भारतमा एकैदिन ४ लाख १४ हजारभन्दा बढीलाई कोरोना संक्रमण, ३९१५ को मृत्यु- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतमा एकैदिन ४ लाख १४ हजारभन्दा बढीलाई कोरोना संक्रमण, ३९१५ को मृत्यु

कान्तिपुर संवाददाता

काठमाडौँ — भारतमा लगतार कोरोना संक्रमण बढिरहेको छ । भारतमा लगतार दोस्रो दिन पनि ४ लाखभन्दा बढीलाई कोरोना संक्रमण पुष्टि भएको छ ।  भारतको स्वास्थ्य तथा परिवार कल्याण मन्त्रालयका अनुसार पछिल्लो चौबीस घण्टामा थप ४ लाख १४ हजार १ सय ८८ जनामा संक्रमण पुष्टि भएको छ ।

भारतको राजधानी दिल्लीमा मंगलबार कोरोना भाइरसविरुद्धको खोप लगाउन लाइन लागेका सर्वसाधारण तस्बिर : रोयटर्स

जुन भारतमा महामारी सुरु भएयताकै उच्च हो । यसअघि बिहीबार भारतमा ४ लाख १२ हजार २ सय ६२ जनामा संक्रमण पुष्टि भएको छ । भारतमा यसअघि गत शुक्रबार एकैदिन ४ लाखभन्दा बढीलाई संक्रमण पुष्टि भएको थियो ।

पछिल्लो समय भारतमा कोरोनाले मृत्यु हुनेको संख्या पनि बढिरहेको छ । भारतमा पछिल्लो २४ घण्टामा ३ हजार ९ सय १५ जनाको मृत्यु भएको छ । बिहीबार भने अहिलेसम्मकै उच्च ३ हजार ९ सय ८० को मृत्यु भएको थियो ।

भारतमा अहिलेसम्म २ करोड १४ लाख ९१ हजारभन्दा बढीलाई संक्रमण पुष्टि भएको छ भने करिब १ करोड ७६ लाख संक्रमणमुक्त भएका छन् । त्यस्तै कोरोनाबाट मृत्यु हुनेको संख्या २ लाख ३४ हजार ८३ पुगेको छ ।

भारतमा पछिल्लो २४ घण्टामा ३ लाख ३१ हजार ५ सय ७ जना संक्रमणमुक्त भएका छन् । योसँगै भारतमा संक्रमणमुक्त हुनेको संख्या करिब १ करोड ७६ लाख पुगेको छ । भारतमा सक्रिय संक्रमितको संख्या ३६ लाख ४५ हजारभन्दा बढी छ । भारतमा पछिल्लो २४ घण्टामा १८ लाख २६ हजार ४ सय ९० नमुना परीक्षण भएको थियो । भारतमा मंगलबारसम्ममा करिब १६ करोड ४९ लाख डोज खोप लगाइएको छ ।

भारत विश्वमा सबैभन्दा बढी संक्रमित मुलुकमध्ये अमेरिकापछि दोस्रोमा पर्छ । कोरोनाको दोस्रो लहर सुरु भएसँगै दिल्ली, महाराष्ट्र, उत्तरप्रदेश, मध्यप्रदेश, गुजरात, छत्तीसगढ, कर्नाटकलगायत राज्यमा उच्च संक्रमण देखिएको छ ।

महाराष्ट्रमा पछिल्लो २४ घण्टामा ६३ हजार ८ सय ४२ जनामा संक्रमण पुष्टि भएको छ भने ८ सय ५३ जनाको मृत्यु भएको छ । त्यस्तै राजधानी दिल्लीमा दिल्लीमा पछिल्लो २४ घण्टामा २० हजार २८ जनामा संक्रमण पुष्टि हुनुका साथै ३ सय ३५ जनाको मृत्यु भएको छ ।

पछिल्लो समय नेपालसँग सीमा जोडिएका भारतका राज्यहरूमा पनि संक्रमण बढिरहेको छ । पछिल्लो २४ घण्टामा उत्तर प्रदेशमा २८ हजार ९ सय २ जनामा संक्रमण पुष्टि भएको छ भने ३ सय ५० जनाको मृत्यु भएको छ ।

त्यस्तै पश्चिम बंगालमा १७ हजार ४ सय १२ जनामा संक्रमण पुष्टि भएको छ भने १ सय १७ जनाको मृत्यु भएको छ । त्यस्तै नेपालसँग सीमा जोडिएको बिहारमा पछिल्लो २४ घण्टामा १३ हजार ३ सय ६४ जनामा संक्रमण पुष्टि भएको छ भने ९० जनाको मृत्यु भएको छ ।

प्रकाशित : वैशाख २४, २०७८ १०:०८
प्रतिक्रिया
पठाउनुहोस्

राजस्व बढाएर ११ महिनापछि खोलियो काठ

यसअघि क, ख र ग वर्गको प्रति क्युबिक फिट क्रमश: १ हजार, ८ सय र ५ सय रुपैयाँ रहेको काठको राजस्व दर अहिले क्रमश: १ हजार ५ सय, १ हजार २ सय र ८ सय निर्धारण गरिएको छ ।
अब्दुल्लाह मियाँ

काठमाडौँ — सरकारले राजस्व दर बढाएर ११ महिनादेखि बन्द रहेको काठ ओसार–पसार र विक्रीवितरण फुकुवा गरेको छ । मन्त्रिपरिषद्को बिहीबार बसेको बैठकले गत जेठ १५ मा बन्द गरेको वैज्ञानिक वनअन्तर्गत काटिएका काठको ओसार–पसार र विक्रीवितरण खोल्ने निर्णय गरेको हो । 

वन पैदावार व्यवसायी र सामुदायिक वन उपभोक्ता महासंघ, नेपालले ती काठ फुकुवा गर्न लामो समयदेखि सरकारको ध्यानाकर्षण गराएका थिए ।

यसअघि काठ खुला गर्न व्यापारीले १ अर्ब रुपैयाँ घुस दिन खोजेको अभिव्यक्ति दिँदा वन तथा वातावरणमन्त्री प्रेमबहादुर आले विवादित बनेका थिए । बिहीबार मन्त्री आलेकै प्रस्तावमा काठ फुकुवा गर्ने निर्णय भएको हो ।

यसअघि क, ख र ग वर्गको प्रति क्युबिक फिट क्रमश: १ हजार, ८ सय र ५ सय रुपैयाँ रहेको काठको राजस्व दर अहिले क्रमश: १ हजार ५ सय, १ हजार २ सय र ८ सय निर्धारण गरिएको छ ।

वैज्ञानिक वन कार्यक्रमका नाममा अत्यधिक कटान भएको भन्दै सरकारले गत वर्ष त्यसरी काटिएका काठ ओसार–पसार र विक्रीवितरण बन्द गरेको थियो । रूख कटानबारे अध्ययन गर्न सरकारले गत वर्ष अधिकारकर्मी नेत्र तिमिल्सिनाको संयोकत्वमा वन प्राविधिकसमेत रहेको कार्यदल बनाएको थियो ।

गत चैत १२ गतेको मन्त्रिपरिषद्ले सरकारद्वारा व्यवस्थित, सामुदायिक, साझेदारी र वन संरक्षण क्षेत्रमा स्वीकृत कार्ययोजनाअनुसार काठ कटानको अनुमति दिन सक्ने निर्णय गरे पनि वैज्ञानिक वनअन्तर्गत काटिएका काठबारे सरकार मौन बसेको थियो ।

वैज्ञानिक वन लागू भएका सरकारी, सामुदायिक र साझेदारी वनमा बाहेक सुक्खड खडा र ढलापडा रूख काट्न पनि उक्त निर्णयले बाटो खोलेको थियो ।

वैज्ञानिक वन लागू भएका ७ सय ५० सामुदायिक वन, ३१ साझेदारी र सात चक्लाबन्दी वनमा गरी करिब ५५ देखि ६० लाख सीएफटी काठ भएको सरोकारवालाहरूको दाबी छ ।

नेपाल वन पैदावार व्यवसायी महासंघ (फेनफिट) का अध्यक्ष मन्जिलबाबु मास्केले यति बेला काठ फुकुवा भए पनि लकडाउन र जेठबाट वन प्रवेश प्रतिबन्ध लाग्नेलगायतका कारणले तत्काल उठाउन सकिने अवस्था नरहेको बताए ।

‘अब कात्तिकमा मात्र काठ उठाउन सकिएला,’ उनले भने, ‘ढिलो गरी निर्णय भएकाले काठको हैसियतसमेत बिग्रिएको हुन सक्छ ।’

सामुदायिक वन उपभोक्ता महासंघ, नेपाल (फेकोफन) का सचिव ठाकुर भण्डारीले ढिलै भए पनि काठ फुकुवा गर्ने निर्णय हुनु स्वागतयोग्य भएको प्रतिक्रिया दिए ।

व्यवसायीहरूका अनुसार नेपालमा वार्षिक ३–५ करोड क्युबिक फिट काठ माग भए पनि त्यसको आधा पनि उत्पादन हुँदैन । सालजस्तै देखिने गोलिया काठ मलेसिया, इन्डोनेसिया, म्यानमार, कम्बोडिया, युक्रेन, चीन, भारतलगायत मुलुकबाट भित्रिने गरेको छ ।

प्रकाशित : वैशाख २४, २०७८ १०:०७
पूरा पढ्नुहोस्
प्रतिक्रिया
पठाउनुहोस्
×