कोरोनाले भारतमा एकैदिन ३९८० को मृत्यु, ४ लाख १२ हजारभन्दा बढीलाई संक्रमण- विश्व - कान्तिपुर समाचार
कान्तिपुर वेबसाईट
AdvertisementAdvertisement

कोरोनाले भारतमा एकैदिन ३९८० को मृत्यु, ४ लाख १२ हजारभन्दा बढीलाई संक्रमण

कान्तिपुर संवाददाता

काठमाडौँ — भारतमा कोरोना संक्रमणबाट मृत्यु हुनेको संख्या लगातार बढिरहेको छ । भारतको स्वास्थ्य तथा परिवार कल्याण मन्त्रालयका अनुसार पछिल्लो चौबीस घण्टामा ३ हजार ९ सय ८० जनाको मृत्यु भएको छ ।

दिल्लीमा बुधबार कोरोना संक्रमणबाट मृत्यु भएका व्यक्तिको अन्त्येष्टि गरिँदै तस्बिर : रोयटर्स

भारतमा कोरोना संक्रमणबाट एकैदिन मृत्यु हुनेको यो संख्या अहिलेसम्मकै उच्च हो । यसअघि भारतमा हिजो बुधबार कोरोनाले ३ हजार ७ सय ८० को मृत्यु भएको थियो ।

त्यस्तै पछिल्लो २४ घण्टामा भारतमा संक्रमितको संख्या पनि बढेको छ । भारतमा बुधबार एकैदिन अहिलेसम्मै उच्च ४ लाख १२ हजार २ सय ६२ जनामा संक्रमण पुष्टि भएको छ। भारतमा यसअघि गत शुक्रबार एकैदिन ४ लाख १ हजार ९ सय २३ संक्रमित थपिएका थिए । मंगलबार भने भारतमा ३ लाख ८२ हजार ३ सय १५ जनामा संक्रमण पुष्टि भएको छ ।

भारतमा अहिलेसम्म २ करोड १० लाख ७७ हजारभन्दा बढीलाई संक्रमण पुष्टि भएको छ भने करिब १ करोड ७२ लाख संक्रमणमुक्त भएका छन् । त्यस्तै कोरोनाबाट मृत्यु हुनेको संख्या २ लाख ३० हजार १ सय ६८ पुगेको छ । भारतमा पछिल्लो २४ घण्टामा ३ लाख २९ हजार १ सय १३ जना संक्रमणमुक्त भएका छन् । योसँगै भारतमा संक्रमण मुक्त हुनेको संख्या करिब १ करोड ७३ लाख पुगेको छ ।

भारतमा सक्रिय संक्रमितको संख्या ३५ लाख ६६ हजारभन्दा बढी छ । भारतमा पछिल्लो २४ घण्टामा १९ लाख २३ हजार १ सय ३१ नमुना परीक्षण भएको थियो । भारतमा मंगलबारसम्ममा करिब १६ करोड २५ लाख डोज खोप लगाइएको छ ।

भारत विश्वमा सबैभन्दा बढी संक्रमित मुलुकमध्ये अमेरिकापछि दोस्रोमा पर्छ । कोरोनाको दोस्रो लहर सुरु भएसँगै दिल्ली, महाराष्ट्र, उत्तरप्रदेश, मध्यप्रदेश, गुजरात, छत्तीसगढ, कर्नाटकलगायत राज्यमा उच्च संक्रमण देखिएको छ ।

महाराष्ट्रमा पछिल्लो २४ घण्टामा ५७ हजार ६ जनामा संक्रमण पुष्टि भएको छ भने ९ सय २० जनाको मृत्यु भएको छ । त्यस्तै राजधानी दिल्लीमा दिल्लीमा पछिल्लो २४ घण्टामा १९ हजार २ सय ९ जनामा संक्रमण पुष्टि हुनुका साथै ३ सय ११ जनाको मृत्यु भएको छ ।

पछिल्लो समय नेपालसँग सीमा जोडिएका भारतका राज्यहरूमा पनि संक्रमण बढिरहेको छ । पछिल्लो २४ घण्टामा उत्तर प्रदेशमा ४० हजार ८ सय ५२ जनामा संक्रमण पुष्टि भएको छ भने ३ सय ५३ जनाको मृत्यु भएको छ ।

त्यस्तै पश्चिम बंगालमा १७ हजार ७३ जनामा संक्रमण पुष्टि भएको छ भने १०३ जनाको मृत्यु भएको छ । त्यस्तै नेपालसँग सीमा जोडिएको बिहारमा पछिल्लो २४ घण्टामा ११ हजार ७ सय २६ जनामा संक्रमण पुष्टि भएको छ भने ६१ जनाको मृत्यु भएको छ ।

प्रकाशित : वैशाख २३, २०७८ १०:२४
प्रतिक्रिया
पठाउनुहोस्

भर्ना नपाएपछि रुँदै फर्किन्छन् संक्रमित

शय्या भए पनि अक्सिजन अभाव रहेको भन्दै बिरामी लिँदैन शिक्षण अस्पताल
मधु शाही

नेपालगन्ज — टाउकोलाई सेतो रुमालले टनक्क बाँधेर उनी अस्पतालको ढोकानिर थुचुक्क बसेकी थिइन् । नेपालगन्जको चर्को गर्मी । पसिना पुछ्दै आँखाभरि आँसु लिएर अस्पतालमा भर्ना हुने आशामा उनको दिन बित्यो । उनलाई सास फेर्न गाह्रो भइरहेको टाढैबाट देखिन्थ्यो तर भर्ना हुन पाइनन् ।

नेपालगन्ज मेडिकल कलेज शिक्षण अस्पताल कोहलपुरमा भर्ना नपाएपछि प्रांगणमा बुधबार अलपत्र परेकी कोरोना संक्रमित महिला । तस्बिर : मधु शाही/कान्तिपुर

उनका आफन्त पनि त्यहाँ कोही थिएनन् । बैजनाथ गाउँपालिका चिसापानीकी ती संक्रमित महिला बुधबार अस्पतालले भर्ना लिन नमानेपछि नेपालगन्ज शिक्षण अस्पतालबाट रुँदै घर फर्किइन् ।

बेड र अक्सिजन अभाव भएपछि बाँकेका अस्पताल संक्रमितलाई फर्काउन बाध्य छन् । शिक्षण अस्पताल कोहलपुरबाट दैनिक दुई–तीन जना संक्रमित भर्ना नपाएर फर्किने गरेको अस्पतालका चिकित्सक डा. देवेन्द्र आचार्यले बताए । उनका अनुसार कतिपय भर्ना भएका बिरामीका आफन्तले आफ्नै प्रयासमा अक्सिजन जोहो गरेका छन् । अस्पतालमा बेड थपिए पनि अक्सिजन पर्याप्त नहुँदा बिरामी फर्काउन बाध्य भएको उनले सुनाए । ‘सिकिस्त बिरामी आउँदा पनि अक्सिजन अभाव छ, त्यसैले भर्ना लिन सकिँदैन,’ उनले भने, ‘लाचार भएर फर्काउनुबाहेक विकल्प नै छैन ।’

महामारीका बेला अस्पतालसम्म आएका बिरामीलाई स्रोतको अभाव देखाएर जहाँसुकै जा भन्नु अस्पतालको गैरजिम्मेवारी भएको एडभोकेसी फोरम बाँकेका संयोजक वसन्त गौतमले बताए । अस्पतालको अनुगमनमा समेत पुगेका उनले बिरामी राख्ने बेड खाली छन् तर अक्सिजन नभएर भर्ना नलिएको सुनाए । यसमा सरकारले बेलैमा स्रोत र साधन उपलब्ध गराउन नसक्नु कमजोरी हो भने अर्कोतर्फ निजी अस्पतालले व्यवसायमुखी नभई सेवामुखी धारणा पनि राख्न जरुरी रहेको उनले बताए ।

सुरुमा शिक्षण अस्पतालले ३ सय बेड क्षमताको कोभिड अस्पताल बनाउने सरकारसमक्ष प्रतिबद्धता जनाएको थियो । अहिले बेड जडान गरेपछि अक्सिजनको माग गरेको हो । अस्पतालमा बेड व्यवस्थित रूपमा राखिएको छ । अहिले १ सय २७ जना संक्रमितलाई भर्ना गरेर उपचार गरिरहेको चिकित्सक आचार्यले बताए । नयाँ बिरामी भर्ना गर्नेबित्तिकै अक्सिजन अपुग हुने उनले बताए ।

अस्पतालमा १८ वटा ठूला सिलिन्डर बराबर क्षमता भएको लिक्विड ट्यांकी छ । त्यो ट्यांकीको अक्सिजन खपत भइसकेको अस्पतालका प्रमुख सुरेशकर्ण कनौडियाले बताए । भर्ना भएका बिरामीलाई अक्सिजन पुर्‍याउन धौधौ भइरहेका बेला नयाँ बिरामी थप गर्न नसकिने उनले बताए । यसले गर्दा अस्पतालमा राखिएका थप नयाँ बेड खाली छन् । नेपालगन्जमा दुईवटा अक्सिजन प्लान्ट छन् । तिनको क्षमता १ हजार १ सय सिलिन्डर अक्सिजन उत्पादन गर्नु हो, जसमध्ये ५ सय सिलिन्डर भेरी अस्पतालले खपत गरिरहेको छ । बाँकी २ सय सिलिन्डर शिक्षण अस्पतालले खपत गर्छ ।

नेपालगन्ज अक्सिजन प्लान्टले सुर्खेत, धनगढी, दाङ, बर्दिया, टीकापुर, हुम्ला, जुम्लासम्म पुर्‍याउँछ । साथै, होम आइसोलेसनमा बसेका बिरामीले समेत निजी पहलमा अक्सिजनको प्रयोग गरिरहेका छन् । डा. कनौडियाका अनुसार भारतबाट लिक्विड अक्सिजन ल्याउन पहल भइरहेको छ । सरकारले दुई–तीन दिन समय लगाएर भए पनि आपूर्ति पूरा गरे बिरामी फर्काउनुपर्ने स्थिति नआउने उनले बताए । उनका अनुसार एक जना बिरामीलाई मोटामोटी प्रतिदिन दुई–तीन सिलिन्डर आवश्यक पर्छ ।

शिक्षण अस्पतालले अक्सिजन अभाव भएको जनाउँदै बिरामी फर्काउनुपरेको अवस्थाप्रति प्रशासन गम्भीर देखिँदैन । बेड थप्दैमा बिरामीको उपचार भइहाल्छ भन्ने हल्का सोचले गर्दा बिरामी मर्कामा परेका हुन् । अस्पतालले प्रशासनसमक्ष ३ सय बेडको वार्ड सञ्चालन गर्न ५ सय सिलिन्डर अक्सिजन माग गरेको थियो ।

प्रकाशित : वैशाख २३, २०७८ १०:०६
पूरा पढ्नुहोस्
प्रतिक्रिया
पठाउनुहोस्
×