दक्षिणपूर्वी अस्ट्रेलियामा भीषण बाढी- विश्व - कान्तिपुर समाचार
कान्तिपुर वेबसाईट
AdvertisementAdvertisement

दक्षिणपूर्वी अस्ट्रेलियामा भीषण बाढी

नारायण खड्का

अस्ट्रेलिया — लगातारको वर्षाका कारण आएको बाढीले अस्ट्रेलियाको दक्षिणपूर्वी राज्य न्यु साउथ वेल्सको जनजीवन अस्तव्यस्त बनाएको छ । बाढी प्रभावित क्षेत्रका बासिन्दाका लागि केन्द्रीय सरकारले राहत घोषणा गरेको छ । 

तस्बिर : रोयटर्स

बाढीका कारण अहिलेसम्म सयौं व्यक्तिको उद्धार गरिएको छ भने उत्तरी सिड्नीको नदीकिनारमा रहेको अधिकांश भाग जलमग्न बनेको छ । बाढीका कारण प्रभावित उक्त क्षेत्रका हजारौं बासिन्दा सरकारद्वारा स्थापना गरिएको आश्रयस्थलमा आश्रय लिन बाध्य छन् । बाढीबाट अति प्रभावित क्षेत्रका बासिन्दालाई सहयोग पुर्‍याउने उद्देश्यले प्रधानमन्त्री स्कट मरिसनले आइतबार सहयोग घोषणा गरेका हुन् ।

मरिसनले न्यु साउथ वेल्सका विभिन्न १८ वटा स्थानीय क्षेत्रमा बसोबास गर्ने वयस्क नागरिकलाई १ हजार डलर र बालबालिकालाई ४ सय डलर नगद दिने घोषणा गरेका छन् । यसैगरी बाढीका कारण ज्यान गुमाएकालाई १३ सातासम्मका लागि आर्थिक सहयोग दिइने घोषणा गरिएको छ । यद्यपि, बाढीका कारण कसैको मृत्यु भएको समाचार सार्वजनिक भएको छैन । बाढीका कारण ४ वटा ग्रामीण सहरका बासिन्दालाई घर छाडेर सुरक्षित स्थानमा सर्न आदेश दिइएको छ । अधिकारीहरूले बाढी प्रभावित सयौंको उद्धार गरिएको जनाएका छन् । शुक्रबारदेखि परेको पानीले न्यु साउथ वेल्सका पोर्ट म्याकवरी, टारी, केम्पसीलगायत क्षेत्र अत्यन्तै प्रभावित बनेका छन् । सिड्नीका केही स्थानमा अझै केही दिन भीषण वर्षा हुने जलवायु मापन केन्द्रलाई उद्धृत गर्दै स्थानीय सञ्चार माध्यमले जनाएका छन् ।

अत्यधिक वर्षाका कारण उत्तरी क्षेत्र जोड्ने मुख्य सडक प्यासिफिक हाइवेको केही भागका साथै अन्य केही प्रमुख सडक बन्द गरिएको समाचारमा जनाइएको छ । वर्षापछिको बाढीका कारण राज्यका विभिन्न क्षेत्रमा अलपत्र परेका सयौं स्थानीयलाई अस्थायी उद्धार केन्द्रमा सारिएको जनाइएको छ । राज्यको आपत्कालीन सेवाका अनुसार हालसम्म करिब ५ सय ५० जनालाई उद्धार गरिएको र करिब ४ हजारले सहयोगका लागि सम्पर्क गरेको जनाएको छ ।

न्यु साउथ वेल्स राज्यकी प्रिमियर ग्लाडिस बेरिजिक्लियनले वर्षा अझै केही दिनसम्म जारी रहने बताउँदै बाढी प्रभावित क्षेत्रका बासिन्दालाई घरबाहिर ननिस्कन र अधिकारीहरूको सुझाव पालना गर्न अनुरोध गरेकी छन् ।

यसैगरी आपत्कालीन सेवा प्रमुख कारलिन योर्कले समेत बाढी प्रभावित क्षेत्रका बासिन्दालाई आवश्यक पर्ने सामानको जोहो गरेर घरभित्रै रहन सुझाव दिएकी छन् । यस वर्ष मुख्य गरेर न्यु साउथ वेल्सको मध्यउत्तरी क्षेत्रमा आएको बाढी ५ दशकपछिकै ठूलो भएको स्थानीय समाचार संस्था एबीसीले उल्लेख गरेको छ ।

प्रकाशित : चैत्र ९, २०७७ ०८:१८
प्रतिक्रिया
पठाउनुहोस्

यौन दुर्व्यवहारको विरोधमा अस्ट्रेलियामा देशव्यापी प्रदर्शन

‘मार्च फर जस्टिस’ को अगुवाइमा ४० स्थानमा गरिएको प्रदर्शनमा हजारौं सहभागी
नारायण खड्का

अस्ट्रेलिया — यौन दुर्व्यवहार तथा लैंगिक हिंसा अन्त्यको माग गर्दै अस्ट्रेलियामा सोमबार हजारौंले देशव्यापी प्रदर्शन गरेका छन् । राजधानी क्यानबेराका साथै सबै मुख्य सहरमा गरिएको प्रदर्शनका सहभागीले महिलामाथि हुने यौन दुर्व्यवहार र उत्पीडनविरुद्ध स्वतन्त्र छानबिन गरिनुपर्ने माग गरेका छन् । 

अस्ट्रेलियाको क्यानबेरामा सोमबार गरिएको प्रदर्शनका सहभागी । तस्बिर : एजेन्सी


‘मार्च फर जस्टिस’ नामक संस्थाको अगुवाइमा भएको प्रदर्शनमा १ लाखभन्दा बढी महिला, पुरुष तथा बालबालिका सहभागी भएका स्थानीय सञ्चारमाध्यमले जनाएका छन् । करिब एक महिनाअघि संसद् भवनस्थित रक्षामन्त्री लिन्डा रेनल्डस्को कार्यालयमा काम गर्ने पूर्वकर्मचारी ब्रिटनी हिगन्सले सहकर्मीद्वारा बलात्कृत हुनुपरेको आरोप लगाएपछि यो मुद्दा अघि आएको हो । यसलगत्तै महान्यायाधिवक्ता क्रिस्टियन पोर्टरले करिब ३३ वर्षअघि एक महिलालाई बलात्कार गरेको आरोप लागेपछि यो समस्या अझ चर्किएको हो ।

पोर्टरमाथि लागेको आरोपका सम्बन्धमा स्वतन्त्र छानबिन हुनुपर्ने माग उठे पनि अहिलेसम्म यसबारे कुनै आधिकारिक निर्णय गरिएको छैन । सोमबार देशैभरि आयोजित प्रदर्शनमा सहभागी महिलाले उक्त मुद्दाका विषयमा स्वतन्त्र छानबिन हुनुपर्ने मागसमेत उठाएका छन् ।

यो संख्यामा पहिलो पटक आयोजना भएको दाबी गरिएको यस प्रदर्शनमा आयोजकले मुख्य ४ वटा माग अघि सारेका छन् । जसमा हरेक किसिमका लैंगिक हिंसाका बारेमा पूर्णरूपमा स्वतन्त्र छानबिन गरिनुपर्ने, अस्ट्रेलियास्थित मानव अधिकार आयोगद्वारा सुझाव दिइएका ५५ वटै सुझावलाई कार्यान्वयन गरिनुपर्ने, लैंगिक हिंसाको रोकथाम तथा अन्त्यका लागि सहयोग बढाउनुपर्ने र यससम्बन्धी अझ प्रभावकारी कानुन बनाउनुपर्ने माग गरिएको छ । प्रदर्शनको अगुवाइ गरिरहेकी संस्थाकी संस्थापक जेनिन हेन्ड्रीले हाम्रो समाजमा अहिले पनि संस्थागत असमानता कायमै रहेका कारण महिलामाथि यौनिक हिंसा हुने गरेको बताइन् । उनले केही सातापहिले मात्र स्थापना गरेको उक्त संस्थालाई अहिले करिब ४० हजारले फलो गरेका छन् । उनले आफूहरूले संस्थागत परिवर्तन नभएसम्म आवाज उठाइरहने बताएकी छन् ।

प्रदर्शन अस्ट्रेलियाका विभिन्न ४० स्थानमा आयोजना गरिएको स्थानीय समाचार संस्था एसबीएसले जनाएको छ । सिड्नी, क्यानबेरा, मेलबर्न, ब्रिसबनका साथै ग्रामीण भेगका सहरमा आयोजित प्रदर्शनमा समेत महिलाले उल्लेख्य रूपमा सहभागिता जनाएका थिए । आयोजकले प्रधानमन्त्री स्कट मरिसन र उपप्रधानमन्त्री माइकल मकोर्म्याकलाई समेत र्‍यालीमा सहभागिताका लागि अनुरोध गरेको भए पनि उनीहरूले व्यस्तताका कारण सहभागिता जनाउन नभ्याउने बताएका थिए ।

प्रधानमन्त्री मरिसनले कार्यक्रम आयोजकलाई महिलामन्त्री मरिस पेइनको सहभागितामा अलग्गै भेट्नका लागि प्रस्ताव गरेका भए पनि उक्त प्रस्तावलाई आयोजकले अस्वीकार गरेको थियो । प्रधानमन्त्री मरिसनले महिलामाथि हुने सबै प्रकारको हिंसाको अन्त्य गर्नु आफ्नो सरकारको उच्च प्राथमिकता रहेको दोहोर्‍याएका छन् । उनले सोमबार संसद्मा बोल्दै महिलाले आयोजना गरेको र्‍यालीको प्रशंसा गरेका थिए ।

राजधानी क्यानबेरामा आयोजित हजारौंको र्‍यालीलाई सम्बोधन गर्दै हिगिन्सले आफूहरू अन्य महिलामाथि हुने शारीरिक हिंसाको अन्त्यका लागि अघि आउन बाध्य भएको बताइन् । उनले आफूहरू यहाँ आउनु चाहना नभई बाध्यता भएको समेत बताएकी थिइन् । र्‍यालीमा सहभागी महिलाले शारीरिक हिंसाका विरुद्धमा सरकारको कदम प्रभावकारी नभएको बताएका थिए भने केही सहभागीले कालो पोसाक लगाएर विरोध जनाएका थिए । आयोजकले सोमबार आयोजना गरिएको

र्‍याली महिलाद्वारा आयोजित अहिलेसम्मकै ठूलो प्रदर्शन भएको हुन सक्ने दाबी गरेको बीबीसीले उल्लेख गरेको छ । आयोजकले प्रधानमन्त्री मरिसनलाई सम्बोधन गर्दै ९४ हजारद्वारा हस्ताक्षरित पेटिसन विपक्षी दलकी सांसद तान्या पिल्बरसेक र ग्रिन पार्टीकी सिनेटर लारिसा वाटरसले स्विकारेका थिए । उनीहरूले र्‍यालीमा सहभागितासमेत जनाएका थिए ।

प्रकाशित : चैत्र ३, २०७७ ०९:५७
पूरा पढ्नुहोस्
प्रतिक्रिया
पठाउनुहोस्
×