शोकमा बकिङ्‌घम प्यालेस- विश्व - कान्तिपुर समाचार
कान्तिपुर वेबसाईट
AdvertisementAdvertisement

शोकमा बकिङ्‌घम प्यालेस

बेलायती महारानीका पति भए पनि राजकुमार फिलिपको कुनै संवैधानिक हैसियत थिएन तर उनी दरबारका खास व्यक्ति थिए ।
नवीन पोखरेल

लन्डन — बेलायती महारानी एलिजाबेथ द्वितीयालाई पति शोक परेको छ । महारानीका पति राजकुमार फिलिपको शुक्रबार ९९ वर्षको उमेरमा विन्डसर क्यासलमा निधन भएको बकिङ्घम राजदरबारले घोषणा गरेको छ ।

तस्बिर : रोयटर्स

रानीले गहिरो दुःखका साथ उनका श्रीमान् ड्युक अफ एडिनबरा राजकुमार फिलिपको मृत्यु भएको घोषणा गरेकी राजदरबारले जारी गरेको विज्ञप्तिमा उल्लेख छ । राजदरबारमा ब्रिटिस झन्डा आधा झुकाइएको छ ।

उपचारका क्रममा एक महिना अस्पतालमा बिताएपछि ड्युक गत १६ मार्चमा आफ्नो निवास विन्डसर क्यासल फर्किएका थिए । टेन डाउनिङ स्ट्रिटमा बोल्दै प्रधानमन्त्री बोरिस जोन्सनले भने, ‘ड्युकको निधनको समाचार सुन्दा साह्रै दुःखी भएको छु । ड्युकले अनगिन्ती युवाहरूको जीवनलाई प्रेरित गरेका थिए ।’

फिलिप ग्रिसको कोर्फु द्वीपमा १० जुन सन् १९२१ मा राजपरिवारमा जन्मिएका थिए । उनी एक वर्षको हुँदा ग्रिसमा क्रान्ति भयो । त्यहाँको अदालतले उनका पितालाई ग्रिसबाट निकाला गरिदियो । त्यसपछि उनीहरू बेलायत पुगेका थिए ।

दोस्रो विश्वयुद्धको संघारमा फिलिप सैन्य सेवामा भर्ती भएका थिए । उनी रोयल न्याभीमा थिए । एलिजाबेथ भ्रमणमा आउँदा भेट भयो । दुवैबीच सन् १९४७ मा विवाह भयो । विवाहको पाँच वर्षपछि एलिजाबेथलाई बेलायतको राजगद्दी सम्हाल्ने जिम्मेवारी आएको थियो ।

बीबीसीका अनुसार राजकुमार फिलिप र महारानी एलिजाबेथका चार सन्तान, आठ नातिनातिनी छन् र १० जना पनातिपनातिनी छन् ।

उनीहरूका छोरा प्रिन्स अफ वेल्स पनि भनिने राजकुमार चार्ल्स सन् १९४८ मा जन्मिएका थिए । त्यसपछि राजकुमारी एन सन् १९५० मा जन्मेकी थिइन् भने ड्युक अफ योर्क राजकुमार एन्ड्र्यु सन् १९६० मा जन्मेका थिए । त्यसैगरी अर्ल अफ वेसेक्स प्रिन्स एडवार्ड सन् १९६४ मा जन्मिएका बीबीसीका समाचारमा उल्लेख छ ।

नेपाली र विशेष गरी गोर्खासँग बेलायती दरबारको निकट सम्बन्ध छ । बेलायतको नेपाली समुदाय फिलिपको निधनबाट दुःखी भएको छ । ‘उनको नेपालप्रति बेग्लै सद्भावना थियो । गोर्खा र नेपाली राजपरिवारसँगको सम्बन्धका कारण पनि फिलिपले नेपाललाई रुचाउँथे,’ सन् १९६१ मा रानीसँगै फिलिप नेपाल गएको सम्झँदै लन्डनका अग्रज चिकित्सक डा. राघवप्रसाद धितालले कान्तिपुरसँग भने । फिलिपसँग दुई पटक सार्वजनिक कार्यक्रममा भेटेको बताउने अन्तर्राष्ट्रिय कानुनका प्राध्यापक डा. सूर्यप्रसाद सुवेदीले उनी महान् राष्ट्रसेवक भएको र रानीलाई सधैं सहयोग गरेको स्मरण गरे ।

‘दोस्रो विश्वयुद्धदेखि अहिलेसम्म ब्रिटेनमा स्थायित्व कायम राख्न ब्रिटिस महारानीलाई उहाँको सहयोग निकै महत्त्वपूर्ण रह्यो,’ सुवेदीले भने, ‘उहाँले थुप्रै ब्रिटिस च्यारिटीहरूको संरक्षकका रूपमा ती संस्थाहरूलाई सघाउनुभयो । विश्वभरि नै उहाँको अनुपस्थिति खड्किनेछ ।’

प्रकाशित : चैत्र २८, २०७७ ०८:१७
प्रतिक्रिया
पठाउनुहोस्

भूपू गोर्खाद्वारा आमरण अनशनको चेतावनी

समान पेन्सनलगायत माग पूरा गर्न आलटाल गरिएको भन्दै गोर्खाहरुले अनशन गर्ने बताएका हुन् 
नवीन पोखरेल

लन्डन — समान पेन्सनलगायत माग पूरा गर्न आलटाल गरिएको भन्दै भूपू गोर्खाहरूले आमरण अनशन गर्ने चेतावनी दिएका छन् । बेलायत र नेपाल सरकारका प्रतिनिधि एवं भूपू गोर्खाहरूबीच विभिन्न चरणका वार्तापछि १३ बुँदे सम्झौता भएको ३ वर्ष हुँदासमेत बेलायतले वास्ता नगरेको भन्दै गोर्खाहरू ‘वार कि पार’ को अवस्थामा पुगेका हुन् ।

भूपू गोर्खा सैनिकहरूको न्याय, समानता तथा समान पेन्सनलगायत १३ बुँदे माग नेपालको राष्ट्रिय एजेन्डा र राष्ट्रिय सहमति बनिसकेको अवस्थामा ती माग पूरा गर्न नेपाल सरकारले आफ्नो कूटनीतिक पहललाई तीव्रता दिनुपर्ने पनि उनीहरूको जोड छ ।

गैरआवासीय नेपाली संघ यूके गोर्खा विभागले शनिबार बेलायतस्थित गोर्खा अभियान सञ्चालन गर्दै आएका प्रमुख संस्थाहरूका अगुवासँग गरेको प्रत्यक्ष बहसमा अभियन्ताहरूले अन्तिम लडाइँको चेतावनी दिए । ‘छिटोभन्दा छिटो हाम्रा माग सम्बोधन नगरिए जुलाई १ देखि हामी लन्डनमा आमरण अनशनमा बस्नेछौं,’ गोर्खा अभियन्ता ज्ञानराज राईले भने । सन् २०१३ मा ब्रिटिस रक्षा मन्त्रालयअगाडि राई आमरण अनशनमा बसेपछि ब्रिटिस संसद्ले गोर्खालीका माग अध्ययन गर्न सर्वदलीय समिति गठन गरेको थियो ।

शनिबार बहसका क्रममा माग सम्बोधन गर्न दुवै मुलुकले जति सक्दो चाँडो वार्ता समिति गठन गरी वार्ताको मिति तोक्न माग गर्दै ६ वटा प्रमुख गोर्खा संस्थाहरूले लन्डनस्थित नेपाली तथा काठमाडौंस्थित ब्रिटिस दूतावासमार्फत दुवै सरकारलाई अल्टिमेटमसहितको संयुक्तपत्र छिट्टै बुझाइने बताएका छन् । साथै, उनीहरूले ब्रिटिस सरकारका भेट्रान्स मन्त्रीले नेपाली दूतावासलाई पठाएको पत्र सार्वजनिक गर्न पनि अनुरोध गरेका छन् ।

ब्रिटिस गोर्खा वेलफेयर सोसाइटी (बीजीडब्लूएस), बिगेसो यूके, ब्रिटिस गोर्खा नेपाली नागरिकता निरन्तरता अभियान, गेसो, गोर्खा सत्याग्रह संयुक्त संघर्ष समिति र नेपाल भूपू सैनिक संघ (नेसा यूके) गरी ६ संगठनका प्रतिनिधिले गोर्खा अभियान सशक्त रूपमा लैजान एकमत जाहेर गरेका हुन् । भूपू गोर्खा सैनिकका ३० वर्ष नाघेका छोराछोरीलाई बिनाकुनै अवरोध बेलायत आउन प्राथमिकता दिन, हाल नेपालमा रहेका ब्रिटिस सेनाबाट सेवानिवृत्त भूतपूर्व गोर्खा सैनिक तथा तिनका परिवारलाई बेलायतको राष्ट्रिय स्वास्थ्य सेवा (एनएचएस) कै स्वास्थ्य सेवा उपलब्ध गराउन तथा ब्रिटिस गोर्खा सैनिकले नेपाली नागरिकता राख्न पाउने व्यवस्था गरिनुपर्नेसमेत उनीहरूको माग छ ।

कार्यक्रममा ब्रिगेड अफ गोर्खाजका सेवानिवृत्त लेफ्टिनेन्ट कर्नेल जेपी क्रसले माग पूरा गर्नका लागि गोर्खालीहरूलाई शुभकामना दिएका थिए । त्यसैगरी, एनआरएनएका केन्द्रीय सल्लाहकार कुल आचार्यले गोर्खालीले पुर्‍याएको सेवाको मूल्यांकन गर्दै उनीहरूका माग पूरा गर्न आह्वान गरे ।

प्रकाशित : चैत्र १७, २०७७ १२:५५
पूरा पढ्नुहोस्
प्रतिक्रिया
पठाउनुहोस्
×