भारतमा कोरोना कहर : २४ घण्टामा चार नेपालीको मृत्यु- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतमा कोरोना कहर : २४ घण्टामा चार नेपालीको मृत्यु

सुरेशराज न्यौपाने

नयाँदिल्ली — कोरोना भाइरसको संक्रमणबाट भारतमा गएको पछिल्लो २४ घण्टामै चार प्रवासी नेपालीले ज्यान गुमाएका छन् ।

रोजगारीका लागि दिल्लीमा बस्दै ५४ वर्षीय विष्णु पौडेलको कोरोना भाइरसको संक्रमणबाट सोमबार मृत्यु भएको छ । आफन्त शिवलाल गौतमका अनुसार बुटवल निवासी गौतमको सोमबार दिउँसो करिब एक बजे दिल्लीको सफदरजंग अस्पतालामा उपचारका क्रममा मृत्यु भएको हो । पौडेललाई एक साताअघि ज्वरो आउने, सास फेर्न गाह्रो, अक्सिजनको लेभल घट्ने जस्ता समस्या देखिएको थियो । ती समस्या देखिनासाथ आफूहरुले अस्पताल भर्नाको प्रयास गरे पनि नपाइएको गौतमले बताए ।

बेड नपाएर चार दिनसम्म दिनभर अस्पतालको गेट धाउने र साँझ घर फर्कने क्रम चलेको उनले सुनाए । ‘कुनैले बेड छैन त कुनैले अक्सिजन छैन भनेर फर्काए । तीन दिनपछि मात्र निकै मुस्किलले सफदरजंग अस्पतालमा भर्ना गरिएको थियो,’ गौतमले भने । अस्पताल भर्ना गरेपछि पौडेलको स्वास्थ्यमा सुधार देखिए पनि सोमबार अचानक अक्सिजनको लेभल घटेपछि उनको मृत्यु भएको गौतमले जानकारी दिए ।

त्यसैगरी अर्का एक नेपाली कामदार ३५ वर्षीय दीपक विकले पनि आइतबार संक्रमणकै कारण ज्यान गुमाएका छन् । अर्घाखाँची घर भएका विकको दिल्ली छेउको नोयडाको जिम्स अस्पतालमा उपचारका क्रममा सोमबार नै मृत्यु भएको छिमेकी विष्णु केसीले कान्तिपुरलाई बताए । केसीका अनुसार ६ दिनअघि कोरोना पुष्टि भएपछि पहिले दिल्लीकै एउटा नर्सिङ होममा बाह्रदिन उपचार गरिएको थियो । तर, स्वास्थ्यमा सुधार नआएपछि ६ दिनअघि उनलाई नोयडाको जिम्स अस्पतालमा आईसीयूमा भर्ना गरिएको केसीले भने । उनलाई दुई पटक प्लाज्मा समेत चढाइएको थियो । तर, उपचार निधन भएको हो ।

त्यस्तै, अर्का एक नेपाली कामदार चन्द्रघर्ती मगरको पनि कोरानाले ज्यान लिएको छ । उत्तरभारत नेपाल तरुण दलका कोषाध्यक्ष चन्दरहम्जाली मगरका अनुसार मृतक मगरको उपचारका क्रममा सोमबार मृत्यु भएको हो । मगर दिल्लीको अलीगाउँमा रेष्टुराँ व्यवसाय गर्दै आएका थिए । उनलाई १० दिनअघि कोरोना संक्रमण देखिएको थियो । सास फेर्न गाह्रो भएपछि दुई दिन अघि दिल्लीकै होली फेमली अस्पतालको इमरजेन्सी पुर्‍याइयो । अस्पतालले बेड छैन भनेपछि सोही दिन साँझ आफन्तले आरएमएल लगे । बेड छैन भनिरहेको अस्पतालले निकै जोडबल गरेपछि २४ घन्टा राख्न दिएको चन्दरहम्जालीले बताए । आइतबार बिहान उनलाई अक्सिजन सिलिण्डिरसहित हरियाणाको फरिदाबाको सोनारोड अस्पताल पुर्‍याएको तर, त्यहाँ अवस्था सुधार नभएपछि दिल्लीकै अपोलो लगियो । तर, अस्पताल छिर्नु अघि नै उनको छटपटिएर निधन भएको चन्दरहम्जालीले बताए । ‘अस्पताल छिर्नै पाउनु भएन । गेट बाहिरनै छटपटिएर बित्नु भयो’ उनले भने ।

दिल्लीमा मात्र नभएर संक्रमणका कारण भारतका अन्य सहरमा पनि नेपालीहरुको मृत्यु हुने क्रम जारी छ । सोमबार नै गोवामा कैलालीकी ३० वर्षीय राधा तिरुवाको उपचारकै क्रममा मृत्यु भएको छ । कोरोना संक्रमित राधाको केहीदिनदेखि आईसीयूमा उपचार भइरहेको थियो । अखिल भारत नेपाली एक समाजका आरबी खड्काका अनुसार उपचारकै क्रममा सोमबार उनको मृत्यु भएको हो । उनका श्रीमान अमर तिरुवा पनि संक्रमित हुन् र हाल उनलाई पनि आईसीयू राखिएको छ ।

गएको २४ घण्टामै चार नेपालीको मृत्युले भारतमा रहेका नेपाली कामदारहरु संक्रमणको उच्च जोखिम रहेको प्रष्ट संकेत गर्छ । प्रवासी नेपाली संगठनहरुका अनुसार पछिल्लो एक सातामै ४० भन्दा बढी नेपालीको मृत्यु भइसकेको छ । उनीहरुको भनाइमा आफन्तहरुले कोरोनाबाट मृत्यु भए पनि नखुलाउने भएकाले संक्रमणबाट मृत्यु हुनेको संख्या निकै धेरै छ । ‘संक्रमित हुनेहरुको त हिसाब नै छैन । एक हप्तामै चालिसभन्दा बढीको मृत्यु भएको छ, अझ कति त कोरोनाबाट ज्यान गए पनि आफन्तहरुले नै बताउँदैनन्,’ अखिल भारत नेपाली एक समाजका आरबी खड्काले भने ।

प्रकाशित : वैशाख १३, २०७८ १८:३६
प्रतिक्रिया
पठाउनुहोस्

विद्यार्थीलाई होस्टल छाड्न साउथ एसियन युनिभर्सिटीको सूचना

महामारीको त्रासकाबीच थपियो नेपाली विद्यार्थीको चिन्ता
सुरेशराज न्यौपाने

नयाँदिल्ली — दिल्लीस्थित साउथ एसियन युनिभर्सिटी (साउ) ले कोरोना महामारीका कारण दिल्लीमा गम्भीर स्वास्थ्य संकट देखा परेको भन्दै त्यहाँ अध्ययनरत आवासीय विद्यार्थीहरुलाई होस्टल छाड्न निर्देशन दिएको छ ।

सोमबार साउ प्रशासनले एउटा सूचना जारी गर्दै दिल्लीको चाणक्यपुरीस्थित अकबर भवनको होस्टलमा रहेका सबै विद्यार्थीहरुलाई १० मेभित्र खाली गर्न आदेश दिएको हो । ‘सबै विद्यार्थीहरुलाई उनीहरुको व्यक्तिगत सुरक्षाका लागि १० मे भित्र अकबर भवनस्थित होस्टल कोठा र परिसर खाली गरेर आ-आफ्नो घर र बस्ने ठाउँका लागि प्रस्थान गर्नुपर्नेछ,’ साउद्धाराजारी सूचनामा भनिएको छ ।

साउले महामारीका कारण दिल्लीमा गम्भीर स्वास्थ्य संकटमा रहेको र विद्यमान स्वास्थ्य पूर्वाधारले बिरामीहरुको चाप थेग्न नसक्ने र आगामी दिनमा परिस्थिति थप भयावह बन्न सक्ने देखेर होस्टल खाली गर्ने निर्णय लिएको दाबी गरेको छ । ‘सञ्चारमाध्यम, राज्य सरकार एवं अस्पतालहरुद्वारा जारी प्रेस विज्ञप्तीहरुले अक्सिजन, बेड र औषधिको चरम संकट देखाएको र साउका केही विद्यार्थीले पनि त्यस्तै परिस्थितिको सामना गर्नुपरेकाले होस्टल खाली गर्ने निर्णयमा पुगेका हौं,’ विज्ञप्तीमा भनिएको छ । साउमा सबै सार्क मुलुकका गरी ७ सयभन्दा बढी विद्यार्थी अध्ययरनत छन् । त्यसमध्ये ४० जना नेपाली विद्यार्थी छन् । र, हाल होस्टलमा दुईसयभन्दा बढी विद्यार्थी रहेको होस्टलका सिनियर वार्डेन तथा उपप्रध्यापक युवराज पोखरेलले बताए । त्यसमध्ये हाल २० जना नेपाली विद्यार्थी रहेको पोखरेलले जानकारी दिए ।

प्रशासनले एकाएक होस्टल खाली गर्न सूचना जारी गरेपछि महामारीको त्रासमा रहेका नेपाली विद्यार्थीलाई कसरी घर जाने भन्ने चिन्ता थपिएको छ । उनीहरुको भनाइमा प्रशासनले होस्टल छाड्न भनेपनि एकातिर हवाइ टिकटको अभाव र अर्कोतर्फ सडकमार्गबाट जाँदा संक्रमणको अत्यधिक जोखिम भएकाले नेपाल जान सहज छैन । ‘सम्भव हुनेजति गएको राम्रो हो । तर, सम्भव नहुनेलाई चाहिँ प्रशासनले सुरक्षित रुपमा फ्लाइटहरुमा टिकट पाउन असम्भव छ, सडकबाट जाँदा कोरोना सर्ने डर छ र अन्तर्राष्ट्रिय सीमा पनि बन्द हुने हल्ला छ त्यसैले यस्तो अवस्थामा क्याम्पस प्रशासनले होस्टलमा नै बस्न चाहने विद्यार्थीहरुको लागि सुरक्षित रुपमा बस्ने र आपतकालीन अवस्थामा औषधोपचारको व्यवस्था गर्नुपर्छ,’ साउमा पीएचडी गर्दै गरेका नेपाली विद्यार्थी महेश्वर गिरीले भने ।

तर, केही विद्यार्थीहरुले भने प्रशासनले उर्दीको शैलीमा सूचना गरेर विद्यार्थीप्रतिको दायित्वबाट पन्छिन खोजेको आरोप लगाए । ‘आफ्ना विद्यार्थीहरुलाई क्याम्पस हाताभित्रै सुरक्षित राख्न सावधानीका न्यूनतम उपायहरुमा जोड दिनुको साटो स्वास्थ्य विज्ञहरुले नै यस्तो बेलामा यात्रा नगर्नु भनिरहेका बेला जोखिमपूर्ण यात्राका लागि बाध्य बनाउनुले प्रशासनमा भएकाहरु मानवीय संवेदनाहीन र आफ्नो दायित्वबाट भाग्न खोजेको प्रष्ट हुन्छ,’ आक्रोशित मुद्रामा एक नेपाली विद्यार्थीले भने ।

तर, होस्टलका सिनियर वार्डेन पोखेरेलले भने विद्यार्थीहरुको जीवन सुरक्षाका लागि भनेर नै विश्वविद्यालयले पछिल्लो निर्णय लिएको दाबी गरे । ‘अहिले नै करिब ३५ जना संक्रमित भइसकेका छन् । होस्टल बिल्डिङ, मेश एउटै छ । कुनै पनि बेला संक्रमणले विस्फोटक रुप लिन सक्छ । उनीहरुको जीवन रक्षाका लागि नै यो निर्णय लिएका हौं,’ पोखरेलले भने । तर, सूचना जारी भयो भन्दैमा प्रशासनले जीवन नै खतरामा पारेर विद्यार्थीहरुलाई जाऊ भन्न नखोजेको उनको भनाइ छ । ‘सबैलाई थाहा छँदै छ दिल्लीको पछिल्लो अवस्था । उपचार पाउने अवस्था छैन । नेपाली विद्यार्थीलाई केही भइहाल्यो भने दूतावास र सरकारले पनि केही नगर्ने हुँदा विद्यार्थीहरुकै लागि त्यस्तो आग्रह गरिएको हो,’ पोखरेलले भने । महामारी विकराल बन्दै गएकाले विद्यार्थीहरु आफैले परिस्थिति बुझ्छन् भन्ने प्रशासनको बुझाई रहेको उनले बताए ।

नोभेम्बर २००५ मा बंग्लादेशको ढाकामा सम्पन्न तेह्रौं सार्क शिखर सम्मेलनमा विश्वस्तरीय शैक्षिक जनशक्ति उत्पादन गर्ने उद्देश्यसहित दक्षिण एसियाली विश्वविद्यालय (साउ) स्थापना गर्ने निर्णय भएको थियो । औपचारिक पठनपाठन भने अगष्ट २०१० देखि दिल्लीकै जहावरलाल नेहरु विश्वविद्यालयकै परिसरबाट सुरु गरिएको थियो । पछि जुलाई २०११ मा चाणक्यपुरीस्थित अहिले कै अकबर भवनमा सारिएको हो । साउको सञ्चालनको खर्चमध्ये भारतले ५७.३८ प्रतिशत, पाकिस्तानले १३.०९ प्रतिशत, बंग्लादेशले ८.२० प्रतिशत, नेपाल र श्रीलंका दुवैले ४.९२ प्रतिशत र भुटान, अफगानिस्तान र माल्दिभ्स प्रत्येकले ३.८३ प्रतिशतका दरले व्यहोर्दै आएका छन् । साउको पूँजीगत खर्च भने पूर्णरुपमा भारतले नै व्यहोर्ने व्यवस्था छ ।

प्रकाशित : वैशाख १३, २०७८ १७:०१
पूरा पढ्नुहोस्
प्रतिक्रिया
पठाउनुहोस्
×