इजरायल-प्यालेस्टाइन द्वन्द्व : संघर्षविराम गर्न अमेरिकी राष्ट्रपति बाइडेनको आग्रह- विश्व - कान्तिपुर समाचार
कान्तिपुर वेबसाईट
AdvertisementAdvertisement

इजरायल-प्यालेस्टाइन द्वन्द्व : संघर्षविराम गर्न अमेरिकी राष्ट्रपति बाइडेनको आग्रह

इकान्तिपुर डेस्क

काठमाडौँ — अमेरिकी राष्ट्रपति जो बाइडेनले इजरायल र प्यालेस्टाइनलाई संघर्षविराम गर्न आग्रह गरेका छन् । हमास र इजरायली सेनाबीच हिंसात्मक द्वन्द्व चर्किएको ८ दिनपछि बाइडेनले संघर्षविरामका लागि आफूले पहल गरिरहेको बताएका हुन् । 

अमेरिकी राष्ट्रपति जो बाइडेन तस्बिर : रोयटर्स

अमेरिकी राष्ट्रपति बाइडेनले इजरायली प्रधानमन्त्री बेन्जामिन नेतान्याहुलाई फोन गरेर अमेरिकाले इजिप्टलगायतका मुलुकसँग मिलेर जारी द्वन्द्व कम गर्न प्रयासरत रहेको बताएको बीबीसीले उल्लेख गरेको छ ।

तर संयुक्त राष्ट्र संघको सुरक्षा परिषद्मा हिंसा बन्द गर्न आह्वान गरिएको संयुक्त वक्तव्य जारी गर्न भने अमेरिका मानिरहेको छैन ।

द्वन्द्व चर्किएको दोस्रो हप्ता सुरु भइसकेको छ, तर तत्काल अन्त्य हुने भने संकेत देखिएको छैन । अहिलेसम्म प्यालेस्टाइनतर्फ ६१ बालबालिकासहित २ सय १२ जनाको मृत्यु भएको छ भने २ बालबालिकासहित १० जना इजरायलीको मृत्यु भएको छ ।

इजरायलले गाजामा मारिएकामध्ये अधिकांश हमास विद्रोहीसँग आबद्ध भएको दाबी गरेको छ । तर अन्तर्राष्ट्रिय संघसंस्थाका स्वतन्त्र रिपोर्टमा भने इजरायली सेनाको आक्रमणमा सर्वसाधारण पनि मारिएको बताइएको छ ।

ह्वाइट हाउसबाट जारी विज्ञप्तिमा राष्ट्रपति बाइडेनले निर्दोष सर्वसाधारणको सुरक्षाको सुनिश्चित गर्न इजरायललाई आग्रह गरेका छन् । त्यस्तै बेलायतका प्रधामन्त्री बोरिस जोन्सनका प्रवक्ताले पनि वक्तव्य जारी गर्दै सर्वसाधारणलाई लक्षित गरी आक्रमण नगर्न आग्रह गरेका छन् ।

गाजामा इजरायली सेनाको हवाई आक्रमणपछि देखिएको दृश्य तस्बिर : रोयटर्स

जर्मन चान्सलर एन्जेला मर्केलले नेतान्याहुलाई फोन गरेर द्वन्द्व अन्त्यका लागि पहल गर्न अनुरोध गरेकी छिन् । त्यस्तै फ्रान्स र इजिप्टले पनि जारी द्वन्द्व तत्काल अन्त्य गर्न दुवै पक्षलाई अनुरोध गरेका छन् ।

त्यस्तै संयुक्त राष्ट्र संघले गाजामा ४० वटा विद्यालय र चार वटा अस्पतालमा ‘पूर्ण वा आंशिक रुपमा क्षति पुगेको’ बताएको छ । विश्व स्वास्थ्य संगठनका आपत्कालीन विभागका प्रमुख डा. माइक र्‍यानले स्वास्थ्य संस्थामा भइरहेको आक्रमण तत्कालन बन्द गर्न आग्रह गरेका छन् ।

गाजा क्षेत्रमा सोमबारदेखि भड्किएको हिंसा सन् २०१४ यताकै गम्भीर हो । यसको सुरुवात पूर्वी जेरुसेलममा गत शुक्रबार अल मक्सा मस्जिदनजिक भएको झडपबाट सुरु भएको हो । त्यसको तीन दिनपछि सोमबारदेखि भने दुवै पक्षबाट रकेट र मिसाइल हमला भइरहेको छ ।

पछिल्ला केही दिनदेखि जेरुसेलममा हिंसा भड्किइरहेको थियो । जेरुसेलमस्थित अल अक्सा मस्जिदमा जान प्रतिबन्ध लगाइएपछि प्यालेस्टाइनका नागरिक क्रुद्ध भएका थिए । यो मस्जिदलाई इस्लाममा तेस्रो पवित्र स्थान मानिन्छ । यो यहुदीहरुको पनि पवित्र धार्मिक स्थलमा रुपमा रहेको छ ।

इजरायलमा रहेका नेपालीलाई दूतावासको आग्रह : साइरन बज्नासाथ सुरक्षित स्थानमा जानुहोस्

प्यालेस्टाइन रेड क्रेसेन्ट सोसाइटीका अनुसार इजरायली प्रहरीसँगको झडपमा ३ सयभन्दा बढी घाइते भएका थिए । सोमबार ‘जेरुसेलम दिवस’ मनाइरहँदा हिंसा भड्किएको हो । सन् १९६७ को अरब–इजरायल युद्धपछि पूर्वी जेरुसेलममाथि कब्जा गरिएको सम्झनामा सोमबार जेरुसेलम दिवस मनाइएको थियो ।

हमासले अल अक्सा र शेख जराह मस्जिदबाट प्रहरी हटाउन पहिलेदेखि नै इजरायलसँग आग्रह गर्दै आएको थियो । उसले दिएको समयसीमा सकिएपछि रकेट प्रहार गरेको बताएको छ ।

सन् १९६७ को मध्यपूर्वको युद्धपछि इजरायलले पूर्वी जेरुसेलममाथि कब्जा गरेको थियो । त्यसपछि उसले पूरा जेरुसेलमलाई आफ्नो राजधानी दाबी गर्दै आएको छ । तर अन्तर्राष्ट्रिय समुदायले यसलाई मान्दैन । प्यालेस्टाइनले भने पूर्वी जेरुसेलमलाई भविष्यको एक सार्वभौम र स्वतन्त्र मुलुकको राजधानीका रुपमा लिँदै आएको छ ।

यही विषयमा प्यालेस्टाइन र इजरायलबीच विवाद रहँदै आएको छ भने पटक–पटक यसले युद्धको रुप लिएको छ । सन् २०१४ को जुलाईदेखि अगस्टको बीचमा भएको द्वन्द्वमा २२५१ प्यालेस्टाइनी मारिएका थिए । तीमध्ये १४६२ त सर्वसाधारण नै थिए । त्यस्तै इजरायलका ६ सर्वसाधारणसहित ६७ जना सैनिक मारिएका थिए ।

सम्बन्धित समाचार

प्रकाशित : जेष्ठ ४, २०७८ ०९:०४
प्रतिक्रिया
पठाउनुहोस्

संक्रमित बढ्दै, जनशक्ति अभाव

जिल्लाबाट रेफर गरिएका संक्रमितलाई बाहिर लैजान हेलिकप्टर चार्टर गर्नुपर्ने बाध्यता
छपाल लामा

हुम्ला — हिमाली जिल्ला हुम्लामा झन्डै ३ साताको अवधिमा हुम्लामा ५६ कोरोना संक्रमित भएका छन् । जनशक्ति र उपकरण अभावमा जटिल समस्या भएकालाई बाहिर रेफर गर्नुपर्ने बाध्यता छ ।

हुम्ला अस्पतालमा कोरोना परीक्षण गराउँदै स्थानीय । तस्बिर : छपाल/कान्तिपुर

लामो समय ‘ग्रिन जोन’ मा रहेको हुम्लामा दुई सातायता कोरोना संक्रमितको संख्या ह्वात्तै बढेको छ । जिल्ला अस्पतालमा एन्टिजेन विधिबाट गरिने परीक्षणमा दैनिक ६ जनासम्म संक्रमित पुष्टि हुने गरेका छन् ।

सदरमुकाम सिमकोट र ग्रामीण क्षेत्रमा ज्वरो र रुघाखोकीका बिरामी बढेसँगै संक्रमण हुनेको संख्यामा वृद्धि भएको जिल्ला स्वास्थ्य सेवा कार्यालयले जनाएको छ । जिल्ला अस्पतालमा एउटा भेन्टिलेटर जडान गरिए पनि जनशक्ति नहुँदा सञ्चालनमा आउन सकेको छैन । ‘मेसिन भए मात्र के गर्ने ?,’ अस्पतालकी सिनियर अनमी सरिता बोहराले भनिन्, ‘न चलाउने जनशक्ति छ न अरू उपकरण ।’ उनले जनशक्ति, उपकरण र अक्सिजनको अभावमा अस्पतालमा संक्रमितको भरपर्दो उपचार हुन नसकेको बताइन् ।

उनका अनुसार जिल्लाबाट रेफर गरिएका संक्रमितलाई बाहिर लैजान हेलिकप्टर चार्टर गर्नुपर्ने बाध्यता छ । सोमबार मात्रै गाउँपालिकाका लागि स्वास्थ्य सामग्री व्यवस्थापन गर्न आएका सर्केगाड गाउँपालिकाका स्वास्थ्य संयोजक सन्तोष धामीलाई कोरोना पोजिटिभ देखिएपछि हेलिकप्टरमार्फत जुम्ला पठाइएको छ । श्वासप्रश्वासमा समस्या आएपछि उपचारका लागि कर्णाली स्वास्थ्य विज्ञान प्रतिष्ठान, जुम्ला लगिएको हो ।

गाउँपालिकाका अनुसार ९ लाख ५० हजार रुपैयाँमा हेलिकप्टर चार्टर गरेर धामीलाई जुम्ला पुर्‍याइएको छ । चार्टरबापत खर्च भएको साढे चार लाख रुपैयाँ गाउँपालिकाले र साढे चार लाख रुपैयाँ धामीले भुक्तानी गर्नेछन् । पैसा हुनेले हेलिकप्टर चार्टर गरे पनि विपन्न नागरिक उपचार अभावमा मर्नुपर्ने अवस्था आएको सिमकोट गाउँपालिकास्थित ठेहेका लालदून सुनारले बताए ।

जिल्ला अस्पतालमा अहिले दुईवटा मात्र अक्सिजन सिलिन्डर मौज्दात छ । ‘अहिलेसम्म त अक्सिजन दिनुपर्ने संक्रमित आएका छैनन्,’ अनमी बोहोराले भनिन्, ‘आए बाहिर रेफर गर्नुको विकल्प छैन ।’ समुदायस्तरमा परीक्षण नभएकाले संक्रमितको संख्या अझै बढ्ने सर्केगाडका रवीन्द्र देवकोटाले बताए । ‘पहिले नै कडाइ गरेको भए यस्तो समस्या आउने थिएन,’ उनले भने, ‘अहिले त गाउँगाउँमा संक्रमित भेटिएका छन् ।’ जिल्ला बाहिरबाट आउनेहरूलाई कोरोना परीक्षण गरी गाउँ पठाउँदा स्थिति भयावह भएको उनको आरोप छ ।

सोमबारको परीक्षणमा ६ संक्रमित थपिएको जिल्ला स्वास्थ्य सेवा कार्यालयका सूचना अधिकारी भक्ति फडेराले बताए । सर्केगाडका एक र अदानचुलीका पाँच जनामा कोरोना संक्रमण पुष्टि भएको हो । उनका अनुसार जिल्ला अस्पतालको आइसोलेसनमा ११ जनाको उपचार भइरहेको छ । त्यस्तै सर्केगाडमा १०, अदानचुलीमा ७ र ताजाकोटमा २० जनाको स्थानीय तहले निर्माण गरेका आइसोलेसन सेन्टरमा उपचार भइरहेको छ ।

प्रकाशित : जेष्ठ ४, २०७८ ०९:००
पूरा पढ्नुहोस्
प्रतिक्रिया
पठाउनुहोस्
x
×