दक्षिण कोरियामा आजदेखि खोप अभियान- विश्व - कान्तिपुर समाचार
कान्तिपुर वेबसाईट
AdvertisementAdvertisement

दक्षिण कोरियामा आजदेखि खोप अभियान

गोकुल थोकर

दक्षिण कोरिया — दक्षिण कोरियाले शुक्रबारदेखि कोभिड–१९ विरुद्धको खोप अभियान सुरु गर्ने भएको छ । पहिलो चरणअन्तर्गत १० लाख मात्रा खोप दिइन लागिएको कोरियाली रोग नियन्त्रण तथा रोगथाम केन्द्र (केसीडीसी) ले जनाएको छ । 

दक्षिण कोरियाली राष्ट्रपति मून जेई इन कोरोना खोप अभियानको तयारी निरीक्षण गर्दै तस्बिर : रोयटर्स

चार दिनसम्म चल्ने यो अभियानमा देशैभरका ६५ वर्षभन्दा कम उमेर समूहका २ लाख ८९ हजार स्वास्थ्यकर्मी र कोभिड–१९ संक्रमित सामेल हुनेछन् । यसका लागि १९ सयभन्दा बढी खोप केन्द्र तोकिएको छ ।

स्थानीय कम्पनी एसके बायोसाइन्सले अस्ट्राजेनेकासँगको सहकार्यमा कोरियामै उत्पादन गरिरहेको खोप नै प्रयोगमा ल्याउन लागिएको हो । सरकारले फाइजर कम्पनीसँग किनेको खोप पनि बिहीबार नै कोरिया आइपुगेको छ ।

सरकारले हालसम्म विभिन्न कम्पनीसँग गरी १० करोडभन्दा बढी मात्रा खोप किन्ने सहमति गरेको जनाएको छ । कोभिड–१९ विरुद्धको खोप ओसारपसारका लागि विशेष खालको फ्रिज बनाइएको केसीडीसीले जनाएको छ । फ्रिजमा ३–८ डिग्री सेल्सियस तापक्रम कायम रहनेछ । तर जेजु टापुमा लैजाने खोप भण्डारण गर्दा यसभन्दा बढी तापक्रम रहेको पाइएपछि त्यसलाई प्रयोग नगर्न भनिएको स्वास्थ्य मन्त्रालयले जनाएको छ ।

खोप अभियानमा सरकारी र निजी दुवै स्वास्थ्यकर्मी प्रयोग हुनेछन् । यो अभियान यसअघिका खोप कार्यक्रमजस्तै रहेकोले खासै अप्ठ्यारो नहुने स्वास्थ्यकर्मीहरूले जनाएको छन् । सन् २०२१ भरि नै यो अभियान सञ्चालन हुने केसीडीसीको भनाइ छ । हाल प्राथमिकतामा रहेकालाई खोप लगाइने भए पनि आगामी सेप्टेम्बरदेखि सबै जनतालाई खोप लगाउने कोरियाको योजना छ । दोस्रो चरणमा ६५ वर्षभन्दा माथिका वृद्धवद्धालाई खोप लगाइने भएको छ । स्वास्थ्य केन्द्रसम्म आउन नसक्नेहरूलाई घरमै खोप लगाउने टोली पठाउने गरी तयारी गरिएको छ ।

तीन नेपालीलाई कोरोना

ह्वासाङ क्षेत्रको एक प्लास्टिक कम्पनीमा कार्यरत ३ नेपालीलाई बिहीबार कोरोना संक्रमण पुष्टि भएको छ । कम्पनीका ३४ कामदार एकैपटक संक्रमित भएकामा नेपालीहरू पनि परेका हुन् ।

उक्त कम्पनी हाललाई बन्द गरिएको नजिकै कार्यरत एडिन छन्त्यालले बताए । ‘तीनै जना नेपाली अहिले अस्पतालमा हुनुहुन्छ,’ उनले भने । ४० भन्दा बढी कामदार रहेको कम्पनीमा ‘पार्ट टाइम’ काम गर्न आउने कामदारबाट कोरोना संक्रमण फैलिएको आशंका गरिएको छ ।

प्रकाशित : फाल्गुन १४, २०७७ १२:०४
प्रतिक्रिया
पठाउनुहोस्

काठमाडौंको तारकेश्‍वरमा फेरि देखियो बर्ड फ्लु

इकान्तिपुर डेस्क

काठमाडौँ — काठमाडौंको तारकेश्वर नगरपालिका वडा नम्बर १ मा  फेरि बर्ड फ्लु देखिएको छ । पशु सेवा विभागका अनुसार स्थानीय किसानले पालेका कुखुरामा बर्ड फ्लु रोग (एच५एन८) पुष्टि भएको छ । 

फाइल तस्बिर : रोयटर्स

एक महिनादेखि काठमाडौंको तारकेश्वर नगरपालिका र सुर्खेतको वीरेन्द्रनगर नगरपालिका क्षत्रेमा बर्ड फ्लु भेटिँदै आएको छ । तारकेश्वर नगरपालिका वडा नम्बर १ मा पालिएका कुखुराको नमुना केन्द्रीय पशुपन्छी रोग अन्वेषण प्रयोगशालामा आरटी पीसीआर विधिबाट परीक्षण गर्दा बुधबार बर्ड फ्लु पुष्टि भएको विभागकी महानिर्देशक डा. दमयन्ती श्रेष्ठले जानकारी दिइन् ।

रोग पुष्टि भएको क्षेत्रबाट रोग अन्यत्र फैलन नदिई तत्काल नियन्त्रणमा लिन संघ, प्रदेश तथा स्थानीय तहका पशु सेवासँग सम्बन्धित निकायहरूलाई परिचालन गरी रोग देखिएको क्षेत्रमा रहेका सम्पूर्ण घरपालुवा पन्छी तथा रोग सार्न सक्ने अन्य वस्तु समेत नष्ट गरिसकिएको विभागले जानकारी दिएको छ ।

विभागका अनुसार ५६५७ लेयर्स कुखुरा, ७२३६ ब्रोइलर कुखुरा, २५०४ लोकल कुखुरा, ५० टर्की १७ बट्टाई ३५७० अण्डा र ३००० केजी दाना नष्ट गरी सुरक्षित तबरले तह लगाइसकिएको छ। साथै रोग देखा परेको क्षेत्रलाई पूर्ण निःसंकमण समेत गरिसकिएको पनि महानिर्देशक श्रेष्ठले बताइन् ।

यसअघि तारकेश्वरमा माघ दोस्रो र अन्तिम सातामा बर्ड फ्लु देखिएको थियो ।

विभागले फार्म परिसरमा जैविक सुरक्षाका विधिहरू अवलम्बन गर्न पनि आग्रह गरेको छ । त्यस्तै सम्पूर्ण पन्छीपालक कृषकलाई फार्म परिसरमा नियमित रूपमा निःसंक्रमण गर्न तथा व्यक्तिगत सरसफाइमा विशेष ध्यान दिन पनि विभागले आग्रह गरेको छ ।

प्रकाशित : फाल्गुन १४, २०७७ ११:५९
पूरा पढ्नुहोस्
प्रतिक्रिया
पठाउनुहोस्
×