४७ अधिकारकर्मीलाई अदालत पेस गरियो

५५ जना अधिकारकर्मीमध्ये ४७ जनालाई हङकङमा गतवर्ष पारित गरिएको विवादास्पद राष्ट्रिय सुरक्षा कानुनअन्तर्गत आइतबार मुद्दा लगाइएको थियो । मुद्दा चलाइएसँगै प्रहरीले उनीहरूलाई आत्मसमर्पण गरी थुनामा बस्न भनेको थियो ।

अधिकारकमीहरूलाई अदालतमा पेस गर्ने क्रममा समर्थकहरूको ठूलो उपस्थिति रहेको थियो । त्यस क्रममा केहीले ‘हङकङलाई स्वतन्त्र बनाउ, स्वतन्त्रताका पक्षमा लडौं र हामी हङकङको पक्षमा उभिन्छौं,’ लगायतका नारा लगाएका थिए । उक्त भीड नियन्त्रणका लागि ठूलो संख्यामा सुरक्षाकर्मी परिचालन गरिएको बीबीसीले जनाएको छ ।

हङकङ सरकारले सन् २०२० को संसदीय चुनावमा विपक्षी दलका उम्मेदवार छान्न अनधिकृत रूपमा प्रारम्भिक चुनाव गरेको आरोपमा ४७ ती अधिकारकर्मीविरुद्ध मुद्दा चलाएको हो । उक्त चुनाव हङकङमा सत्ता हत्याउने कोसिस भएको चीन र हङकङका अधिकारीको दाबी छ

मुद्दा चलाइएकाहरूमा २३ देखि ६४ वर्ष उमेर समूहका ३९ पुरुष र ८ जना महिला रहेका प्रहरीले जनाएको छ । चीनले गत वर्ष हङकङमा स्थायित्वका लागि आवश्यक भएको भन्दै राष्ट्रिय सुरक्षा कानुन ल्याएको थियो । तर आलोचकहरूले उक्त कानुनले फरक मत राख्ने अधिकार तथा हङकङको स्वतन्त्रतामाथि बन्देज लगाएको बताउँदै आएका छन् ।