‘चिनियाँ खोप ५० प्रतिशत मात्रै प्रभावकारी’- विश्व - कान्तिपुर समाचार
कान्तिपुर वेबसाईट
AdvertisementAdvertisement

‘चिनियाँ खोप ५० प्रतिशत मात्रै प्रभावकारी’

एजेन्सी

ब्रासिलिया — चीनको सिनोभ्याकले उत्पादन गरेको कोरोना भाइरसविरुद्धको खोप ५० प्रतिशत मात्र प्रभावकारी देखिएको अध्ययनकर्ताहरूले जनाएका छन् । ब्राजिलमा गरिएको परीक्षणमा उक्त खोप ५०.४ प्रतिशत मात्रै प्रभावकारी देखिएको बताइएको हो । 

नयाँ तथ्यांकअनुसार सिनोभ्याकको खोप यसअघि दाबी गरिएको भन्दा एकदमै कम प्रभावकारी रहेको देखिएको हो । खोप स्वीकृत हुनका लागि कम्तीमा ५० प्रतिशत प्रभावकारी हुनुपर्ने प्रावधान छ । ब्राजिल सरकारले कोभिडविरुद्ध देशभर लगाउन तयार राखेका दुइटा खोपमध्ये एउटा सिनोभ्याकले बनाएको कोरोनाभ्याक खोप हो ।

कोरोनाभ्याक खोपले मृतप्रायः कोरोना भाइरसलाई शरीरमा प्रवेश गराएर मानिसमा रोगप्रतिरोधी क्षमतालाई लड्न सिकाउने जनाइएको छ । इन्डोनेसिया, टर्की र सिंगापुरले यो खोप किन्न आफूहरू तयार रहेको बताइसकेका छन् ।

ब्राजिलमा गरिएको परीक्षणमा बुटानटान इन्स्टिच्युटका अध्ययनकर्ताहरूले उक्त खोप कोरोना भाइरसका मध्यमदेखि गम्भीर खालका अवस्थामा ७८ प्रतिशत प्रभावकारी रहेको गतसात बताएका थिए । तर मंगलबार उनीहरूले उक्त तथ्यांकमा उपचार आवश्यक नपर्ने सामान्य मध्यम खालका संक्रमण भएका व्यक्तिहरूको तथ्यांक नसमेटिएको बताएका हुन् । उक्त तथ्यांकबिना यसको प्रभावकारिता ५०.४ प्रतिशतमा झरेको थियो । बुटानटान इन्स्टिच्युटले भने उक्त खोप उपचार आवश्यक पर्ने मध्यम संक्रमणमा ७८ प्रतिशत र गम्भीर संक्रमणमा शतप्रतिशत प्रभावकारी भएको दाबी गरेको बीबीसीले जनाएको छ । सिनोभ्याकको परीक्षणमा फरक देशमा फरक नतिजा देखिएको जनाइएको छ ।

टर्कीका अध्ययनकर्ताहरूले गत महिना यो खोप ९१.२५ प्रतिशत प्रभावकारी रहेको बताएका थिए । त्यस्तै इन्डोनेसियाली अधिकारीले यो खोप कोरोनाविरुद्ध ६५.३ प्रतिशत प्रभावकारी रहेका जनाएका थिए । यी दुवै अन्तिम अवस्थाका परीक्षणका अन्तरिम नतिजा हुन् ।

यसैबीच, विश्व स्वास्थ्य संगठनले चिनियाँ कम्पनीले उत्पादन गरेका दुइटा खोप सिनोफार्म र सिनोभ्याकको आपत्कालीन प्रयोगबारेमा अनुसन्धान भइरहेको जनाएको छ । विश्व स्वास्थ्य संगठनका महानिर्देशक टेड्रोस एड्हानोम गेब्रेयसेसले संगठनका विशेषज्ञहरूले त्यसबारे अध्ययन गरिरहेका जनाएका हुन् । उनले चीनका ती कम्पनीहरूले उत्पादन गरेका खोपहरूको आपत्कालीन प्रयोगका लागि आवश्यक पर्ने प्रक्रिया पूरा गर्ने विषयमा विश्व स्वास्थ्य संगठनका विज्ञहरूले काम गरिरहेका समेत बताए ।

महानिर्देशक गेब्रेयसेसले भने, ‘मलाई यस कारणले खुसी लागेको छ कि चीनका यी दुई खोपको प्रयोग र तिनको अन्तर्राष्ट्रिय प्रयोगका लागि आवश्यक गुणस्तरका विषयमा पनि विश्व स्वास्थ्य संगठनको विज्ञ समूहले काम गरिरहेको छ ।’

विश्व स्वास्थ्य संगठनले विश्वका खोप उत्पादक कम्पनीहरूलाई छिटो छिटो खोपहरू उत्पादन गर्न र यससम्बन्धी तथ्यांकहरू संगठनलाई उपलब्ध गराउन पनि विश्व समुदायलाई आग्रह गरिरहेको छ ।

प्रकाशित : माघ १, २०७७ १०:०३
प्रतिक्रिया
पठाउनुहोस्

हिंसा भड्काएको आरोपसहित ट्रम्पविरुद्ध महाभियोग

दुई पटक महाभियोग लाग्ने ट्रम्प पहिलो अमेरिकी राष्ट्रपति
महाभियोगको पक्षमा सत्तारुढ रिपब्लिकनकै १० जना सांसद
एजेन्सी

वासिङ्टन — अमेरिकी राष्ट्रपति डोनाल्ड ट्रम्पविरुद्ध महाभियोग प्रस्ताव पारित भएको छ । अमेरिकी संसद्को तल्लो सदन हाउस अफ रिप्रेजेन्टेटिभ्सले उनीविरुद्ध महाभियोग प्रस्ताव पारित गरेको हो ।

गत साता संसद् भवनमा भएको हिंसालाई ट्रम्पले प्रोत्साहित गरेको आरोपसहित लगाइएको महाभियोग प्रस्ताव २३२ भोटसहित पारित भएको हो । महाभियोग प्रस्तावको विपक्षमा १९७ जना सांसद मात्र देखिए । रिपब्लिकन पार्टीकै दस जना सांसदले महाभियोग प्रस्तावको समर्थन गरेका छन् । योसँगै ट्रम्प दुई पटक महाभियोग लाग्ने पहिलो अमेरिकी राष्ट्रपति बनेका छन् ।

यसअघि सन् २०१९ मा पनि हाउस अफ रिप्रेजेन्टेटिभ्सले ट्रम्पविरुद्ध महाभियोग प्रस्ताव पारित गरेको थियो । त्यतिबेला भने ट्रम्पलाई महाभियोग लगाउनुपर्छ भन्ने पक्षमा रिपब्लिकन पार्टीका एक जना सांसद पनि देखिएका थिएनन् । तर त्यसबेला ट्रम्पलाई माथिल्लो सदन सिनेटले सफाइ दिएको थियो । आफ्नो कार्यकाल सकिन केही दिन मात्रै बाँकी रहँदा अमेरिकी राष्ट्रपति ट्रम्पले महाभियोगको सामना गर्नुपर्ने भएको छ । तल्लो सदनबाट पारित भएको प्रस्ताव अब सिनेटले पारित गर्नुपर्नेछ । त्यसका लागि सिनेटको दुई तिहाइ बहुमत आवश्यक हुन्छ । दुई तिहाइ बहुमतका लागि रिपब्लिकनका सांसदहरूले पनि मत दिनुपर्ने हुन्छ ।

१०० सिट रहेको माथिल्लो सदनमा ट्रम्पविरुद्धको महाभियोग प्रस्ताव पारित हुन रिपब्लिकन पार्टीका कम्तीमा १७ जना सिनेटरको साथ चाहिन्छ । मंगलबार प्रकाशित न्युयोर्क टाइम्सको एउटा रिपोर्टका अनुसार रिपब्लिकनका कम्तीमा २० जना सांसद ट्रम्पलाई गत साता भड्किएको हिंसामा दोषी ठहर्‍याउँदै महाभियोगमा पक्षमा उभिने देखिएका छन् ।

ट्रम्पविरुद्ध तल्लो सदनले पारित गरेको महाभियोग प्रस्ताव देखाउँदै नान्सी पेलोसी तस्बिर : रोयटर्स

डेमोक्र्याटहरूले संसद्‍मा पेस गरेको प्रस्तावमा ट्रम्पबाट राष्ट्रपतीय शक्ति खोस्न उपराष्ट्रपति माइक पेन्स तथा मन्त्रिमण्डललाई आग्रह गरिएको थियो । तर उपराष्ट्रपति पेन्सले अमेरिकी संविधानको २५औं संशोधनमार्फत ट्रम्पलाई हटाउने कुरा अस्वीकार गरेपछि संसद्‍मा महाभियोग प्रस्तावमाथि मतदान भएको हो ।

हाउस अफ रेप्रिजेन्टेटिभ्सकी सभामुख नान्सी पेलोसीले ट्रम्पका कारण अमेरिकी लोकतन्त र संविधानमाथि नै खतरा रहेको भन्दै उनलाई तत्काल पदबाट हटाउनुपर्ने बताएकी छन् । राष्ट्रपति ट्रम्पको आगामी जनवरी २० मा पदावधि सकिँदै छ । तर त्यसअघि नै उनलाई

ह्वाइटहाउसबाट निकाल्न डेमोक्र्याटिक दलले प्रयास गरिरहेको हो । त्यसका लागि उक्त दलले अमेरिकी संविधानमा रहेको व्यवस्थालाई टेक्दै उपराष्ट्रपति पेन्सले ट्रम्पलाई पदमुक्त गर्नुपर्ने बताएको हो ।

संविधानको २५ औं संशोधनअनुसार पेन्सले ट्रम्प अयोग्य रहेको घोषित गर्दै कार्यवाहक राष्ट्रपतिको जिम्मेवारी आफूमा ल्याउन सक्ने व्यवस्था छ । तर पेन्सले उक्त आग्रह अस्वीकार गरेपछि डेमोक्र्याटले आफ्नो बहुमत रहेको तल्लो सदनबाट ट्रम्पमाथि लगाइएको महाअभियोग प्रस्ताव पारित गरेको हो ।

प्रकाशित : माघ १, २०७७ ०८:०७
पूरा पढ्नुहोस्
प्रतिक्रिया
पठाउनुहोस्
×