नाइजेरियामा विमान दुर्घटनामा ७ को मृत्यु- विश्व - कान्तिपुर समाचार
कान्तिपुर वेबसाईट
AdvertisementAdvertisement

नाइजेरियामा विमान दुर्घटनामा ७ को मृत्यु

(एजेन्सी)

अबुजा — नाइजेरियाको राजधानी अबुजामा आइतबार भएको विमान दुर्घटनामा ७ जनाको मृत्यु भएको छ । दुर्घटनामा चालक दलका सदस्यसहित ७ सैनिक अधिकारीको मृत्यु भएको नाइजेरियाली सेनाले पुष्टि गरेको छ ।

यसअघि उड्डयनमन्त्री हदी सिरिकाले विमान दुर्घटनामा परेको पुष्टि गरेका थिए । तर उनले पनि विमानमा यात्रारत व्यक्तिको विवरण भने उल्लेख गरेका थिएनन् । ‘सैनिक विमान किङ एयर–३५० अबुजाबाट मिएनाका लागि छुट्दासाथ अबुजा विमानस्थल नजिकै दुर्घटनाग्रस्त भएको हो,’ उनले भनेका छन् ।

सिरिकाले इन्जिनमा समस्या भएका कारण विमान दुर्घटनामा परेको जनाए । दुर्घटनास्थल राजधानी अबुजाबाट १ सय १० किलोमिटर टाढा पर्छ ।

प्रकाशित : फाल्गुन ९, २०७७ २२:०३
प्रतिक्रिया
पठाउनुहोस्

६ वर्षमा साढे १३ लाखको सावाँब्याज झन्डै दुई करोड !

बहिनीको विवाहका लागि पिताले लिएको ऋण चुक्ता गर्न कतारबाट घर आएका समीर मित्रुका दाजुभाइले देखाएको बक्यौताको हिसाब हेरेपछि हैरान छन्
भूषण यादव

वीरगन्ज — पर्साको वीरगन्ज–१२ मुर्लीका एमडी सहाबुद्दीन अन्सारीले ६ वर्षअघि छोरीको बिहेका लागि आदर्शनगरका मदनमोहन मित्रुकासँग १३ लाख ६० हजार रुपैयाँ ऋण लिएका थिए । वैदेशिक रोजगारीबाट घर आएका छोरा मोहमद समीर अन्सारीले बाबुले लिएको ऋण रकम तिर्न खोज्दा मित्रुकाले एक करोड ९० लाख रुपैयाँ हिसाब देखाएपछि अन्सारी परिवार अहिले बिखलबन्दमा परेको छ ।

२०७१ वैशाख २३ मा ऋण लिँदा अन्सारीले मुर्लीको आफ्नो एक कट्ठा १० धुर जग्गा मित्रुकाको नाममा दृष्टिबन्धक गरिदिएका थिए । अन्सारीका अनुसार मित्रुकासँग १३ लाख ६० हजार ऋण लिएकोमा चलनचल्तीमा त्यसको दोब्बर २६ लाख रुपैयाँको दृष्टिबन्धक लिखत पारित गरिएको थियो । ऋण चुक्ताका लागि हरहिसाब माग्दा १३ लाख ६० हजारको ब्याज नजोडी ५१ लाख रुपैयाँको जोडिएको छ । ‘त्यही मितिमा मदनका भाइ मुरलीमनोहर मित्रुकाले झुक्याएर २५ लाख रुपैयाँको छुट्टै कपाली तमसुकसमेत गराएका रहेछन्,’ पूर्वप्रहरी निरीक्षकसमेत रहेका अन्सारीले भने, ‘मुरलीमनोहरसँग त एक रुपैयाँ पनि मैले लिएको थिइनँ । एउटै कर्जाबापतको दुइटा कागज गराएका हुन् ।’

बाध्यताको फाइदा उठाएर घरवारविहीन पार्न खोजेको उनको गुनासो छ । मित्रुका दाजुभाइले ठगेको भन्दै अन्सारीले गत माघ १८ मा जिल्ला प्रशासन कार्यालय पर्सामा लिखित उजुरी दिएका थिए । गत साता प्रमुख जिल्ला अधिकारी अस्मान तामाङले मित्रुका दाजुभाइलाई छलफलका लागि बोलाएका थिए । ‘त्यो बेला दुवैले १३ लाख ६० हजार रुपैयाँ मात्र कर्जा दिएको स्वीकार गरेका थिए,’ अन्सारीले भने, ‘सीडीओ सापको अगाडि १३ लाख ६० हजार कर्जा सकारे पनि बाहिर आएर पुरानै हिसाब माग्दै छन् ।’

मुरलीमनोहर मित्रुकाले कपाली तमसुकका आधारमा एमडी साहबुद्दिन अन्सारीविरुद्ध अदालतमा लेनदेन मुद्दासमेत दर्ता गराएका छन् । २५ लाख रुपैयाँको सावाँब्याज भराइपाउँ भनी २०७६ पुस २० मा पर्सा अदालतमा मुद्दा दर्ता गराएको अन्सारीले बताए । ‘बहिनीको विवाहका लागि बुबाले १३ लाख ६० हजार रुपैयाँ ऋण लिएको हामी सबैलाई थाहा छ,’ साहबुद्दिनका छोरा समीरले भने, ‘ऋणको हिसाब मिलान हुन नसकेपछि कतारबाट जागिर छाडेर घर फर्किनुपरेको छ ।’

उनका अनुसार हिसाब मिलाउन तीन पटक मित्रुका दाजुभाइको घर जाँदा पनि दृष्टिबन्धक कपाली तमसुक र ५१ लाख रुपैयाँको कागज देखाएर एक करोड ९० लाख रुपैयाँ हिसाब निकाल्दै आएका छन् । उनले भने, ‘यति त घरबार बेचेर पनि चुक्ता गर्न सक्दैनौं ।’ मित्रुका दाजुभाइले आफूजस्ता १० जनाभन्दा बढीलाई मिटर ब्याजमा ठगेको आरोप उनले लगाएका छन् ।

मुर्लीका नुरुल हक देवानले २०७१ सालमा मुरलीमनोहर मित्रुकासँग उनले दुई लाख ऋण लिएर ६ लाख रुपैयाँमा ७ धुर जमिन खरिद गरे । तर, दुई लाख रुपैयाँ ऋणको उनले ११ लाखको दृष्टिबन्धक गर्नुपरेको सुनाए । ‘जुन मितिमा लिखत पास गराए त्यही दिन मुरलीमनोहरलाई ११ लाख रुपैयाँको दृष्टिबन्धक गर्नुपर्‍यो,’ उनले भने, ‘आठ दिनपछि दुई लाखको कपाली तमसुक पनि गराए ।’

प्रजिअ तामाङले अन्सारीले उजुरी दिएपछि मित्रुका दाजुभाइलाई छलफलका लागि बोलाएको बताए । ‘एउटै मितिमा २५ लाख रुपैयाँको कपाली तमसुक र २६ लाख रुपैयाँको दृष्टिबन्धक गरिएको पाइएको छ,’ उनले भने, ‘चक्रवर्ती ब्याजका आधारमा करोडभन्दा बढी हिसाब पुर्‍याइएको छ । मित्रुका दाजुभाइलाई १० दिनको तारेख दिएका छौं, पीडितले न्याय पाउँछन् ।’

प्रकाशित : फाल्गुन ९, २०७७ २२:०१
पूरा पढ्नुहोस्
प्रतिक्रिया
पठाउनुहोस्
×