भारत बायोटेकको कोरोना खोप '८१ प्रतिशत प्रभावकारी'- विश्व - कान्तिपुर समाचार

भारत बायोटेकको कोरोना खोप '८१ प्रतिशत प्रभावकारी'

कोभ्याक्सिन बेलायतमा देखिएको नयाँ कोरोनाविरूद्ध पनि काम गर्ने उत्पादक कम्पनीको दाबी 
सुरेशराज न्यौपाने

नयाँदिल्ली — भारत बायोटेकले कोभ्याक्सिन खोपको प्रभावकारिता ८१ प्रतिशत रहेको दाबी गरेको छ । बुधबार तेस्रो चरणको क्लिनिकल ट्रायल (मानव परीक्षण) को नतिजा सार्वजनिक गर्दै कम्पनीले त्यस्तो दाबी गरिएको हो ।

भारतको अहमदाबादमा बुधबार कोरोना भाइरविरुद्धको खोप लगाउँदै स्थानीय । भारत सरकारले सोमबारदेखि सुरु गरेको दोस्रो चरणको खोप अभियानमा ६० वर्षभन्दा बढी उमेरका र जटिल रोगबाट पीडित ४५ वर्षभन्दा माथिका नागरिकलाई खोप दिन थालिएको हो । तस्बिर : एपी


कम्पनीले कोभ्याक्सिन बेलायतमा देखिएको नयाँ प्रकारको कोरोना भाइरसविरुद्ध पनि प्रभावकारी हुनेसमेत दाबी गरेको छ ।

‘दोस्रो डोजपछि यसअघि संक्रमित नभएकाहरूमा पनि भाइरसको रोकथाममा कोभ्याक्सिनले ८१ प्रभावकारिता देखाएको छ,’ कम्पनीद्वारा बुधबार जारी विज्ञप्तिमा भनिएको छ । कम्पनीका अनुसार गत नोभेम्बर अन्त्यदेखि सुरु गरिएको परीक्षणमा २५ हजार ८ सयभन्दा बढी सहभागी भएका थिए । जसमा १८ देखि ९८ वर्ष उमेरका मानिस थिए । परीक्षण विभिन्न समूह बनाएर २५ वटा स्थानमा गरिएको जनाइएको छ । त्यसैगरी, ६० वर्षभन्दा माथिका २ हजार ४ सय ३३ जना र विभिन्न जटिल रोगका पीडित ४ हजार ५ सय ३३ जना परीक्षणमा सहभागी भएको समेत कम्पनीको विज्ञप्तिमा उल्लेख छ ।

त्यसैगरी कम्पनीले बेलायतमा देखिएको नयाँ किसिमको भाइरसका लागि पनि खोप प्रभावकारी देखिएको दाबी गरेको छ । ‘राष्ट्रिय संक्रमण रोग केन्द्रको विश्लेषणमा खोप लगाएपछि बनेका एन्टिबडीले बेलायतमा देखिएको र अन्य किसिमको भाइरसको असर कम गरेको संकेत गरेको छ,’ कम्पनीले भनेको छ ।

भारत बायोटेक भारतमा कोरोनाविरुद्धको खोपको प्रयोग गर्ने अनमुति पाउने दुई कम्पनीमध्ये एक हो । भारत सरकारले हालसम्म कोभिसिल्ड र कोभ्याक्सिन खोपलाई मात्र आपत्कालीन प्रयोगको अनुमति दिएको छ । कोभिसिल्ड अक्सफोर्ड विश्वविद्यालय र अस्ट्राजेनेकाले तथा कोभ्याक्सिन भने भारतकै भारत बायोटेक र भारतीय औषधि अनुसन्धान परिषद्को साझेदारीमा विकास गरिएको हो ।

कोभिसिल्डको उत्पादक पुनाको सिरम इन्स्टिच्युट अफ इन्डिया (एसआईआई) हो भने कोभ्याक्सिन भने हैदराबादको भारत बायोटेकले नै उत्पादन गरिरहेको छ । विश्वकै सबैभन्दा ठूलो खोप उत्पादक सेरमसँग मासिक १० करोड खोप उत्पादन गर्ने क्षमता छ भने बायोटेकले भने मासिक करिब ३ करोड खोप उत्पादन गर्न सक्ने बताइएको छ ।

भारत बायोटेकले तेस्रो चरणको मानव परीक्षण नटुंग्याएका कारण त्यसलाई सीमित प्रयोजनका लागि मात्र आपत्–कालीन प्रयोगको अनुमति दिइएको थियो । जसले आपत्कालीन अनुमति पाए पनि तेस्रो चरणको क्लिनिकल ट्रायलको डाटा पेस नगरेको भन्दै कोभ्याक्सिनको प्रभावकारितामाथि सुरुदेखि नै प्रश्न उठ्दै आएको थियो । कम्पनी र भारत सरकार भने त्यस किसिमको आशंकालाई अस्वीकार गर्दै आएका थिए । त्यही आशंका कारण नै ३ माघदेखि सुरु भएको खोप अभियानमा कोभ्याक्सिनको प्रयोग निकै न्यून रहेको छ । त्यसैगरी अन्य मुलुकले पनि कोभिसिल्डमै जोड दिँदै आएका थिए । जसले गर्दा भारतले अन्य मुलुकहरूलाई अनुदान दिँदासमेत सिरमद्वारा उत्पादित कोभिसिल्ड नै प्राथमिकतामा राख्दै आएको छ ।

भारतले नेपाललाई अनुदानमा दिएको १० लाख डोज खोप पनि सिरमद्वारा उत्पादित कोभिसिल्डकै हो । त्यसैगरी नेपाल सरकारले थप २० लाख डोज खोप पनि सिरमबाटै किन्ने निर्णय गरिसकेको छ ।

जब कि भारत सरकारले भने आमनागरिकमा स्वदेशमा विकास गरिएको कोभ्याक्सिनप्रति विश्वास जगाउन विभिन्न प्रयाससमेत गर्दै आएको छ । गत सोमबार प्रधानमन्त्री नरेन्द्र मोदी आफैंले कोभ्याक्सिन खोप लगाएका थिए । सोमबारदेखि दोस्रो चरणको खोप अभियानअन्तर्गत मोदी र अन्य मन्त्रीहरूले खोप लगाएका हुन् । भारतमा बुधबारसम्ममा १ करोड ११ लाख ३९ हजारभन्दा बढी कोरोना भाइरसबाट संक्रमित भएका छन् ।

त्यसमध्ये १ लाख ५७ हजार ३ सय ४६ को मृत्यु भएको छ । १ करोड ८ लाख १२ हजारभन्दा बढी निको भइसकेका छन् । भारतको स्वास्थ्य मन्त्रालयका अनुसार बुधबार मात्र १४ हजार ९ सय ८९ सयभन्दा बढी नयाँ संक्रमित थपिएका छन् । ९९ जनाको ज्यान गएको छ । त्यसैगरी बुधबारसम्ममा १ करोड ४८ लाख ५४ हजारभन्दा बढी भारतीयले खोप लगाएका छन् । भारत सरकारले आगामी जुलाई महिनासम्म २७ करोडलाई खोप लगाउने लक्ष्य राखेको छ ।

प्रकाशित : फाल्गुन २०, २०७७ ०८:५२
प्रतिक्रिया
पठाउनुहोस्

जापानी अर्बपतिले चन्द्रमामा ८ जना लैजाने

कान्तिपुर संवाददाता

टोकियो — जापानी अर्बपति युसाकु माएजावाले आफूसँग चन्द्रमाको यात्रा गर्नका लागि विश्वभरबाट ८ जना सर्वसाधारणलाई आमन्त्रण गरेका छन् । युसाकुले एलन मस्कको ‘स्पेसएक्स’ रकेटबाट सन् २०२३ मा चन्द्रमाको यात्रा गर्दै छन् । 

युसाकु माएजावा

‘मैले यो यात्रामा विभिन्न पृष्ठभूमिका मानिस जोडिऊन् भन्ने चाहन्छु,’ उनले ट्वीटरमा एक भिडियो सार्वजनिक गर्दै भनेका छन् । त्यसमा उनले आवेदन दिनका लागि भर्नुपर्ने विवरणसहितको लिंकसमेत राखेका छन् । युसाकुले यात्राका लागि लाग्ने खर्च आफैंले व्यहोर्ने र अन्य सहभागीले निःशुल्क रूपमा यात्रा गर्न पाउने पनि जनाएका छन् ।

‘डियरमुन’ नामक अन्तरिक्ष मिसनमा भाग लिनका लागि आवेदकले दुइटा मापदण्ड पूरा गर्नुपर्ने उल्लेख गरिएको छ । युसाकुले यात्रा गर्न चाहने व्यक्ति ‘जुनसुकै क्रियाकलापमा संलग्न रहेका भए पनि उनीहरूले अन्य मानिस र बृहत् समाजलाई कुनै न कुनै रूपमा सहयोग गर्नुपर्ने’ जनाएका छन् ।

त्यसका साथै ‘त्यस्तै धारणा राख्ने यात्राका अन्य सदस्यहरूलाई सहयोग गर्न ती व्यक्ति इच्छुक हुनुपर्ने’ जनाइएको छ । ‘मैले सबै सिटहरू किनिसकेको छु, त्यसैले यो निजी यात्रा हुनेछ,’ उनले भनेका छन् । युसाकु फेसन क्षेत्रका धनाढ्य हुन् । सन् १९७५ मा जन्मेका युसाकुले २३ वर्षको उमेरमा अनलाइन फेसन वेभसाइट ‘जोजोटाउन’ बाट व्यावसायिक यात्रा सुरु गरेको हुन् । फोर्ब्सका अनुसार जापानका २२ औं धनी युसाकुसँग २ अर्ब अमेरिकी डलरबराबरको सम्पत्ति छ । युसाकुले यात्राका लागि यसअघि आफूले ‘कलाकारहरू’ लाई आमन्त्रण गर्न चाहेको बताएका थिए । तर अब भने ‘यात्रामा समावेश हुन विश्वभरका मानिसलाई मौका दिने’ उनले बताए ।

‘यदि तपाईंले आफूलाई कलाकारका रूपमा हेर्नुहुन्छ भने तपाईं एक कलाकार नै हो,’ युसाकुले भने । उनले गत वर्ष ‘डियरमुन’ यात्रामा आफूसँग समावेश हुनका लागि नयाँ केटीसाथीको पनि खोजी गरेका थिए । तर केही मिश्रित प्रक्रियापछि उनले त्यो योजना रद्द गरेको जनाएका थिए । एलन मस्कको स्वामित्वको कम्पनी स्पेसएक्सले सन् २०१८ मा चन्द्रमाको परिक्रमा गरिने यात्रामा लैजानका लागि पहिलो यात्रुका रूपमा युसाकुलाई छानेको थियो ।

अन्तरिक्षमा जानका लागि उनले कति रकम तिरे भन्नेबारे भने हालसम्म केही उल्लेख गरिएको छैन । तर उक्त यात्राका लागि युसाकुले ‘धेरै ठूलो रकम’ तिरेका मस्कले बताएका छन् । सन् २०२३ का लागि तय गरिएको डियरमुन मिसन सन् १९७२ पछिको मानवसहितको पहिलो चन्द्रमा यात्रा हुनेछ ।

प्रकाशित : फाल्गुन २०, २०७७ ०८:५०
पूरा पढ्नुहोस्
प्रतिक्रिया
पठाउनुहोस्
×