दक्षिण कोरियामा आजदेखि खोप अभियान- विश्व - कान्तिपुर समाचार
कान्तिपुर वेबसाईट
AdvertisementAdvertisement

दक्षिण कोरियामा आजदेखि खोप अभियान

गोकुल थोकर

दक्षिण कोरिया — दक्षिण कोरियाले शुक्रबारदेखि कोभिड–१९ विरुद्धको खोप अभियान सुरु गर्ने भएको छ । पहिलो चरणअन्तर्गत १० लाख मात्रा खोप दिइन लागिएको कोरियाली रोग नियन्त्रण तथा रोगथाम केन्द्र (केसीडीसी) ले जनाएको छ । 

दक्षिण कोरियाली राष्ट्रपति मून जेई इन कोरोना खोप अभियानको तयारी निरीक्षण गर्दै तस्बिर : रोयटर्स

चार दिनसम्म चल्ने यो अभियानमा देशैभरका ६५ वर्षभन्दा कम उमेर समूहका २ लाख ८९ हजार स्वास्थ्यकर्मी र कोभिड–१९ संक्रमित सामेल हुनेछन् । यसका लागि १९ सयभन्दा बढी खोप केन्द्र तोकिएको छ ।

स्थानीय कम्पनी एसके बायोसाइन्सले अस्ट्राजेनेकासँगको सहकार्यमा कोरियामै उत्पादन गरिरहेको खोप नै प्रयोगमा ल्याउन लागिएको हो । सरकारले फाइजर कम्पनीसँग किनेको खोप पनि बिहीबार नै कोरिया आइपुगेको छ ।

सरकारले हालसम्म विभिन्न कम्पनीसँग गरी १० करोडभन्दा बढी मात्रा खोप किन्ने सहमति गरेको जनाएको छ । कोभिड–१९ विरुद्धको खोप ओसारपसारका लागि विशेष खालको फ्रिज बनाइएको केसीडीसीले जनाएको छ । फ्रिजमा ३–८ डिग्री सेल्सियस तापक्रम कायम रहनेछ । तर जेजु टापुमा लैजाने खोप भण्डारण गर्दा यसभन्दा बढी तापक्रम रहेको पाइएपछि त्यसलाई प्रयोग नगर्न भनिएको स्वास्थ्य मन्त्रालयले जनाएको छ ।

खोप अभियानमा सरकारी र निजी दुवै स्वास्थ्यकर्मी प्रयोग हुनेछन् । यो अभियान यसअघिका खोप कार्यक्रमजस्तै रहेकोले खासै अप्ठ्यारो नहुने स्वास्थ्यकर्मीहरूले जनाएको छन् । सन् २०२१ भरि नै यो अभियान सञ्चालन हुने केसीडीसीको भनाइ छ । हाल प्राथमिकतामा रहेकालाई खोप लगाइने भए पनि आगामी सेप्टेम्बरदेखि सबै जनतालाई खोप लगाउने कोरियाको योजना छ । दोस्रो चरणमा ६५ वर्षभन्दा माथिका वृद्धवद्धालाई खोप लगाइने भएको छ । स्वास्थ्य केन्द्रसम्म आउन नसक्नेहरूलाई घरमै खोप लगाउने टोली पठाउने गरी तयारी गरिएको छ ।

तीन नेपालीलाई कोरोना

ह्वासाङ क्षेत्रको एक प्लास्टिक कम्पनीमा कार्यरत ३ नेपालीलाई बिहीबार कोरोना संक्रमण पुष्टि भएको छ । कम्पनीका ३४ कामदार एकैपटक संक्रमित भएकामा नेपालीहरू पनि परेका हुन् ।

उक्त कम्पनी हाललाई बन्द गरिएको नजिकै कार्यरत एडिन छन्त्यालले बताए । ‘तीनै जना नेपाली अहिले अस्पतालमा हुनुहुन्छ,’ उनले भने । ४० भन्दा बढी कामदार रहेको कम्पनीमा ‘पार्ट टाइम’ काम गर्न आउने कामदारबाट कोरोना संक्रमण फैलिएको आशंका गरिएको छ ।

प्रकाशित : फाल्गुन १४, २०७७ १२:०४
प्रतिक्रिया
पठाउनुहोस्

कोरियाली फिल्ममा जम्दै गम्भीर

गोकुल थोकर

सोल — विदेशी श्रमिकले कोरियामा भोग्ने भेदभावलाई विषय बनाएको फिल्म ‘सारासेनवी खाल’ (सारासेनको तरबार) कोरियामा प्रदर्शन भएको छ । इमछे यङको निर्देशनमा तयार फिल्ममा मुख्य भूमिकामा छन् नेपाली युवक गम्भीरमान श्रेष्ठ । उनी केही समयदेखि कोरियाली फिल्महरूमा अभिनय गर्दै आएका छन् ।

‘यो फिल्म विदेशी कामदारले कोरियामा भोग्ने भेदभावका बारेमा हो । कोरियाले आर्थिक विकास गरेसँगै विदेशी कामदार आउन थालेको सन् १९९० देखि अहिलेसम्मकै जीवनशैली हेर्न सकिन्छ,’ श्रेष्ठले भने, ‘विदेशी कामदारहरूले कोरियालाई पुर्‍याएको सकारात्मक पक्ष फिल्मले समेटेको छ ।’

फिल्ममा सारासेनको तरबारले बन्दुकलाई पनि जित्न सक्ने रूपमा चित्रण गरिएको छ । त्यही तरबारको काम कोरियामा रहेर काम गर्ने विदेशी कामदारले गर्छ भन्ने सन्देश चलचित्रमा छ । ‘फिल्ममा देखाइएको सारासेन तरबारका रूपमा खुकुरीलाई प्रयोग गरिएको छ । मैले डाइरेक्टरलाई सुझाव दिएको थिएँ । हाम्रो खुकुरी साइजमा सानो भए पनि वीरताको प्रतीकका रूपमा चिनिन्छ, त्यसैले खुकुरी नै प्रयोग गरौं,’ फिल्म निर्माणका बेलाको प्रसंग श्रेष्ठले सुनाए, ‘सुझाव उनले माने । त्यसैले फिल्ममा खुकुरी हेर्न पाइन्छ ।’

श्रेष्ठ सन् २०१० देखि कोरियाली सिने क्षेत्रमा छन् । उनले कोरियामा सफल मानिएमध्येका सिसानारा (२०११), हिमालय (२०१५) र आसुरा (२०१७) लगायत फिल्ममा अभिनय गरेका छन् । फान्गाफान्गा (२०१०), बनाना सेक (२०११) र नाइन (टेलिफिल्म) लगायत कलात्मक फिल्ममा पनि अभिनय गरेका छन् । ‘यहाँ काम गर्न सजिलो छ । सबै आआफ्ना काममा व्यावसायिक छन् । सानो–ठूलो जस्तो रोल भए पनि कामको सम्मान छ,’ उनी भन्छन्, ‘ठूला बजेटको फिल्ममा डाइरेक्टर, कलाकार, प्राविधिक सबै विश्वभरि नै नाम चलेकाहरू हुन्छन् । उनीहरू समयको महत्त्व बुझेका हुन्छन् जस्तो लाग्छ । सबै कामको समयतालिका छ । त्यही समयमा काम सकिन्छ ।’ केही समययता कोरोनाका कारण भने फिल्मका कामलाई असर परेको उनले सुनाए । ‘केही काम रोकिएका छन् । मैले २०१९ र २० मा काम गरेका तीनवटा फिल्म प्रदर्शन भएका छैनन् । समय अनुकूल भएपछि रिलिज होलान्,’ उनले भने ।

विश्व बजारमा कोरियाली फिल्मको आफ्नै स्थान छ । सन् २०१९ को अस्कर जितेपछि कोरियाली फिल्मको बजार बढेको छ । त्यसबेला कोरियाकै कथामा बनेको डार्क कमेडी फिल्म गिसेजुङ (प्यारासाइड) ले चारवटा अस्कर अवार्ड जितेको थियो । ‘यहाँको फिल्म उद्योगसँग लगानी प्रशस्त छ । फरक– फरक खालका कथा छन् । फिल्म बनाउनका लागि लोकेसन नयाँ नयाँ हेरिरहेका हुन्छन्,’ उनले भने ।

प्रकाशित : माघ ११, २०७७ ०७:५२
पूरा पढ्नुहोस्
प्रतिक्रिया
पठाउनुहोस्
×