फ्रान्समा फेरि चार हप्ताका लागि कडा लकडाउन घोषणा- विश्व - कान्तिपुर समाचार

फ्रान्समा फेरि चार हप्ताका लागि कडा लकडाउन घोषणा

ददि सापकोटा

पेरिस — कोरोना भाइरसको उत्परिवर्तित (म्युटेन्ट) रुपको महामारी फेरि चर्किएपछि फ्रान्समा शनिबारदेखि लागू हुनेगरी कडा लकडाउन घोषणा गरिएको छ । बेलायती स्वरूपको कोरोना भाइरसबाट संक्रमित हुनेको संख्या बढ्न थालेपछि बुधवार साँझ राष्ट्रका नाममा सम्बोधन गर्दै फ्रान्सेली राष्ट्रपति एमानुयल म्याक्रोंले कडा लकडाउन घोषणा गरेका हुन् ।

सरकारी अस्पतालहरुको सघन उपचार कक्षमा पाँच हजार बिरामीहरु भर्ना भएपछि स्वास्थ्य प्रतिरक्षा परिषद (हेल्थ डिफेन्स काउन्सिल) को सुझाव अनुसार उनले यस्तो निर्णय लिएको फ्रान्सेली मिडियाहरुको भनाइ छ । उक्त सुझावलाई मन्त्रिपरिषदबाट पास गरिएको थियो ।

राष्ट्रपतिको सम्बोधनका अनुसार यसअघि खुला रहेका नर्सरी, स्कुल, कलेज र उच्च विद्यालयहरू तीन हप्ताका लागि बन्द रहने छन् । विश्वविद्यालयका विद्यार्थी भने हप्तामा एक दिन मात्रै कक्षामा प्रत्यक्ष सरिक हुन पाउने व्यवस्था गरिएको छ । लकडाउनका बेला आफ्ना बालबालिका घरैमा राख्न बाध्य हुने कर्मचारीहरुका लागि सहयोगीको व्यवस्था गरिनेछ ।

एस्ट्राजेनेका र जोनसन एण्ड जोन्सन कम्पनीबाट उत्पादित खोपलाई व्यापक रुपमा प्रयोग गर्न भेटेरनरी चिकित्सक र फार्मेसीका कर्मचारीसमेत परिचालन गरिएको राष्ट्रपतिले उल्लेख गरेका छन् ।

आगामी हप्ता विद्यार्थीहरुलाई पूरै घरमै राखिने छ र त्यसपछिका दुई हप्ता गर्मी यामको छुट्टी घोषणा गरिने छ । शिशु कक्षा, माध्यमिक स्कुल अप्रिल २६ अगाडि खोलिने छैनन् । निम्न माध्यमिक र माध्यमिक तहका विद्याहरुका लागि भने मे महिनाको ३ सम्म बन्द रहने छ । एक क्षेत्रबाट अर्को क्षेत्रबीचको आवतजावत इस्टर पर्वका बेला बाहेक निषेध गरिएको छ । यसअघि रहेको १९ प्रान्तमा मात्रै रहेको स्वास्थ्य प्रतिबन्ध निगरानीलाई फ्रान्सभरि लागू गराइने छ । होटेल, बार, रेस्टुरेन्टहरु सबै बन्द रहने छन् । रेस्टुरेन्टहरुले स्वास्थ्य सुरक्षा अपनाएर टेक वे सेवा दिन पाउने छन् । बन्द रहेका होटेल, रेस्टुरेन्ट र अन्य व्यवसायीहरुका लागि सामाजिक सहयोग रहने छ । बन्द रहेका व्यवसायका कर्मचारीले बेरोजगार भत्ता पाउने छन् ।

कोरोना भाइरसको महामारीले संक्रमितको संख्या अस्पतालहरुले धान्नै नसक्ने देखिएपछि राष्ट्रपतिले स्वास्थ्यकर्मीहरुलाईसमेत सहज हुनेगरी सुविधासम्पन्न १० हजार बेड थप गरिने बताएका छन् ।

भाइरसलाई नियन्त्रण गर्न प्रहरी अधिकारी र शिक्षकहरुलाई प्राथमिकताका साथ खोप दिइने छ । ५० देखि ६० वर्षका नागरिकलाई मे महिनाको १५ देखि खोप लगाउन सुरु गरिने छ भने त्यस मुनिकालाई जुन महिनाको मध्यदेखि सुरु गरिने पनि राष्ट्रपतिले उल्लेख गरेका छन् । ६० वर्षदेखि ७० वर्षका नागरिकले भने अप्रिल १६ देखि नै खोप लगाउन सक्ने छन् । आगामी अगस्ट महिनासम्ममा १८ वर्षमुनिका सबैलाई खोप लगाइसकिने छ । हाल एक हजार सात सय खोप केन्द्रहरु खुला रहेको पनि उनले बताए ।

कोरोना भाइरसको संक्रमणले हालसम्म फ्रान्समा ९५ हजारको ज्यान लिइसकेको छ । बेलायती स्वरुपको भाइरस फैलिएपछि संक्रमितहरुको संख्या तीव्र रुपमा बढिरहेको छ । मार्च महिनाको मध्यदेखि फ्रान्समा प्रत्येक दिन ३० हजार मानिस संक्रमित भइरहेको फ्रान्स २४ न्युजले उल्लेख गरेको छ ।

प्रकाशित : चैत्र १९, २०७७ ०८:३६
प्रतिक्रिया
पठाउनुहोस्

कोरोना संक्रमण बढेपछि पेरिस र फ्रान्सका १६ प्रान्तमा शुक्रबारदेखि फेरि पूर्ण लकडाउन

ददि सापकोटा

पेरिस — शुक्रबारदेखि फ्रान्सको राजधानी पेरिस क्षेत्र र १६ प्रान्तमा चार हप्ताका लागि पूर्ण लकडाउन घोषणा गरिएको छ । फ्रान्समा लकडाउन घोषणा गरिएको यो तेस्रो पटक हो ।

फाइल फोटो : रोयटर्स

प्रधानमन्त्री जँ कास्तेक्सले पूरै पेरिस क्षेत्रलगायत १६ फ्रान्सेली प्रान्तहरूमा कोरोना भाइरसको संक्रमण व्यापक फैलिएकाले त्यसलाई रोक्न पूर्ण लकडाउन गर्नुपरेको बिहीबार साँझ बताएका हुन् । कोरोना भाइरसको खासगरी परिवर्तित रुपले गर्दा महामारी फैलिएकाले कम्तीमा चार हप्ता लकडाउन गर्नुपरेको उनले उल्लेख गरेका छन् ।

उनको घोषणा अनुसार लकडाउन अवधिमा अत्यावश्यक बस्तुहरुका पसलहरु खाद्यान्न, औषधि पसल, सूर्तिजन्य र पत्रिका पसल, गाडी सर्भिसिङ सेन्टरहरु र किताब पसलहरुबाहेक अन्य सबै पसलहरु बन्द रहनेछन् । स्कुल र कलेजहरु खुलै हुनेछन् भने विश्वविद्यालयहरु भने बन्द रहनेछन् । रेस्टुरेन्टहरुले भने स्वास्थ्य नियमहरुको कडा पालन गर्दै टेक अवे सुविधा दिन पाउनेछन् ।

लकडाउन गरिएका क्षेत्रबाट लकडाउन नगरिएका क्षेत्रको प्रवेशबीचको आवागमनलाई पूर्णरुपमा निषेध गरिएको छ । पेसागत, उपचार वा अन्य अत्यावस्यक कारणले यात्रा गर्नुपर्नेले कारण खुलेको प्रमाणका साथ यात्रा गर्नुपर्ने छ । लकडाउन गरिएका क्षेत्रमा साँझ सात बजेदेखि कर्फ्यु घोषणा गरिएको छ ।

आउटडोर गतिविधिहरूलाई प्रमाणपत्र प्रस्तुत गर्ने सर्तमा छुट दिईने छ । यस्तो गतिबिधी आफ्नो ठेगानाबाट १० किमी भित्रै सीमित राख्नुपर्ने छ ।

युरोपीयन मेडिसिन एजेन्सीले अनुकूल राय दिएकाले एस्ट्राजेनेकाको खोप शुक्रबारबाट पुनः सुरू हुने पनि प्रधानमन्त्रीले उल्लेख गरेका छन् ।

यसैबीच युरोपभरी कोरोना भाइरसको तेस्रो लहर चलिरहेका बेला युरोपेली युनियन (ईयु) ले बेलायतमा कोरोना भाइरसको खोप निर्यातमा प्रतिबन्ध लगाउने चेतावनी दिएको छ । ब्रेक्जिट सम्झौतापछि बेलायत र ईयुबीचको सम्बन्धमा तिक्तता आइरेहेका बेला ईयुले बुधबार यस्तो चेतावनी दिएको हो ।

यसअघि ब्रेक्जिट सम्झौताको उल्लंघन गरेको भन्दै युरोपेली आयोगले बेलायतविरुद्ध दुई मुद्दा युरोपेली अदालतमा दर्ता गरेको थियो ।

आफ्नै नागरिकका लागि खोपको दुर्लभ मात्रा सुरक्षा गर्न भन्दै बेलायत निर्यातमा खोप रोक्का गर्ने चेतावनी दिएको जनाइएको छ । केही युरोपेली मिडियाहरुले बेलायत र युरोपेली युनियनबीच तिक्तका बढेकाले खोप निर्यात रोक्का गर्ने चेतावनी दिएको उल्लेख गरेका छन् ।

प्रकाशित : चैत्र ६, २०७७ ०७:१२
पूरा पढ्नुहोस्
प्रतिक्रिया
पठाउनुहोस्
×