्ब ५३ करोड रुपैयाँ विनियोजन गरिएको उल्लेख छ ।

बुँदा नं. १५९ मा आगामी आर्थिक वर्षमा चुरे तथा तराई–मधेस क्षेत्रमा डेढ करोड बिरुवा रोप्ने कार्यक्रम सञ्चालन गर्ने भनिएको छ । तर चुरेभावरमै दोहन हुने गरी बुँदा नं. १९९ मा ढुंगा, गिट्टी र बालुवा निकासी गरिने भनिएको छ ।

सम्बन्धित समाचार

प्रकाशित : जेष्ठ १९, २०७८ ११:४९
पूरा पढ्नुहोस्
प्रतिक्रिया
पठाउनुहोस्
×