राजकुमार फिलिपको अन्त्येष्टि शनिबार- विश्व - कान्तिपुर समाचार
कान्तिपुर वेबसाईट
AdvertisementAdvertisement

राजकुमार फिलिपको अन्त्येष्टि शनिबार

कोरोना  महामारीका कारण अन्त्येष्टि समारोहमा राजपरिवार सदस्यसहित ३० जना मात्रै सहभागी हुने
नवीन पोखरेल

लन्डन — बेलायती महारानी एलिजाबेथ द्वितीयाका श्रीमान् राजकुमार फिलिपको अन्त्येष्टि आउँदो अप्रिल १७ मा गरिने भएको छ । बेलायती राजदरबार बकिङ्घम प्यालेसका प्रवक्ताका अनुसार फिलिपको स्थानीय समयअनुसार दिउँसो ३ बजे विन्डसोरस्थित सेन्ट जर्ज गिर्जाघरमा अन्त्येष्टि गरिनेछ । फिलिपको गत शुक्रबार ९९ वर्षको उमेरमा स्वर्गारोहण भएको थियो ।

तस्बिर : रोयटर्स

फिलिपको सम्झनामा क्यान्टरबरीस्थित गिर्जाघरमा प्रार्थनासभा आयोजना गरिएको छ । क्यान्टरबरीका आर्च बिसप, जस्टिन वेल्बीको नेतृत्वमा उक्त प्रार्थना सभा आयोजना गरिएको थियो । आउँदो शनिबार हुने अन्त्येष्टि कार्यक्रमको नेतृत्व पनि उनले नै गर्ने अपेक्षा गरिएको छ । कोरोना भाइरसको महामारीका कारण अन्त्येष्टि समारोहमा राजपरिवार सदस्यहरू र निकटका ३० जनालाई मात्रै सहभागी गराइने बीबीसीले जनाएको छ ।

प्रधानमन्त्री बोरिस जोन्सनसमेत समारोहमा सहभागी हुने छैनन् । सर्वसाधारणलाई टाढै रहन भनिएको छ । फिलिप निवासमा सर्वसाधारणले पुष्पगुच्छा चढाइरहँदा त्यसको सट्टा च्यारिटीलाई सहयोग गर्न अपिल गरिएको छ । फिलिपको अन्त्येष्टिमा सहभागी हुन बेलायती प्रिन्स ह्यारी क्यालिफोर्नियाबाट लन्डन आउने भएका छन् । ह्यारी राजपरिवारको सम्पूर्ण जिम्मेवारी त्यागेर श्रीमती मेघन र छोरा आर्चीका साथ अमेरिकामा बस्दै आएका छन् । अन्त्येष्टिमा मेघन भने गर्भवती भएकाले चिकित्सकहरूको सुझावअनुसार सहभागी हुने छैनन् ।

सन् १९४७ नोभेम्बर २० मा बिहे गरेका राजकुमार फिलिप र रानीका ४ सन्तान, ८ नातिनातिना र १० जना पनाति–पनातिनी छन् । फिलिपको निधनसँगै ह्यारी मेघन र शाही परिवारबीच पछिल्लो समय देखिएको तिक्तता हट्ने अपेक्षा गरिएको छ । आमा डायनाको निधनपछि प्रिन्स ह्यारी र विलियमको अभिभावक रहेका बेलायती पूर्वप्रधानमन्त्री सर जोन मेजरले यो शोकको घडीले शाही परिवारबीचको दूरी अन्त्य गर्ने बताएका छन् ।

सरकारले फिलिपको निधनमा देशभर आठ दिन शोक मनाउने निर्णय गरेको छ । शोक मनाउने समयमा देशभर राष्ट्रिय झन्डा आधा र राजदरबारमा पूरै झन्डा झुकाइने छ ।

विश्व स्तब्ध

बेलायती महारानी एलिजाबेथ द्वितीयाका पति राजकुमार फिलिपको निधनप्रति विश्व समुदाय स्तब्ध भएको छ । विन्डसर क्यासलमा दिवंगत भएका फिलिपलाई विश्वभरका राजसंस्था, राष्ट्रप्रमुख, बहालवाला तथा पूर्वप्रधानमन्त्रीहरूले श्रद्धाञ्जली अर्पण गर्दै उनको योगदानको स्मरण गरेका छन् ।

युरोपेली राजपरिवार र कमनवेल्थ राष्ट्रका नेताहरूले स्वर्गिय फिलिपप्रति समवेदना प्रकट गर्दै उनको असाधारण राष्ट्रसेवाको स्मरण गरेका छन् । अमेरिकी राष्ट्रपति जो बाइडेन र जीवित सबै अमेरिकी पूर्वराष्ट्रपतिहरू, पोप फ्रान्सिस र आध्यात्मिक तिब्बती नेता दलाई लामाले पनि समवेदना प्रकट गरेका छन् । चिनियाँ राष्ट्रपति सी चिनफिङले बेलायती महारानीलाई समवेदना सन्देश पठाएको बीबीसीले जनाएको छ । फिलिपको निधनमा अस्ट्रेलियाको क्यानबेरास्थित संसद् भवनको झन्डा आधा झुकाइएको छ । प्रिन्स फिलिप सन् १९५४ मा राज्याभिषेकपछि पहिलो विदेश भ्रमणका क्रममा रानीका साथ अस्ट्रेलिया पुगेका थिए ।

राजकुमार फिलिपको जन्म सन् १९२१ जुन १० मा ग्रिसको कोर्फु द्वीपमा भएको थियो । उनी ग्रिसका राजकुमार एन्ड्र्यु र बाटेनवर्गकी राजकुमारी एलिसका एकमात्र छोरा थिए । बेलायतकी महारानीसँग सात दशकभन्दा लामो वैवाहिक जीवन सँगै बिताएका फिलिप र महारानीले विश्वका सयौं राजकीय भ्रमण गरेका थिए । सन् १९५२ देखि अवकाश नलिँदासम्म झन्डै २२ हजार त्यस्ता कार्यक्रममा सहभागी भएका थिए । अन्तर्राष्ट्रिय सञ्चारमाध्यमका अनुसार, फिलिपमा युवाहरूको कल्याण तथा वन्यजन्तु र प्रकृति संरक्षणमा विशेष रुचि थियो ।

सन् २०१७ अगस्टमा सार्वजनिक जीवनबाट अवकाश लिएका प्रिन्स फिलिप केही समयअघि अस्वस्थ भएका कारण एक महिना अस्पतालमा बिताएर गत मार्च १६ मा आफ्नो निवास विन्डसर क्यासल फर्किएका थिए । सन् १९५२ को फेब्रुअरीमा फिलिप र एलिजाबेथ केन्या भ्रमणमा रहेका बेला बेलायतका राजा जर्ज छैटौंको निधन भएपछि बेलायती महारानी बनेकी आफ्नी पत्नी एलिजाबेथलाई राजकुमार फिलिपको जीवनपर्यन्त दरिलो साथ थियो ।

प्रकाशित : चैत्र ३०, २०७७ १२:५४
प्रतिक्रिया
पठाउनुहोस्

शोकमा बकिङ्‌घम प्यालेस

बेलायती महारानीका पति भए पनि राजकुमार फिलिपको कुनै संवैधानिक हैसियत थिएन तर उनी दरबारका खास व्यक्ति थिए ।
नवीन पोखरेल

लन्डन — बेलायती महारानी एलिजाबेथ द्वितीयालाई पति शोक परेको छ । महारानीका पति राजकुमार फिलिपको शुक्रबार ९९ वर्षको उमेरमा विन्डसर क्यासलमा निधन भएको बकिङ्घम राजदरबारले घोषणा गरेको छ ।

तस्बिर : रोयटर्स

रानीले गहिरो दुःखका साथ उनका श्रीमान् ड्युक अफ एडिनबरा राजकुमार फिलिपको मृत्यु भएको घोषणा गरेकी राजदरबारले जारी गरेको विज्ञप्तिमा उल्लेख छ । राजदरबारमा ब्रिटिस झन्डा आधा झुकाइएको छ ।

उपचारका क्रममा एक महिना अस्पतालमा बिताएपछि ड्युक गत १६ मार्चमा आफ्नो निवास विन्डसर क्यासल फर्किएका थिए । टेन डाउनिङ स्ट्रिटमा बोल्दै प्रधानमन्त्री बोरिस जोन्सनले भने, ‘ड्युकको निधनको समाचार सुन्दा साह्रै दुःखी भएको छु । ड्युकले अनगिन्ती युवाहरूको जीवनलाई प्रेरित गरेका थिए ।’

फिलिप ग्रिसको कोर्फु द्वीपमा १० जुन सन् १९२१ मा राजपरिवारमा जन्मिएका थिए । उनी एक वर्षको हुँदा ग्रिसमा क्रान्ति भयो । त्यहाँको अदालतले उनका पितालाई ग्रिसबाट निकाला गरिदियो । त्यसपछि उनीहरू बेलायत पुगेका थिए ।

दोस्रो विश्वयुद्धको संघारमा फिलिप सैन्य सेवामा भर्ती भएका थिए । उनी रोयल न्याभीमा थिए । एलिजाबेथ भ्रमणमा आउँदा भेट भयो । दुवैबीच सन् १९४७ मा विवाह भयो । विवाहको पाँच वर्षपछि एलिजाबेथलाई बेलायतको राजगद्दी सम्हाल्ने जिम्मेवारी आएको थियो ।

बीबीसीका अनुसार राजकुमार फिलिप र महारानी एलिजाबेथका चार सन्तान, आठ नातिनातिनी छन् र १० जना पनातिपनातिनी छन् ।

उनीहरूका छोरा प्रिन्स अफ वेल्स पनि भनिने राजकुमार चार्ल्स सन् १९४८ मा जन्मिएका थिए । त्यसपछि राजकुमारी एन सन् १९५० मा जन्मेकी थिइन् भने ड्युक अफ योर्क राजकुमार एन्ड्र्यु सन् १९६० मा जन्मेका थिए । त्यसैगरी अर्ल अफ वेसेक्स प्रिन्स एडवार्ड सन् १९६४ मा जन्मिएका बीबीसीका समाचारमा उल्लेख छ ।

नेपाली र विशेष गरी गोर्खासँग बेलायती दरबारको निकट सम्बन्ध छ । बेलायतको नेपाली समुदाय फिलिपको निधनबाट दुःखी भएको छ । ‘उनको नेपालप्रति बेग्लै सद्भावना थियो । गोर्खा र नेपाली राजपरिवारसँगको सम्बन्धका कारण पनि फिलिपले नेपाललाई रुचाउँथे,’ सन् १९६१ मा रानीसँगै फिलिप नेपाल गएको सम्झँदै लन्डनका अग्रज चिकित्सक डा. राघवप्रसाद धितालले कान्तिपुरसँग भने । फिलिपसँग दुई पटक सार्वजनिक कार्यक्रममा भेटेको बताउने अन्तर्राष्ट्रिय कानुनका प्राध्यापक डा. सूर्यप्रसाद सुवेदीले उनी महान् राष्ट्रसेवक भएको र रानीलाई सधैं सहयोग गरेको स्मरण गरे ।

‘दोस्रो विश्वयुद्धदेखि अहिलेसम्म ब्रिटेनमा स्थायित्व कायम राख्न ब्रिटिस महारानीलाई उहाँको सहयोग निकै महत्त्वपूर्ण रह्यो,’ सुवेदीले भने, ‘उहाँले थुप्रै ब्रिटिस च्यारिटीहरूको संरक्षकका रूपमा ती संस्थाहरूलाई सघाउनुभयो । विश्वभरि नै उहाँको अनुपस्थिति खड्किनेछ ।’

प्रकाशित : चैत्र २८, २०७७ ०८:१७
पूरा पढ्नुहोस्
प्रतिक्रिया
पठाउनुहोस्
×