जर्ज फ्लोइडको हत्यामा पूर्वप्रहरी दोषी ठहर

सन् २०२० को मेमा फ्लोइडको गिरफ्तारीका बेला ४५ वर्षीय प्रहरी अधिकारी डेरेक सोभिनले ९ मिनेटभन्दा लामो समयसम्म घुँडाले उनको घाँटीमा थिचेका थिए । उक्त दृश्य सामाजिक सञ्जाल प्रयोगकर्ताले बाहिर ल्याएका थिए । उक्त भिडियोमा फ्लोइडले ‘मैले सास फेर्न सकिरहेको छैन’ भनेको सुन्न सकिन्छ ।

लाखौं मानिसले हेर्नुका साथै सेयर गरेको उक्त दृश्यका कारण अमेरिकामा प्रमुख सहरका साथै कतिपय युरोपेली देशमा जातिवाद र प्रहरी ज्यादतीविरुद्ध कैयौं दिनसम्म विरोध प्रदर्शन गरिएको थियो । अमेरिकी सञ्चारमाध्यमका अनुसार सोभिनलाई एक जुरीले तीनवटा अभियोगमा दोषी ठहर गरेको हो । जसमा सेकेन्ड डिग्री हत्या, थर्ड डिग्री हत्या र आशयबिनाको गैरकानुनी हत्या छन् । अमेरिकी कानुनअनुसार सेकेन्ड डिग्रीमा हत्या ठहर गर्न आशय खुलेको हुनुपर्छ तर त्यो पूर्वनियोजित भने हुँदैन । थर्ड डिग्री हत्यामा प्रतिवादीले पीडितलाई मार्न खोजेको देखिँदैन ।

यसअघि जमानतमा रिहा भएका सोभिनलाई मुद्दाको फैसला सुनाउने क्रममा हतकडी लगाएर उपस्थित गराइएको थियो । जेल सजाय नतोकिँदासम्म उनी हिरासतमै रहनेछन् र दशकौंसम्म जेलमा बिताउनुपर्ने हुन सक्छ । सोभिनले निर्णयविरुद्ध पुनरावेदन गर्ने ठानिएको छ ।

मुद्दाको सुनुवाइका क्रममा दुवै पक्षले सोमबार अन्तिम तर्कहरू प्रस्तुत गरेका थिए । त्यसको एक दिनमै १२ सदस्यीय जुरीले फैसला सुनाएको हो । जुरीमा ७ जना महिला र ५ जना पुरुष छन् । हेन्नेपिन काउन्टीका न्यायाधीश पिटर केहिलले फैसलाको पाठ सुनाउँदै उक्त फैसला सर्वसम्मत रहेको बताएका छन् ।

तीन साताको सुनुवाइले मिनियापोलिसमा एक खालको तनावपूर्ण अवस्था निम्ताएको थियो । सुनुवाइ सकिएपछि बाह्य सम्पर्कबाट टाढा रहन भन्दै १२ सदस्यीय जुरी एउटा होटलमा बसेको थियो ।

निर्णयपछि अदालतबाहिर खुसीका दृश्य देखिएका बीबीसीले जनाएको छ । फ्लोइड परिवारका वकिल बेन क्रम्पले उक्त निर्णय अमेरिकाका निम्ति ‘इतिहासको घुम्ती’ भएको बताएका छन् । ‘पीडाका साथ आर्जन भएको न्याय अन्तत: प्राप्त भएको छ,’ उनले ट्वीटरमा लेखेका छन् ।

अमेरिकी राष्ट्रपति जो बाइडेन, उपराष्ट्रपति कमला ह्यारिस र सभामुख नान्सी पेलोसीले फैसलाप्रति प्रसन्नता प्रकट गरेका छन् । बाइडेनले ‘कम्तीमा केही न्याय प्राप्त’ भएको बताए । ‘हामीले अझै धेरै प्राप्त गर्नुपर्ने छ,’ बाइडेनले भने । फैसलापछि सम्बोधन गर्दै उनले ‘प्रणालीगत जातिवाद देशकै आत्माको कलंक’ भएको बताए ।

त्यस्तै, उपराष्ट्रपति ह्यारिसले अमेरिकी प्रहरीको प्रशासकीय पुनर्संरचना गर्ने पक्षमा ल्याइएको जर्ज फ्लोइड विधेयक पारित गर्न सांसदहरूलाई आग्रह गरिन् ।