यौन दुर्व्यवहारको विरोधमा अस्ट्रेलियामा देशव्यापी प्रदर्शन- विश्व - कान्तिपुर समाचार
कान्तिपुर वेबसाईट
AdvertisementAdvertisement

यौन दुर्व्यवहारको विरोधमा अस्ट्रेलियामा देशव्यापी प्रदर्शन

‘मार्च फर जस्टिस’ को अगुवाइमा ४० स्थानमा गरिएको प्रदर्शनमा हजारौं सहभागी
नारायण खड्का

अस्ट्रेलिया — यौन दुर्व्यवहार तथा लैंगिक हिंसा अन्त्यको माग गर्दै अस्ट्रेलियामा सोमबार हजारौंले देशव्यापी प्रदर्शन गरेका छन् । राजधानी क्यानबेराका साथै सबै मुख्य सहरमा गरिएको प्रदर्शनका सहभागीले महिलामाथि हुने यौन दुर्व्यवहार र उत्पीडनविरुद्ध स्वतन्त्र छानबिन गरिनुपर्ने माग गरेका छन् । 

अस्ट्रेलियाको क्यानबेरामा सोमबार गरिएको प्रदर्शनका सहभागी । तस्बिर : एजेन्सी


‘मार्च फर जस्टिस’ नामक संस्थाको अगुवाइमा भएको प्रदर्शनमा १ लाखभन्दा बढी महिला, पुरुष तथा बालबालिका सहभागी भएका स्थानीय सञ्चारमाध्यमले जनाएका छन् । करिब एक महिनाअघि संसद् भवनस्थित रक्षामन्त्री लिन्डा रेनल्डस्को कार्यालयमा काम गर्ने पूर्वकर्मचारी ब्रिटनी हिगन्सले सहकर्मीद्वारा बलात्कृत हुनुपरेको आरोप लगाएपछि यो मुद्दा अघि आएको हो । यसलगत्तै महान्यायाधिवक्ता क्रिस्टियन पोर्टरले करिब ३३ वर्षअघि एक महिलालाई बलात्कार गरेको आरोप लागेपछि यो समस्या अझ चर्किएको हो ।

पोर्टरमाथि लागेको आरोपका सम्बन्धमा स्वतन्त्र छानबिन हुनुपर्ने माग उठे पनि अहिलेसम्म यसबारे कुनै आधिकारिक निर्णय गरिएको छैन । सोमबार देशैभरि आयोजित प्रदर्शनमा सहभागी महिलाले उक्त मुद्दाका विषयमा स्वतन्त्र छानबिन हुनुपर्ने मागसमेत उठाएका छन् ।

यो संख्यामा पहिलो पटक आयोजना भएको दाबी गरिएको यस प्रदर्शनमा आयोजकले मुख्य ४ वटा माग अघि सारेका छन् । जसमा हरेक किसिमका लैंगिक हिंसाका बारेमा पूर्णरूपमा स्वतन्त्र छानबिन गरिनुपर्ने, अस्ट्रेलियास्थित मानव अधिकार आयोगद्वारा सुझाव दिइएका ५५ वटै सुझावलाई कार्यान्वयन गरिनुपर्ने, लैंगिक हिंसाको रोकथाम तथा अन्त्यका लागि सहयोग बढाउनुपर्ने र यससम्बन्धी अझ प्रभावकारी कानुन बनाउनुपर्ने माग गरिएको छ । प्रदर्शनको अगुवाइ गरिरहेकी संस्थाकी संस्थापक जेनिन हेन्ड्रीले हाम्रो समाजमा अहिले पनि संस्थागत असमानता कायमै रहेका कारण महिलामाथि यौनिक हिंसा हुने गरेको बताइन् । उनले केही सातापहिले मात्र स्थापना गरेको उक्त संस्थालाई अहिले करिब ४० हजारले फलो गरेका छन् । उनले आफूहरूले संस्थागत परिवर्तन नभएसम्म आवाज उठाइरहने बताएकी छन् ।

प्रदर्शन अस्ट्रेलियाका विभिन्न ४० स्थानमा आयोजना गरिएको स्थानीय समाचार संस्था एसबीएसले जनाएको छ । सिड्नी, क्यानबेरा, मेलबर्न, ब्रिसबनका साथै ग्रामीण भेगका सहरमा आयोजित प्रदर्शनमा समेत महिलाले उल्लेख्य रूपमा सहभागिता जनाएका थिए । आयोजकले प्रधानमन्त्री स्कट मरिसन र उपप्रधानमन्त्री माइकल मकोर्म्याकलाई समेत र्‍यालीमा सहभागिताका लागि अनुरोध गरेको भए पनि उनीहरूले व्यस्तताका कारण सहभागिता जनाउन नभ्याउने बताएका थिए ।

प्रधानमन्त्री मरिसनले कार्यक्रम आयोजकलाई महिलामन्त्री मरिस पेइनको सहभागितामा अलग्गै भेट्नका लागि प्रस्ताव गरेका भए पनि उक्त प्रस्तावलाई आयोजकले अस्वीकार गरेको थियो । प्रधानमन्त्री मरिसनले महिलामाथि हुने सबै प्रकारको हिंसाको अन्त्य गर्नु आफ्नो सरकारको उच्च प्राथमिकता रहेको दोहोर्‍याएका छन् । उनले सोमबार संसद्मा बोल्दै महिलाले आयोजना गरेको र्‍यालीको प्रशंसा गरेका थिए ।

राजधानी क्यानबेरामा आयोजित हजारौंको र्‍यालीलाई सम्बोधन गर्दै हिगिन्सले आफूहरू अन्य महिलामाथि हुने शारीरिक हिंसाको अन्त्यका लागि अघि आउन बाध्य भएको बताइन् । उनले आफूहरू यहाँ आउनु चाहना नभई बाध्यता भएको समेत बताएकी थिइन् । र्‍यालीमा सहभागी महिलाले शारीरिक हिंसाका विरुद्धमा सरकारको कदम प्रभावकारी नभएको बताएका थिए भने केही सहभागीले कालो पोसाक लगाएर विरोध जनाएका थिए । आयोजकले सोमबार आयोजना गरिएको

र्‍याली महिलाद्वारा आयोजित अहिलेसम्मकै ठूलो प्रदर्शन भएको हुन सक्ने दाबी गरेको बीबीसीले उल्लेख गरेको छ । आयोजकले प्रधानमन्त्री मरिसनलाई सम्बोधन गर्दै ९४ हजारद्वारा हस्ताक्षरित पेटिसन विपक्षी दलकी सांसद तान्या पिल्बरसेक र ग्रिन पार्टीकी सिनेटर लारिसा वाटरसले स्विकारेका थिए । उनीहरूले र्‍यालीमा सहभागितासमेत जनाएका थिए ।

प्रकाशित : चैत्र ३, २०७७ ०९:५७
प्रतिक्रिया
पठाउनुहोस्

अस्ट्रेलियाका महान्यायाधिवक्ताद्वारा बलात्कार आरोप अस्वीकार

नारायण खड्का

अस्ट्रेलिया — अस्ट्रेलियाका महान्यायाधिवक्ता क्रिस्टियन पोर्टरले आफूमाथि लगाइएको बलात्कार आरोप अस्वीकार गरेका छन् । ५० वर्षीय पोर्टरले ३३ वर्षअघि आफूलाई बलात्कार गरेका एक महिलाले आरोप लगाएकी थिइन् । 



अस्ट्रेलियाको महान्यायाधिवक्ता केन्द्र सरकारको वरिष्ठ मन्त्री रहने व्यवस्था छ । पोर्टरले सन् १९८८ मा १६ वर्षकी युवतीलाई बलात्कार गरेका भन्दै एक पत्र गतसाता प्रधानमन्त्री स्कट मरिसनलाई पठाइएको थियो । पोर्टरले आरोपित व्यक्ति आफू भएको सार्वजनिक गर्दै प्रधानमन्त्रीसहित केही सांसदलाई पठाइएको पत्रको खण्डन गरेका हुन् ।

उक्त पत्र सञ्चारमाध्यमबाट सार्वजनिक भएपछि पोर्टरले बुधबार पत्रकार सम्मेलन गरेर आरोपको खण्डन गरेका हुन् । ती महिलाले भने करिब एक वर्षअघि नै आत्महत्या गरिसकेकी छन् । उनले केही समय पहिले न्यु साउथ वेल्स प्रहरीमा यसबारे उजुरी दिएकी सञ्चारमाध्यमले जनाएका छन् । तर उनको मृत्युपछि उक्त मुद्दाको छानबिन बन्द गरिएको थियो । बुधबार पश्चिम अस्ट्रेलियाको पर्थमा पत्रकार सम्मेलन गर्दै महान्याधिवक्ता पोर्टरले प्रहरीले घटनाको अनुसन्धान गरिरहेका कारण मिडियामा आउन उचित नठानेको बताए । बीबीसीका अनुसार न्यु साउथ वेल्स प्रहरीले आवश्यक प्रमाण नभएका कारण उक्त घटनाको छानबिन बन्द गरेको मंगलबार जनाएको थियो ।

पत्रकार सम्मेलनमा पोर्टरले ३३ वर्षअघि सिड्नीमा आयोजित वादविवाद प्रतियोगितामा आरोप लगाउने युवतीसँगै आफू गएको भए पनि त्यस्तो अनैतिक कार्य नगरेको बताएका हुन् । उनले आरोप लगाइएको घटना हुँदै नभएको र आफुले सार्वजनिक रूपमा भन्नै पर्ने आवश्यक्ता भएको जनाए । पत्रकार सम्मेलनमा उनले पटकपटक आफूले उक्त कार्य नगरेको बताएका थिए । त्यस क्रममा पोर्टरले त्यतिबेला ती युवतीलाई खुसी र बौद्धिक पाएको स्मरण गरे ।

पोर्टरले राजीनामा दिनुपर्ने माग कडा रूपमा उठेको भए पनि उनले त्यसबारे नसोचेको बताए । उनले आफूले गर्दै नगरेको घटनालाई लिएर पद छाडेको खण्डमा अस्ट्रेलियामा आफूले नगरेको कार्यमा समेत आफ्नो करियर गुमाउने डर हुने दाबी गरेका स्थानीय सञ्चारमाध्यमले जनाएका छन् । यद्यपि उनले आफ्नो मानसिक स्वास्थ्यका कारण दुई साताका लागि बिदा लिने जनाएका छन् । रक्षामन्त्री लिन्डा रेनल्डसको कार्यालयमा काम गर्ने ब्रिटनी हिगिन्सले करिब एक वर्षअघि आफूमाथि आफ्नै सहकर्मीद्वारा बलात्कार भएको आरोप लगाएको केही समयपछि सार्वजनिक भएको यस घटनाले अस्ट्रेलियाली राजनीतिलाई भने तताएको छ ।

प्रधानमन्त्री स्कट मरिसनले सोमबार आरोपित मन्त्रीले आरोप अस्वीकार गरेका र घटनाबारे प्रहरीले अनुसन्धान गरिरहको बताएका थिए । आरोपित महिलाका साथीहरूले भने यस घटनाको छानबिन हुनुपर्ने माग गरिरहेका छन् । सन् २०१७ मा महान्यायाधिवक्ता भएका पोर्टर अस्ट्रेलियाली राजनीतिमा निकै प्रभावशाली मानिन्छन् । कतिपयले उनलाई भावी प्रधानमन्त्रीका रूपमा समेत हेर्दै आएका छन् । तर यो घटनापछि भने उनको राजनीतिक भविष्यलाई केही क्षति पुग्ने आँकलन गरिएको छ ।

प्रकाशित : फाल्गुन २०, २०७७ ०८:३८
पूरा पढ्नुहोस्
प्रतिक्रिया
पठाउनुहोस्
×