म्यान्मारमा मारिए १० जना प्रदर्शनकारी- विश्व - कान्तिपुर समाचार

म्यान्मारमा मारिए १० जना प्रदर्शनकारी

(एजेन्सी)

यांगुन — म्यान्मारमा सैनिक सरकारको विरोधमा बुधबार गरिएको प्रदर्शनमा सुरक्षाकर्मीले गोली चलाउँदा कम्तीमा १० जना मारिएका छन् । प्रत्यक्षदर्शी तथा मानवअधिकारकर्मीहरूले १० जनाको मृत्यु भएको पुष्टि गर्दै मृतकहरूको संख्या बढ्न सक्ने जनाएका छन् ।

सैनिक ‘कु’ को विरोधमा म्यान्मारमा दंगा भड्किएपछि स्थिति नियन्त्रणमा लिने प्रयासमा अश्रुग्यास प्रहार गर्दै प्रहरी : तस्बिर : रोयटर्स

म्यान्मारमा फेबु्रअरी १ को सैनिक ‘कु’ विरुद्ध हजारौं लोकतन्त्र पक्षधरहरूले दिनहुँ प्रदर्शन गर्दै आएका छन् । उनीहरूले लोतन्त्रवादी नेतृ आङ सान सुची, राष्ट्रपति विन मिन्टलगायत नेसनल लिग फर डेमोक्रेसी (एनएलडी) का नेताहरुको रिहाइ र जननिर्वाचित सरकारको पुन:स्थापनाको माग गर्दै आएका छन् ।

प्रदर्शनका क्रममा भएका प्रहरीको दमनका कारण हालसम्म ज्यान गुमाउनेको संख्या कम्तीमा ३२ पुगेको छ । गत आइतबार गरिएका प्रदर्शनमा प्रहरीले गोली चलाउँदा १८ जनाको मृत्यु भएको थियो । संयुक्त राष्ट्रसंघीय मानवअधिकार कार्यालयका अनुसार कम्तीमा ३० जना घाइते भएका थिए ।

अस्पताल स्रोतका अनुसार सुरक्षाकर्मीको गोली लागेर ४ जनाको मृत्यु भएको हो । दोस्रो ठूलो सहर म्यान्डलेमा दुई जनाको मृत्यु भएको अस्पताल स्रोतलाई उल्लेख गर्दै एएफपीले जनाएको छ । एक चिकित्सकले नाम नबताउने सर्तमा म्यान्डलेमा मारिएका एक व्यक्तिको टाउकामा गोली लागेको बताएका छन् ।

मियांगयान सहरको प्रदर्शन पनि निकै हिंसात्मक बनेको जनाइएको छ । ती चिकित्सकका अनुसार सुरक्षाकर्मीले अश्रुग्यास, रबरको गोली प्रहार गरेका थिए । उक्त घटनामा कम्तीमा १० जना घाइते भएका छन् । सबैभन्दा ठूलो सहर यांगुनमा पनि बुधबार प्रदर्शनहरु भएका छन् । विभिन्न सहरमा सुरक्षाफौजले पत्रकारहरु र नागरिक समाजका अगुवालाई धरपकड गरेको जनाइएको छ ।

प्रदर्शन हिंसात्मक बन्दै गएपछि म्यान्मारमाथि अन्तर्राष्ट्रिय दबाब पनि बढ्दो छ । बेलायतले राष्ट्रसंघ सुरक्षा परिषद्को बैठक पनि डाकेको छ । अमेरिका, बेलायत, क्यानाडा, संयुक्त राष्ट्रसंघ, युरोपेली संघलगायतले सेनालाई जननिर्वाचित सरकार बहाली गर्न तथा पक्राउ लोकतन्त्र पक्षधर नेताहरूलाई रिहा गर्न दबाब दिँदै आएका छन् । अमेरिका, बेलायत, क्यानाडालगायत कतिपय पश्चिमा देशहरूल सैनिक नेतृत्वमाथि प्रतिबन्धहरू घोषणा गरिसकेका छन् ।

सैनिक ‘कु’ सँगै सैनिक नियन्त्रणमा राखिएकी नेतृ सुचीलाई हालसम्म विभिन्न चारवटा अभियोग लगाइएको छ । अन्तर्राष्ट्रिय सञ्चारमाध्यमका अनुसार उनीविरुद्ध सोमबार सुचीविरुद्ध ‘त्रास वा खतरापूर्ण संकेत’ उत्पन्न हुन सक्ने सूचना प्रकाशन रोक्नेसम्बन्धी कानुन र दूरसञ्चारसम्बन्धी कानुनअन्तर्गत मुद्दा दायर गरिएको थियो ।

त्यसअघि सुचीलाई गैरकानुनी रूपमा वाकीटकी राखेको र प्राकृतिक विपद्सम्बन्धी कानुन उल्लंघन गरेको आरोप लगाइएको थियो । ७५ वर्षीया सुचीलाई मार्च १५ मा अदालत पेस गरिने जनाइएको छ ।

सत्ताकब्जा गरेका सेना प्रमुख ह्लाइङले फरक मत राख्नेहरूप्रति सुरक्षाकर्मीले लोकतान्त्रिक व्यवहार गरिरहेको दाबी गर्दै आएका छन् । त्यस्तै सरकारले न्यून संख्यामा सुरक्षाफौज परिचालन गरेको उनको भनाइ छ । ह्लाइङले ‘संविधानअनुसार नै शासनसत्ता नियन्त्रणमा लिइएको’ दाबी गर्दै ‘देशलाई एक वर्षभित्र सही मार्गमा लैजाने’ बताउँदै आएका छन् ।

नोभेम्बरमा भएको चुनावमा व्यापक धाँधली गरिएको र सरकारले आर्थिक हिनामिना गरेको आरोप लगाउँदै सेनाले सत्ता हातमा लिएको हो । उक्त चुनावमा सुचीको दल एनएलडी करिब ८० प्रतिशत मतसहित विजयी भएको थियो ।

यसैबीच, म्यान्मारका विदेशमन्त्री यु वाना मुङ एलविन दक्षिण पूर्वी एसियाली देशहरूको संगठन (आसिएन) का विदेशमन्त्रीहरूको एक भर्चुअल बैठकमा सहभागी भएका छन् । उनी मंगलबार उक्त बैठकमा सहभागी भएका जनाइएको छ । उनी सैनिक सरकारद्वारा हालै विदेशमन्त्रीमा नियुक्त भएका हुन् । म्यान्मारको सरकारी सञ्चारमाध्यमका अनुसार भर्चुअल बैठकमा आसिएनका सबैजसो विदेशमन्त्रीहरूले म्यान्मारलाई शान्ति र रचनात्मक कार्यका लागि सहयोग गर्ने वाचा गरेका थिए ।

प्रकाशित : फाल्गुन १९, २०७७ २१:४६
प्रतिक्रिया
पठाउनुहोस्

जिपको ठक्करबाट छात्राको मृत्यु

नियतवश सवारी ‘ब्याक’ गरेर मारेको मृतकका आफन्तको आरोप, चालकलाई ज्यान मार्ने उद्योगमा मुद्दा चलाउन माग गर्दै शिक्षक–विद्यार्थीद्वारा प्रदर्शन
प्रशान्त माली

ललितपुर — क्याम्पस जाने क्रममा जिप (सुमो) ले ठक्कर दिँदा १९ वर्षीया एक छात्राको मृत्यु भएको छ । बुधबार बिहान साढे ५ बजेतिर खोटाङ जाने यात्रु लिन बल्खुबाट एकान्तकुना आउँदै गरेको स१ज ५६७ नम्बरको जिपले कोटेश्वर बहुमुखी क्याम्पसमा स्नातक तह पहिलो वर्षमा पढ्ने सिन्धुपाल्चोककी अञ्जु दाहाललाई नख्खु, बागडोलमा ठक्कर दिएको थियो ।

दुर्घटनापछि अञ्जुलाई पाटन अस्पताल पुर्‍याइए पनि चिकित्सकले मृत घोषणा गरेका थिए । ‘जिपको पछाडिको चक्काले छोरीको टाउकोमा किचेको स्पष्ट देखिन्छ । यसबाट नियतवश गाडी ब्याक गरेर मारेको पुष्टि हुन्छ,’ अञ्जुका काका केशर दाहालले भने । उनले चालकलाई ज्यान मार्ने उद्योगमा मुद्दा चलाउन माग गरे ।

घटनापछि दोषीलाई कारबाहीको माग गर्दै क्याम्पसका विद्यार्थी र शिक्षकले जावलाखेलमा विरोध प्रदर्शन गरेका थिए । यातायात व्यवसायी, शिक्षक र मृतकका आफन्तबीच महानगरीय प्रहरी परिसर जावलाखेलमा वार्ता भए पनि निष्कर्ष निस्किएन । घटनाका दोषीलाई सामान्य कारबाही र क्षतिपूर्ति दिएर उम्काउन खोजिएकाले उक्त कुरा आफूहरूलाई मान्य नहुने क्याम्पस प्रमुख गोविन्दबहादुर कार्कीले बताए । ‘दोषीमाथि कडा कारबाही र मृतकका आफन्तलाई उचित क्षतिपूर्ति नदिएसम्म आन्दोलन जारी रहन्छ,’ उनले भने, ‘प्रहरीले पनि सत्यतथ्यलाई बंग्याउन कोसिस नगरोस् ।’

प्रहरीले जिप चालक खोटाङ घर भई चाबहिल बस्ने प्रविन गिरीलाई पक्राउ गरी ललितपुर जिल्ला अदालतबाट ५ दिनको म्याद थपेर अनुसन्धान थालेको जनाएको छ । परिसर प्रवक्ता प्रज्वल महर्जनले घटनाको सूक्ष्म अध्ययन गरी दोषीमाथि कानुनबमोजिम कारबाही गर्ने प्रतिबद्धता जनाए । ‘प्रत्यक्षदर्शी यात्रुको बयान लिने क्रममा छौं,’ उनले भने । मृतक अञ्जुका आमाबुबा छैनन् । उनी बागडोलस्थित होस्टलमा बस्दै आइरहेकी थिइन् ।

प्रकाशित : फाल्गुन १९, २०७७ २१:३०
पूरा पढ्नुहोस्
प्रतिक्रिया
पठाउनुहोस्
×